རྒྱ་དམག་གིས་རྒྱ་གར་གྱི་གནས་སྐོར་བ་བཀག

རྒྱ་ནག་གི་མཐའ་མཚམས་དམག་མིས་གངས་རིན་པོ་ཆེ་དང་མ་ཕམ་གཡུ་མཚོར་གནས་སྐོར་དུ་འགྲོ་མཁན་རྒྱ་གར་བ་ ༤༧ གྱི་ལམ་ཁ་བཀག་སྡེ་ཕྱིར་སློག་བཏང་ཡོད་འདུག

དེ་རིང་རྒྱ་གར་དུས་བབ་ཀྱིས་གནས་ཚུལ་སྤེལ་བ་ལྟར་ན། རྒྱ་ནག་གིས་ཉེ་ལམ་བོད་ནང་དུ་ཡོད་པའི་སྟོད་མངའ་རིའི་གངས་རིན་པོ་ཆེ་དང་མ་ཕམ་གཡུ་མཚོར་གནས་སྐོར་དུ་འགྲོ་མཁན་རྒྱ་གར་བ་ ༤༧ འབྲས་ལྗོངས་དང་བོད་ཀྱི་ས་མཚམས་སྣ་སྟོད་ལ་(Nathula)ནས་བཀག་ཡོད་སྟབས་གནས་སྐོར་བ་དེ་དག་ཕྱིར་མི་ལོག་ཐབས་མེད་བྱུང་ཡོད་འདུག

རྒྱ་ནག་གཞུང་གིས་ལོ་ལྟར་གངས་རིན་པོ་ཆེ་དང་མ་ཕམ་གཡུ་མཚོར་གནས་སྐོར་དུ་འགྲོ་མཁན་རྒྱ་གར་བ་ཚོར་ཆོག་མཆན་སྤྲོད་ཀྱི་ཡོད་ཀྱང་། ད་རེབ་བཀག་སྡོམ་བྱེད་དགོས་པའི་རྒྱུ་མཚན་ནི་གངས་རིན་པོ་དང་མ་ཕམ་གཡུ་མཚོའི་ཉེ་འཁོར་གྱི་ལམ་ཁ་རྣམས་བཟོ་བཅོས་རྒྱག་གི་ཡོད་སྟབས། གནས་སྐབས་རིང་གནས་སྐོར་བ་རྣམས་གཏོང་ཐུབ་ཀྱི་མེད་སྐོར་བརྗོད་ཡོད་པ་མ་ཟད། རྒྱ་གར་གྱི་གནས་སྐོར་བའི་བདེ་དོན་དེ་རྒྱ་ནག་ལ་འགན་ཡོད་པ་དང་། ཁོང་ཚོའི་བདེ་འཇགས་ལ་སེམས་འཁུར་བྱེད་ཀྱི་ཡོད་ཚུལ་བརྗོད་འདུག

དེ་རིང་རྒྱ་ནག་ཕྱི་དྲིལ་བློན་ཆེན་གྱི་སྐུ་ཚབ་གཱེང་སཱུ་ཧཱང་(Gen Suhang)ཟེར་བས་གསར་འགོད་པར། “ང་ལ་གནས་ཚུལ་འབྱོར་བ་ལྟར་ན། བོད་ནང་གནས་སྐོར་དུ་འགྲོ་མཁན་རྒྱ་གར་བ་དེ་དག་མ་བཀག་སྔོན་ལ་དེའི་ཐད་ཕྱོགས་གཉིས་ཀྱི་གཞུང་བར་གྲོས་བསྡུར་བྱུང་འདུག” ཅེས་བརྗོད་པ་ལས་གནས་ཚུལ་ཁ་གསལ་གང་ཡང་བརྗོད་མི་འདུག

གནས་སྐོར་བ་ཚོས་གནད་དོན་གསལ་བོ་མ་ཤེས་སྟབས། དེ་ནི་གནམ་གཤིས་ཡག་པོ་མེད་པར་ས་དང་རི་ཉིལ་བའི་དོན་རྐྱེན་འབྱུང་བར་དོགས་ཏེ་བཀག་སྡོམ་བྱས་ཚུལ་གླེང་སློང་བྱེད་ཀྱི་ཡོད་ཀྱང་། རྒྱ་ནག་ཕྱི་དྲིལ་སྐུ་ཚབ་ཀྱིས་གནད་དོན་དེའི་ཐད་ལ་རྒྱ་དཀར་ནག་གི་ཕྱི་འབྲེལ་མི་སྣའི་བར་གྲོས་བསྡུར་བྱས་ཟིན་པ་ཞིག་ཡིན་སྐོར་བརྗོད་ཡོད།

