སྲིད་སྐྱོང་སྤེན་པ་ཚེ་རིང་མཆོག་གིས་མི་རིགས་མཐུན་སྒྲིལ་ཡར་ཐོན་སྐུལ་འདེད་ཀྱི་ཁྲིམས་ཡིག་དེ་རྒྱ་ནག་གི་ཁྲིམས་ཡིག་མང་པོ་ཞིག་དང་འགལ་ཟླ་ཆགས་ཡོད་པ་མ་ཟད།དངོས་སུ་ལག་བསྟར་བྱས་ཚེ་ཁྲིམས་གང་ལ་གཞི་བཅོལ་ཡོད་མེད་ཀྱང་གནད་དོན་ཞིག་ཆགས་ཡོད་ཅེས་གསུངས་སོང་།
དེ་རིང་ཕྱི་ཟླ་ ༣ ཚེས་ ༣༡ ཉིན་ནས་ཟླ་གཅིག་ཙམ་རིང་བོད་ཀྱི་གཞོན་ནུ་ལྷན་ཚོགས་ཀྱི་གོ་སྒྲིག་འོག དྷ་རམ་ས་ལ་ནས་ལྡི་ལི་བར་ཞྭ་མོ་ནག་པོའི་གོམ་བགྲོད་ཅེས་པའི་ལས་འགུལ་སྤེལ་བཞིན་ཡོད་ཅིང་། གངས་ཅན་སྐྱིད་གཤོངས་ཀྱི་སྒོ་ཆེན་འགྲམ་ནས་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་བོད་ཀྱི་རྒྱལ་དར་འཕྱར་ཏེ་གོམ་བགྲོད་དབུ་འབྱེད་གནང་སོང་། ཐེངས་འདིའི་གོམ་བགྲོད་ནང་བོད་ཀྱི་གཞོན་ནུ་ལྷན་ཚོགས་ཀྱི་ཁྱབ་ཁོངས་ཀྱི་ས་གནས་མི་འདྲ་བ་ ༢༠ ནས་གོམ་བགྲོད་པ་ཁྱོན་གྲངས་ ༦༥ མཉམ་ཞུགས་གནང་ཡོད་པ་དང་། དེའི་ཁྲོད་དགུང་ལོ་ཆེ་ཤོས་ ༧༤ དང་ཆུང་ཤོས་ ༢༦ ཡིན་འདུག
དབུས་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ་ཚེ་རིང་ཆོས་འཕེལ་ལགས་ཀྱིས། ཕྱི་ལོ་ ༡༩༤༩ ལོ་ནས་བཟུང་རྒྱ་ནག་དམར་པོ་གཞུང་གིས་བོད་ནང་བཙན་འཛུལ་བྱས་ཏེ། བོད་མི་རིགས་ཀྱི་སྐད་ཡིག་བཅས་པ་རྩ་གཏོར་གཏོང་བཞིན་ཡོད་པ་མ་ཟད། ཉེ་ལམ་ཕྱི་ཟླ་ ༣ ཚེས་ ༡༢ ཉིན་རྒྱ་ནག་གཞུང་གིས་མི་རིགས་མཐུན་སྒྲིལ་ཡར་ཐོན་སྐུལ་འདེད་ཀྱི་ཁྲིམས་ཡིག་ཟེར་བ་གཏན་འབེབས་བྱས་ཡོད་ཅིང་། ཁྲིམས་ཡིག་དེའི་ནང་དུ་ལེའུ་བདུན་དང་དོན་ཚན ༦༥ ཡོད་པ་རེད། ང་ཚོས་བལྟས་བ་ཙམ་གྱིས་ཁྲིམས་ཡིག་དེའི་ནང་དུ་སྙན་པོ་རྐྱང་རྐྱང་བྲིས་ཡོད་ཀྱང་། དོན་དུ་མི་རིགས་བཙན་བསྒྱུར་དང་རིག་གཞུང་བསྲེས་ལྷད་གཏོང་ཐབས་རེད། ཐེངས་འདིའི་ཞྭ་མོ་ནག་པོའི་གོམ་བགྲོད་ཀྱིས་རྒྱ་ནག་གཞུང་ལ་བོད་ཀྱི་ཆོས་དང་རིག་གཞུང་སྲུང་སྐྱོབ་བྱེད་བཞིན་ཡོད་པའི་བརྡ་ལེན་གསལ་བོ་སྤྲོད་བཞིན་ཡོད། ཅེས་བརྗོད་སོང་།
