ཊི་རུམ་ཕི་གཞུང་གིས་བོད་མིའི་རོགས་དངུལ་འགོག་འཆར་ཡོད་ན་ཞུ་སྐུལ་གནང་དགོས།

ཨ་རིའི་སྲིད་འཛིན་ཊི་རུམ་ཕིའི་གཞུང་གིས་བོད་མིར་རོགས་དངུལ་སྤྲོད་བཞིན་པ་ཡོངས་རྫོགས་མཚམས་འཇོག་བྱ་རྒྱུའི་གྲོས་འཆར་བཏོན་ཡོད་པ་དེར་མོས་མཐུན་གནང་མིན་ཨ་རིའི་གྲོས་ཚོགས་ཀྱི་སྐུ་དབང་ཡིན་འདུག

དེ་རིང་རྒྱ་གར་བང་ཆེན་གསར་ཁང་གིས་གནས་ཚུལ་སྤེལ་བ་ལྟར་ན། ཨ་རིའི་སྲིད་འཛིན་ཊི་རུམ་ཕིའི་སྲི་གཞུང་གསར་པས། དེ་སྔ་ཨ་རིའི་གཞུང་གིས་བོད་མིར་རོགས་དངུལ་སྤྲོད་བཞིན་པ་ཡོངས་རྫོགས་མཚམས་འཇོག་བྱ་རྒྱུའི་སྔོན་རྩིས་འཆར་འབུལ་ཞུས་ཡོད་པ་དང་། དེར་གྲོས་ཚོགས་ཀྱིས་རྒྱབ་སྐྱོར་ཐོབ་ཚེ་ ༢༠༡༨ ཟླ་ ༡༠ ཚེས་ ༡ ཉིན་ནས་ལག་བསྟར་བྱ་རྒྱུ་ཡིན་སྐོར་སོགས་བཀོད་འདུག

གནས་ཚུལ་དེའི་སྐོར་ལ་འདི་གའི་གསར་འགོད་པས་བོད་མིའི་སྒྲིག་འཛུགས་ཀྱི་མགྲིན་ཚབ་པ་དྭགས་པོ་བསོད་ནམས་ནོར་བུ་ལགས་སུ་བཅར་འདྲི་ཞུས་པར། ཁོང་གིས་ད་ལྟའི་ཆར་གསར་ལམ་ཁག་ཏུ་ཐོན་པའི་གནས་ཚུལ་ཙམ་ལས་བོད་མིའི་སྒྲིག་འཛུགས་ཀྱིས་གནས་ཚུལ་ཁ་གསལ་ཤེས་རྟོགས་ཐུབ་མེད་སྐོར་དང་། གལ་སྲིད་ཨ་རིའི་གཞུང་གིས་གྲོས་འཆར་དེ་འདྲ་ཞིག་བཏོན་ཡོད་སྲིད་ཀྱང་། མཐའ་མའི་ཐག་གཅོད་གནང་མཁན་གྲོས་ཚོགས་ཆགས་ཡོད་སྐོར་གསུངས་སོང་།

རྒྱ་གར་བང་ཆེན་སྟེང་། ཊི་རུམ་ཕི་གཞུང་གིས་ལོ་ངོ་བཅུ་ཕྲག་ཕྱིན་པའི་བོད་ཀྱི་ཐེབས་རྩ་ (Tibet Fund) དང་ངག་དབང་ཆོས་འཕེལ་ཤེས་ཡོན་བརྗེ་ལེན་ (Ngwang Choephel Fellows) སོགས་ཀྱི་རོགས་དངུལ་མེད་པ་བཟོ་རྒྱུ་ཡིན་འདུག་པ་དང་། ལྕམ་ནན་སི་ཕི་ལོ་སི་མཆོག་གི་མགྲིན་ཚབ་པ་སྐུ་ཞབས་ཧམ་མེལ་ (Drew Hammill) ལགས་ཀྱིས་གསར་འགོད་པར། ཨ་རིའི་གྲོས་ཚོགས་འོག་མའི་དམངས་གཙོ་ཚོགས་པའི་དབུ་ཁྲིད་ལྕམ་ནན་སི་ཕི་ལོ་སི་མཆོག་གིས་ཊི་རུམ་ཕི་གཞུང་གིས་བོད་མིའི་རོགས་དངུལ་ཡོངས་རྫོགས་མཚམས་འཇོག་བྱེད་རྒྱུའི་གྲོས་འཆར་དེའི་ཐད་སེམས་འཚུབ་ཆེན་པོ་གནང་གི་ཡོད་ཚུལ་བརྗོད་འདུག