བདུན་ཕྲག་སྔོན་མའི་ནང་རྒྱ་གར་གྱི་གནས་སྐོར་བ་ ༤༧ ཙམ་འབྲས་ལྗོངས་མངའ་སྡེའི་རྒྱ་བོད་ས་མཚམས་སྣ་སྟོད་ལ་བརྒྱུད་དེ་གངས་རིན་པོ་ཆེ་དང་མ་ཕམ་གཡུ་མཚོར་འགྲོ་བཞིན་ཡོད་པ་རྒྱ་ནག་གི་དམག་མིས་བཀག་ཏེ་ཕྱིར་སློག་བཏང་ཡོད། རྒྱ་གར་ཕྱི་དྲིལ་བློན་ཆེན་གྱི་སྐུ་ཚབ་གྷོ་པཱལ་བྷག་ལཱེ་(Gopal Baglay)ཡིས་རྒྱ་གར་རྒྱལ་ས་ལྡི་ལིར་རྒྱ་གར་གྱི་གནས་སྐོར་བ་ཚོ་སྣ་སྟོད་ལ་བརྒྱུད་ནས་འགྲོ་མཁན་ཚོའི་སྐོར་ལ་ད་ལྟ་རྒྱ་ནག་གཞུང་ལ་གྲོས་བསྡུར་བྱེད་བཞིན་ཡོད་ཅེས་བརྗོད་འདུག

ད་ལོ་རྒྱ་གར་གཞུང་ལ་གངས་རིན་པོ་ཆེ་དང་མ་ཕམ་གཡུ་མཚོར་གནས་མཇལ་དུ་འགྲོ་མཁན་ ༣༥༠ ཡིས་ཐོ་འགོད་བྱས་ཡོད་པ་དང་། རྒྱ་གར་གཞུང་གིས་མི་དེ་དག་སྡེ་ཚན་བདུན་དུ་བགོས་ཏེ་གཏོང་གི་ཡོད་ཀྱང་གློ་བུར་དུ་རྒྱ་ནག་ཕྱོགས་ནས་བཀག་སྡོམ་བྱས་པ་དེ་ནི་ཧང་སང་དགོས་པའི་གནད་དོན་ཞིག་ཆགས་ཡོད།

༢༠༡༥ ལོར་རྒྱ་དཀར་ནག་བར་གྲོས་མོལ་བྱས་ཏེ་ས་མཚམས་སྣ་སྟོད་ལ་བརྒྱུད་དེ་གངས་རིན་པོ་ཆེ་དང་མ་ཕམ་གཡུ་མཚོར་གནས་སྐོར་དུ་འགྲོ་མཁན་ཚོར་ལམ་ཁ་ཕྱེ་ཡོད་པ་དང་། ལམ་ཁ་དེ་ནི་རྒྱ་གར་ནས་གངས་རིན་པོ་ཆེ་འགྲོ་བའི་ལམ་ཁ་གཉིས་པ་དེ་ཆགས་ཡོད། ༢༠༡༥ ལོའི་གོང་དུ་(Lipu)ཞེས་པ་དེ་ནས་རི་བོ་ཧི་མཱ་ལ་ཡཱ་བརྒྱུད་ནས་འགྲོ་དགོས་པ་དང་། དེ་ནི་རྒྱ་གར་ནས་གངས་རིན་པོ་ཆེར་འགྲོ་བའི་ལམ་དང་པོ་དེ་ཡིན་པ་དང་། ལམ་ཁ་དེ་ཐག་རིང་ཞིང་ཉེན་ཁ་ཅན་ཞིག་ཡིན་སྟབས། སྐབས་དེར་རྒྱ་གར་ཕྱི་དྲིལ་ལས་ཁུངས་ཀྱིས་གནས་སྐོར་བ་ཚོར་ལམ་ཁའི་དཀའ་ངལ་ལ་གདོང་ལེན་བྱེད་ཕྱོགས་ལ་རོགས་རམ་ལམ་སྟོན་བྱེད་ཀྱི་ཡོད། སྣ་སྟོད་ལ་ནས་གངས་རིན་པོ་ཆེ་བར་སྤྱི་ལེ་ ༡༥༠༠ ཡོད་པ་དང་། ལམ་ཁ་དེ་ནི་ལཱི་ཕཱུ་ལ་དང་མ་འདྲ་བར་ལམ་ཁར་དཀའ་ཁག་ཉུང་ཞིང་སྣུམ་འཁོར་འགྲོ་ལམ་ཡོད་སྟབས་ལོ་ན་རྒན་པའི་རིགས་སྐྱོད་པར་སྟབས་བདེ་བོ་ཡོད།

