ཊི་རུམ་ཕིས་གཟབ་ནན་བྱས་ན་ཡག་གི་རེད་དཱ།

ཨོ་བྷ་མས་གལ་སྲིད་ཊི་རུམ་ཕི་ཡིས་ཨ་རིའི་ཆེ་མཐོང་དང་རྩིས་ཐང་ལ་འཇིགས་སྣང་བསླངས་ཚེ་ཁོས་ཊི་རུམ་ཕི་ཡི་ཉེས་དོན་ཐེར་འདོན་བྱ་ངེས་སྐོར་བརྗོད་འདུག

ཁ་སང་ཨ་རིའི་སྲིད་འཛིན་ཨོ་བྷ་མས་ཕོ་བྲང་དཀར་པོ་རུ་གསར་འགོད་གསལ་བསྒྲགས་ཤིག་སྤེལ་ཏེ། ཨ་རིའི་གཞུང་དམངས་ཀྱིས་ཨ་རིའི་མ་འོངས་པར་སེམས་ཁྲལ་བྱེད་མི་དགོས་སྐོར་དང་། གལ་སྲིད། བདམས་ཐོན་སྲིད་འཛིན་ཌོ་ནལ་ཌི་ཊི་རུམ་ཕི་ཡིས་ཨ་རིའི་ཆེ་མཐོང་དང་རྩིས་ཐང་ལ་འཇིགས་སྣང་བསླང་ཚེ། ཁོས་ཊི་རུམ་ཕི་ནོར་འཁྲུལ་ཐེར་འདོན་བྱ་ངེས་ཡིན་སྐོར་བརྗོད་འདུག འདི་ནི་ཨོ་བྷ་མས་ཨ་རིའི་སྲིད་དབང་བསྐྱངས་ཏེ་ལོ་ངོ་བརྒྱད་ཟིན་པའི་རྗེས་ཀྱི་ཕོ་བྲང་དཀར་པོའི་ནང་གི་གསར་འགོད་ལྷན་ཚོགས་མཐའ་མ་དེ་ཆགས་ཡོད་འདུག

ཨོ་བྷ་མས་ཨ་རིའི་ནང་སྲིད་སྐོར་བརྗོད་པར། གལ་སྲིད་ཊི་རུམ་ཕི་གཞུང་གསར་བས་མི་རིགས་དབྱེ་འབྱེད་བྱེད་པ་དང་། འོས་བསྡུའི་ཐོབ་ཐང་དང་གསར་འགོད་དབང་ལ་སྟངས་འཛིན་བྱེད་པ། ཨ་རིའི་ནང་གི་གནས་སྤོ་མི་མང་ཕྱིར་འཕུད་གཏོང་བ་སོགས་ཀྱི་སྲིད་ཇུས་ལག་བསྟར་བྱས་ཚེ། གནད་དོན་དེ་ལ་ཁོས་ཡ་ལན་བསློག་རྒྱུ་ཡིན་པ་དང་། ཨ་རིའི་སྲིད་འཛིན་གྱི་ལས་འགན་དེ་སླ་པོ་ཞིག་མིན་པ་མ་ཟད། ཊི་རུམ་ཕི་ཡི་ལས་དོན་གང་ཞིག་བརྩམས་ཀྱང་ཨ་རིའི་གཞུང་དམངས་ལ་བསྟུན་དགོས་པ་ལས། ཁོས་རང་སྣང་གང་དྲན་གྱིས་ཐག་གཅོད་བྱ་ཆོག་པ་ཞིག་མིན་སྐོར་སོགས་བརྗོད་འདུག