དབུ་འབྱེད་མཛད་སྒོའི་ཐོག་བདེ་སྲུང་བཀའ་བློན་རྒྱ་རི་སྒྲོལ་མ་མཆོག་གིས། རྒྱ་ནག་གཞུང་གིས་ཁྲིམས་འགལ་ཐོག་བོད་དབང་བསྒྱུར་བྱས་རྗེས་རྒྱལ་སྤྱིའི་ནང་བོད་ཀྱི་ལོ་རྒྱུས་རྫུན་བཟོ་བྱས་ཡོད་ལ། བོད་ཀྱི་ཆ་ཤས་གཅིག་ཡིན་པའི་བོད་རང་སྐྱོང་ལྗོངས་ལ་ཞིས་ཙང་ཟེར་བའི་མིང་བཏགས་ཏེ་འཛམ་གླིང་སྟེང་བོད་དེ་ཁྲིམས་ཐོག་ནས་རྒྱ་ནག་གི་ཡིན་པ་སྟོན་བཞིན་ཡོད། ད་ལྟ་བར་དུ་རྒྱ་ནག་གཞུང་གི་དགོས་མཁོ་ལྟར་ཁྲིམས་ཡིག་མང་པོ་ཞིག་བཟོས་ཡོད། དེ་བཞིན་བོད་མི་རིགས་ཀྱི་ཆོས་དང་རིག་གཞུང་རྩ་མེད་བཟོ་བའི་ལས་འགུལ་སྤེལ་བཞིན་པ་རེད། ལྷག་པར་དུ་བོད་ནང་དུ་༧གོང་ས་མཆོག་གི་སྐུ་པར་སྒྲིག་གཤམ་དང་ཆོས་ལུགས་ཀྱི་བྱེད་སྒོ་སོགས་གང་ཡང་བྱེད་ཆོག་གི་མེད་ཀྱང་། རྒྱ་ནག་གཞུང་གིས་འཆར་གཞི་ངན་པ་འཐེན་ཏེ་སྤྲུལ་སྐུ་ངོས་འཛིན་ཟེར་བའི་ཁྲིམས་བཟོས་ཡོད། འཛམ་གླིང་ལ་མགོ་བསྐོར་བཏང་ཡོད་ཀྱང་བོད་མི་རྣམས་མགོ་བསྐོར་ཐུབ་མེད་པའི་བརྡ་ལེན་སྤྲོད་དགོས་པ་གལ་ཆེན་པོ་རེད། ང་ཚོས་འདི་ནས་སྐད་འབོད་ངོ་རྒོལ་བྱས་ཏེ་རྒྱ་ནག་གཞུང་གིས་ལམ་སང་ཁྲིམས་ཡིག་ལ་འགྱུར་བ་གཏོང་མི་སྲིད་ཀྱང་། རྒྱ་ནག་གི་ཁྲིམས་ཡིག་ལ་ངོས་ལེན་མེད་པའི་རྣམ་འགྱུར་སྟོན་མ་ཐུབ་ཚེ། ང་ཚོས་བོད་མི་རིགས་ཀྱི་འགན་མ་འཁུར་བ་ཞིག་ཆགས་ཀྱི་ཡོད། དེ་བཞིན་༧གོང་ས་རྒྱལ་བ་རིན་པོ་ཆེ་མཆོག་གི་བཀའ་དྲིན་དྲན་པའི་ཐོག་བོད་མི་ཚང་མ་གཅིག་སྒྲིལ་གྱིས་གོམ་པ་སྤོ་ཐུབ་དགོས། ཞེས་བརྗོད་སོང་།
བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས། ད་ལྟ་བར་དུ་རྒྱ་ནག་གཞུང་གིས་རྩ་ཁྲིམས་དང་བཅའ་ཁྲིམས་མང་པོ་ཞིག་གཏན་འབེབས་བྱས་ཡོད་པ་རེད། ད་ལྟ་རྩ་ཁྲིམས་ལག་བསྟར་བྱེད་བཞིན་པ་དེ་ཕྱི་ལོ་ ༡༩༨༢ ལོར་གཏན་འབེབས་བྱས་པ་དེ་རེད། དེའི་ཆ་རྐྱེན་གྱི་འོག་ནས་ས་གནས་མི་རིགས་རང་སྐྱོང་གི་ཁྲིམས་ཡིག་ཅིག་ཡོད་པ་རེད། མི་རིགས་དེ་དག་ལ་སོ་སོའི་སྐད་ཡིག་དང་། རིག་གཞུང་། ཆོས་བཅས་བཀོལ་སྤྱོད་བྱེད་པའི་རང་དབང་ཆ་ཚང་གསལ་བསྡད་ཡོད། ཉེ་ལམ་ཕྱི་ཟླ་ ༣ ཚེས་ ༡༢ ཉིན་རྒྱ་ནག་གི་ཚོགས་ཆེན་གཉིས་མཇུག་བསྡུས་པའི་སྐབས་མི་རིགས་མཐུན་སྒྲིལ་ཡར་ཐོན་སྐུལ་འདེད་ཀྱི་ཁྲིམས་ཡིག་ཟེར་བ་ཞིག་བཟོས་ཏེ། ད་ལྟའི་རྒྱ་ནག་གི་ཁྲིམས་ཡིག་མང་པོ་ཞིག་དང་འགལ་ཟླ་ཆགས་ཡོད་པ་རེད། དངོས་སུ་ལག་བསྟར་བྱེད་སྐབས་ཁྲིམས་གང་ལ་གཞི་བཅོལ་ཡོད་མེད་ཀྱང་གནད་དོན་ཞིག་ཆགས་ཡོད། རྒྱལ་སྤྱིའི་ཐོག་ནས་བལྟས་ན་ཁྲིམས་ཡིག་དེའི་མིང་ལ་མི་རིགས་མཐུན་སྒྲིལ་ཡར་ཐོན་སྐུལ་འདེད་ཞེས་སྙིང་རྗེ་བོ་རེད། རྒྱ་གཞུང་གིས་མིང་རྙིང་པ་ཞིག་གི་འོག་ནས་མི་རིགས་གཞན་པ་རྩ་མེད་བཟོ་བཞིན་ཡོད། ད་ལྟའི་ཆར་རྒྱ་གཞུང་གིས་མི་རིགས་གཞན་མེད་པ་ཆགས་ཚེ། མི་རིགས་ཀྱི་གནད་དོན་མེད་པའི་བསམ་བློ་གཏོང་བཞིན་ཡོད། མི་རིགས་གཞན་མེད་པར་བཟོ་བའི་ཐབས་ལམ་དེ་མི་རིགས་དེའི་བསམ་བློ་དང་ཀུན་སྤྱོད་བཅས་པ་འགྱུར་བ་གཏོང་རྒྱུ་དེ་རེད། བོད་མི་རིགས་ཀྱི་སྐད་ཡིག་དང་། ནང་ཆོས། ཁོར་ཡུག་ལ་བརྟེན་པའི་འཚོ་བ་སྐྱེལ་སྟངས་སོགས་གཏོར་བཤིག་གཏོང་བའི་སྲིད་ཇུས་བཟུང་ཡོད་དུས། རྒྱལ་སྤྱིའི་ཐོག་རྒྱ་གཞུང་གི་སྲིད་ཇུས་དེའི་སྐོར་གོ་རྟོགས་སྤེལ་རྒྱུ་གལ་ཆེན་པོ་རེད། ཐེངས་འདིའི་ལས་འགུལ་ཁྲོད་བོད་ནང་གི་བོད་མི་རྣམས་ལ་གདུང་སེམས་མཉམ་བསྐྱེད་དང་། རྒྱལ་སྤྱིའི་ནང་གོ་རྟོགས་སྤེལ་བར་བསྔགས་བརྗོད་ཞུ་བཞིན་ཡོད། ཅེས་གསུངས་སོང་།
ཐེངས་འདིའི་གོམ་བགྲོད་སྐབས་དགོས་འདུན་བཞི་བཏོན་ཡོད་པའི་ནང་། མི་རིགས་མཐུན་སྒྲིལ་ཡར་ཐོན་སྐུལ་འདེད་ཀྱི་ཁྲིམས་ཡིག་ཅེས་པ་ནི་ཚད་ལྡན་མ་ཡིན་པའི་མི་རིགས་བཙན་སྒྱུར་གྱི་སྲིད་བྱུས་ཡིན་པས་མཚམས་འཇོག་དགོས་པ་དང་། བོད་ཀྱི་ཆབ་སྲིད་བཙོན་པ་༧ཀུན་གཟིགས་༧པཎ་ཆེན་རིན་པོ་ཆེ་མཆོག་གིས་གཙོས་ཉེས་ མེད་ཆབ་སྲིད་བཙོན་པ་ཡོངས་རྫོགས་གློད་བཀྲོལ་གཏོང་དགོས། བོད་ཀྱི་སྐྱེ་ཁམས་ཁོར་ཡུག་ལ་སྦག་བཙོག་དང་གཏོར་བརླག་གཏོང་མཚམས་འཇོག་དགོས། དེ་བཞིན་རྒྱ་གར་དབུས་སའི་གཞུང་ནས་ད་བར་བོད་དང་བོད་མིར་མཐུན་འགྱུར་རྒྱབ་སྐྱོར་འགྱུར་མེད་གནང་བར་ཐུགས་རྗེ་ཆེ་ཞུ་རྒྱུ་ཡིན་པ་བཀོད་འདུག
གསར་འགོད་པ། བྱམས་པ་ཚེ་རིང་། རྩོམ་སྒྲིག་བྱེད་མཁན། པདྨ་མཚོ།
