བེ་རི་རིག་པའི་རྡོ་རྗེ།
དེ་རིང་ངས་ཉེ་ཆར་རྡོར་གདན་དུ་འཚོགས་པའི་རྒྱལ་བ་ཇོ་ནང་བའི་དམིགས་བསལ་ཚོགས་ཆེན་ཐེངས་བརྒྱད་པ་དང་འབྲེལ་བའི་སྐོར་ནས་ཅུང་ཟད་ཅིག་གླེང་དགོས་བྱུང་སོང་།
ཕྱི་ལོ་ ༢༠༡༧ ཟླ་ ༡ ཚེས་ ༢ ཉིན། རྒྱ་གར་རྡོ་རྗེ་གདན་དུ་འཚོགས་པའི་རྒྱལ་བ་ཇོ་ནང་པའི་དམིགས་བསལ་ཚོགས་ཆེན་ཐེངས་བརྒྱད་པའི་མཇུག་བསྡོམས་ཐོག བོད་གཞུང་ཆོས་དོན་བཀའ་བློན་ཀརྨ་དགེ་ལེགས་མཆོག་ཆེད་ཕེབས་ཀྱིས། གསུང་བཤད་གནང་སྐབས། “ཇོ་ནང་པར་ཐོབ་ཐང་གཅིག་ཀྱང་མ་སྤྲད་པ་དང་། ཕྱིར་ཕུད་བཏང་བ་ཞིག་མིན་པས་གོ་ལོག་ཐེབས་རྒྱུ་མེད་”ཅེས་གསུངས། འོ་ན། ཆོས་དོན་ལྷན་ཚོགས་ཀྱི་ཁྲིམས་ཡིག་གི་ཐོག་མཐའ་བར་གསུམ་དུ། བོད་ཀྱི་ཆོས་བརྒྱུད་ཆེན་པོ་བཞི་དང་གཡུང་དྲུང་བོན་ཞེས་པ་ལས་རྒྱལ་བ་ཇོ་ནང་བའི་མཚན་ཟུར་ཙམ་ཡང་མེད་པ་དེ་ཐོབ་ཐང་སྤྲད་པ་ཡིན་ཟེར་རྒྱུ་ཡིན་ནམ།
དེ་བཞིན་དུ་ཁྲིམས་ཡིག་དེའི་དོན་ཚན་གསུམ་པ། ཁྲིམས་ཡིག་གི་ཁྱབ་ཚད་ཅེས་པར། “བོད་མིའི་སྒྲིག་འཛུགས་ཀྱི་ཆོས་རིག་ལས་ཁུངས་ཀྱི་ཁྱབ་ཁོངས་སུ་ཡོད་པའི་བོད་ཀྱི་ཆོས་བརྒྱུད་ཆེན་པོ་བཞི་དང་གཡུང་དྲུང་བོན་བཅས་ལ་ཁྱབ་པ་ཡིན།” ཞེས་ཁྱབ་བྱེད་ཆོས་དོན་ལྷན་ཚོགས་ཀྱི་ཁྲིམས་ཡིག་གིས་ཁྱབ་བྱ་བོད་ཀྱི་ཆོས་བརྒྱུད་ཆེན་པོ་བཞི་དང་གཡུང་དྲུང་བོན་བཅས་མ་གཏོགས་ཇོ་ནང་ལ་མ་ཁྱབ་ཅེས་ཚིག་ཐག་བཅད་དེ་བཤད་ཡོད་པ་འདི་ཇོ་ནང་བོད་ཀྱི་ཆོས་གྲལ་ནས་ཕུད་པ་རེད་དམ་བཞག་པ་རེད།
