རྒྱ་གར་གྱི་གློག་བརྙན་འཁྲབ་སྟོན་པ་ཨཱ་མིར་ཁཱང་གིས་འཁྲབ་སྟོན་བྱས་པའི་དྷེན་གྷལ་ཞེས་པའི་གློག་བརྙན་དེ་རྒྱ་གར་གྱི་གློག་བརྙན་ཁྲོམ་རའི་ནང་ནས་ཡང་རྩེར་སོན།
ཉིན་འདི་གར་རྒྱ་གར་ནང་སྐད་གྲགས་འགྲོ་བཞིན་པའི་གློག་བརྙན་ (DANGAL)ཞེས་པ་ ༢༠༡༦ ཟླ་ ༡༢ ཚེས་ ༢༡ ཉིན་དབུ་འབྱེད་བྱས་ཏེ། ཉིན་གྲངས་ ༢༤ ནང་ཧིན་སྒོར་ཐེར་འབུམ་ ༣ དང་ཕྱེད་ལྷག་(ཀ་རོར་ Rs 375 crore)བསགས་ཏེ། རྒྱ་གར་གྱི་གློག་བརྙན་ལོ་རྒྱུས་ནང་གི་ཚད་མཐོ་ཤོས་ཀྱི་ཟིན་ཐོ་སྐྲུན་ཡོད་འདུག
གོང་གི་དངུལ་འབོར་དེ་ཨ་སྒོར་ས་ཡ་ ༥༥ དང་། ཡུ་སྒོར་ས་ཡ་ ༥༡ ལྷག་ཆགས་ཀྱི་ཡོད་འདུག གློག་བརྙན་འགྲེམ་སྤེལ་ཁང་(Box office)གིས་བརྗོད་ན་གློག་བརྙན་འདིར་ཕར་འགྲོ་སོང་ཧིན་སྒོར་ཀོ་རོར་ ༧༠ བཏང་ཡོད་པ་དང་། ཚུར་ཡོང་འབབ་ཀོ་རོར་ ༦༩༠ ལྷག་ཡིན་པའི་ཚོད་དཔག་བྱས་འདུག
གློག་བརྙན་འདི་ནི་རྒྱ་གར་གྱི་བྷོ་ལེ་ཝོ་ཌའི་གློག་བརྙན་འཁྲབ་སྟོན་པ་གྲགས་ཆེན་ཨཱ་མིར་ཁཱང་གིས་འཁྲབ་སྟོན་བྱས་ཤིང་། དྷེན་གྷལ་(DANGAL)ཞེས་པ་ཧིན་རྡུའི་ཚིག་ཅིག་ཡིན་པ་དང་། ནང་དོན་ཤེད་རྩལ་འགྲན་པ་ཞེས་པའི་དོན་ཡིན་འདུག འདི་ནི་ཨཱ་མིར་ཁཱང་གི་དུས་ཐུང་ནང་དངུལ་སྒོར་ཀ་རོར་བརྒྱ་ལས་བརྒལ་བའི་གློག་བརྙན་ལྔ་པ་དེ་ཆགས་ཡོད་འདུག
ཁོང་གི་གློག་བརྙན་(Ghajini)དང་(3 Idiot)། (Dhoom 3)། (PK)སོགས་ཀྱང་དངུལ་སྒོར་ཀ་རོར་ལ་བུད་ཡོད་པ་རྐྱང་ཡིན་པ་དང་། ཨཱ་མིར་ཁཱང་ནི་རྒྱ་གར་གྱི་བྷོ་ལེ་ཝོ་ཌི་(bollywood)ཡི་སྐར་ཆེན་གྲས་ཀྱི་མི་མང་གིས་དགའ་བསུ་ཆེ་ཤོས་ཐོབ་པའི་འཁྲབ་སྟོན་པ་དང་འཁྲབ་ཁྲིད་པ་ཞིག་ཆགས་ཡོད་པ་རེད།
ཁོང་གི་གློག་བརྙན་མང་ཆེ་བ་ཞིག་དངོས་ཡོད་སྤྱི་ཚོགས་འཚོ་བ་གཞི་རྩར་བཟུང་སྟེ། སྤྱི་ཚོགས་ནང་གི་གནས་ཚུལ་དང་སྣང་ཚུལ་མི་ལེགས་པ་མང་པོར་སུན་འབྱིན་དང་། ལྷག་པར་དུ་རྒྱ་གར་ནང་གི་ཆོས་ལུགས་རྨོངས་དད་དང་རིགས་རུས་དབྱེ་འབྱེད། སློབ་གསོ་ནོར་འཁྲུལ་ཅན་སོགས་ལ་དག་ཐེར་བྱས་ཡོད་སྟབས། མཚམས་རེར་ཁོང་གི་གློག་བརྙན་དེ་དག་སྤྱི་ཚོགས་ནང་བཀྲམས་རྗེས་རྙོག་དྲ་ཡོང་གི་ཡོད་པ་མ་ཟད། ཁོང་ལའང་ཁ་རྡུང་དང་འཇིགས་སྐུལ་གཏོང་མཁན་མང་པོ་འབྱུང་བཞིན་ཡོད་པ་རེད།
ཐེངས་འདིའི་གློག་བརྙན་དེའང་སྤྱི་ཚོགས་ནང་གི་དངོས་ཡོད་གནས་ཚུལ་ཞིག་བརྗོད་གཞིར་བཟུང་སྟེ་འཁྲབ་ཡོད་པ་དང་། དེ་ནི་ཧར་ཡཱ་ནཱ་མངའ་སྡེའི་རྩལ་འགྲན་པ་མཱ་ཧཱ་ཝར་སཱ་ཧྥོ་གྷ་ཊི་(Mahavir Singh Phogat)ལགས་ཀྱིས་གྲོང་སྡེའི་ནང་གི་ལས་ཀ་ཆུང་ཆུང་དེ་གཡུག་ནས་ཆུ་ཚོད་ཚང་མ་རང་གི་བུ་མོ་བཞི་ཡི་ཤེད་རྩལ་སྦྱོང་བརྡར་ཐོག་བཏང་སྟེ། ༢༠༡༠ ལོའི་རྒྱ་གར་ནང་རྩེད་པའི་རྒྱལ་སྤྱིའི་རྩེད་འགྲན་(Commonwealth Games)ཞེས་པའི་སྟེང་། ཁོང་གི་བུ་མོ་ཆེ་བ་གྷེ་ཊཱ་ཧྥོ་གྷཱ་ཊི་(Geeta Phogat)ཡིས་རྒྱ་གར་གྱི་ཆེས་ཐོག་མའི་གསེར་གྱི་གཟེངས་རྟགས་བླངས་ཡོད་པ་མ་ཟད། ད་དུང་ཁོ་མོ་ ༢༠༡༦ ལོའི་དབྱར་ཁའི་ཨོ་ལིམ་ཕིག་རྩེད་འགྲན་སྐབས་རྒྱ་གར་གྱི་ཆེས་ཐོག་མའི་བུད་མེད་ཤེད་རྩལ་འགྲན་ཞུགས་པ་ཆགས་ཡོད།
ཁོང་གི་བུ་མོ་གཉིས་པ་(Babita Kumari)ལགས་ཀྱང་ ༢༠༡༦ ལོའི་རྒྱ་གར་གྱི་རྩེད་འགྲན་(Commonwealth Games)ཞེས་པའི་ཤེད་རྩལ་འགྲན་བསྡུར་ནང་ཞུགས་ཏེ་གཟེངས་རྟགས་བླངས་ཡོད་པ་དང་། བུ་མོ་གསུམ་པ་(Ritu Phogat)ལགས་ཀྱིས་ཀྱང་རྩེད་འགྲན་དེའི་ནང་གསེར་གྱི་གཟེངས་རྟགས་བླངས་ཡོད་པ་རེད། ཁོང་ཅག་ནི་རྒྱ་གར་གྱི་ཆེས་ཐོག་མའི་ཤེད་རྩལ་འགྲན་བསྡུར་གྱི་ལོ་རྒྱུས་བཟོ་མཁན་གྱི་ནང་མི་དེ་ཡིན་འདུག
བྷེ་བྷེ་སི་དྲ་བའི་དཔྱད་བརྗོད་ནང་། འདས་པའི་ལོ་ལྔའི་ནང་བྷོ་ལེ་ཝོ་ཌི་གློག་བརྙན་འཁྲབ་སྟོན་པ་ཚོས་རྒྱ་གར་གྱི་ལུས་རྩལ་རྩེད་འགྲན་པ་ཚོས་སྐོར་ནས་གློག་བརྙན་མང་པོ་བཟོས་ཡོད་ཀྱང་། དྷེན་གྷལ་ལྟ་བུའི་ལེགས་འགྲུབ་བྱུང་བ་ཞིག་གཞན་སུ་གང་ལའང་བྱུང་མེད་ཅེས་འཁོད་འདུག
