རྒྱ་རིགས་སློབ་ཕྲུག་ཅིག་གིས་ཨ་རི་ནས་སློབ་མཐར་ཕྱིན་པའི་མཛད་སྒོའི་སྟེང་རྒྱ་ནག་གི་མཁའ་དབུགས་འབག་བཙོག་དང་མི་མང་ལ་རང་དབང་མེད་སྐོར་གཏམ་བཤད་སྤེལ་བ་དེར་ཕྱི་ནང་གི་སྐྱོན་བརྗོད་ཤུགས་ཆེན་བསླེབས་ཏེ་ཁོ་མོས་དགོངས་སེལ་ཞུས་འདུག
དེ་རིང་བྷེ་བྷེ་སེ་གསར་ཁང་གིས་གནས་ཚུལ་སྤེལ་བ་ལྟར་ན། ཟླ་འདིའི་ཕྱི་ཚེས་ ༢༡ ཉིན་རྒྱ་ནག་ནས་ཨ་རིའི་མཱ་རེ་ལན་ཌི་གཙུག་སློབ་ཆེན་ (UMD) ནང་གི་རྒྱ་རིགས་སློབ་ཕྲུག་བུ་མོ་ཧྲུ་ཕེན་ཡཱང་ (Yang Shuping)ཟེར་བ་ཞིག་གིས་སློབ་མཐར་ཕྱིན་པའི་མཛད་སྒོའི་སྟེང་གཏམ་བཤད་སྤེལ་སྐབས། རྒྱ་ནག་ནང་སྨྲ་བརྗོད་རང་དབང་བཀག་སྡོམ་བྱས་ཡོད་པ་མ་ཟད། རང་བྱུང་མཁའ་དབུགས་འབག་བཙོག་ཆགས་ཡོད་སྟབས་ཁོ་མོ་ཨ་རིར་བསླེབས་རྗེས། ཨ་རིའི་དྭངས་གཙང་གི་མཁའ་དབུགས་དང་སྨྲ་བརྗོད་རང་དབང་མྱོང་རོལ་བྱེད་ཐུབ་པ་བྱུང་ཡོད་ཚུལ་དང་། ཨ་རིའི་རང་དབང་དང་དམངས་གཙོ། དྭངས་གཙང་གི་མཁའ་དབུགས་སོགས་ནི་ཧ་ཅང་རིན་ཐང་ཅན་ཞིག་ཡིན་སྐོར་སོགས་བརྗོད་ཡོད་ཅིང་། དེ་ལ་སྤྱི་ཚོགས་བརྒྱུད་ལམ་ཁག་ཏུ་རྒྱ་ནག་ནང་དང་ཕྱི་ལོགས་ཀྱི་རྒྱ་རིགས་ཚོས། ཡཱང་གིས་མེས་རྒྱལ་གྱི་མཚན་སྙན་ལ་གནོན་སྐྱོན་བཟོས་ཡོད་སྐོར་དང་། ཁོ་མོ་མ་འོངས་པར་ཕྱིར་རྒྱ་ནག་ནང་ལོག་ས་མེད་ཚུལ་སོགས་ཀྱི་སྐྱོན་བརྗོད་ཤུགས་ཆེན་ཡོང་བཞིན་ཡོད་སྟབས། དེ་རིང་སློབ་ཕྲུག་ཡཱང་གིས་དགོངས་དག་ཞུས་ཡོད་པའི་ནང་། “ངས་གཏམ་བཤད་དེ་སྤེལ་བར་བཟོད་གསོད་ཞུ་རྒྱུ་ཡིན། ཚང་མས་ང་ལ་གུ་ཡངས་གནང་རོགས། ངས་རང་ཉིད་ཀྱི་ནོར་འཁྲུལ་ངོས་ཟིན་བྱས་ཡོད” ཅེས་བརྗོད་ཡོད་འདུག
ཧྲུ་ཕེན་ཡཱང་གི་གཏམ་བཤད་བརྙན་ལེན་བྱས་ཡོད་པའི་ནང་ཁོ་མོས། “ང་རང་ཨ་རིའི་གནམ་ཐང་ཕྱི་ལོགས་སུ་འབྱོར་རྗེས། ངས་དྭངས་གཙང་གི་རང་བྱུང་མཁའ་དབུགས་རྔུབ་པའི་སྐལ་བ་བྱུང་བ་དང་། ང་ལ་རང་དབང་གི་ཚོར་སྣང་བྱུང་སོང་” ཞེས་དང་། “དུས་ཡུན་རིང་པོ་མ་འགོར་བར་ངས་དྭངས་གཙང་གི་མཁའ་དབུགས་གཞན་མང་པོ་ཞིག་མྱོང་སྐལ་བྱུང་བ་དང་། དེ་དག་ནི་ང་རང་ཆེས་དགའ་ཞིང་མོས་པའི་མཁའ་དབུགས་དེ་ཡིན་ལ། དེ་ནི་ཨ་རིའི་དྭངས་གཙང