ཨ་རིའི་གཞུང་སྔོན་མ་དག་གིས་བོད་མིའི་ཆོས་དང་རིག་གཞུང་། བོད་པའི་སྐད་ཡིག་དང་ངོ་བོ་སྲུང་སྐྱོབ། ལྷག་པར་དུ་བོད་མིའི་འགྲོ་བ་མིའི་ཐོབ་ཐང་གི་གནས་སྟངས་ཡར་རྒྱས་ཡོང་ཐབས་སོགས་ཀྱི་ཆེད་དུ་བཙན་བྱོལ་བོད་མིའི་སྒྲིག་འཛུགས་གཙོས་པའི་ལྷོ་ཨེ་ཤ་ཡའི་ནང་གི་བོད་མི་སྐྱབས་བཅོལ་བ་སོགས་ལ་ཨ་སྒོར་ས་ཡ་མང་པོའི་རོགས་རམ་བྱེད་བཞིན་ཡོད་པ་མ་ཟད། ཨེ་ཤ་ཡ་རང་དབང་རླུང་འཕྲིན་ཁང་དང་ཨ་རིའི་རླུང་འཕྲིན་ཁང་། དེ་བཞིན། དྷ་རམ་ས་ལའི་གཞུང་འབྲེལ་མིན་པའི་ཚོགས་པ་ཁག་བཅས་ལའང་རོགས་དངུལ་མང་པོ་སྤྲོད་བཞིན་ཡོད་ཀྱང་། ཊི་རུམ་ཕི་གཞུང་གིས་རོགས་དངུལ་དེ་དག་ཡོངས་རྫོགས་བཀག་སྡོམ་བྱེད་འཆར་ཡོད་པ་མ་ཟད། ༢༠༡༧ ལོའི་ཨ་རིའི་ཟུར་བཅད་སྔོན་རྩིས་ནང་རོགས་དངུལ་ཨ་སྒོར་ས་ཡ་ ༡༤.༧ ཡོད་ཀྱང་། ཕྱི་ལོ་ ༢༠༡༨ ལོར་ས་ཡ་ ༧ བཅས་ཀྱི་ཉུང་དུ་བཏང་ཡོད་སྐོར་སོགས་བཀོད་འདུག

བོད་མིའི་སྒྲིག་འཛུགས་ཀྱི་མགྲིན་ཚབ་པ་དྭགས་པོ་བསོད་ནམས་ནོར་བུ་ལགས་ཀྱིས་བརྗོད་དོན། ད་ལྟའི་ཆར་གསར་འགྱུར་བརྒྱུད་ལམ་དུ་གནས་ཚུལ་ཐོན་པ་ཙམ་མ་གཏོགས་ཁ་གསལ་ཤེས་རྟོགས་མེད་པ་དང་། དེའི་རྒྱབ་ལྗོངས་ག་འདྲ་ཡིན་པ་དང་མ་འོངས་པར་ག་འདྲ་ཆགས་མིན་གསལ་པོ་གང་ཡང་མེད་ལ། ཨ་རིའི་གཞུང་ནས་གྲོས་འཆར་བཏོན་པ་ཙམ་ལས་མཐའ་མའི་ཐག་གཅོད་དེ་གྲོས་ཚོགས་ནས་གནང་དགོས་ཀྱི་ཡོད་པ་དང་། བོད་མིའི་སྒྲིག་འཛུགས་ཀྱི་ངོས་ནས་ཨ་རིའི་སྐུ་ཚབ་དོན་གཅོད་དང་བོད་དོན་རྒྱབ་སྐྱོར་བ། དཔེར་ན་ཉེ་བའི་ཆར་ཨ་རིའི་གྲོས་ཚོགས་འོག་མའི་དམངས་གཙོ་ཚོགས་པའི་ཚོགས་གཙོ་ལྕམ་ནན་སི་ཕི་ལོ་སི་མཆོག་གིས་དབུ་འཁྲིད་པའི་ཨ་རིའི་གཞུང་གི་དངུལ་དང་འབྲེལ་ཡོད་འཐུས་མི་མང་པོ་ཞིག་འདིར་ཕེབས་ཡོད་པ་དང་། བོད་མིའི་སྒྲིག་འཛུགས་ནས་གལ་སྲིད་སྲིད་འཛིན་ཌོ་ནལ་ཊོམ་ཕུ་མཆོག་གི་གཞུང་ངོས་ནས་བོད་མིའི་རོགས་དངུལ་གྱི་སྔོན་རྩིས་ཐོག་ལ་གཅོག་ཆ་གནང་བའི་ཐབས་ཤེས་གནང་གི་ཡོད་ན། མཐའ་མའི་སྔོན་རྩིས་གཏན་འབེབས་གྲོས་ཚོགས་ནས་གནང་གི་ཡོད་དུས་ཐག་གཅོད་དེ་བཞིན་མི་ཡོང་བའི་ཞུ་སྐུལ་ཞུས་ཡོད་ལ། དེ་བཞིན་ཁོང་རྣམ་པ་འདིར་ཕེབས་སྐབས་བོད་ཀྱི་འགྲོ་བ་མིའི་ཐོབ་ཐང་དང་། ཆོས་དང་རིག་གཞུང་སོགས་ལ་རྒྱབ་སྐྱོར་གནང་རོགས་ཞུས་པ་ལྟར་མུ་མཐུད་དུ་གནང་གི་ཡིན་གསུངས་ཡོད་སྐོར་གསུངས་བྱུང་།

