པེ་ཅིན་་མི་མང་ཚོགས་ཁང་ཆེན་མོའི་ནང་ཚོགས་ཆེན་བཅུ་དགུ་པ་ཚ་ཚ་འུར་འུར་གྱིས་ཚོགས་ཏེ་ས་གནས་ཁག་ཏུ་དོགས་ཟོན་དམ་དྲག་ཤུགས་ཆེན་བྱེད་བཞིན་ཡོད་འདུག
རྒྱ་ནག་དམར་ཤོག་ཚོགས་པའི་ཚོགས་ཆེན་དེ་རིང་ནས་མགོ་བཙུགས་ཏེ་ཕྱི་ཚེས་ ༢༤ བར་འཚོགས་ཀྱི་ཡོད་པའི་སྐབས་དང་བསྟུན། རྒྱ་ནག་རྒྱལ་ཡོངས་སུ་དམ་དྲག་ཤུགས་ཆེན་བྱེད་བཞིན་ཡོད་པ་དང་། ལྷག་པར་དུ་པེ་ཅིན་གྲོང་ཁྱེར་གྱི་མི་མང་ཚོགས་ཁང་ཆེན་མོའི་མཐའ་འཁོར་དང་། གྲོང་ཁྱེར་གྱི་དཀྱིལ་སྙིང་ཡོད་ཚད་དམག་དཔུང་གིས་དུས་ངེས་མེད་དུ་མི་མང་གི་འགྲོ་འདུག་སྤྱོད་གསུམ་ལ་ལྟ་སྲུང་ནན་མོ་དང་། ས་གནས་ཁག་ཏུ་ཐབས་བརྒྱ་ཇུས་སྟོང་གིས་ཚོགས་ཆེན་གྱི་སྐོར་དྲིལ་བསྒྲགས་བྱས་པ་དང་སྦྲགས། དངོས་ཤུགས་བརྒྱུད་གསུམ་ནས་དམ་དྲག་དང་དོགས་ཟོན་གྱི་བྱ་འགུལ་སྣ་ཚོགས་སྤེལ་བཞིན་ཡོད་འདུག
ཚོགས་ཆེན་དང་བསྟུན་བོད་ཁུལ་གྱི་ས་གནས་སྲིད་གཞུང་ཁག་ཅིག་ནས་མི་མང་གི་བདེ་འཇགས་ལ་ཁ་གཡར་ཏེ། འབར་སླ་བའི་དངོས་རྫས་དང་དུག་རྫས་རིགས་ལ་བཀག་སྡོམ་དང་། ལྷག་པར་དུ་མེ་མདའ་དང་མཚོན་ཆའི་རིགས་རང་འགུལ་གྱིས་གཞུང་ལ་རྩིས་སྤྲོད་དགོས་པའི་བཀའ་ཁྱབ་གཏོང་བཞིན་ཡོད་འདུག དེའི་སྐོར་ལ་ཁ་སང་སྤྱི་ཚོགས་དྲ་ལམ་དུ་ཁྱབ་པའི་གནས་ཚུལ་ཞིག་ཏུ། མཚོ་སྔོན་ཞིང་ཆེན་ཀན་ལྷོ་རང་སྐྱོང་ཁུལ་ཀོས་ནན་རྫོང་ཉེན་རྟོག་ཁང་དང་སྡེ་བའི་ཉེན་རྟོག་པ་ཚོ་ཆེད་དུ་སྡེ་བ་སོ་སོར་སོང་སྟེ། མང་ཚོགས་ཀྱི་ཁྱིམ་ཚང་དུ་མེ་མདའ་དང་མཚོན་ཆ་ཉར་བ་ནི་ནག་ཉེས་ཚབས་ཆེན་ཡིན་སྐོར་གྱི་ཁྲིམས་ལུགས་དྲིལ་སྒྲོག་བྱས་ཏེ། མེ་མདའ་དང་མཚོན་ཆའི་རིགས་ཉར་ཚགས་བྱས་ཡོད་པ་རྣམས་རྩིས་སྤྲོད་དགོས་པའི་བཀའ་བཏང་ཡོད་པ་མ་ཟད། ས་གནས་འབྲོག་མི་ཞིག་གིས་མེ་མདའ་རྩིས་སྤྲོད་བྱེད་བཞིན་པའི་འདྲ་པར་བརྒྱུད་ལམ་དུ་བཀྲམ་སྟེ་དྲིལ་བསྒྲགས་བྱས་འདུག
