རྒྱ་ནག་ལ་གནོད་གཞིའི་བཀའ་མོལ་རིགས་མ་གནང་རོགས་ཟེར།

གཟའ་ལྷག་པའི་ཉིན་རྒྱ་གར་དུས་བབ་གསར་ཁང་གིས་སྤེལ་བའི་གནས་ཚུལ། ༸གོང་ས་མཆོག་རྒྱ་གར་བྱང་ཤར་ཁུལ་དུ་ཕེབས་འཆར་ཡོད་པ་དེར་ཨ་སམ་གྱི་འཇིགས་སྐུལ་ཚོགས་པས་གསལ་བསྒྲགས་སྤེལ་ཏེ། ༸གོང་ས་མཆོག་ཏཱ་ལའི་བླ་མ་ས་གནས་དེ་ཁུལ་དུ་ཕེབས་སྐབས་རྒྱ་ནག་ལ་གནོད་གཞིའི་བཀའ་མོལ་རིགས་མི་གནང་རྒྱུའི་རེ་སྐུལ་ཞུས་པ་དང་། ཨ་སམ་མངའ་སྡེའི་གཞུང་གིས་༧གོང་ས་མཆོག་གི་བདེ་འཇགས་ཉེན་སྲུང་ཚད་མཐོ་བོ་གྲ་སྒྲིག་གནང་ཡོད་འདུག

ཕྱི་ཟླ་ ༤ ཚེས་ཤར་ལ་༸གོང་ས་ཏཱ་ལའི་བླ་མ་མཆོག་རྒྱ་གར་བྱང་ཤར་ཨ་སམ་(Assam)དང་ཨ་རུ་ནཱ་ཅཱལ་(Arunachal)མངའ་སྡེ་གཉིས་ནང་ཕེབས་ཏེ་ཆོས་ཕྱོགས་ཀྱི་མཛད་འཕྲིན་བསྐྱང་འཆར་ཡོད་པ་དང་། ཕྱི་ཚེས་ ༡ ཉིན་༸གོང་ས་ཏཱ་ལའི་བླ་མ་མཆོག་ཨ་སམ་མངའ་སྡེར་ཆིབས་སྒྱུར་བསྐྱངས་ཏེ། མངའ་སྡེའི་རྒྱལ་ས་གྷུ་བ་ཊེ་(Guwahati)ནང་སྤྱི་སྒེར་གྱི་ཚོགས་པ་ཁ་ཤས་ལ་གཟིགས་སྐོར་དང་བཀའ་སློབ་གནང་རྒྱུ་ཡིན་པ་དང་། ཕྱི་ཚེས་ ༢ ཉིན་གྷུ་བ་ཊེའི་འཕྲུལ་ལས་རིག་པའི་མཐོ་སློབ་(IIT)ཞེས་པར་ཕེབས་ཏེ། ཁོང་གི་མཛད་རྣམ་ ༼ངོས་ཀྱི་ཡུལ་དང་ངོས་ཀྱི་མི་མང་།༽ཞེས་པ་ཨ་སམ་སྐད་ཡིག་ཐོག་བསྒྱུར་ཡོད་པ་དེ་དབུ་འབྱེད་གནང་རྒྱུ་ཡིན་པ་དང་། མངའ་སྡེའི་གཞུང་གི་གོ་སྒྲིག་བྱེད་བཞིན་པའི་ (Namami Brahmaputra ཡར་ཀླུང་གཙང་པོ་ལ་ཕྱག་འཚལ་ལོའམ། ཚངས་པའི་སྲས་ལ་ཕྱག་འཚལ་ལོ།)ཞེས་པའི་དུས་སྟོན་སྟེང་ཕེབས་རྒྱུ་ཡིན་འདུག

ཕྱི་ཚེས་ ༣ ཉིན་མཐོ་སློབ་(Dibrugarh Universituy)ཞེས་པའི་སློབ་མ་རྣམས་ལ་བཀའ་སློབ་གནང་རྒྱུ་ཡིན་འདུག ཨ་སམ་ཁུལ་གྱི་ཉིན་གསུམ་རིང་གི་མཛད་འཕྲིན་གྲུབ་རྗེས་ཨ་རུ་ན་ཅཱལ་མངའ་སྡེའི་ནང་ཕེབས་ཏེ། རྟ་དབང་དགོན་པ་དང་འབུམ་སྡེ་ལ་ས་གནས་སོགས་སུ་ཆོས་ཕྱོགས་ཀྱི་མཛད་འཕྲིན་བསྐྱང་རྒྱུ་ཡིན་འདུག

