ཊི་རུམ་ཕི་དང་མཱོ་ཌེ་གཉིས་ཀྱིས་ཕོ་བྲང་དཀར་པོའི་ནང་འཐམ་འཁྱུད་བྱས་ཏེ་རྒྱལ་ཁབ་གཉིས་ཀྱི་འབྲེལ་བ་ཡར་རྒྱས་གཏོང་རྒྱུ་ཁེག་ཐག་བྱས།

སེ་ཨན་ཨན་གསར་ཁང་གིས་༢༠༡༧།༦།༢༧ཉིན་སྤེལ། ཁ་སང་གཟའ་ཟླ་བའི་ཉིན། ཨ་རིའི་ཕོ་བྲང་དཀར་པོའི་ནང་། རྒྱ་གར་གྱི་སྲིད་བློན་མཱོ་ཌེ་དང་ཨ་རིའི་སྲིད་འཛིན་ཊི་རུམ་ཕི་གཉིས་ཐུག་འཕྲད་བྱས་ཡོད་པ་དང་། དེ་ནི་ཕྱོགས་གཉིས་བར་གྱི་དུས་ཡུན་རིང་པོའི་འབྲེལ་ལམ་ཁྱབ་བསྒྲགས་བྱས་པ་ཞིག་དང་། དུས་ཡུན་ཐུང་ངུའི་ནང་བྱུང་བའི་ཕྱི་སྲིད་ཀྱི་དཀའ་རྙོག་ཁག་ལ་གདོང་ལེན་བྱེད་ཐབས་ཤིག་རེད།

ཨ་རི་དང་རྒྱ་གར་བར་གྱི་འབྲེལ་ལམ་ཁྲོད་རྒྱལ་ཁབ་གཉིས་བར་དམག་དོན་མཉམ་ལས་བྱ་རྒྱུ་བྱས་ཡོད། པ་ཀི་སི་ཐན་དང་རྒྱ་གར་བར་གྱི་རྩོད་རྙོག་ཁྲོད་ནས་རྒྱ་གར་གྱི་སྲིད་བློན་ཨ་རིའི་ནང་རང་དབང་གིས་སྐོར་སྐྱོད་གནང་སྐབས། ཨ་རིའི་སྲིད་འཛིན་གསར་བས་རྒྱ་གར་ལ་དམག་དོན་མཉམ་ལས་བྱེད་རྒྱུ་དམིགས་འབེན་དུ་བཟུང་ཡོད་པ་དེས་སྲིད་འཛིན་ཊི་རུམ་ཕི་རྒྱ་གར་དང་པ་ཀི་སི་ཐན་བར་གྱི་དཀའ་རྙོག་ནང་ལྷུང་ཡོད་པ་རེད།

ཐེངས་འདིར་རྒྱལ་ཁབ་གཉིས་ཀྱི་དབུ་ཁྲིད་ཀྱིས་ཡང་དང་བསྐྱར་དུ་མཛའ་བརྩེའི་ལག་འཇུ་དང་འཐམ་འཁྱུད་བྱས་པ་དེས་དུས་ཡུན་ཐུང་ངུའི་ནང་རྒྱལ་ཁབ་གཉིས་བར་མཛའ་བརྩེ་ཟབ་མོ་ཆགས་ཡོད་པའི་རྣམ་པ་མངོན་ཡོད་པ་རེད། ཊི་རུམ་ཕི་གཞུང་གིས་སྲིད་བློན་མཱོ་ཌེ་ལ་ས་གདན་དམར་པོ་བཏང་ནས་ཕེབས་བསུ་བྱས་པ་མ་ཟད། ཕོ་བྲང་དཀར་པོའི་སྲིད་འཛིན་ལས་ཤག་ནང་དགོང་ཟས་གསོལ་སྟོན་ཡང་བཤམས་ཡོད།