ཡང་། ཁོང་གིས། “དེ་བཞིན་སྤྱི་འཐུས་ལྷན་ཚོགས་ཀྱི་གྲུབ་ཆ་དང་ཆོས་བརྒྱུད་ལ་ངོས་འཛིན་ཡོད་མེད་དང་ཆོས་བརྒྱུད་ཀྱི་ཐོབ་ཐང་ཡོད་མེད་བསྲེ་བསྲེ་གཏོང་རྒྱུ་མི་འདུག རྐུབ་བཀྱག་ཁོ་རང་ཐོབ་ཐང་གི་ངོ་བོ་གཅིག་བྱས་ནས་དེ་ཐོབ་ཡོད་པ་རེད་དམ་ཟེར་ན་དེ་ཐོབ་ཡོད་པ་མ་རེད། ཡིན་ན་ཡང་དེ་གཉིས་བསྲེ་བསྲེ་གཏོང་རྒྱུ་མི་འདུག་”ཅེས་གསུངས། དེས་ན་ཆོས་དོན་ལྷན་ཚོགས་ཀྱི་དབང་ཚད་ཀྱི་ཐོག་ནས་དེ་གཉིས་ཁ་ཁར་ཕྱེས་ཏེ། དེ་གའི་ལྷན་ཁང་དང་འབྲེལ་ཡོད་ཡིག་ཆ་ཡོངས་རྫོགས་ཀྱི་ནང་དུ་བོད་ཀྱི་ཆོས་བརྒྱུད་ཆེན་པོ་ལྔ་གཡུང་དྲུང་བོན་ཞེས་འབྲི་ཐུབ་བམ། གལ་ཏེ་དེ་ལྟར་ཐུབ་ན། ང་ཚོས་ངོས་ནས་སྤྱི་འཐུས་ཀྱི་གྲུབ་ཆར་རེ་ཞིག་རྩོད་གླེང་མི་བྱེད་ཐག་ཆོད་ཡིན་ལ། ང་ཚོས་ནམ་ཡང་ཆོས་བརྒྱུད་ཀྱི་སྤྱི་འཐུས་དམིགས་སུ་བཀར་ནས་བརྩད་ཀྱང་མྱོང་མེད། ང་ཚོའི་རྩ་དོན་གཙོ་བོ་དེ་ཆོས་བརྒྱུད་སྤྱི་མཚུངས་ཀྱི་ཐོབ་ཐང་ཟེར་བ་འདི་ཡིན་པ་གཞུང་དམངས་གཉིས་ཀྱིས་མཁྱེན་རྒྱུ་གལ་ཆེ།
ཡང་ཁོང་གིས། “ཆོས་བརྒྱུད་ཆུང་ཁག་ཇོ་ནང་སོགས་” གསུངས་པ་ནི། ང་ཚོས་རྩ་བ་ནས་ངོས་ལེན་མེད། རྒྱུ་མཚན་རྒྱལ་བ་ཇོ་ནང་པ་ནི། ནང་བསྟན་མདོ་རྒྱུད་བསྟན་བཅོས་ཐམས་ཅད་ཀྱི་དགོངས་དོན། རྒྱུད་ཐམས་ཅད་ཀྱི་རྒྱལ་པོ། ཐེག་པ་ཐམས་ཅད་ཀྱི་མཐར་ཐུག གཉིས་མེད་རྒྱུད་ཀྱི་ཡང་རྩེ། དཔལ་མཆོག་དུས་ཀྱི་འཁོར་ལོའི་བསྟན་པའི་བཀའ་བབ་ཡིན་པས་ཆོས་བརྒྱུད་ཆེན་པོའི་ནང་གི་ཆེན་པོ་ཡིན་ཏེ། ༧རྒྱལ་དབང་ཐམས་ཅད་མཁྱེན་པས། མདོ་རྒྱུད་གཞན་དང་བཤད་སྲོལ་མི་མཚུངས་པའི།། ཤིང་རྟའི་སྲོལ་ཆེན་དུས་ཀྱི་འཁོར་ལོའི་རྒྱུད།། མི་ཉམས་འཛིན་ཅིང་སྤེལ་བའི་བཀའ་བབ་པ།། ཇོ་ནང་པ་ཡི་བསྟན་པ་ཞེས་གསུངས་པ་ལྟར་དང་། ད་དུང་༧གོང་ས་ཐམས་ཅད་མཁྱེན་པའི་ཞལ་སྔ་ནས་དམིགས་སུ་བཀར་ཏེ་ཆོས་བརྒྱུད་ཆེན་པོ་ཞེས་པའི་ཐ་སྙད་ཀྱང་སྦྱར་ཡོད་དེ། ཕྱི་ལོ་ ༢༠༡༥ ཟླ་ ༩ ཚེས་ ༣ ཉིན། ཇོ་ནང་དམིགས་བསལ་ཚོགས་ཆེན་ཐེངས་བདུན་པར་བསྩལ་བའི་བཀའ་ཤོག་ཏུ། “བོད་ཀྱི་བསྟན་སྲིད་གོད་ཆགས་ཀྱིས་རྐྱེན་པས་རྒྱལ་བསྟན་སྤྱི་ཡོངས་ལ་སྔར་བྱུང་མྱོང་མེད་པའི་ཉམས་ཆག་བྱུང་བའི་ཁྲོད་རྒྱལ་བ་ཇོ་ནང་པའི་བསྟན་པ་ཡང་ཉག་ཕྲར་གྱུར་པ་ཀུན་ཤེས་ཡིན། རྒྱུད་རྒྱལ་དུས་ཀྱི་འཁོར་ལོའི་ཉམས་བཞེས་སྤྱི་དང་། ལྷག་པར་སྦྱོར་དྲུག་རྩལ་དུ་བཏོན་པའི་ཉམས་བཞེས་ཀྱི་བསྟན་རྒྱུན་བཟང་པོ་མི་ཉམས་རྒྱུན་འཛིན་ཡོང་ཐབས་སུ་ཆོས་བརྒྱུད་གང་གི་དབུ་ཁྲིད་ཁལ་ཁ་རྗེ་བཙུན་དམ་པ་རིན་པོ་ཆེའི་མཚན་གནས་བསྐྱར་གསོ་དང་། འཕགས་ཡུལ་དུ་ཇོ་ནང་མ་དགོན་གྱི་གནས་གཞི་མཐུན་རྐྱེན་བཅས་ཆེད་དུ་སྦྱར་བས་མཚོན་ཆོས་བརྒྱུད་ཆེན་པོ་འདིའི་ལུང་རྟོགས་ཀྱི་བསྟན་པ་ཡུན་གནས་ཆེད་མཐུན་རྐྱེན་གང་ཐུབ་སྒྲུབ་པ་ཚང་མའི་ཐུགས་ངེས་ཡིན་ལ།” ཞེས་“ཆོས་བརྒྱུད་ཆེན་པོ་འདིའི་ལུང་རྟོགས་ཀྱི་བསྟན་པ་”ཞེས་ཆོས་བརྒྱུད་ཆེན་པོའི་ཐ་སྙད་དངོས་སུ་སྦྱར་དེ་ནན་ཏན་དུ་གསུངས་ཡོད།
འོན་ཀྱང་སྐུ་དྲག་ཚོས་ད་དུང་མིག་དང་རྣ་བ་བཀག་ནས་རྒྱལ་བ་ཇོ་ནང་པ་ཆོས་བརྒྱུད་ཆེན་པོ་མིན་ཚུལ་གསུངས་པ་ནི། ༧རྒྱལ་བའི་བཀའ་ལ་ལོག་འགྲེལ་དང་། འཛམ་གླིང་ཐོག་ཡོངས་སུ་གྲགས་པའི་དཔལ་མཆོག་དུས་ཀྱི་འཁོར་ལོའི་ཆོས་ཚུལ་ཆེན་པོ་འདི་ལ་མཐོང་ཆུང་བྱས་པར་ཟད་དོ།།