ཕྱི་ཚེས་ ༢༨ ཉིན་ཨ་སམ་མངའ་སྡེ་ནང་ཡོད་པའི་འཇིགས་སྐུལ་རུ་ཚོགས་ཨཱུལ་ཕཱ་(UlFA-I)ཞེས་པ་ཡིས་༸གོང་ས་ཏཱ་ལའི་བླ་མ་མཆོག་རྒྱ་གར་བྱང་ཤར་ཕྱོགས་སུ་ཕེབས་སྐབས་རྒྱ་ནག་ལ་ཕོག་ཐུག་འགྲོ་གཞིའི་བཀའ་མོལ་རིགས་མི་གནང་རྒྱུའི་རེ་སྐུལ་ཞུས་ཡོད་པ་གསར་ལམ་ཁག་ཏུ་ཐོན་ཡོད་པ་དང་། ཡི་གེ་དེའི་ནང་འཇིགས་སྐུལ་རུ་ཚོགས་དེའི་མགོ་ཁྲིད་ཨཱ་བྷི་ཇཱིཊ་ཨཱ་སཱོམ་(Abhijeet Asom)ཟེར་བ་དེས། “གལ་སྲིད་སྐུ་ཉིད་ཨ་སམ་ནང་གཟིགས་སྐོར་གནང་འདུན་ཡོད་ན་ང་ཚོ་ལ་ཆ་རྐྱེན་དམིགས་བསལ་བ་ཞིག་ཡོད་པ་ནི། སྐུ་ཉིད་ཀྱིས་ཨ་སམ་ས་ཐོག་ནས་ཚོགས་སྒེར་སུ་ལའང་རྒྱ་ནག་གི་འགལ་ཟླར་འགྱུར་བའི་བཀའ་མོལ་རིགས་གནང་མི་ཆོག” ཅེས་དང་། “རྒྱ་ནག་དང་ཨ་སམ་གཉིས་ནི་འབྲེལ་འདྲིས་ཆེ་བའི་ཁྱིམ་མཚེས་ཡིན་ལ། ང་ཚོའི་བར་ལ་ཡུན་རིང་པོ་ནས་སྐད་ཡིག་དང་རིག་གཞུང་གི་འབྲེལ་བ་ཟབ་མོ་ཡོད་སྟབས། སྐུ་ཉིད་ནས་ཨ་སམ་ས་ཐོག་ཏུ་རྒྱ་གར་སྐུ་ཚབ་ཀྱི་ངོ་བོའི་ཐོག་ནས་རྒྱ་ནག་ལ་འཛིན་པའི་སྲིད་ཇུས་ཐོག་སྐད་ཆ་བཤད་ན་ང་ཚོས་བཟོད་བསྲན་བྱེད་ཐུབ་མེད།” ཅེས་སོགས་འཁོད་ཡོད་འདུག

ད་དུང་ཡི་གེ་དེའི་ནང་མུ་མཐུད་དུ། བོད་ཀྱི་ལྷོ་ཕྱོགས་ཨ་རུ་ནཱ་ཅཱལ་ནི་རྒྱ་གར་གཞུང་གིས་ཁྲིམས་འགལ་གྱིས་བཙན་བཟུང་བྱས་པ་ཞིག་ཡིན་པ་དང་། རྒྱ་ནག་གཞུང་གིས་བཀག་འགོག་བྱེད་མིན་ལ་མ་ལྟོས་པར་༸གོང་ས་ཏཱ་ལའི་བླ་མ་མོན་རྟ་དབང་ལ་ཕེབས་རྒྱུའི་ཐུགས་ཐག་བཅད་པ་དེ་ནི་ཧ་ཅང་མི་འོས་པ་ཞིག་ཡིན་པ་དང་། གལ་སྲིད་རྒྱ་ནག་ཁོང་ཁྲོ་ལང་ན་རྒྱ་དཀར་ནག་བར་དམག་འཁྲུག་ལང་རྒྱུ་ལས་འོས་མེད་སྐོར་སོགས་འཁོད་ཡོད་འདུག

༸གོང་ས་ཏཱ་ལའི་བླ་མ་མཆོག་རྒྱ་གར་བྱང་ཤར་ཁུལ་དུ་ཕེབས་འཆར་ཡོད་པ་དེར། ཉེ་ལམ་རྒྱ་ནག་གཞུང་གིས་སྐྱོན་བརྗོད་ཤུགས་ཆེན་བྱས་ཡོད་ཀྱང་། རྒྱ་གར་གཞུང་གིས་༸གོང་ས་ཏཱ་ལའི་བླ་མཆོག་ཕྱི་ཚེས་ ༡ ཉིན་ནས་རྒྱ་གར་བྱང་ཤར་དུ་ཕེབས་ཆོག་པའི་ཆོག་མཆན་གནང་ཡོད། རྒྱ་གར་གསང་བའི་ལས་ཁུངས་ཀྱིས་ཨ་སམ་འཇིགས་སྐུལ་ཚོགས་པའི་ཡི་གེ་དེའི་ཐད། ཨ་སམ་འཇིགས་སྐུལ་རུ་ཚོགས་ཀྱི་མགོ་ཁྲིད་པྲ་རེཥ་བྷ་རཱུ་ཨཱ་(Paresh Barua)ད་ལྟ་རྒྱ་ནག་ཏུ་ཡོད་པ་དང་། ཡི་གེ་དེའི་ནང་དོན་རྣམས་ཁོ་རང་སྡོད་ཡུལ་རྒྱ་ནག་གི་འདོད་འདུན་ལྟར་བྲིས་པ་ཞིག་རེད་ཅེས་བརྗོད་ཡོད་འདུག

ཨ་སམ་མངའ་སྡེ་གཞུང་གིས་ད་རེབ་༸གོང་ས་ཏཱ་ལའི་བླ་མ་མཆོག་ཨ་སམ་གྱི་ས་ཕྱོགས་གང་དུ་ཕེབས་འཆར་ཡོད་པ་དེ་དག་ནང་། འཇིགས་སྐུལ་རུ་ཚོགས་ཨཱུལ་ཕཱེ་ཡི་རྙོག་གྲ་མི་ཡོང་བའི་ཆེད་དུ་བདེ་འཇགས་དམག་མི་གྲ་སྒྲིག་ལེགས་པར་བྱས་ཡོད་པའི་གསལ་བསྒྲགས་བྱས་ཡོད་འདུག