ཁེ་ན་ཌའི་གཞས་པ་གྲགས་ཅན་ཇ་སི་ཊིན་བྷི་བྷར་(Justin Bieber)ལགས་སུ་མི་མང་གི་འདོད་བློ་དང་མི་མཐུན་པའི་ཀུན་སྤྱོད་ཞན་ལུགས་བརྗོད་དེ་རྒྱ་ནག་གཞུང་གིས་ཁོ་པའི་རོལ་དབྱངས་སྤྲོ་སྟོན་རྒྱ་ནག་ཏུ་འཚོག་རྒྱུ་བཀག་སྡོམ་བྱས་ཡོད།
ཧོང་ཀོང་རང་དབང་གསར་ཁང་གིས་ ༢༠༡༧།༧།༢༡ ཉིན་སྤེལ་བའི་གནས་ཚུལ།
བྷི་བྷར་གྱིས་ཕྱི་ལོ་ ༢༠༡༦ ལོའི་ཟླ་ ༣ ནས་རང་ཉིད་ཀྱི་གཞས་ཀྱི་བརྙན་འཁོར་གསར་ཤོས་དེ་དྲིལ་བསྒྲགས་བྱེད་བཞིན་ཡོད། ཁོ་པས་ཟླ་ ༩ ཚེས་ ༢༧ ཉིན་ཧོང་ཀོང་དུ་རོལ་དབྱངས་སྤྲོ་སྟོན་སྐོང་འཚོགས་བྱས་ཡོད་ཀྱང་སྐམ་ས་ཆེན་མོར་གྲོ་སྒྲིག་བྱེད་ཐུབ་མེད།
ཁོ་པར་དུང་ཞེན་ཅན་ཞིག་གིས་གཟའ་ཉི་མའི་ཉིན་པེ་ཅིན་གྲོང་ཁྱེར་རིག་གཞུང་དོན་གཅོད་ཁང་གི་དྲ་ཚིགས་ཐོག་ “ཇ་སི་ཊིན་བྷི་བྷར་ནི་རིག་རྩལ་ཆེ་ལ། གཟེངས་རྟགས་མང་པོ་ཐོབ་པའི་གྲགས་ཅན་གཞས་པ་ཞིག་རེད། ཁོང་ལ་དགའ་ཞེན་ཆེ་བའི་སྐམ་ས་ཆེན་མོའོ་མི་རྣམས་ལ་ཁོང་གི་སྙན་དབྱངས་ལ་རོལ་བའི་ཐོབ་ཐང་མེད་པ་གང་ཡིན་ནམ།” ཞེས་འབྲི་འགོད་བྱས་ཡོད།
རིག་གཞུང་དོན་གཅོད་ཁང་དེས་གཟའ་མིག་དམར་ཉིན། ཁོ་པར་དུང་ཞེན་ཅན་ཚོའི་ཚོར་སྣང་ལ་དོ་ཁུར་ཡོད་ཚུལ་དང་ལྷན། “ཇ་སི་ཊིན་བྷི་བྷར་རིག་རྩལ་ལྡན་པ་ཞིག་ཡིན་རུང་། རྩོད་རྙོག་ཅན་གྱི་ཕྱི་རྒྱལ་གྱི་ན་གཞོན་གཞས་པ་ཞིག་རེད།” ཅེས་དང་། “ང་ཚོས་གོ་ཤེས་ཐུབ་པ་ནི། ཁོ་པ་སྤྱི་ཚོགས་ཀྱི་གལ་ཆེའི་མི་སྣ་ཞིག་ཡིན་པའི་ཆ་ནས་ཕྱི་རྒྱལ་གྱི་སྤྱི་ཚོགས་འཚོ་བ་དང་རྒྱལ་ནང་དུ་རོལ་དབྱངས་སྤྲོ་སྟོན་གྱི་སྐབས། དམངས་ཀྱི་འདོད་བློ་དང་མི་མཐུན་པའི་ཀུན་སྤྱོད་ཞན་པའི་སྐྱོན་ཆ་ཆེན་པོ་ཡོད་པ་དེ་ཡིན།” ཞེས་ལན་འདེབས་བྱས་ཡོད་པ་དང་། “ཁྲོམ་རར་རོལ་དབྱངས་སྤྲོ་སྟོན་གྱི་དགོས་མཁོ་སྟངས་འཛིན་དང་། རྒྱལ་ཁབ་ཏུ་རོལ་དབྱངས་སྤྲོ་སྟོན་གྱི་ཁྲོམ་རྭའི་ཁོར་ཡུག་གཙང་མ་ཡོང་སླད། ཀུན་སྤྱོད་མི་བཟང་བའི་མི་སྣ་ངོ་སྤྲོད་བྱེད་པ་ནི་འོས་ཤིང་འཚམས་པ་མིན། འོན་ཀྱང་ཁོ་པ་ལོ་ན་ཆེ་རུ་འགྲོ་རིམ་བཞིན་ཀུན་སྤྱོད་ཡར་རྒྱས་དང་། མང་ཚོགས་ཀྱིས་དངོས་གནས་དགའ་མོས་བྱེད་པའི་གཞས་པ་ཞིག་ཏུ་གྱུར་བའི་རེ་བ་བྱེད་ཀྱི་ཡོད་” ཅེས་འབྲི་བཀོད་བྱས་ཡོད།
ཕྱི་ལོ་ ༢༠༡༣ ལོར་བྷི་བྷར་གྱིས་རྒྱ་ནག་གི་པེ་ཅིང་གྲོང་ཁྱེར་དང་། ཏཱ་ལེན། ཧྲང་ཧེ་བཅས་སུ་རོལ་དབྱངས་སྤྲོ་སྟོན་བྱས་ཡོད།
ཕྱི་ལོ་ ༢༠༡༤ ལོར་བྷི་བྷར་གྱིས་ཉི་འོང་གི་ཊོག་ཡོ་གྲོང་ཁྱེར་དུ་ཡོད་པའི། རྩོད་རྙོག་ཅན་གྱི་ཡ་སུ་ཀུ་ནི་(Yasukuni )ལྷ་ཁང་མདུན་དུ་བླངས་པའི་རང་ཉིད་ཀྱི་འདྲ་པར་ཞིག་དྲ་ལམ་དུ་སྤེལ་བར་བརྟེན། རྒྱ་ནག་ནས་ཁ་རྡུང་དང་སྐྱོན་བརྗོད་དྲག་པོ་བྱས་ཡོད། ལྷ་ཁང་དེ་ནི་རྒྱ་ཕྱོགས་ནས་ཉི་འོང་གིས་དམག་སར་ནག་ཉེས་བསགས་ཏེ་སྲོག་ཁྲིམས་ཕོག་པའི་དཔོན་རིགས་ལ་དྲན་གསོ་བྱེད་པའི་མཚོན་རྟགས་སུ་ངོས་འཛིན་བྱེད་ཀྱི་ཡོད་པ་དང་། ལྷ་ཁང་དེར་ལྟ་སྐོར་ལ་འགྲོ་སྐྱོད་བྱེད་མི་སུ་ཡིན་རུང་སྐྱོན་བརྗོད་བྱེད་ཀྱི་ཡོད།
སྐབས་དེར་བྷི་བྷར་གྱིས་ཨིན་སི་ཊ་གྷ་རམ་(Instagram)བརྒྱུད་ “ང་ཉི་འོང་དུ་ཡོད་སྐབས་ལྷ་ཁང་སྙིང་རྗེ་མོ་ཞིག་མཐོང་བ་དེར། རླངས་འཁོར་ཁ་ལོ་བར་སྐྱོད་དགོས་པར་བཤད་པ་ཡིན། དེ་གསོལ་འདེབས་བྱ་ཡུལ་གྱི་ལྷ་ཁང་ཞིག་ཡིན་པར་འཁྲུལ་བ་རེད། སུ་ལ་ཕོག་ཐུག་ཕྱིན་ཡོད་ཀྱང་དགོངས་གསོལ་ཞུ་རྒྱུ་ཡིན། ང་རྒྱ་ནག་ལ་དགའ་ཞེན་ཆེ་ལ་ཉི་འོང་ལ་དགའ་ཞེན་ཆེ།”ཞེས་བྲིས་ཡོད་པ་རེད།
