ཟླ་འདིའི་ཕྱི་ཚེས་ ༢༧ ཉིན། ཏཱ་ལའི་བླ་མ་མཐོ་རིམ་སློབ་གཉེར་ཁང་དུ། འདི་ལོའི་རབ་འབྱམས་མཐར་ཕྱིན་མཛད་སྒོ་ཚོགས་ཡོད་པ་དང་། སྐུ་མགྲོན་གཙོ་བོར་ལྷོ་སྤྱི་ཆོས་འཕེལ་ཐུབ་བསྟན་ལགས་དང་། དམིགས་བསལ་སྐུ་མགྲོན་དུ་བྷིང་ལོར་སྨན་རྩིས་ཁང་གི་སྨན་པ་རྡོ་རྗེ་རབ་བརྟན་གཉིས་ཕེབས་ཡོད་འདུག
རྒྱ་གར་མེ་སོར་གཙུག་ལག་སློབ་ཆེན་གྱི་ངོས་ལེན་འོག ཏཱ་ལའི་བླ་མ་མཐོ་རིམ་སློབ་གཉེར་ཁང་དུ་བོད་རྒྱ་སྐད་གཉིས་ཆེད་སྦྱོང་རབ་འབྱམས་དང་། གཞན་སྡེ་ཚན་ ༤ ནས་ཉེ་བའི་གཙུག་ལག་རབ་འབྱམས་པ་དང་སྤྱིར་བཏང་རིག་གནས་རབ་འབྱམས་པའི་སློབ་མ་ ༡༢༦ བསླབ་པ་མཐར་སོན་བྱུང་ཡོད་པ་རེད།
མཐར་ཕྱིན་མཛད་སྒོའི་ཐོག་སྐུ་མགྲོན་གཙོ་བོ་ཆོས་འཕེལ་ཐུབ་བསྟན་ལགས་ཀྱིས། ༧གོང་ས་སྐྱབས་མགོན་ཆེན་པོ་མཆོག་གི་དཀའ་དྲིན་ལ་བརྟེན་ནས། ང་ཚོར་མཐོ་རིམ་སློབ་གཉེར་ཁང་འདི་ལྟ་བུ་ཞིག་ཡོད་པ་དེ་སྤོབས་པ་སྐྱེས་འོས་པ་ཞིག་རེད་ལ། འདི་ནས་ཐོན་པའི་སློབ་གཉེར་བ་ཚོས་མ་འོངས་པར་མུ་མཐུད་སློབ་སྦྱོང་མཐར་སོན་པ་བྱས་ཏེ། ང་ཚོའི་སྤྱི་ཚོགས་ལ་ཕན་ཐོགས་ཡོད་པ་ཞིག་དང་། ༧གོང་ས་སྐྱབས་མགོན་ཆེན་པོའི་རེ་བ་སྒྲུབ་ཐུབ་མཁན་ཞིག་བྱ་དགོས་པ་དེ་ཅ་ཧང་གལ་ཆེན་པོ་རེད། ཅེས་བརྗོད་ཡོད་འདུག
དམིགས་བསལ་སྐུ་མགྲོན་སྨན་པ་རྡོ་རྗེ་རབ་བརྟན་ལགས་ཀྱིས། མཐོ་རིམ་སློབ་གྲྭ་འདི་ནི་མ་འོངས་པར་ང་ཚོ་བོད་པ་ཙམ་མ་ཟད། རྒྱལ་སྤྱི་རང་བཞིན་གྱི་སློབ་གཉེར་བྱ་སའི་ལྟེ་གནས་ཤིག་ཆགས་ཡོང་གི་རེད་ལ། ༧གོང་ས་སྐྱབས་མགོན་ཆེན་པོ་མཆོག་གི་མཚན་གནས་རྗེས་འབྲེལ་གྱི་སློབ་གྲྭ་འདི་ལྟ་བུ་ཞིག་ཡོད་པ་བཞིན། འདི་ནས་ཐོན་མཁན་ཚོས་རང་ཉིད་ཀྱི་སྤོབས་པ་དང་གཟི་བརྗིད་ཅིག་ཏུ་བསམ་དགོས་པ་རེད། ཅེས་བརྗོད་འདུག