་གི་རང་བྱུང་མཁའ་དབུགས་དང་། དམངས་གཙོ་དང་སྨྲ་བརྗོད་རང་དབང་གི་མཁའ་དབུགས་བཅས་རེད་ལ། དུས་ནམ་ཡང་ངས་དྭངས་གཙང་གི་མཁའ་དབུགས་དེ་བརྗེད་མི་སྲིད། དམངས་གཙོ་དང་རང་དབང་ནི་དྭངས་གཙང་གི་མཁའ་དབུགས་ཡིན་ཞིང་། དེ་དག་བརྩོན་ལེན་བྱེད་པ་ནི་ཧ་ཅང་རིན་ཐང་ཆེན་པོ་ཞིག་རེད།”ཅེས་བརྗོད་ཡོད།
སྤྱི་ཚོགས་བརྒྱུད་ལམ་ཁག་ཏུ་ཁོ་མོར་སྐྱོན་བརྗོད་བྱེད་བཞིན་པའི་ནང་རྒྱ་རིགས་ཞིན་ལཱང་ཅང་ (Xinliang Jiang)ཟེར་བ་ཞིག་གིས་“མི་མང་གིས་རྒྱ་ནག་ཡར་རྒྱས་འགྲོ་བཞིན་ཡོད་པ་ངོས་ལེན་བྱེད་ཀྱིན་ཡོད། ཕྱི་ཕྱོགས་ནས་ངའི་རྒྱལ་ཁབ་ལ་དམའ་འབབ་བྱེད་པར་ངས་ངོས་ལེན་བྱེད་ཐབས་མེད། ཨ་རི་ནི་སྨྲ་བརྗོད་རང་དབང་ཡོད་པའི་རྒྱལ་ཁབ་ཅིག་ཡིན་ཡང་། ཧྲུ་ཕེན་ཡཱང་གིས་བཤད་པའི་སྐད་ཆའི་བརྒྱ་ཆ་ ༨༠ རྫུན་གཏམ་དང་གཡོ་ཐབས་ཁོ་ན་རེད། ཧྲུ་ཕེན་ཡཱང་གིས་རྒྱ་ནག་རྒྱལ་ཡོངས་ཀྱི་སློབ་མའི་ཚབ་བྱེད་ཐུབ་པ་མ་རེད། དོན་དངོས་སུ་ཧྲུ་ཕེན་ཡཱང་གི་ཕ་ཡུལ་ཁུན་མིན་ (Kunming) ནི་རྒྱ་ནག་ནང་གི་ཆེས་མཛེས་སྡུག་ལྡན་པའི་ས་ཆ་ཞིག་རེད་ལ། ས་ཆ་དེ་ནི་ང་སློབ་གསེང་ལ་འགྲོ་ས་ཡག་ཤོས་ཤིག་ཡིན” ཞེས་དང་། “ཧྲུ་ཕེན་ཡཱང་གིས་རྫུན་བཤད་ཀྱིན་འདུག ཡཱང་ལ་ངོ་ཚ་མི་འདུག ཁོ་མོ་རྒྱལ་ཁབ་གང་ནས་ཡིན་ཡང་དེ་ལ་འབྲེལ་བ་མི་འདུག མོས་སློབ་སྦྱོང་ལ་འབད་བརྩོན་བྱེད་རན་རེད་མ་གཏོགས། རྒྱལ་ཁབ་ལ་དམའ་འབེབས་བྱེད་སྐབས་མ་རེད། མོས་མེས་རྒྱལ་ཀྱི་གཟི་བརྗིད་ཉམ་རྒུད་དུ་བཏང་འདུག ང་ཚོར་དགོངས་དག་ཞུ་དགོས” ཞེས་སོགས་བརྗོད་སོགས་བརྗོད་འདུག
ཧྲང་ཧེ་གསར་གནས་བརྒྱུད་ལམ་དུ་ཧྲུ་ཕེན་ཡཱང་གི་སྐད་ཆ་ལུང་འདྲེན་བྱས་པའི་ནང་། “དུས་རྒྱུན་མི་མང་གིས་ང་ལ། ཅིའི་ཕྱིར་ཁྱོད་རང་མཱ་རེ་ལན་ཌི་གཙུག་ལག་སློབ་ཆེན་ནང་ཡོང་བ་ཡིན་ཞེས་འདྲི་གི་འདུག ངས་ནམ་རྒྱུན་ཁོ་ཚོར་ང་མཁའ་དབུགས་གཙང་མ་རྔུབ་ཏུ་ཡོང་བ་ཡིན་ཞེས་ལན་འདེབས་ཀྱི་ཡོད། ལོ་ ༥ ཡི་སྔོན་ལ་ང་རྒྱ་ནག་གི་གནམ་གྲུ་ལས་བབ་སྟེ་ཌ་ལ་སི་ (Dallas Airport) རྒྱལ་སྤྱིའི་གནམ་ཐང་ནས་གནམ་གྲུར་སྡོད་སྐབས། ངས་ཁ་རས་ ༥ གྲ་སྒྲིག་བྱས་མོད། ཨ་རིའི་མཁའ་དབུགས་དང་པོ་རྔུབ་རྗེས། ངས་གྲ་སྒྲིག་བྱས་པའི་ཁ་རས་དེ་དག་དགོས་མཁོ་མེད་པས་གཡུགས་པ་ཡིན། ཨ་རིའི་མཁའ་དབུགས་ནི་དྭངས་ཤིང་གཙང་བས་ཧ་ཅང་སྐྱིད་པོ་འདུག ང་ནི་ཨ་རིའི་དྭངས་གཙང་གི་མཁའ་དབུགས་དེ་ལ་ཧ་ལས་བྱུང་། ང་རང་རྒྱ་ནག་གི་གྲོང་ཁྱེར་ཞིག་གི་ནང་འཚར་ལོངས་བྱུང་བ་ཡིན། གྲོང་ཁྱེར་དེའི་ནང་ང་་ཕྱི་ལོགས་སུ་འགྲོ་དུས་ནམ་རྒྱུན་ཁ་རས་གྱོན་དགོས་པ་རེད། ཁ་རས་མ་གྱོན་ཡང་ལམ་སང་ན་ཡོང་གི་འདུག གང་ལྟར་ང་རང་ཨ་རིའི་གནམ་ཐང་གི་ཕྱི་ལོགས་སུ་འབྱོར་རྗེས། ང་ལ་རང་དབང་གི་ཚོར་སྣང་བྱུང” ཞེས་བརྗོད་ཡོད་སྐོར་འཁོད་འདུག
རྒྱ་རིགས་སློབ་ཕྲུག་དེའི་གཏམ་བརྗོད་དེ་ནི་རྒྱ་ནག་གི་སྤྱི་ཚོགས་བརྒྱུད་ལམ་ཁག་ཏུ་གླེང་སློང་ཆེན་པོ་བྱུང་བ་དང་། ཁ་སང་གཅིག་པུར་དེ་ལ་ཉན་འཇོག་བྱེད་མཁན་མི་མང་ས་ཡ་ ༥༠ ལྷག་བྱུང་ཡོད་པ་དང་། གཏམ་བཤད་དེས་ཕྱིའི་རྒྱལ་ཁབ་ཀྱི་སློབ་ཆེན་ཁག་ནང་སློབ་གཉེར་བྱེད་བཞིན་པའི་རྒྱ་རིགས་སློབ་ཕྲུག་ཚོར་ཆབ་སྲིད་ཀྱི་རྩོད་གཞི་ཆེན་པོ་བསླངས་ཡོད་འདུག ཡིན་ནའང་མཱ་རེ་ལན་ཌི་གཙུག་ལག་སློབ་ཆེན་གྱི་ངོས་ནས་གསལ་བསྒྲགས་སྤེལ་ཏེ། རྒྱ་རིགས་སློབ་ཕྲུག་ཧྲུ་ཕེན་ཡཱང་ལ་རྒྱབ་སྐྱོར་གྱི་ཚུལ་དུ། ཁོ་མོས་རང་ཉིད་ཀྱི་ལྟ་ཚུལ་ངོ་མ་བརྗོད་པ་དེ་ཧ་ཅང་གལ་ཆེན་པོ་ཡིན་སྐོར་དང་། མཱ་རེ་ལན་ཌི་གཙུག་ལག་སློབ་ཆེན་གྱི་ཕྱི་ནང་གི་རྒྱ་རིགས་ཚོས་ཕན་ཚུན་གྱི་བསམ་ཚུལ་ལ་ཉན་འཇོག་དང་། ཕན་ཚུན་གྱི་བསམ་ཚུལ་མི་མཐུན་པར་བརྩི་བཀུར་བྱེད་དགོས་སྐོར་སོགས་བརྗོད་འདུག
འདས་པའི་ལོ་ངོ་འདི་རིང་ཨ་རིའི་གཙུག་ལག་སློབ་ཆེན་ཁག་གིས་རྒྱ་རིགས་སློབ་ཕྲུག་མང་པོར་སྣེ་ལེན་བྱེད་ཀྱི་ཡོད་པ་དང་དང་། རྒྱལ་སྤྱིའི་གཙུག་ལག་སློབ་གཉེར་གྱི་ཤེས་ཡོན་སློབ་གསོ་ (IIE) ཞིབ་འཇུག་ཡིག་ཆ་ལྟར་ན། ༢༠༡༤ ནས་ ༢༠༡༥ བར་རྒྱ་རིགས་སློབ་མ་ ༣༠༤༠༠༠ ལྷག་ཨ་རིའི་གཙུག་ལག་སློབ་ཆེན་ཁག་ཏུ་འཛུལ་ཞུགས་བྱས་ཡོད་པ་དང་། དེ་ནི་འདས་པའི་ལོ་ངོ་བཅུ་ཕྲག་སྔོན་གྱི་གྲངས་འབོར་དང་བསྡུར་ན་ལྡབ་ ༥ ཡིས་ཇེ་མང་དུ་ཕྱིན་ཡོད་འདུག
གསར་འགོད་པ། པདྨ་རྒྱལ།