ཁོང་གིས། “གལ་སྲིད་ཇོ་ནང་ལ་སྤྱི་འཐུས་ཀྱི་རྐུབ་བཀྱག་དེ་ཚོ་བྱུང་ན་རྗེས་ནས་ང་ཚོ་ལ་དགོས་ཀྱི་ཡོད་ཅེས་ཁག་ཅིག་ཡོང་ཆོག་ཆོག་འདྲ་བྱས་ནས་བསྡད་ཡོད་པ་རེད་”ཅེས་དང་། “སྒྲུབ་བརྒྱུད་ཤིང་རྟ་བརྒྱད་བརྩི་སྟངས་མ་འདྲ་བ་ཁ་ཤས་ཡོད་རེད་ལ། ད་ལྟ་སྤྱི་འཐུས་ཀྱི་ཐོབ་ཐང་མ་རག་མཁན་ཇོ་ནང་བརྩིས་པའི་བཞི་ཞིག་ཡོང་གི་འདུག ཞི་བྱེད་དང་། ཞ་ལུ། བོ་དུང་བཅས་རེད། ད་དུང་བོད་པ་ཁ་ཆེའི་གཞིས་ཆགས་ནས་ཁོང་ཚོར་སྤྱི་འཐུས་དགོས་ཀྱི་འདུག་ལབ་ཀྱི་ཡོད། དེར་བརྟེན་དེ་སྤྱི་འཐུས་ལྷན་ཚོགས་སུ་ཅུང་ཁག་པོ་ཡོད་རེད།”ཅེས་གསུངས།
ང་ཚོས་ངོས་ནས་དམིགས་བསལ་ཆོས་བརྒྱུད་སྤྱི་འཐུས་ཀྱི་རྐུབ་བཀྱག་རྩོད་ཀྱིན་མེད་མོད། འོན་ཀྱང་ཆོས་བརྒྱུད་སྤྱི་མཚུངས་ཀྱི་ཐོབ་ཐང་ཡོངས་རྫོགས་ཐོབ་པ་ཡིན་ན། དེ་ཡང་རང་བཞིན་གྱིས་ཐོབ་ཀྱིན་ཡོད་སྟབས། དེ་དུས་ཞི་བྱེད་དང་ཞ་ལུ་སོགས་མ་ཟད། བོད་པ་ཁ་ཆེ་དང་། ད་དུང་བོད་པ་ཡི་ཤི་ཆོས་ལུགས་པ་དེ་དག་གིས་ཀྱང་སྤྱི་མཚུངས་ཀྱི་ཐོབ་ཐང་དགོས་ཞེས་གསུང་ན་ངེས་པར་སྤྲོད་རྐྱང་བྱེད་དགོས་རེད། འདི་གཞུང་གི་ལས་འགན་རེད། གལ་ཏེ་མ་སྤྲད་ན་ཆོས་བརྒྱུད་དབྱེ་འབྱེད་བྱས་པ་རེད། མུ་མཐུད་དུ་ཆོས་བརྒྱུད་དབྱེ་འབྱེད་བྱེད་རྒྱུ་ཡིན་ནམ།
སྒྲུབ་བརྒྱུད་ཤིང་རྟ་བརྒྱད་བརྩི་ཚུལ་མི་འདྲ་བ་ཞིག་གང་དུ་ཡོད་དམ། ཡོད་ན་གསལ་བོར་བཤད་རོགས། གལ་ཏེ་བརྩི་སྟངས་མི་འདྲ་བ་ཞིག་ཡོད་ན། དེས་ཆོས་དོན་ལྷན་ཚོགས་ཀྱི་ཁྲིམས་ཡིག་དང་། ཆོས་དོན་ལྷན་ཁང་གི་བྱེད་ཕྱོགས་ལ་ཕན་ཐོགས་ཅི་ཞིག་ཡོད་དམ། སྒྲུབ་བརྒྱུད་ཤིང་རྟ་བརྒྱད་ཀྱི་ནང་དུ་མེད་པའི་ཆོས་བརྒྱུད་དེ་བོད་ཀྱི་ཆོས་གྲལ་ནས་ཕུད་རྒྱུ་ལས་སླ་བོ་རེད་དགོས་ཀྱིན་ཡོད་དམ།
