བོད་རིགས་ཕ་མ་གཉིས་ཀྱི་བཟོད་སྒོམ་ལ་མི་མང་པོས་ཡིད་སྨོན་ཤོར།

ཨ་རིར་ཡོད་པའི་བོད་རིགས་ཕྲུ་གུ་ཞིག་ལ་རླངས་འཁོར་གྱི་བརྡབ་སྐྱོན་བྱུང་སྟེ་རྐྱེན་འདས་སུ་ཕྱིན་ཡོད་ཀྱང་ཁོང་གི་ཕ་མ་གཉིས་ཀྱིས་ཁ་ལོ་བ་དེ་བཟོད་སྒོམ་གུ་ཡངས་བཏང་ཡོད་འདུག

ཟླ་འདིའི་ཚེས་  ༡༡ ཉིན་གྱི་མཚན་མོའི་ཆུ་ཚོད་ ༧་༤༠ སྟེང་། ཨ་རིའི་མངའ་སྡེ་ཁོ་ལོ་ར་ཌོའི་ཨ་ཌམ་སི་(Adams)རྫོང་གི་ལི་པན་(Lipan)སྲང་ལམ་དུ། ལོ་ན་ ༢ ཡིན་པའི་བོད་རིགས་ཕྲུ་གུ་བསྟན་འཛིན་མཆོག་འཛིན་ཟེར་བ་ཞིག་ལ་སྒེར་གྱི་རླངས་འཁོར་ཞིག་གིས་བརྡབས་ཡོད་པ་དང་། ཕྱིས་སུ་ཉེན་རྟོག་པས་བསྟན་འཛིན་མཆོག་འཛིན་ས་གནས་དེའི་(St. Anthony)སྨན་ཁང་དུ་བསྐྱལ་ཡོད་ཀྱང་འདས་གྲོངས་སུ་ཕྱིན་ཡོད་འདུག

ཨ་རིའི་གསར་འགྱུར་བརྒྱུད་ལམ་གྱི་གནས་ཚུལ་ལྟར་ན། བསྟན་འཛིན་མཆོག་འཛིན་ཕྱིར་ཁམས་སངས་སུ་ཕྱིན་པའི་རྨོ་ལགས་འཚོལ་དུ་ཕྱིན་སྐབས་རླངས་འཁོར་གྱི་བརྡབ་སྐྱོན་བྱུང་ཡོད་པ་དང་།  ཕྱི་ཚེས་ ༡༢ ཉིན་བསྟན་འཛིན་མཆོག་འཛིན་གྱི་ཕ་མ་གཉིས་ཀྱིས་རླངས་འཁོར་ཁ་ལོ་བ་དེ་བཟོད་སྒོམ་གུ་ཡངས་བཏང་བའི་འཕྲིན་ཡིག་ཅིག་དྲ་ལམ་དུ་སྤེལ་རྗེས། བོད་རིགས་ཕ་མ་དེ་གཉིས་ཀྱི་བྱམས་སྙིང་རྗེ་དང་བཟོད་སྒོམ་ལ་ཨ་རིའི་ཁོ་ལོ་ར་ཌོ་མངའ་སྡེ་ཙམ་མ་ཟད། ཨ་རིའི་གསར་བརྒྱུད་ལམ་ཁག་མང་པོའི་ནང་དམིགས་དཔེར་ལྟ་འོས་པའི་བོད་རིགས་ཁྱིམ་ཚང་ཞིག་ཡིན་སྐོར་རྗོད་བཞིན་འདུག

ཁོ་ལོ་ར་ཌོའི་ས་གནས་ཉེན་རྟོག་པས།  དོན་རྐྱེན་བྱུང་རྗེས་རླངས་འཁོར་ཁ་ལོ་བ་དེ་ས་གནས་དེར་མ་བསྡད་པར་ཕྱིན་ཡོད་ཀྱང་། གསར་འགྱུར་ནང་བྱིས་པ་ཞིག་ལ་རླངས་འཁོར་གྱིས་བརྡབ་སྐྱོན་བྱུང་སྟེ་ཁ་ལོ་བ་ཞིག་འཚོལ་ཞིབ་བྱེད་བཞིན་ཡོད་པ་ཁོ་རང་གིས་མཐོང་སྟབས། ཁོས་རང་གི་ནག་ཉེས་ངོས་ལེན་བྱས་ཏེ་ཉེན་རྟོག་ཁང་གིས་ཞིབ་བཤེར་བྱེད་བཞིན་ཡོད། ཅེས་བརྗོད་ཡོད་པ་དང་། རླངས་འཁོར་ཁ་ལོ་བ་དེའི་མིང་ལ་ཇཱོར་ཇཱི་ཁོའུ་རེ་(George Currie)ཟེར་གྱི་ཡོད་པ་དང་། ད་ལྟ་རང་ལོ་ ༦༧ ཙམ་ཡིན་འདུག