དེ་བཞིན། དེ་རིང་ནས་རྒྱ་ནག་གཞུང་གིས་བོད་ཁུལ་གྱི་ས་གནས་མང་པོར་མང་ཚོགས་བསྡུ་སྐོང་གིས་ཞི་ཅིན་ཕིན་གྱི་ཚོགས་ཆེན་སྐབས་ཀྱི་མཛད་སྒོའི་གཏམ་བཤད་ལ་ཉན་བཅུག་གི་ཡོད་པ་དང་། སློབ་གྲྭ་ཁག་དང་དགོན་སྡེ་ཁག་ཏུའང་ཆེད་དུ་བརྙན་འཕྲིན་ལྟ་རུ་བཅུག་ནས་ཚོགས་ཆེན་གྱི་ནང་དོན་ལ་སློབ་སྦྱོང་བྱ་དགོས་པའི་སྐུལ་མ་གཏོང་གི་ཡོད་འདུག
དམར་ཤོག་གི་ཚོགས་ཆེན་མགོ་བཙུགས་པ་ནས་བཟུང་ཟླ་འདིའི་ཕྱི་ཚེས་ ༢༨ བར་བོད་ཁུལ་དུ་ཕྱིའི་ཡུལ་སྐོར་སྤྲོ་འཆམ་པ་འགྲོ་འོང་བྱེད་པར་བཀག་སྡོམ་བྱེད་བཞིན་ཡོད་པ་དང་། དེ་བཞིན་ཚོགས་ཆེན་གྱི་མགོ་མ་བཙུགས་གོང་ནས་རྒྱ་ནག་ནང་ལོགས་སུ་ཡོད་པའི་ཕྱི་རྒྱལ་གྱི་ཡུལ་སྐོར་སྤྲོ་འཆམ་པ་མང་པོ་ཞིག་རྒྱ་ནག་དང་ཁ་འབྲལ་དགོས་པའི་བཀའ་རྒྱ་བསྒྲགས་པ་ལྟར། ས་གནས་ཁག་གི་ཡུལ་སྐོར་སྤྲོ་འཆམ་ལས་ཁུངས་རྣམས་ཀྱིས་ཡུལ་སྐོར་བ་ཚོར་བཀག་སྡོམ་ཆེན་པོ་བྱེད་བཞིན་ཡོད་འདུག
ད་ལྟ་རྒྱ་ནག་ནང་ཡོད་པའི་ཕྱིའི་ཡུལ་སྐོར་སྤྲོ་འཆམ་པ་ཚོ་འཆར་ཟླ་ ༡༠ ཚེས་ ༡༧ སྔོན་ལ་རྒྱ་ནག་དང་ཁ་འབྲལ་དགོས་སྟབས། ལས་དོན་དེ་ས་ཁུལ་སོ་སོའི་ཡུལ་སྐོར་སྤྲོ་འཆམ་ལས་ཁུངས་ནས་ལག་བསྟར་དོན་འཁྱོལ་ཡོང་བ་བྱེད་དགོས་སྐོར་དང་། བྱ་འགུལ་དེའི་དགོས་དམིགས་གཙོ་བོ་ནི། ཟླ་རྗེས་མར་འཚོགས་འཆར་ཡོད་པའི་ཏང་གི་ཚོགས་ཆེན་ཐེངས་ ༡༩ པའི་བདེ་འཇགས་ཆེད་དུ་ཡིན་ལུགས་སོགས་བརྗོད་ཡོད་འདུག
གཞན་ཡང་། ཁ་སང་རྒྱ་ནག་པེ་ཅིན་གྲོང་ཁྱེར་ལྷོ་རྒྱུད་དུ་མི་ཞིག་གིས་རང་ལུས་མེར་བསྲེགས་བཏང་ཡོད་པའི་གནས་ཚུལ་དང་བརྙན་ཐུང་སྤྱི་ཚོགས་བརྒྱུད་ལམ་དུ་ཐོན་ཡོད་ཀྱང་། མི་དེ་སུ་ཡིན་མིན་དང་ད་ལྟའི་ཆར་ཤི་གསོན་གྱི་གནས་སྟངས་ཅི་ཡིན་སོགས་གསལ་ཁ་མེད་ན་ཡང་། ཕྱི་ལོ་ ༢༠༠༩ ལོ་ནས་བཟུང་ཉུང་མཐར་བོད་ཕྱི་ནང་གཉིས་ནས་བོད་མི་སེར་སྐྱ་ ༡༥༠ ལྷག་གིས་རྒྱ་ནག་གཞུང་གི་བཙན་གནོན་སྲིད་བྱུས་ལ་ངོ་རྒོལ་གྱིས་རང་ལུས་མེར་བསྲེགས་བཏང་གནང་ཡོད་པར་བརྟེན། ཁ་སང་པེ་ཅིན་དུ་བྱུང་བའི་རང་ལུས་མེར་བསྲེགས་ཀྱི་བརྙན་ཐུང་ནང་ཉེ་འཁོར་དུ་མི་མང་པོ་ཡོད་པའི་ཁྲོད་ནས་བུད་མེད་ཅིག་གིས་རྒྱ་སྐད་ཀྱིས་མི་དེ་བོད་པ་རེད་དམ་ཞེས་བཤད་ཀྱི་འདུག
གསར་འགོད་པ། སངས་རྒྱས་དཀོན་མཆོག