ཁ་སང་ཚེས་ ༢༦ ཉིན་རྒྱལ་ཁབ་གཉིས་ཀྱི་དབུ་ཁྲིད་ཐུག་འཕྲད་སྐོར་གྱི་གཞུང་འབྲེལ་གསལ་བསྒྲགས་སྐབས། སྲིད་འཛིན་ཊི་རུམ་ཕི་དང་སྲིད་བློན་མཱོ་ཌེ་གཉིས་ཕན་ཚུན་ལ་བརྩེ་བའི་འཐམ་འཁྱུད་ཡང་བསྐྱར་བྱས། ཐེངས་འདིར་གྲ་སྒྲིག་ཅི་ཡང་མེད་པའི་ཨ་རིའི་སྲིད་འཛིན་དང་། འཛམ་གླིང་སྟེང་དཔལ་འབྱོར་འཕེལ་རྒྱས་མགྱོགས་ཤོས་རྒྱ་གར་སྲིད་བློན་གཉིས་ཀྱི་ཐུག་འཕྲད་འདིས་རྩོད་རྙོག་མང་པོ་ཞིག་ཐག་གཅོད་བྱེད་དགོས་ཀྱང་། ད་སྔ་དཀའ་རྙོག་གང་ཡང་ཐག་གཅོད་བྱུང་བ་ཕྱི་གསལ་ནང་གསལ་ཐོག་གསལ་བསྒྲགས་བྱས་མེད།

ཆབ་སྲིད་ཀྱི་མདུན་ཅོག་སྟེང་དཀའ་རྙོག་ཐག་ཆོད་མེད་པ་དེ་ནི། ཨ་རིས་རྒྱ་གར་ནི་རང་གི་འཐབ་གྲོགས་ཆེན་པོ་ཞིག་ཡིན་པའི་ངོས་འཛིན་བྱེད་པ་ལས་ལྷག་པའི་ཆབ་སྲིད་ཐབས་ཇུས་གཞན་ཞིག་ཡིན་ཡང་སྲིད། ༢༠༡༦ ལོར་ཨོ་བྷ་མའི་གཞུང་གིས་རྒྱ་གར་གྱི་ཁྱིམ་མཚེས་རྒྱལ་ཁབ་པ་ཀི་སི་ཐན་ལ་དོ་ཕོགས་མ་བཟོས་པའི་ཐོག་ནས་རྒྱ་གར་ནི་ཨ་རིའི་མཐུན་ཕྱོགས་རྒྱལ་ཁབ་ཅིག་ཡིན་པའི་མཚན་གནས་སྤྲད་ཡོད།

ཕོ་བྲང་དཀར་པོའི་ནང་ཐུག་འཕྲད་སྐབས། ཊི་རུམ་ཕིས་ཕྱོགས་གཉིས་བར་གྱི་ཆབ་སྲིད་ལངས་ཕྱོགས་མི་གཅིག་པའི་རིགས་ལའང་བདེན་ཁའི་མགོ་བོ་ལྕོག་ལྕོག་བྱས་ཏེ་མཐུན་ཕྱོགས་རྒྱལ་ཁབ་རྒྱ་གར་ལ་ཡིད་རྟོན་བྱས། ཊི་རུམ་ཕིས་ “གནད་དོན་མང་པོའི་ཐོག་ང་ཚོས་ཕན་ཚུན་ལ་མོས་མཐུན་བྱས་པ་ཡིན། ཐུག་ཕྲད་ཀྱི་མཇུག་ཏུ་ངས་ནི་ཕྱོགས་གཉིས་ཀྱི་གནད་དོན་ཚང་མར་མོས་མཐུན་བྱ་ངེས་ཡིན།” ཞེས་བརྗོད་ཡོད།

རྒྱ་སེ་མེ་ཏོག་སྤྱི་གླིང་དུ་ཊི་རུམ་ཕི་དང་མཱོ་ཌེ་ཐུག་འཕྲད་སྐོར་གྱི་གཞུང་འབྲེལ་གསལ་བསྒྲགས་སྐབས། ཁོང་གཉིས་ཀས་རྒྱལ་ཁབ་གཉིས་བར་དམག་དོན་མཉམ་ལས་བྱེད་ཕྱོགས་སྐོར་བཤད་ཡོད། ཊི་རུམ་ཕིས་རྒྱལ་ཁབ་ཀྱི་བདེ་འཇགས་སྲུང་སྐྱོབ་དང་འབྲེལ་བའི་མཐུན་ཕྱོགས་རྒྱལ་ཁབ་ནི་ “ཧ་ཅང་གལ་ཆེན་པོ” ཡིན་ཚུལ་དང་། ཁ་ཆེ་འཇིགས་སྐུལ་དྲག་སྤྱོད་པར་གདོང་ལེན་བྱེད་ཕྱོགས་ཐད་རྒྱལ་ཁབ་གཉིས་ཀྱིས་མཉམ་འབྲེལ་བྱེད་དགོས་ལུགས་བཤད་ཡོད།

ཊི་རུམ་ཕིས་ “ང་ཚོའི་རྒྱལ་ཁབ་གཉིས་ལ་གདུག་ཅན་དྲག་སྤྱོད་པས་རྡུང་རྡེག་བཏང་བ་རེད། ང་ཚོའི་རྒྱལ་ཁབ་གཉིས་མཉམ་འབྲེལ་གྱིས་ཐལ་སྤྱོད་ལྟ་བ་འཛིན་མཁན་དྲག་སྤྱོད་པའི་སྒྲིག་འཛུགས་ཁག་གཏོར་རྒོལ་གཏོང་དགོས” ཞེས་ཟེར། རྒྱ་གར་སྲིད་བློན་མཱོ་ཌེ་ཡིས་ཀྱང་སྐད་སྒྱུར་བ་བརྒྱུད་དེ་ཕྱོགས་གཉིས་མཉམ་ལས་བྱེད་ཕྱོགས་སྐོར་ནས་ཨབ་གྷན་ནང་རྒྱ་གར་གྱིས་ཨ་རིར་རོགས་འདེགས་བྱ་རྒྱུ་ཡིན་ཚུལ་བཤད།

ཉེ་ཆར་རྒྱ་གར་སྲིད་བློན་མཱོ་ཌེ་ཡིས་རྒྱ་གར་ནང་ཐོན་སྐྱེད་བྱེད་བཞིན་པའི་ཨ་རིའི་ཚོང་གཉེར་ཁང་ཁག་གི་དངོས་ཟོག་སྟེང་ “རྒྱ་གར་ནས་བཟོས”ཞེས་པའི་ཚོང་རྟགས་འགོད་དགོས་པའི་དགོས་འདུན་བཏོན་ཡོད་པ་དང་། གཟའ་ཟླ་བའི་ཉིན་ཁོས་ “ཨ་རི་ཡང་བསྐྱར་རླབས་ཆེན་ཡིན།”ཞེས་པའི་འབོད་ཚིག་དེ་འགོད་པའི་ལྟ་ཚུལ་བཏོན་ཡོད་པ་དང་། འབོད་ཚིག་དེ་ནི་ ༢༠༡༦ ལོར་ཊི་རུམ་ཕིའི་སྲིད་འཛིན་འོས་བསྡུའི་ལས་འགུལ་གྱི་འབོད་ཚིག་རེད། མཱོ་ཌེ་ཡིས་ “ང་རང་གི་རྒྱ་གར་གསར་བའི་ལྟ་ཚུལ་དང་སྲིད་འཛིན་ཊི་རུམ་ཕིའི་ཨ་རི་ཡང་བསྐྱར་རླབས་ཆེན་བཟོ་བའི་ལྟ་ཚུལ་གཉིས་ཀྱིས་ང་ཚོའི་བར་གྱི་མཉམ་ལས་ཁོར་ཡུག་རྒྱ་ཇེ་ཆེར་བཏང་ཡོད། ངས་གསལ་བོར་བཤད་ཐུབ་པ་ཞིག་ནི། ཨ་རི་ནང་བཞིན་རྒྱ་གར་ལའང་དཔལ་འབྱོར་ཡར་རྒྱས་གོང་འཕེལ་འགྲོ་བའི་འདོད་འདུན་ཆེན་པོ་ཡོད་པ་དང་། རྒྱ་གར་གྱི་དཔལ་འབྱོར་འཕེལ་རྒྱས་དེ་རྒྱལ་སྤྱིའི་དཔལ་འབྱོར་འཕེལ་རྒྱས་དང་ཁོད་སྙོམས་ཡོང་རྒྱུ་ནི་ཨ་རིའི་འདོད་འདུན་ཡང་རེད” ཅེས་ཟེར།