ཉེན་རྟོག་པས། ཁ་ལོ་བ་ཁོའུ་རེ་ལགས་ཀྱིས་སེམས་ཅན་ཆུང་ཆུང་ཞིག་ལ་བརྡབ་སྐྱོན་ཤོར་སོང་བསམ་སྟེ། རླངས་འཁོར་རྨིད་ ༡༥༠ ཡི་སར་བཞག་སྟེ་ལྟ་ཙམ་བྱས་ཡོད་ཀྱང་།  ཁོས་ཅི་གང་མཐོང་མེད་སྟབས་མུ་མཐུད་རླངས་འཁོར་བཏང་ནས་ཕྱིན་ཡོད་སྐོར་བརྗོད་འདུག

འཕྲིན་ཡིག་དེའི་ནང་དུ་བསྟན་འཛིན་མཆོག་འཛིན་གྱི་ཕ་དཀོན་མཆོག་བསྟན་འཛིན་ལགས་དང་ཨ་མ་བཀྲ་ཤིས་སྒྲོལ་མ་ལགས་གཉིས་ཀྱིས། བསྟན་འཛིན་མཆོག་འཛིན་ནི་ང་ཚོའི་བྱིས་པ་ཆུང་ཤོས་དང་སྙིང་ཉེ་ཤོས་དེ་ཡིན་པ་མ་ཟད། གྲོགས་པོ་ཡག་ཤོས་ཀྱང་ཡིན་པས། ཁོ་ལ་དོན་རྐྱེན་བྱུང་བ་འདི་བཟོད་ཐབས་བྲལ་བ་ཞིག་ཡིན་ཡང་།  ང་ཚོ་ནང་པའི་ཁྱིམ་ཚང་ཞིག་ཡིན་པའི་ངོས་ནས་བྱམས་སྙིང་རྗེ་ཉམས་ལེན་གྱིས་དོན་རྐྱེན་འདི་གོ་སྐབས་ཞིག་ལ་ངོས་འཛིན་བྱེད་ཀྱི་ཡོད་པས། རྐྱེན་ངན་བཟོ་མཁན་བཟོད་བསྲན་གུ་ཡངས་བཏང་བ་ཡིན་ལ། ང་ཚོའི་བུ་ཆུང་འདི་ལ་ཁྱེད་ཀྱིས་བསྔོ་སྨོན་གནང་རོགས། མཐའ་དོན་དུ་ཁ་ལོ་བ་ཚང་མས་རླངས་འཁོར་གཏོང་སྐབས་ཐུགས་གཟབ་གནང་རོགས་ཞེས་འབོད་སྐུལ་ཞུ་ཡི་ཡོད། ཅེས་བརྗོད་འདུག

ཨ་རིའི་གསར་འགྱུར་བརྒྱུད་ལམ་ཁག་ཅིག་ཏུ་གནས་ཚུལ་ཐོན་པ་ལྟར་ན།  བསྟན་འཛིན་མཆོག་འཛིན་གྱི་ཕ་མ་གཉིས་ཀྱི་སྙིང་རྗེ་ཡི་སྤྱོད་པ་དེས་མི་མང་པོ་ཞིག་ལ་ཡིད་སྨོན་དང་སེམས་འགུལ་ཐེབས་ཡོད་འདུག་ལ། ཁོ་ཚོའི་ཁྱིམ་མཚེས་མིང་ལ་བྷོ་ནེ་བྷེ་སི་ཊར་(Bonnie Baxter)ཟེར་བ་ཞིག་གིས། བསྟན་འཛིན་མཆོག་འཛིན་གྱི་ནང་མིའི་ཆེད་དྲ་རྒྱའི་ཐོག་ཞལ་འདེབས་གྲངས་ཚད་ཨ་སྒོར་ ༡༥༠༠༠ སློང་བའི་ལས་འགུལ་ཞིག་སྤེལ་བཞིན་ཡོད་པ་དང་།  ད་ལྟའི་ཆར་ཞལ་འདེབས་ཨ་སྒོར ༣༩༠༠ ཟིན་ཡོད་ཀྱང་།  བྷོ་ནེ་བྷེ་སི་ལགས་ཀྱིས། བསྟན་འཛིན་མཆོག་འཛིན་གྱི་ཕ་མ་གཉིས་ཀྱིས་དྲ་རྒྱའི་ཐོག་ཞལ་འདེབས་ག་ཚོད་བྱུང་བ་ཡིན་ནའང་། ཚང་མ་བསྟན་འཛིན་མཆོག་འཛིན་གྱི་རྗེས་དྲན་ཆེད་བྱིས་པའི་རོགས་སྐྱོར་ཐེབས་རྩ་ཁང་ཞིག་ལ་སྤྲོད་དགོས་པའི་རེ་འདུན་བཏོན་ཡོད་སྐོར་བརྗོད་འདུག་ལ། དྲ་ཐོག་ཞལ་འདེབས་ཀྱི་གྲངས་ཚད་ལོངས་རྗེས།  བྱིས་པའི་སྨན་ཁང་ཞིག་ལ་སྤྲོད་རྒྱུ་ཐག་བཅད་གནང་ཡོད་འདུག

གསར་འགོད་པ། སྐལ་བཟང་སྦྱིན་པ།