ཨོ་བྷ་མས་ཨ་རིའི་ཕྱི་སྲིད་སྐོར་བརྗོད་པར། ཨ་རིའི་ཕྱི་སྲིད་དང་ནང་སྲིད་གཉིས་ཀྱི་འགྲོ་སྟངས་འདྲ་བོ་མེད་སྟབས། ཨ་རིའི་ཕྱི་འབྲེལ་སྲིད་ཇུས་ཐད་བསམ་བློ་ནན་ཏན་བཏང་སྟེ་ཐག་གཅོད་བྱེད་དགོས་པ་དང་། ད་ལྟའི་ཊི་རུམ་ཕི་ཡིས་ཕྱི་འབྲེལ་སྲིད་ཇུས་ཁག་ཅིག་ཧ་ཅང་བློ་ཚུབ་ཀྱི་རང་བཞིན་ཆགས་ཡོད་པ། དཔེར་ན། ཊི་རུམ་ཕི་ཡིས་ཨ་རིས་ཡུ་ཁི་རན་གྱི་གནད་དོན་དང་འབྲེལ་ཏེ་ཨུ་རུ་སུར་དཔལ་འབྱོར་ཉེས་ཆད་བཅད་པ་དེ་ལྷོད་ཡངས་བཏང་སྟེ། ཨ་རི་དང་ཨུ་རུ་སུ་གཉིས་བར་གྱི་འབྲེལ་ལམ་ཡར་རྒྱས་གཏོང་རྒྱུ་དང་། ཨི་ཛི་རིལ་གྱི་གྲོང་ཁྱེར་ཊིལ་ཨ་ཝེ་ཝ་ (Tel Aviv) ནང་ཡོད་པའི་ཨ་རིའི་གཞུང་ཚབ་ཁང་ཇི་རུ་ས་ལིམ་ (erusalem) ནང་གནས་སྤོར་རྒྱུ་ཡིན་སྐོར་བཤད་པ་ལྟ་བུ་ཡིན་སྐོར་བརྗོད་འདུག

སང་ཉིན་ཨ་རིའི་ཕྱི་ཚེས་ ༢༠ ཉིན་བདམས་ཐོན་སྲིད་འཛིན་ཊི་རུམ་ཕི་ཡིས་ལས་འཁུར་དམ་འབུལ་མཛད་སྒོ་ཚོགས་ལ་ཉེ་བ་དང་བསྟུན་ཏེ། ཨ་རིའི་རྒྱལ་ས་ཝ་ཤིན་ཊོན་གཙོས་པའི་གྲོང་ཁྱེར་ཁག་ཅིག་ནང་མི་མང་ཚོས་ཊི་རུམ་ཕི་ལ་མི་འདོད་པའི་རྣམ་འགྱུར་སྣ་ཚོགས་སྟོན་བཞིན་ཡོད་པ་དང་། རྒྱལ་སར་ ” ཟླ་ ༡ ཚེས་ ༢༠ གཏོར་རྒོལ” (DisruptJ20) ཞེས་པའི་ཚོགས་པ་ཞིག་རྩ་འཛུགས་བྱས་ཏེ། ཊི་རུམ་ཕི་ཡི་ལས་འཁུར་མཛད་སྒོ་ཚོགས་ཡུལ་དུ་སྐྱོད་པའི་གཞུང་ལམ་ཁག་ཏུ་ངོ་རྒོལ་བྱ་འཆར་ཡོད་འདུག ཐེངས་འདིའི་ངོ་རྒོལ་ལས་འགུལ་ནང་མི་མང་ ༩༠༠༠༠༠ ཡས་མས་མཉམ་ཞུགས་ཡོང་བའི་ཚོད་དཔག་བྱེད་བཞིན་ཡོད་པ་དང་། ཨ་རིའི་གཞུང་ཕྱོགས་ནས་རྒྱལ་ས་ཝ་ཤིན་ཊོན་གྱི་ས་ཚིགས་ཁག་ཏུ་ཉེན་རྟོག་པ་ ༣༠༠༠ དང་། དྲག་ཆས་དམག་མི་ ༥༠༠༠ ལྷག་འགྲེམ་འཇོག་བྱས་ཏེ། སང་ཉིན་གྱི་ཨ་རིའི་སྲིད་འཛིན་དམ་འབུལ་མཛད་སྒོའི་བདེ་འཇགས་སྐྱོང་སྐྱོབ་བྱེད་བཞིན་ཡོད་འདུག

ཐའེ་ཝན་ཕྱི་འབྲེལ་ལྷན་ཁང་གིས་གསལ་བསྒྲགས་སྤེལ་ཏེ། ཐའེ་ཝན་གྱི་སྲིད་བློན་ཟུར་བ་ཡུ་ཞི་ཁུན་ (Youxi Kun) གྱི་སྣེ་འཁྲིད་འོག་ཐའེ་ཝན་དམངས་གཙོ་ཡར་ཐོན་ཚོགས་པ་དང་ཐའེ་ཝན་གོ་མན་ཏང་ཚོགས་པ་གཉིས་ཀྱི་སྐུ་ཚབ་ཚོགས་ཆུང་ཞིག་སྐུ་ཞབས་ཊི་རུམ་ཕི་ཡི་ལས་འཁུར་མཛད་སྒོར་མཉམ་ཞུགས་བྱ་རྒྱུ་ཡིན་སྐོར་བསྒྲགས་འདུག