དེ་སྔོན་བོད་མིའི་དབུ་ཁྲིད་༸གོང་ས་ཏཱ་ལའི་བླ་མ་མཆོག་དང་ཐུགས་འབྲེལ་ཡོད་པའི་རྒྱུ་མཚན་གྱིས་ནུབ་ཕྱོགས་པའི་གཞས་པ་མང་པོ་རྒྱ་ནག་གིས་བཀག་འགོག་བྱས་ཡོད།
ཨ་མི་རི་ཀའི་རོག་རོལ་དབྱངས་རུ་ཁག་བྷོན་ཇོ་ཝི་(Bon Jovi)ཡིས། ཕྱི་ལོ་ ༢༠༡༠ ལོར་ཐེ་ཝན་དུ་རོལ་དབྱངས་སྤྲོ་སྟོན་ཞིག་གི་སྐབས། སྡིངས་ཆའི་གྱང་ངོས་སུ་༸གོང་ས་མཆོག་གི་སྐུ་པར་སྒྲིག་གཤོམ་ཞུས་པར་བརྟེན། ཕྱི་ལོ་ ༢༠༡༥ ལོའི་ཟླ་ ༩ རུ་ཁག་དེས་རྒྱ་ནག་ཏུ་གོ་སྒྲིག་བྱས་པའི་རོལ་དབྱངས་སྤྲོ་སྟོན་བཀག་འགོག་བྱས་པ་རེད།
ཨ་མི་རི་ཀའི་པོབ་རོལ་དབྱངས་རུ་ཁག་དམར་སྨུག་ལྔ་(Maroon 5)ཞེས་པའི་རུ་ཁག་གི་མི་ཞིག་གིས་༸གོང་ས་མཆོག་ལ་ཊུའི་ཊར་(Twitter)ཐོག་འཁྲུངས་སྐར་གྱི་འཚམས་འདྲི་ཞུས་རྐྱེན། ཕྱི་ལོ་ ༢༠༡༥ ལོར་ཧྲང་ཧེ་གྲོང་ཁྱེར་དུ་གོ་སྒྲིག་བྱས་པའི་རོལ་དབྱངས་སྤྲོ་སྟོན་ཕྱིར་འཐེན་བྱེད་དུ་བཅུག་ཡོད་པ་རེད།
དབྱིན་ཇིའི་རོག་རོལ་དབྱངས་རུ་ཁག་ཨོ་སེ་སི་(Oasis)ཡི་གྷི་ཊར་(guitarist)དཀྲོལ་མཁན་ནོལ་གྷ་ལ་གྷར་(Noel Gallagher)གྱིས་ཕྱི་ལོ་ ༡༩༩༧ ལོར་བོད་རང་བཙན་རོལ་དབྱངས་དུས་སྟོན་ནང་མཉམ་ཞུགས་བྱས་པར་བརྟེན། རོག་རོལ་དབྱངས་རུ་ཁག་དེས་ཕྱི་ལོ་ ༢༠༠༩ ལོར་གོ་སྒིག་བྱས་པའི་རོལ་དབྱངས་སྤྲོ་སྟོན་ཕྱིར་འཐེན་བྱས་པ་དང་། ཨའེ་སེ་ལན་ཌའི་གཞས་པ་ཇོག་ (Bjork) གིས་བོད་དོན་ལས་འགུལ་སྤེལ་བར་བརྟེན། ཕྱི་ལོ་ ༢༠༠༨ ལོའི་ཧྲང་ཧེ་རུ་གོ་སྒྲིག་བྱས་པའི་རོལ་དབྱངས་སྤྲོ་སྟོན་བཀག་འགོག་བྱས་ཡོད།
ཧོང་ཀོར་རང་དབང་གསར་ཁང་གིས་ཇེ་སེ་ཊིན་བྷི་བྷར་གྱི་རོལ་དབྱངས་འཛིན་སྐྱོང་དོ་དམ་ཁང་ལ་གནད་དོན་དེ་སྐོར་བསམ་ཚུལ་ཇི་ཡོད་འབྲེལ་གཏུགས་བྱས་ཡོད།