གློག་བརྙན་འདིའི་རྟོག་བཟོ་ལྟ་བུའི་ཁྱད་པར་ཅན་གྱི་འཆར་ངོས་བརྗེ་བསྒྱུར་དེ་བྷོ་ལེ་ཝོ་ཌིའི་གློག་བརྙན་གཞན་དག་དང་གཅིག་མཚུངས་ཀྱིས་བརྒྱན་ཡོད་པ་དང་། གཏིང་ཟབ་པའི་ནང་མིའི་མཛའ་བརྩེ་དང་དཀའ་སྤྱད་འབད་བརྩོན། ཁྲག་དང་དངུལ་ཆུའི་འགྲོ་གྲོན་ལ་བརྟེན་ཏེ་རྒྱ་གར་དང་རྒྱལ་སྤྱིའི་ཐོག་ནས་རྒྱལ་ཁའི་རྟགས་མ་བླངས་པ་དེ་ཡིས་ལྟད་མོ་བ་ཚོར་ཡིད་འགུལ་ཆེན་པོ་ཐེབས་ཡོད་པ་མ་ཟད། ཨ་མིར་ཁཱང་གི་འཁྲབ་སྟོན་གྱི་ཚད་གཞི་ཆེས་མཐོ་ཤོས་དེ་ཟིན་ཡོད་པ་རེད།
རྒྱ་གར་ལ་མཚོན་ན། ཤེད་འགྲན་ལུས་རྩལ་དེ་དར་སོ་ཆེན་པོ་ཡིན་པ་དང་། རྒྱ་གར་གྱི་ལྷ་རྣམས་ཀྱིས་ཀྱང་རང་གི་དགྲ་བོ་ལས་ཤེད་རྩལ་འགྲན་ཏེ་རྒྱལ་ཁ་བླངས་པ་མང་པོ་ཡོད་པ་དང་། ལྷ་ཁྱབ་འཇུག་ལ་མཚོན་ན་རང་གི་དགྲ་བོ་བདུད་རྒྱལ་ཀམ་སཱ་དེ་ཤེད་འགྲན་སྟེགས་བུའི་སྟེང་ནས་ཕམ་པར་བརྒྱབ་པ་དང་། རྒྱལ་པོ་རཱ་མཱ་ཎིའི་སྤྲེའི་ཧཱ་ཎི་མན་ཋིའི་ཤེད་རྩལ་འགྲན་ཏེ་རྒྱལ་ཁ་བླངས་པའི་ལྕགས་དབྱུག་དེ་རྒྱ་གར་བྱང་ཕྱོགས་སོགས་སུ་དར་ཁྱབ་ཆེན་པོ་ཡོད།
རྒྱ་གར་ནང་ཤེད་རྩལ་དེ་སྐྱེས་པ་ཁོ་ནའི་རྩེད་མོ་ཞིག་ཏུ་ངོས་འཛིན་བྱེད་པ་དང་། རྒྱ་གར་བྱང་ཕྱོགས་སུ་ཤེད་རྩལ་སློབ་གྲྭ་མང་པོ་ཡོད་ཀྱང་། དེ་དག་ནང་སྐྱེས་པའི་སློབ་ཕྲུག་ལས། བུད་མེད་སློབ་འཇུག་བྱེད་པའི་ལུགས་སྲོལ་མེད། དེ་དག་གི་ལྟ་གྲུབ་དང་གཞུང་ལུགས་ཡོངས་རྫོགས་སྐྱེས་པ་གཞི་རྩར་བཟུང་ཡོད་པ་ལས་བུད་མེད་ལ་ཁ་ཕྱོགས་བཟུང་མེད།
དྷེན་གྷལ་འཁྲབ་གཞུང་རྩོམ་པ་པོ་རོ་ཌིར་ནཱལ་སཱོན་གྷབ་ཊཱ་(Rudraneil sengupta)ལགས་ཀྱིས་བརྗོད་ན། “ གློག་བརྙན་འདི་བརྒྱུད་དེ་སྤྱི་ཚོགས་ནང་གི་སྲོལ་རྒྱུན་ངན་པ་དེ་ལ་གཏིང་ཟབ་ས་ནས་འགྱུར་བཅོས་གཏོང་ཐུབ་པ་རེད་བསམ་ཡོད།” ཁོང་གིས་ད་དུང་། “ ངའི་རེ་བ་ཞིག་ལ་གློག་བརྙན་འདིས་ཕ་མ་མང་པོར་སེམས་ཤུགས་སྤར་ཏེ། ཁོང་ཚོའི་བུ་མོ་རྣམས་ལུས་རྩལ་ལས་ཀར་ཞུགས་རྒྱུའི་གོ་སྐབས་སྤྲོད་པའི་རེ་བ་ཡོད།” ཅེས་བརྗོད་འདུག
གློག་བརྙན་འདིར་ ༢༠༡༦ ལོའི་རྒྱ་གར་གྱི་གློག་བརྙན་འགྲན་ཞུགས་བྱ་དགའི་ཁྲོད་ནས་འཁྲབ་ཁྲིད་པ་ཡག་ཤོས་དང་འཁྲབ་སྟོན་པ་ཡག་ཤོས་སོགས་བྱ་དགའ་རིམ་པ་གསུམ་ཐོབ་ཡོད་འདུག