ཏཱ་ལའི་བླ་མ་མཐོ་རིམ་སློབ་གཉེར་ཁང་གི་བོད་ཡིག་སྡེ་ཚན་གྱི་འགན་འཛིན་ཆོས་རྒྱལ་ལགས་ཀྱིས། ཏཱ་ལའི་བླ་མ་མཐོ་རིམ་སློབ་གཉེར་ཁང་གི་བོད་ཡིག་སྡེ་ཚན་ནང་། ཆེད་སྦྱོང་རིག་གནས་རབ་འབྱམས་ལ་དཔྱད་རྩོམ་བྲིས་ནས་བསླབ་པ་མཐར་སོན་པ་ ༢༧ དང་། སྤྱིར་བཏང་རིག་གནས་རབ་འབྱམས་མཐར་སོན་པ་ཁ་ཤས་ཡོད། ད་ལོའི་བསླབ་པ་མཐར་སོན་མཁན་ཚོ་སྤྱིའི་ཆ་ནས་མཐོ་རིམ་སློབ་གཉེར་ཁང་ཁག་གཞན་དག་ལས་ཡག་པོ་ཡོད་པ་རེད་ཅེས་བཤད་ཐུབ་པ་ཞིག་མ་རེད་ལ་སྐྱོ་བ་ཡོད་པ་རེད་ཅེས་ཀྱང་བཤད་མི་ཐུབ་མོད། རྐང་པ་མཉམ་གཤིབ་ཀྱིས་འགྲོ་ཐུབ་པ་ཞིག་ཡོད་པ་རེད།
ང་ཚོས་དམིགས་བྱ་གཙོ་བོ་དེ་སློབ་གཉེར་བ་དག་གི་ཕྱི་ནང་གི་ཀུན་སྤྱོད་ཀྱི་ཐད་ལ་རེ་བ་ཆེན་པོ་བརྒྱབ་ཡོད། ཤེས་ཡོན་ཡོད་ནའང་མིའི་ཀུན་སྤྱོད་དང་གཤིས་སྤྱོད་དེ་ཉམ་ཉེས་སུ་སོང་བ་ཡིན་ན། ཤེས་ཡོན་གྱི་རྣམ་གྲངས་ག་ཚོད་ཡོད་ཀྱང་། དེ་བེད་སྤྱོད་མེད་པ་ལྟ་བུ་ཞིག་དང་སྤྱི་ཚོགས་ལ་ཕན་ཐོགས་མེད་པ་ཞིག་ཏུ་འགྱུར་གྱི་རེད། སྐབས་རེར་སྤྱི་ཚོགས་ལ་ཕན་པ་ལས་གནོད་པ་གནོད་པ་ཆེ་བ་ཡོང་གི་ཡོད་པ་རེད། སློབ་གཉེར་བ་ཚོས་ད་ལོའི་དཔྱད་རྩོམ་ལ་མཚོན་ན། ང་རང་གིས་ཆ་ཚང་ཞིག་བཀླགས་ཐུབ་མ་སོང་མོད། ཚང་མར་མིག་བཤེར་ལྟ་བུ་རེ་བྱས་ཡིན། འབྲེལ་ཡོད་དགེ་རྒན་དག་གིས་དཔྱད་ཞིབ་དང་ཕྱོགས་བསྡོམས་བརྒྱ་ཆ་ལ་བལྟས་ན། སློབ་མ་མང་ཆེ་བའི་དཔྱད་རྩོམ་ཡག་པོ་བྱུང་འདུག ངས་འདི་ལོའི་མཐར་ཕྱིན་སློབ་མ་ཚོའི་ཟླ་གསུམ་རིང་གི་མཉམ་གསོག་སྙན་ཐོ་དེ་ཆ་ཚང་བཀླགས་པ་ཡིན། མཉམ་གསོག་སྙན་ཐོ་ལ་བལྟས་ན་སློབ་གཉེར་བ་ཚོའི་ཤེས་ཡོན་སྤྱིའི་གནས་ཚད་དང་འབྲི་རྩལ་ཡག་པོ་འདུག་བསམ་པ་བྱུང་། ཞེས་བརྗོད་སོང་།
