སང་ཉིན་རྒྱ་ནག་དམར་ཤོག་གི་ཚོཊ་ཆེན་འཚོགས་རྒྱུ་ཡིན་པ་དང་བསྟུན་དྷ་ས་ཁུལ་གྱི་གཞུང་འབྲེལ་མ་ཡིན་པའི་ཚོགས་པ་ལྔ་ཡིས་བོད་ནང་མུན་ནག་གི་ལོ་ཟླ་ཞེས་པའི་བསྒྲགས་གཏམ་ཞིག་སྤེལ་སོང་།
དེ་རིང་སྔ་དྲོའི་ཆུ་ཚོད་༡༠:༠༠་སྟེང་དྷ་ས་མེག་གྷན་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་ཁང་དུ། བོད་ཀྱི་གཞོན་ནུ་ལྷན་ཚོགས་དང་བུད་མེད་ལྷན་ཚོགས། བོད་ཀྱི་དགུ་བཅུ་གསུམ་ལས་འགུལ་ཚོགས་པ། བོད་རྒྱལ་ཡོངས་མང་གཙོ་ཚོགས་པ། བོད་རང་བཙན་སློབ་ཕྲུག་ཚོགས་པ་བཅས་གཞུང་འབྲེལ་མ་ཡིན་པའིོ་ཚོགས་པ་ལྔ་ཐུན་མོང་གིས། ཞི་ཅིན་ཕིན་གྱི་སྲིད་དབང་སྒེར་གཅོད་འོག་བོད་ནང་མུན་ནག་གི་ལོ་ཟླ་ཞེས་པའི་བརྗོད་གཞིའི་ཐོག བོད་ཡིག་དང་དབྱིན་ཡིག ཧིན་རྡུ། རྒྱ་ཡིག་བཅས་སྐད་ཡིག་བཞིའི་སྒང་ནས་ཐུན་མོང་གི་བསྒྲགས་གཏམ་ཞིག་སྤེལ་སོང་།
ཐུན་མོང་གི་གསར་འགོད་གསལ་བསྒྲགས་ཐོག ཞི་ཅིན་ཕིན་གྱི་སྲིད་དབང་ལོ་ལྔའི་རིང་ལ་བོད་ནང་དམ་དྲག་ཤུགས་ཆེ་རུ་ཕྱིན་ཏེ། བོད་མི་ཚོ་བཙོན་འཇུག་ཁྲིམས་ཆད་དང་གདུག་རྩུབ་མནར་གཅོད་ཀྱི་སྲིད་ཇུས་ངན་རུ་སོང་ཡོད་པ། རྒྱ་ནག་གིས་དཔལ་འབྱོར་གྱི་གཡོ་ཐབས་ལ་བརྟེན་ནས་འཛམ་གླིང་རྒྱལ་སྤྱིའི་ཐོག་རྒྱ་ནག་དང་ཞི་ཅིན་ཕིན་འཛམ་གླིང་གི་དབུ་འཁྲིད་ཡིན་པའི་རྣམ་འགྱུར་སྟོན་བཞིོན་པ་དང་། མི་རིང་བར་རྒྱ་ནག་དམར་ཤོག་ཚོགས་པའི་སྐབས་༡༩ པའི་ཚོགས་ཆེན་ཚོགས་ལ་ཉེ་སྟབས། བོད་ནང་སྲིད་ཇུས་དམ་དྲག་དང་གདུག་རྩུབ་མནར་གཅོད་ཀྱི་ལས་ཀ་མཚམས་མ་བཞག་བར་རྒྱ་ནག་དེ་འཛམ་གླིང་གི་སྣེ་འཁྲིད་མཁན་གྱི་རྒྱལ་ཁབ་ཅིག་ཏུ་འགྱུར་མི་ཐུབ་པའི་བརྡ་ལན་ཞིག་སྤྲོད་ཀྱི་ཡོད། ཅེས་བརྗོད་སོང་།