གཟའ་ཟླ་བའི་ཉིན། ཊི་རུམ་ཕི་རྒྱ་གར་སྲིད་བློན་མཱོ་ཌེ་ལ་ཐུག་འཕྲད་བྱེད་པར་གྲ་སྒྲིག་གནང་མཁན་ཨ་རིའི་གཞུང་གི་དཔོན་རིགས་ཚོས། ཊི་རུམ་ཕིས་རྒྱ་གར་དང་པ་ཀི་སི་ཐན་བར་གྱི་འབྲེལ་ལམ་བརྟན་པོ་མེད་པ་ཤེས་ཀྱི་ཡོད་ཀྱང་། མི་འབོར་ཐེར་འབུམ་ ༡.༣ ཡོད་པའི་རྒྱལ་ཁབ་ཅིག་གི་བདེ་འཇགས་སྲུང་སྐྱོབ་ཐད་ནས་རྒྱ་གར་ནི་མཐུན་ཕྱོགས་རྒྱལ་ཁབ་ཅིག་ཏུ་ངོས་འཛིན་བྱེད་ཀྱི་ཡོད་པ་དང་། ཊི་རུམ་ཕིའི་ལྟ་སྟངས་དེའི་ནང་ད་ལྟ་ཨ་རིས་རང་གི་མཐུན་ཕྱོགས་རྒྱལ་ཁབ་དང་ཚོང་འབྲེལ་རྒྱལ་ཁབ་ཁག་ལ་མཁོ་ཚོང་བྱེད་བཞིན་པའི་བཟོ་ལས་རིག་རྩལ་ཡང་ཚུད་ཡོད་ཚུལ་བཤད་འདུག

ཨ་རིའི་ཆེད་མཁས་པ་ཚོས། ཨ་རི་དང་རྒྱ་གར་གཉིས་བར་གྱི་ཚོང་འབྲེལ་དེས་མ་འོངས་པར་པ་ཀི་སི་ཐན་དང་ཨ་རིའི་བར་གྱི་འབྲེལ་ལམ་ལ་ཉེན་ཁ་བཟོ་སྲིད་པའི་ཚོད་དཔག་བྱེད་ཀྱིན་ཡོད། མིང་བརྗོད་འདོད་མེད་པའི་ཨ་རིའི་དཔོན་རིགས་ཤིག་གིས་ “ཨ་རི་དང་རྒྱ་གར་བར་གྱི་འབྲེལ་ལམ་དང་། ཨ་རི་དང་པ་ཀི་སི་ཐན་བར་གྱི་འབྲེལ་ལམ་དེ་རྒྱལ་ཁབ་སོ་སོའི་ཁེ་ཕན་དང་གྲོས་ཆོད་གཞིར་བཟུང་བྱུང་བ་ཞིག་ཡིན་སྟབས། ཨ་རིའི་ངོས་ནས་ཕྱོགས་གཉིས་ཀྱི་འབྲེལ་ལམ་ཆད་པའི་དཀའ་རྙོག་མཐོང་འདོད་མེད” ཟེར།

ཊི་རུམ་ཕི་གཞུང་གིས་རྒྱ་གར་དང་ཨ་རིའི་བར་གྱི་འབྲེལ་ལམ་སྔར་ལྷག་ཤུགས་ཆེ་རུ་གཏོང་འདོད་ཡོད་འདུག གོང་ཞུས་དཔོན་རིགས་དེས་ཨ་རིས་པ་ཀི་སི་ཐན་ལ་འབྲེལ་ལམ་མུ་མཐུད་རྒྱུན་འཁྱོངས་བྱེད་འདོད་ཡོད་ཀྱང་། ཨ་རིས་རྒྱ་གར་དང་པ་ཀི་སི་ཐན་བར་གྱི་རྩོད་རྙོག་ལའང་སེམས་ཁྲལ་བྱེད་ཀྱི་ཡོད་ཚུལ་བཤད་འདུག