རྒྱ་ཡིག་སྡེ་ཚན་གྱི་འགན་འཛིན་དགེ་རྒན་སྒྲོན་དཀར་སྐྱིད་ལགས་ཀྱིས། སྤྱིར་རྒྱ་ཡིག་གི་སྡེ་ཚན་འདི་དང་ཐོག་གསར་འཛུགས་བྱེད་སྐབས། སློབ་གཉེར་བ་གང་འཚམ་ཕོན་ཆེན་པོ་ཡོད་ཀྱང་། རྗེས་སུ་སློབ་མ་མང་པོ་ཞིག་གིས་རྩ་དགོངས་ཞུས་སོང་། ན་ནིང་སློབ་གཉེར་བ་ཁག་ཅིག་མཐར་ཕྱིན་པ་རེད། འདི་ལོར་དངོས་སུ་མཐར་ཕྱིན་དཔྱད་རྩོམ་བྲིས་ནས་བསླབ་པ་མཐར་སོན་མཁན་སློབ་གཉེར་བ་ ༡༠ དང་། མཐར་ཕྱིན་དཔྱད་རྩོམ་མེད་པར་སློབ་མཐར་ཕྱིན་མཁན་ ༢ ཁྱོན་སློབ་གཉེར་བ་ ༡༢ ཡོད། སྤྱིར་རྒྱ་ཡིག་སྡེ་ཚན་གྱི་སློབ་གཉེར་བ་ཚོའི་སློབ་སྦྱོང་གི་གནས་རིམ་པ་དེ། ལོ་རིམ་དང་པོའི་སྐབས་ཀྱི་རྨང་གཞིའི་སློབ་ཚན་ནས་འཁྲིད་ཀྱི་ཡོད་ལ། དེ་ནི་སློབ་གཉེར་བ་དག་ཐོག་མར་འབྱོར་སྐབས་ཁ་ཤས་ལ་རྒྱ་ཡིག་གི་ཆུ་ཚད་ཞན་པ་དང་། ཁ་ཤས་ཀྱིས་ཡུན་རིང་ལ་རྒྱ་ཡིག་དང་འབྲེལ་འདྲིས་མ་བྱས་པར་བརྗེད་པ། སློབ་མ་ཚོའི་ཤེས་ཚད་དོ་མི་མཉམ་པ་བཅས་ལ་བརྟེན་ཏེ་རྨང་གཞིའི་སློབ་ཚན་ནས་འཁྲིད་དགོས་བྱུང་བ་རེད། ང་འདིར་བསླེབས་ནས་རྒྱ་ཡིག་སྡེ་ཚན་ནས་སྐབས་གཉིས་མཐར་ཕྱིན་ཡོད་པ་རེད། སྤྱི་ཡོངས་ནས་སློབ་གཉེར་བ་ཚོའི་ཆུ་ཚད་ཡག་པོ་ཡོད་པ་དང་། རེ་གཉིས་ཤིག་རྒྱ་ནག་དང་ཐེ་ཝན་སོགས་ཀྱི་སློབ་མ་ཚོར་བསྡུར་ནའང་བསྡུར་རིན་ཡོད་པ་ཞིག་ཆགས་ཡོད། ལྷག་པར་དུ་ན་ནིང་གི་མཐར་ཕྱིན་སློབ་མའི་ཁྲོད་ཆུ་ཚད་ཡག་པོ་མང་པོ་ཡོད། འདི་ལོའི་མཐར་ཕྱིན་དཔྱད་རྩོམ་འབྲི་མཁན་ཚོར་མཚོན་ན་དེ་ཙམ་འདོད་པ་ཁེངས་པ་ཞིག་བྱུང་མ་སོང་། ཞེས་བརྗོད་སོང་།