ཡང་གཅིག་བཤད་ན། སྤྱི་འཐུས་ལྷན་འཚོགས་ཀྱིས་དཀའ་མོ་རྩ་མོ་དང་། རྩོད་ཉོག་འདི་ཞི་འཇམ་གྱི་སྒོ་ནས་ཐག་གཅོད་བྱེད་འདོད་ཡོད་ན། འདི་ཧ་ཅང་གི་དཀའ་མོ་ཞིག་མ་རེད། གང་ཡིན་ཟེར་ན། འདི་ལ་འདེམས་ཀ་གསུམ་ཡོད། གཅིག ད་ཡོད་ཆོས་བརྒྱུད་ཀྱི་སྤྱི་འཐུས་ཟེར་བའི་ཞབས་འདྲེན་དེ་ཚོ་མེད་པ་བྱས་ཤིང་། བཙན་བྱོལ་བོད་མིའི་བཅའ་ཁྲིམས་དང་། ལྷན་ཁང་རྣམས་ཀྱི་སྒྲིག་གཞི་ཁག་ཏུ་བོད་ཀྱི་ཆོས་བརྒྱུད་ཆེན་པོ་ལྔ་གཡུང་དྲུང་བོན་ཞེས་ཐ་སྙད་དེ་གཏན་འབེབ་བྱེད་རྒྱུ་དེ་རེད།
གཉིས། ཆོས་བརྒྱུད་ཁག་གི་ཐོབ་ཐང་ཡོད་ན་ཡོད་མཉམ་དང་མེད་ན་མེད་ཉམས་བཟོ་རྒྱུ་དེ་རེད།
གསུམ། བཅའ་ཁྲིམས་ནང་གི་ “རྙིང་མ་དང༌། བཀའ་བརྒྱུད། ས་སྐྱ། དགེ་ལུགས། གཡུང་དྲུང་བོན་བཅས་ལྔ་པོ་རེ་རེ་ནས་འོས་བསྡུ་བྱས་པའི་སྤྱི་འཐུས་གཉིས་རེ།” ཞེས་པའི་ཐ་སྙད་གཅིག་པོ་བསྒྱུར་བཅོས་བྱས་ཏེ། “རྙིང་མ་དང༌། བཀའ་བརྒྱུད། ས་སྐྱ། ཇོ་ནང་། དགེ་ལུགས། གཡུང་དྲུང་བོན་བཅས” ཞེས་བཀོད་དགོས།
དེ་གསུམ་ལས་གང་རུང་ཞིག་ཐག་གཅོད་གནང་ཐུབ་ན། རྩོད་ཉོག་འདི་ནམ་མཁའི་སྤྲིན་དང་སའི་རྡུལ་བཞིན་དངས་ཚར་བ་རེད། དེ་མིན་ཆོས་བརྒྱུད་དབྱེ་འབྱེད་ཇི་སྲིད་བྱས་པ་དེ་སྲིད་དུ་རྩོད་ཉོག་འདི་རྒྱུན་མི་ཆད་པར་ཡོང་རྒྱུ་ཡིན་པ་རྒྱུ་འབྲས་ཀྱི་འབྲེལ་བ་ཡིན་ལ། ང་ཚོས་ཀྱང་བཙན་བྱོལ་བོད་མིའི་བཅའ་ཁྲིམས་ཀྱི་ཚིག་ཟིན་དང་། ལྷག་པར་དུ་༧གོང་ས་ཐམས་ཅད་མཁྱེན་པས། “ཡག་པོ་རེད། ཁྱེད་རང་ཚོར་ཐོབ་ཐང་ནི་ཡོད་རེད། བདེན་པ་ཡང་ཡོད་རེད་པ། རྩོད་དགོས་རེད། སྔོན་མ་ནས་བཤད་ཡིན་པ།” ཞེས་ཚིག་གི་བདག་པོས་ཚིག་ཐག་བཅད་དེ་བཀའ་བསྩལ་བ་གཞིར་བཟུང་བྱས་ནས་འདྲ་མཉམ་གྱི་ཐོབ་ཐང་མ་རག་བར་དུ་འཐབ་རྩོད་བྱེད་ངེས་ཡིན།