དེ་ཡང་བསྒྲགས་གཏམ་ནང་དུ། རྒྱ་ནག་དམར་ཤོག་ཚོགས་པའི་རྒྱལ་ཡོངས་ཚོགས་ཆེན་ཐེངས་བཅུ་དགུ་པ་སྐོང་འཚོགས་བྱ་གྲབས་ཡོད་པའི་དུས་འདིར། འདས་པའི་མི་ལོ་ལྔ་ཡི་རིང་ཞི་ཅིན་ཕིན་གྱིས་སྲིད་སྐྱོང་དུས་ཡུན་དེའི་རིང་བོད་ནང་བཟང་ཕྱོགས་ཀྱི་འགྱུར་བ་གང་ཡང་མ་བྱུང་བ་མ་ཟད། ད་དུང་ཇེ་ཞན་ཇེ་སྡུག་ཏུ་ཕྱིན་ཡོད། ཞི་ཅིན་ཕིན་རྒྱ་ནག་གི་སྲིད་འཛིན་ཆགས་པའི་སྔ་ནུབ་དེར་རྒྱལ་སྤྱིའི་སྤྱི་ཚོགས་ཀྱིས་ཁོ་པས་སྲིད་སྐྱོང་བའི་ལོ་ངོ་ལྔ་ཡི་ནང་རྒྱ་ནག་ལ་བཟང་ཕྱོགས་ཀྱི་འགྱུར་ལྡོག་ཡོང་རྒྱུའི་ཚོད་དཔག་བྱེད་མཁན་སྣ་ཚོགས་བྱུང་ཡོད་ལ། དེ་བཞིན་བཙན་འོག་ཏུ་ཡོད་པའི་བོད་དང་ས་ཁུལ་གཞན་ཁག་གི་ཐོག་འཛིན་པའི་སྲིད་ཇུས་ལའང་བཟང་ཕྱོགས་ཀྱི་འགྱུར་ལྡོག་ཡོང་རྒྱུའི་རེ་སྒུག་བྱས་ཡོད་ཀྱང། ད་ཆ་འདས་པའི་ལོ་ངོ་ལྔ་ཡི་དོན་དངོས་ཀྱི་གནས་ཚུལ་ལ་ཕྱིར་མིག་ཅིག་བལྟས་ན། ཚོད་དཔག་དང་རེ་སྒུག་དེ་དག་ཚང་མ་འཇའ་ལྟར་ཡལ་བ་མ་ཟད། བོད་མིའི་ཆོས་དད་རང་དབང་དང་། འགྲོ་བ་མིའི་ཐོབ་ཐང། དེ་བཞིན་སྐད་ཡིག་དང་ཤེས་ཡོན་སློབ་གསོ། དྲ་རྒྱའི་རིག་གནས་སོགས་ཕྱོགས་ཡོངས་ཀྱི་ཐད་དེ་བས་ཇེ་ཞན་ཇེ་སྡུག་ཏུ་འགྲོ་བའི་གནས་ཚུལ་ཁོ་ན་ལས་བཟང་ཕྱོགས་ཀྱི་འགྱུར་ལྡོག་འགྲོ་བའི་ཟུར་ཙམ་ཡང་མཐོང་རྒྱུ་མེད།
ཡང་ཞིང་ཅིན་ཕིན་གྱིས་བོད་ཀྱི་སྤྱི་ཚོགས་དམ་དྲག་དང་བཀག་སྡོམ་བྱེད་ཕྱོགས་ཀྱི་ཐད། ཞི་ཅིན་ཕིན་གྱིས་རྒྱལ་ཁབ་སྐྱོང་བར་སྔོན་ལ་མཐའ་མཚམས་སྐྱོང་དགོས་པ་དང། མཐའ་མཚམས་སྐྱོང་བར་སྔོན་ལ་བོད་ལྗོངས་བརྟན་ལྷིང་ཡོང་བ་བྱེད་དགོས་ཅེས་སྤྱི་ཚོགས་བརྟན་ལྷིང་ཟེར་བའི་མིང་ཐོག་ནས་བོད་ནང་དམ་དྲག་བྱེད་པའི་སྲིད་ཇུས་དེ་ལས་དོན་མཐའ་དག་གི་འགོ་འཛུགས་ས་དང་གལ་ཆེན་ནང་གི་དོན་ཆེན་ཡིན་པ་ནན་བཤད་བྱས་ཡོད། དེ་བཞིན་ཆོས་དད་རང་དབང་གི་ཐད་ནས་བཤད་ན། གསེར་རྟ་ལྔ་རིག་ནང་བསྟན་སློབ་གླིང་གི་གྲྭ་ཤག་གཏོར་བཅོམ་བཏང་བ་དང་གྲྭ་རྒྱུན་ཉུང་འཕྲི་བྱས་ཏེ་རང་རང་སོ་སོའི་ལུང་པར་ཕྱིར་ལོག་དགོས་པའི་བཙན་བཀའ་བཏང་བ་མ་ཟད། ད་ལྟ་ཡོད་མུས་ཡིན་པ་དེ་དག་ཀྱང་དུམ་བུ་གཉིས་སུ་དབྱེ་ནས་ཁ་བྲལ་བཏང་བ། དགོན་པའི་འཛིན་སྐྱོང་གི་ལས་དོན་ཐད་ལའང་དམར་ཤོག་ཚོགས་པའི་ལས་བྱེད་པ་བཅའ་སྡོད་བྱས་ཏེ་ཁོ་ཚོའི་བཀའ་བཀོད་ལ་ཉན་དགོས་པའི་བཙན་བཀའ་བཏང་ཡོད། ཐ་ན་བོད་ནང་སྲོལ་རྒྱུན་ཆོས་ལུགས་ཀྱི་དུས་སྟོན་ལའང་དམ་དྲག་དང་གཞུང་གི་ལས་བྱེད་དང་སློབ་ཕྲུག་སོགས་ཀྱིས་དུས་ཆེན་དེ་ཚོའི་ནང་མཉམ་ཞུགས་མི་ཆོག་པའི་བཙན་བཀའ་བཏང་ཡོད། སྲིད་ཇུས་འདི་དག་ནི་དེ་སྔའི་རིག་གནས་གསར་བརྗེའི་སྐབས་ཀྱི་སྲིད་ཇུས་དང་གཅིག་མཚུངས་རེད། ཅེས་འཁོད་འདུག
མཇུག་ཏུ་རྒྱ་ནག་དམར་ཤོག་ཚོགས་པའི་ཚོགས་ཆེན་ ༡༩ པའི་སྐོར་ལ་བསྒྲགས་གཏམ་ནང་། རྒྱ་ནག་དམར་ཤོག་གི་རྒྱལ་ཡོངས་ཚོགས་ཆེན་བཅུ་དགུ་པ་སྐོང་འཚོགས་བྱས་ཏེ། ཞི་ཅིན་ཕིན་གྱིས་མགོ་འཁྲིད་པའི་རྒྱ་ནག་གི་དབང་འཛིན་པ་མི་རབས་དྲུག་པ་དེས་སྔར་བཞིན་དམ་དྲག་དང་བཙན་གནོན་རང་བཞིན་གྱི་སྲིད་ཇུས་དང་རྒྱ་སྐྱེད་རིང་ལུགས་ཁོ་ནའི་ཐོག་ཤར་བསྐྱོད་བྱ་རྒྱུ་ལས། བཟང་ཕྱོགས་ཀྱི་འགྱུར་བ་གསར་པ་ཞིག་ཡོང་རྒྱུའི་རེ་བ་གང་ཡང་མེད་སྟབས། ངེད་གཞུང་འབྲེལ་མ་ཡིན་པའི་ཚོགས་པ་ལྔ་ནས་ཞི་ཡིས་སྲིད་སྐྱོང་བའི་མི་ལོ་ལྔ་ཡི་རིང་བོད་ནང་འགྲོ་བ་མིའི་ཐོབ་ཐང་བརྡབ་བཤིག་དང་རང་དབང་ལ་ཚད་ལས་བརྒལ་བའི་དམ་དྲག་བྱས་པར་ངོ་རྒོལ་བྱ་རྒྱུ་མ་ཟད། བོད་ཀྱི་གནད་དོན་ཇི་སྲིད་ཐག་གཅོད་མ་བྱུང་བར་དེ་སྲིད་དུ་ང་ཚོས་མཐར་ཕྱིན་པའི་ངོ་རྒོལ་བྱ་རྒྱུ་ཡིན། ཞེས་འཁོད་འདུག
གསར་འགོད་ལྷན་ཚོགས་གྲོལ་བ་དང་བསྟུན་བོད་རང་བཙན་སློབ་ཕྲུག་ཚོགས་པའི་ངོས་ནས་དྷ་ས་མེག་གྷན་གྱི་བཞི་མདོ་རུ། རྒྱ་ནག་གི་མགོ་འཁྲིད་ཞི་ཅིན་ཕིན་གྱི་འདྲ་པར་གྱི་འཕྲད་དར་འཕྱར་ཏེ། འགྲམ་དུ་སེར་སྐྱ་གཉིས་ཀྱི་ལུས་ལ་ཁྲག་གིས་བརྫིས་ནས་འགྱེལ་བསྡད་པའི་འཁྲབ་སྟོན་བྱས་ཏེ། རྒྱ་གཞུང་གིས་བོད་ནང་འཛིན་པའི་དྲག་གནོན་སྲིད་བྱུས་ལ་འགྱུར་བ་གང་ཡང་མེད་པ་མ་ཟད། སྔར་བཞིན་དྲག་གནོན་དང་གདུག་རྩུབ་འོག་ཡོད་པའི་ཡིག་ཆ་ཞིག་ཀྱང་འགྲེམས་སྤེལ་གནང་སོང་།
གསར་འགོད་པ། སངས་རྒྱས་དཀོན་མཆོག