བོད་ཡིག་ཆེད་སྦྱོང་རབ་འབྱམས་སྡེ་ཚན་གྱི་སློབ་གཉེར་བ་བསྟན་འཛིན་ཆོས་གྲགས་ལགས་ཀྱིས། སྔོན་ཆད་བོད་ཡིག་དང་བོད་ཀྱི་རིག་གནས་ལ་དུང་ཞེན་ཙམ་གྱིས་དཔེ་ཀློག་ལྟ་བུ་རེ་བྱས་ནས་བསྡད་པ་ལས་ཡག་པོ་ཞིག་ཤེས་ཡོད་པ་མ་རེད། ཡིན་ནའང་རྗེས་སུ་འདི་ག་མཐོ་རིམ་སློབ་གཉེར་ཁང་དུ་བསླེབས་ནས། དགེ་རྒན་གྱི་ཆ་ནས་གཞི་རིམ་དགེ་རྒན་ཚོ་དང་མི་འདྲ་བ་དང་། སློབ་སྦྱོང་གི་མཁའ་དབུགས་སོགས་ཕྱོགས་གང་ཐད་ནས་མི་འདྲ་བ་ཞིག་ཡིན་སྟབས། རང་ཉིད་རང་གིས་བསྐྱེད་བསྲིང་བྱས་ན་ཡང་བྱ་ཐུབ་པ་ཞིག་རེད་ལ། སློབ་ཚན་ཁག་གི་དགེ་རྒན་དག་གི་སློབ་འཁྲིད་ཀྱི་ནུས་པར་བརྟེན་ནས། ལོ་ངོ་བཞིའི་རིང་གི་སློབ་སྦྱོང་གི་བརྒྱུད་རིམ་དེ་ཇི་ལྟར་ཚར་བའང་ཤེས་མ་སོང་། སློབ་ཆེན་གྱི་མི་ཚེའམ་ལོ་ངོ་འདི་དག་གི་དུས་ཡུན་དེ་སློབ་འཁྲིད་ཙམ་ལ་ཡར་འགྲོ་མར་འོང་གི་དུས་འདས་བ་ཙམ་མིན་པར། ཆེས་སྤྱིར་བཏང་གི་མི་ཞིག་གི་མི་ཚེ་ལ་དགོས་པའི་མཐོ་རིམ་སྤྱི་ཚོགས་ཀྱི་སློབ་གསོ་ཞིག་མྱོང་ཐུབ་སོང་།
སྔོན་ཆད་གཞི་རིམ་སློབ་གྲྭའི་ནང་འབྲི་རྩལ་ལ་སྦྱང་གོམས་མེད་ཀྱང་། འདིར་རྩོམ་རིག་དགེ་རྒན་དང་ལོ་རྒྱུས་དགེ་རྒན་སོགས་ཀྱིས་འབྲེལ་ཡོད་ཀྱི་ནང་སྦྱོང་ཟེར་ན་རེད། དཔྱད་རྩོམ་ལྟ་བུ་མང་པོ་འབྲི་བཅུག་པ་དེས་ད་ལོའི་དཔྱད་རྩོམ་འབྲི་རྒྱུར་ཕན་ཐོགས་ཆེན་པོ་བྱུང་སོང་། ང་རང་གི་མཐར་ཕྱིན་དཔྱད་རྩོམ་དེ་<བོད་ཀྱི་སྙན་ངག་གསར་བའི་དཔྱད་བརྗོད་ཁག་གི་འགལ་མཐུན་ལ་དཔྱད་པ།>ཞེས་པ་དེ་ཡིན། ཐོག་མ་བསམ་བློ་བཏང་ནས་སྡོད་རྒྱུ་ལས་ཇི་ལྟར་འབྲི་དགོས་པ་མི་ཤེས་པའི་དཀའ་ངལ་འཕྲད་སོང་ཡང་། རྗེས་ལ་སློབ་གྲྭའི་ངོས་ནས་དཔྱད་རྩོམ་འབྲི་ཐབས་སྐོར་ལ་ཆེད་མཁས་པ་གདན་འདྲེན་ཞུས་པ་དང་། རྩོམ་རིག་དགེ་རྒན་ཨ་འབྲུག་དཀོན་མཆོག་ལགས་བཅས་ཀྱི་ལམ་སྟོན་འོག མཐར་ཕྱིན་དཔྱད་རྩོམ་དེ་འབྲི་ཐུབ་པ་བྱུང་སོང་། ང་ལ་མཚོན་ན་མཐར་ཕྱིན་དཔྱད་རྩོམ་དེ་མི་ཚེའི་ནང་གི་རྩོམ་ཡིག་རིང་ཤོས་དང་། ད་ལྟའི་བར་དུ་དཔྱད་རྩོམ་ཞིག་ལ་དཀའ་ལས་བརྒྱབ་པ་ཐེངས་དང་པོ་དེ་ཡིན། དེ་དང་འབྲེལ་ནས་དཔེ་ཆ་དང་དཔྱད་རྩོམ་སུམ་བརྒྱ་ལྷག་བཀླགས་དགོས་བྱུང་སོང་། ཞེས་བརྗོད་སོང་།