ཕོ་བྲང་དཀར་པོའི་བློན་ཆེན་ལྷན་ཚོགས་ཀྱི་ཚོགས་ཁང་དུ་ཐུག་འཕྲད་སྐབས། ཊི་རུམ་ཕིས་རྒྱ་གར་སྲིད་བློན་མཱོ་ཌེ་ལ་རྒྱ་གར་གྱིས་ཨ་རིར་དམག་གི་སྒྲིག་ཆས་མཁོ་འཚོང་བྱས་པར་ཐུགས་རྗེ་ཆེ་ཞུས་ཡོད། ཊི་རུམ་ཕིས་ “ང་ཚོས་བཟོས་པའི་དམག་གི་སྒྲིག་ཆས་འདི་ལྟ་བུ་ཞིག་གཞན་སུས་ཀྱང་བཟོས་ཡོད་པ་མ་རེད། དེར་བརྟེན། ཁྱེད་རང་ལ་ཐུགས་རྗེ་ཆེ་ཞུ་རྒྱུ་ཡིན” ཞེས་བརྗོད་ཡོད་པ་དང་། སྐབས་དེར་སྲིད་བློན་མཱོ་ཌེ་ཡིས་སྲིད་འཛིན་ཊི་རུམ་ཕིས་རྒྱ་གར་དང་སྲིད་བློན་ཁོ་རང་ལ་བརྩི་བཀུར་ཞུས་པར་ཡིད་ཚིམ་པའི་རྣམ་འགྱུར་བསྟན་ཡོད་འདུག

གཟའ་ཟླ་བའི་ཉིན་རྒྱུག་ཆེ་བའི་སྤྱི་ཚོགས་བརྒྱུད་ལམ་ཊི་ཝེ་ཊིར་བེད་སྤྱོད་གཏོང་མཁན་དབུ་ཁྲིད་གཉིས་ཐུག་འཕྲད་གནང་སྟེ་ཕྱོགས་གཉིས་བར་གྱི་འབྲེལ་ལམ་ཇེ་ཟབ་ཏུ་བཏང་ཡོད། ད་ལྟ་སྲིད་བློན་མཱོ་ཌེ་ལ་ཊི་ཝེ་ཊིར་བརྒྱུད་ལམ་དུ་རྗེས་འབྲང་དྲ་གྲོགས་ས་ཡ་ ༣༡ ཡོད་པ་དང་། ཊི་རུམ་ཕི་ལ་ས་ཡ་ ༣༢ ལྷག་ཡོད་འདུག ཊི་རུམ་ཕིས་ཐ་ན་རྒྱ་སེ་མེ་ཏོག་སྤྱི་གླིང་དུའང་སྤྱི་ཚོགས་བརྒྱུད་ལམ་སྟེང་ཕྱོགས་གཉིས་བར་གྱི་མཛའ་འབྲེལ་གསལ་བསྒྲགས་བྱས་ཡོད། ཊི་རུམ་ཕིས་ཁོ་རང་གི་ཊི་ཝེ་ཊིར་སྟེང་“རྒྱ་གར་དང་ཨ་རིའི་བར་གྱི་འབྲེལ་ལམ་ནི་རྒྱུས་མེད་ཅིག་མིན་ལ། ད་ལྟ་གཞི་ནས་ཇེ་ལེགས་སུ་ཕྱིན་པ་ཞིག་ཀྱང་མིན། སྲིད་བློན་མཱོ་ཌེ་དང་ངེད་གཉིས་སྤྱི་ཚོགས་བརྒྱུད་ལམ་སྟེང་གི་འཛམ་གླིང་དབུ་ཁྲིད་ཡིན་ཞེས་ངས་སྤོབས་པོ་ཆེན་པོས་བསྒྲགས་འདོད་བྱུང” ཞེས་དང་། “ངེད་གཉིས་ཀྱིས་སྤྱི་ཚོགས་བརྒྱུད་ལམ་བརྒྱུད་ནས་རྒྱལ་ཁབ་གཉིས་ཀྱི་མི་མང་དང་དབུ་ཁྲིད་བར་ཐད་ཀར་འབྲེལ་འདྲིས་བྱེད་ཐུབ་པར་ཡིད་ཆེས་བྱེད་ཀྱི་ཡོད” ཅེས་འཁོད་ཡོད།

གསར་འགོད་པ། པདྨ་རྒྱལ།