མཐའ་དོན་མཇུག་མ་བསྡུས་པའི་གོང་དུ་སླར་ཡང་གསལ་བཤད་ཅིག་འདོད་པ་ནི། ང་ཚོས་ཕྱི་ལོ་ ༡༩༩༧ ལོ་ནས་བཟུང་དེ་རིང་གི་བར་དུ། ཇོ་ནང་པར་ཆོས་བརྒྱུད་སྤྱི་མཚུངས་ཀྱི་ཐོབ་ཐང་ཆ་ཚང་གནང་རོགས་ཞེས་འབོད་བསྐུལ་དང་ཞི་འབོད་བྱེད་བཞིན་ཡོད་པ་ལས། དམིགས་སུ་བཀར་ཏེ་ཇོ་ནང་པར་ཆོས་བརྒྱུད་སྤྱི་འཐུས་ཀྱི་རྐུབ་བཀྱག་དགོས་ཞེས་ནམ་ཡང་ཞུ་མྱོང་མེད་ལ། མ་འོངས་པར་ཡང་མི་ཞུ་ཐག་ཆོད་ཡིན། འོ་ན་ཅི་ཞིག་དགོས་སྙམ་ན། གོང་དུ་ཞུས་པ་ལྟར། བཙན་བྱོལ་བོད་མིའི་བཅའ་ཁྲིམས་དང་། ལྷན་ཁང་ཁག་གི་སྒྲིག་གཞི། ད་དུང་གཞུང་འབྲེལ་ཡིག་ཆ་ཡོངས་སུ་རྫོགས་པར་བོད་ཀྱི་ཆོས་བརྒྱུད་ཆེན་པོ་ལྔ་གཡུང་དྲུང་བོན་ཞེས་འཁོད་དགོས་པ་དེ་ཡིན། དེས་ན་བྱ་མ་དཀྲོག་པར་སྒོ་ང་ལེན་ཚུལ་ཞིག་ཡོད་ན། ང་ཚོས་གཞུང་གིས་གང་གསུང་དངས་ལེན་དང་། མཛུབ་མོས་གར་བསྟན་ཤར་ལ་ངོས་འཛིན་བྱས་ནས་ཁུ་སིམ་མེར་སྡོད་ངེས་ཡིན་ཞེས་ཞུ་བ་ཡིན།
ཕྱི་ལོ་ ༢༠༡༧ ཟླ་ ༡ ཚེས་ ༤ ཉིན།
དཔལ་རྒྱལ་བ་ཇོ་ནང་པ་ལ་ཆོས་རྒྱུད་སྤྱི་མཚུངས་ལྟར་ཐོབ་ཐང་སྤྲད་མ་ཐུབ་པ་དེ་བོད་མིའི་སྒྲིག་འཛུགས་ཀྱི་འཐུས་ཤོར་དང་ངོ་ཚ་ཞིག་ཀྱང་རེད། ཁ་གཡར་ས་མང་པོ་ཡོད་རེད་དེ་དོན་དངོས་ལག་ལེན་གྱིས་བསྟན་པ་རེད། གཡུང་དྲུང་བོན་ལའང་བདུན་ཅུ་དོན་གྲངས་ལ་དཀའ་ངལ་འདི་བྱུང་ཡོད་པ་རེད། གང་ཟག་རེ་གཉིས་ཀྱི་བྱ་སྤྱོད་ལས་སྤྱི་པར་ནག་ཉེས་ཐེབས་འདིའི་རིགས་ལོ་རྒྱུས་ཀྱི་ཕམ་ཁ་རེད། ད་མང་པོ་བཤད་དགོས་པ་མི་འདུག མ་ཤེས་པ་མིན་པར་ཤེས་བཞིན་ལམ་ལོག་ལ་འགྲོ་ན་བྱེད་ཐབས་ཡོད་པ་མ་མཆིས་སོ།