རྒྱ་ཡིག་རིག་གནས་རབ་འབྱམས་སྡེ་ཚན་གྱི་སློབ་གཉེར་བ་ཟོན་ཐར་སྐྱིད་ལགས་ཀྱིས། ང་རང་ལ་མཚོན་ན་དང་ཐོག་རྒྱ་གར་ལ་བསླེབས་རྗེས། ཤེས་རབས་དགའ་ཚལ་སློབ་གླིང་ལ་ཕྱིན་པ་ཡིན། རྗེས་ལ་ཏཱ་ལ་བླ་མ་མཐོ་རིམ་སློབ་གཉེར་ཁང་དུ་རྒྱ་ཡིག་རིག་གནས་རབ་འབྱམས་ཐོག་མུ་མཐུད་སློབ་སྦྱོང་བྱེད་ཐུབ་པ་བྱུང་བ་དེས་ཕན་ཐོགས་ཆེན་པོ་བྱུང་སོང་། ཐོག་མ་སོ་སོར་རྒྱ་ཡིག་གི་ཤེས་ཚད་ཡག་པོ་མེད་ཀྱང་ལོ་ངོ་བཞིར་ཧུར་བརྩོན་བྱས་པ་དེས་ད་ལྟ་ལས་ཀ་བྱེད་ཐུབ་ཀྱི་འདུག་བསམ་པའི་གདེང་ཚོད་ཡོད། ངའི་མཐར་ཕྱིན་དཔྱད་རྩོམ་དེ་<བོད་ཀྱི་དུར་མཆོད་>སྐོར་ཡིན་ཡང་། མཐར་ཕྱིན་དཔྱད་རྩོམ་དེ་འདོད་ཁེངས་པ་ཞིག་བྱུང་མ་སོང་དྲན་བསྡད་ཡོད། གང་ཡིན་ཟེར་ན། དཔྱད་རྩོམ་འབྲི་ཐབས་སྐོར་ལ་སྦྱོང་མེད་སྟབས། གློ་བུར་དུ་དཔྱད་རྩོམ་ཆེན་པོ་ཞིག་འབྲི་དགོས་དུས་དཀའ་ལས་ཁག་པོ་འདུག ཅེས་བརྗོད་སོང་།
ཏཱ་ལའི་བླ་མ་མཐོ་རིམ་སློབ་གཉེར་ཁང་ནི་ ༢༠༠༨ ལོར་རྒྱ་གར་ལྷོ་ཕྱོགས་བྷང་ལོར་གྲོང་ཁྱེར་དུ་གསར་འཛུགས་གནང་བ་དང་། ཕྱི་ལོ་ ༢༠༡༣ ལོ་ནས་རྒྱ་གར་མེ་སོར་གཙུག་ལག་སློབ་ཆེན་གྱི་ངོས་ལེན་འོག བོད་རྒྱ་སྐད་གཉིས་ཆེད་སྦྱོང་རབ་འབྱམས་དང་། གཞན་སྡེ་ཚན་བཞི་ནས་ཉེ་བའི་གཙུག་ལག་རམ་འབྱམས་དང་། སྤྱིར་བཏང་རིག་གནས་རབ་འབྱམས་སོགས་འགྲོ་བཞིན་ཡོད་པ་དང་། ད་ཆར་སློབ་ཐོན་དེའི་ནང་སློབ་མ་ ༣༢༠ ཙམ་ཡོད་པ་དང་། ཐེངས་འདིར་སློབ་མ་ ༡༢༦ བསླབ་པ་མཐར་སོན་བྱུང་ཡོད་པ་རེད།
གསར་འགོད་པ། པདྨ་རྒྱལ།