དེང་སྐབས་རྒྱ་དཀར་ནག་བར་གྱི་འབྲེལ་ལམ་ཇེ་སྡུག་ཏུ་འགྲོ་བཞིན་ཡོད་པ་དང་། རྒྱ་གར་གྱིས་རྒྱ་ནག་དང་པཱ་ཀི་སི་ཐན་གྱི་ཚོང་འབྲེལ་ཐད་མ་དགའ་བའི་རྣམ་འགྱུར་སྟོན་གྱི་ཡོད་ལ། རྒྱ་གར་གྱིས་རྒྱལ་སྤྱིའི་རྡུལ་ཕྲན་མཚོན་ཆ་བཀག་སྡོམ་ལས་གཞིར་རྒྱབ་སྐྱོར་ཤུགས་ཆེན་བྱེད་ཀྱི་ཡོད་པ་ནི་རྒྱ་ནག་གི་བསམ་ཚུལ་ལས་ལྡོག་ཕྱོགས་ཆགས་ཡོད་པ་མ་ཟད། ཐེངས་འདིར་རྒྱ་ནག་གི་དམག་མིས་རྒྱ་གར་གྱི་གནས་སྐོར་བ་བཀག་སྡོམ་བྱས་པ་དེས་རྒྱལ་ཁབ་གཉིས་ཀྱི་འབྲེལ་ལམ་སྔར་ལས་སེམས་འཚབ་ཀྱི་རང་བཞིན་ཞིག་ཆགས་ཡོད།

ཟླ་འདིའི་ཚེས་མགོར་རྒྱ་གར་གྱི་སྲིད་བློན་ནཱ་རན་དྷར་མོ་ཌེ་(Narendra Modi)དང་། རྒྱ་ནག་གི་སྲིད་འཛིན་ཞི་ཅིན་ཕིན་གཉིས་ཀཱ་ཛཱག་(Kazakh)རྒྱལ་ཁབ་ཀྱི་རྒྱལ་ས་ཨཱས་ཊ་ནཱ་(Astana)ཞེས་པར་ཚོང་དོན་ཚོགས་འདུ་ཞིག་གི་སྟེང་ཐུག་འཕྲད་བྱུང་ཡོད་པ་དང་། ཚོགས་འདུའི་སྟེང་མཱོ་ཌེ་ཡིས་རྒྱ་དཀར་ནག་གཉིས་ཀྱིས་རྒྱལ་སྤྱིའི་ཚོང་འབྲེལ་ཐོག་ནུས་པ་སྔར་ལས་ཆེ་བ་འདོན་དགོས་པ་དང་། ཕན་ཚུན་བརྩི་བཀུར་གྱི་ཐོག་ནས་རྩོད་རྙོག་རྣམས་གྲོས་མོལ་བརྒྱུད་དེ་སེལ་ཐབས་བྱེད་དགོས་པའི་རེ་འདུན་བཏོན་ཡོད།

གངས་རིན་པོ་ཆེ་ནི་ཧིན་རྡུའི་ཆོས་ལུགས་ནང་གི་གནས་རི་ཧ་ཅང་རྩ་ཆེན་ཞིག་ཏུ་བརྩི་བ་དང་། གནས་དེར་ལྷ་ཆེན་དབང་ཕྱུག་ཆེན་པོ་དང་སྐུ་ལྕམ་ལྷ་མོ་ཨུ་མ་གཉིས་ཀྱིས་སྒོམ་བརྒྱབ་སྟེ་ཡུན་རིང་བཞུགས་ཡོད་སྐོར་སོགས་ཧིན་རྡུའི་གཞུང་མང་པོའི་ནང་བསྟན་ཡོད་འདུག

གསར་འགོད་པ། ཉི་མ་ཚེ་རིང་།