ངས་འདིར་ཇོ་ནང་དང་འབྲེལ་ནས་ཅུང་སྤྲོས་འདོད་པ་ནི། གལ་ཏེ་ཇོ་ནང་ལྟར་ཆོས་རྒྱུད་མང་མང་ཞིག་ཡར་ཐོབ་ཐང་རྩོད་ནས་ཡར་དོན་ཡོང་ན། མ་འོངས་པ་ན་ཁ་ཆེའི་བོད་པ་དང་ཡི་ཤུའི་བོད་པ་སོགས་མི་ཚོགས་ཁ་ཤས་ཀྱིས་སྤྱི་འཐུས་འདུག་སྟེགས་དགོས་པའི་རེ་བ་སྟོན་ཡོང་ན་བོད་གཞུང་ཆོས་རིག་ལས་ཁུངས་ཀྱིས་ཁྲིམས་སྒྲིག་གཞི་ལྟར་བརྡ་ལན་ཅི་ཞིག་སྤྲད་རྒྱུ་ཡིན་ནམ།
ངས་ལྟས་ན་ཆོས་བརྒྱུད་ཁག་གི་སྤྱི་འཐུས་ཞེས་པ་ཞིག་ཡེར་ནད་མེད་ན་ལེགས། ཆོས་པ་སྲིད་ལས་བྱེད་པ་ནི་དགོས་པ་ཆེར་མ་མཐོང། མེ་ཆུང་ཚེ་ལ་ཆུ་བླུགས་ན་ཡག་པ་ཡོད་རེད། གཞན་མ་འོངས་པ་ན་རྙོག་དྲ་ཆེན་པོ་ཞིག་ཆགས་མ་སྲིད་པ་མ་རེད།
གོང་གི་རྩོམ་ཡིག་འདི་གནད་འཁེལ་ལེགས་པོ་ཞིག་བྲིས་འདུག་པས་ཆ་ཚང་བཀླགས་པ་ཡིན།
ཆོས་རྒྱུད་སྤྱི་འཐུས་ཀྱི་རྐུབ་བཀྱག་མི་རྩོད་པར་བཅའ་ཁྲིམས་སུ་ཆོས་རྒྱུད་ཆེན་པོ་ལྔ་དང་བོན་ཞེས་དགོས་ཟེར་བ་ནི་ནང་འགལ་འདྲ་ཞིག་རེད། བཅའ་ཁྲིམས་སུ་འདི་ལྟར་འཁོད་དགོས་ན་དོན་དུ་ཆབ་སྲིད་ཀྱི་རྐུབ་བཀྱག་ལ་རྩོད་ཀྱི་ཡོད་པ་ཞིག་རེད། གཞུང་འབྲེལ་ཡིག་ཆ་ཡང་སྤྱི་འཐུས་ལྷན་ཚོགས་ཀྱི་གཏན་ལ་ཕབ་པའི་ཁྲིམས་ཡིག་དང་བསྟུན་དགོས་སྟབས་དེ་ཡང་དབྱེ་མཚམས་ཤིག་མེད་ན་དཀའ་མོ་རེད།
ཆོལ་གསུམ་ཆིག་བསྒྲིལ་གྱི་མཐུན་རྐྱེན་ཆོས་རྒྱུད་ཡིན་གསུངས་པ་དང་། ཡང་འདུལ་བ་འཛིན་པའི་སྡེ་ཞིག་ལ་ཆབ་སྲིད་ཀྱི་ཞབས་བཀྱག་རྩོད་དང་མི་རྩོད་དེ་ཁོངས་ནས་བལྟ་དགོས་རེད་་་་ གསུངས་པ་དེ་ཚོའི་དགོངས་དོན་ལ་དཔྱད་དགོས་པ་ཞིག་རེད་བསམས།