མ་འོངས་པར་གྲོས་འཆར་དེ་ཇི་བཞིན་གཏན་འབེབས་བྱུང་བ་ཡིན་ན། ད་ལྟ་ཨ་རིའི་གཞུང་གིས་བོད་མི་སྐྱབས་བཅོལ་བར་རོགས་དངུལ་ཨ་སྒོར་ས་ཡ་ ༢༣ གནང་རྒྱུ་ཞལ་བཞེས་གནང་ཡོད་པ་དེར་འགྱུར་བ་འགྲོ་སྲིད་མིན་དྲིས་པར་ཁོང་གིས། ད་ལྟའི་ཆར་གསར་འགྱུར་ཙམ་ལས་གནས་ཚུལ་ཁ་གསལ་བྱུང་མེད་སྟབས་བཤད་ཚོད་ཐུག་ཁག་པོ་ཡིན་སྐོར་གསུངས་སོང་།

ཐེངས་འདིར་ཨ་རིའི་གཞུང་གིས་བོད་མིའི་རོགས་དངུལ་མཚམས་འཇོག་གི་གནད་དོན་དེ་བོད་མིའི་སྒྲིག་འཛུགས་ཙམ་མ་ཡིན་པར་གཞུང་འབྲེལ་མིན་པའི་ཚོགས་པ་མང་པོ་ཞིག་ལའང་འབྲེལ་བ་ཆགས་ཡོད་སྟབས། ཚོགས་སྒེར་སོ་སོའི་ངོས་ནས་ག་རེ་གནང་རྒྱུ་ཡོད་མེད་དྲིས་པར། ཨ་རིའི་ཕྱི་སྲིད་ལས་ཁུངས་བརྒྱུད་རོགས་དངུལ་རག་མཁན་དེ་བོད་མིའི་སྒྲིག་འཛུགས་གཅིག་པུ་མིན་པར་གཞུང་འབྲེལ་མིན་པའི་ཚོགས་པ་མང་པོ་ཞིག་ལའང་རག་གི་ཡོད་པར་བརྟེན། ཚང་མས་ཞུ་སྐུལ་གནང་དགོས་པ་དེ་གལ་ཆེན་པོ་རེད། ཨ་རི་དམངས་གཙོའི་རྒྱལ་ཁབ་ཅིག་ཡིན་པའི་ཆ་ནས་གནས་ཚུལ་ག་རེ་ཡིན་ནའང་མི་མང་ལ་འབྲེལ་བ་ཤུགས་ཆེན་པོ་ཆགས་ཡོད་ལ། མི་མང་གིས་བསམ་ཚུལ་འདོན་པ་དང་ཞུ་སྐུལ་བྱེད་པའི་ལམ་ག་ཡོད་སྟབས། ང་ཚོ་ཚང་མའི་ངོས་ནས་འབད་བརྩོན་བྱས་ཏེ་ཨ་རིའི་གྲོས་ཚོགས་དང་གཞུང་ལ་ཞུ་སྐུལ་བྱས་པ་ཡིན་ན། ཁོང་ཚོའི་རྒྱལ་ཁབ་དེ་རྒྱ་ནག་ལྟར་མ་ཡིན་པར་མི་མང་གི་བསམ་ཚུལ་ལ་ཉན་མཁན་གྱི་དམངས་གཙོའི་རྒྱལ་ཁབ་ཅིག་ཡིན་སྟབས། མི་མང་གི་བསམ་ཚུལ་དང་ཞུ་སྐུལ་ལ་དོ་སྣང་བྱེད་དགོས་པ་ཞིག་ཆགས་ངེས་རེད། ཅེས་གསུངས་བྱུང་།

གསར་འགོད་པ། པདྨ་མཚོ།