གཞན། ད་ལྟ་སུད་སིར་འཚོགས་བཞིན་པའི་རྒྱལ་སྤྱིའི་དཔལ་འབྱོར་གླེང་སྟེགས་སྟེང་། རྒྱ་ནག་གི་ཨ་ལེ་པཱ་པཱ་དྲ་ལམ་ཚོང་གཉེར་ཁང་གི་སྤྱི་ཁྱབ་པ་སྐུ་ཞབས་རྗ་ཁི་མཱ་ (Jack ma) ཡིས། ཨ་རྒྱ་གཉིས་བར་ཉོ་འཚོང་གི་དམག་འཁྲུག་འབྱུང་མི་སྲིད་པ་དང་། ཨ་རིའི་སྲིད་འཛིན་འོས་ཐོན་པ་ཊི་རུམ་ཕི་ལ་ཨ་རིའི་ཕྱི་འབྲེལ་སྲིད་ཇུས་ཐད་བསམ་བློ་གཏོང་བའི་ཆུ་ཚོད་སྤྲད་པ་ཡིན་ན། ཁོ་རང་གི་མཐོང་རྒྱ་ཇེ་ཆེར་འགྲོ་ངེས་ཡིན་པ་དང་། ཨ་རིའི་ནང་སྨྲ་བརྗོད་རང་དབང་ཡོད་སྟབས། ཊི་རུམ་ཕི་ཡིས་ཁོ་རང་གིས་གང་བཤད་འདོད་པ་དེ་བཤད་ཆོག་གི་ཡོད་པ་དང་། ཁོས་ཊི་རུམ་ཕི་ཡི་གཏམ་སྤྱོད་ལ་བསམ་ཤེས་དང་བརྩི་བཀུར་བྱེད་ཀྱིན་ཡོད་ཀྱང་། ཁོ་རང་ལ་ཁོ་རང་གི་ལྟ་ཚུལ་ཡོད་པའི་བསམ་ཚུལ་བཏོན་འདུག

ཡུ་ཁུ་རན་གྱི་སྲིད་འཛིན་ཕའོ་རའོ་ཤཱིན་ཀོ་ (Poroshenko) ཡིས། རྒྱལ་སྤྱིའི་དཔལ་འབྱོར་གླེང་སྟེགས་ཀྱི་ཟུར་དུ་གསར་འགོད་པར། གལ་སྲིད། མ་འོངས་པར་ཨ་རིའི་སྲིད་འཛིན་འོས་ཐོན་པ་ཊི་རུམ་ཕི་གཞུང་གིས་ཨ་རིས་ཨུ་རུ་སུའི་ཐོག་འཛིན་པའི་སྲིད་ཇུས་དེ་མུ་མཐུད་རྒྱུན་འཁྱོངས་བྱས་པ་ཡིན་ན། ཨ་རི་དང་ཡུ་ཁུ་རན་གཉིས་གྱི་འབྲེལ་ལམ་ཡར་རྒྱས་འགྲོ་ངེས་ཡིན་པ་དང་། ཁོ་རང་མི་འགྱངས་བར་སྐུ་ཞབས་ཊི་རུམ་ཕི་ལ་ཐུག་འཕྲད་བྱ་འཆར་ཡོད་པ། ཨུ་རུ་སུའི་དྲ་ལམ་གསང་ཉུལ་གྱི་གནད་དོན་དེ་ཨ་རི་གཅིག་པུ་མིན་པར་རྒྱལ་སྤྱིའི་རྒྱལ་ཁབ་ཚང་མར་འཕྲད་བཞིན་པའི་དཀའ་རྙོག་ཅིག་ཡིན་སྟབས། འཛམ་གླིང་རྒྱལ་ཁབ་ཚང་མ་མཉམ་འབྲེལ་ཐོག་ཨུ་རུ་སུའི་དྲ་ལམ་གསང་ཉུལ་གྱི་གནད་དོན་ལ་གདོང་ལེན་བྱེད་དགོས་པ་དང་། བྱང་ཆིངས་སྒྲིག་འཛུགས་ (NATO) ཀྱིས་ཚོགས་མིའི་རྒྱལ་ཁབ་ཁག་གི་བདེ་འཇགས་ལ་འགན་འཁུར་དགོས་སྟབས། ཡུ་ཁུ་རན་ནང་གི་ཨུ་རུ་སུའི་ཟིང་འཁྲུག་གི་གནད་དོན་ཐག་གཅོད་ཐུབ་སྐོར་སོགས་བརྗོད་འདུག

གསར་འགོད་པ། པདྨ་རྒྱལ།