༅༅། ཇོ་ནང་ཆོས་རྒྱུད་མ་རྩོད་བསྟན་པའི་གཞུང་ལ་སྦྱང་རྩོད་གནང་དགོས་པ་སྙམ་།
གལ་ཏེ་ང་ཚོས་ནང་ཁུལ་ལ་ཐོབ་ཐང་རྩོད་བྱེད་ན། བོད་གངས་ཅན་གྱི་ཐོབ་ཐང་སུ་ཡིས་རྩོད། གལ་ཏེ་ང་ཚོས་རྒྱལ་སྤྱིའི་ངོས་འཛིན་མེད་པའི་རང་རེའི་བཙན་བྱོལ་གཞུང་ལ་གཏུག་བཤེར་བྱེད་སྡོད་ན། འུ་ཚོའི་འཐབ་རྩོད་ཀྱི་སྲོག་ཤིང་དུ་གྱུར་པའི་བཙན་བྱོལ་གཞུང་ལ་དབུ་འོག་དཔུང་འདེགས་སུ་ཡིས་བྱེད།
ངེས་པར་གོང་དུ་འདེམས་ཀ་གསུམ་གྱི་དང་པོ་ད་ཡོད་ཆོས་བརྒྱུད་ཀྱི་སྤྱི་འཐུས་ཀྱི་ཞབས་བཏེགས་དེ་བཞིན་ཕྱིར་བསྡུ་གནང་དགོས་ཀྱི་འདུག ཆོས་བརྒྱུད་སྤྱི་འཐུས་ཟེར་བ་ཁག་ཅིག་གིས་གསུང་འགྲོས་ལ་བལྟས་ན་མ་འོངས་པར་ཆོས་བརྒྱུད་ནང་ཁུལ་དང་ཡང་སྒོས་བོད་མི་སྤྱིའི་དད་པ་དམ་ཚིག་ལ་ཆེས་གནོད་སྐྱོན་ཡོང་ཉེན་འདུག ད་ལྟའི་ཆོས་བརྒྱུད་ཆེན་པོ་བཞི་དང་གཡུང་དྲུང་བོན་ཐེ་བའི་ཆོས་ལུགས་གཞན་དང་གཞན་ལ་དད་པ་ཡོད་པའི་བོད་རིགས་ཤིག་ཡིན་ཕྱིན། བོད་ཆོལ་ཁ་གསུམ་གྱི་ནང་དུ་མ་འདུས་པ་མེད་སྙམ། དེས་ན་གོང་གསལ་བསམ་ཚུལ་དེ་བདག་འདྲ་བའི་རྨོངས་པ་ཞིག་གིས་བསམ་བློ་བཏང་ཚེ་ཆོས་བརྒྱུད་སྤྱི་འཐུས་དེ་ངེས་པར་དུ་ཕྱིར་བསྡུ་གནང་དགོས་ཀྱི་འདུག བོད་ཆོལ་ཁ་གསུམ་ཆིག་སྒྲིལ་དང་འཆམ་མཐུན་ཡོང་རྒྱུ་ནི་བོད་རིགས་རྩམ་གཟན་ཡོངས་ཀྱི་འགན་ཁུར་ཡིན་ལ། འཆམ་མཐུན་བྱུང་ན་ཆོས་ལུགས་དང་ཆོལ་ཁའི་དབྱེ་བ་མེད་པར་བོད་རིགས་ཡིན་ནོ་ཅོག་ལ་དགེ་མཚན་ཡོད་པ་ཞིག་ཡིན། དེས་ན་ངེས་པར་དུ་དགོངས་བཞེས་གནང་དགོས་སྙམ།