མི་ཞིག་ལ་ལོ་ ༤༧༢ བཙོན་འཇུག་ཁྲིམས་ཐག་བཅད།

བུ་མོ་ལོ་ཆུང་མང་པོར་མགོ་སྐོར་བཏང་ནས་སྨད་ཚོང་མའི་ལས་གཉེར་དུ་བཅུག་པ་དང་བུད་མེད་མང་པོར་བཙན་གཡེམ་བྱས་པ་སོགས་ཀྱི་ནག་ཉེས་འོག་ཨ་རིའི་སྐྱེས་པ་ཞིག་ལ་ལོ་ ༤༧༢ བཙོན་འཇུག་ཁྲིམས་ཐག་བཅད་འདུག

ཁ་སང་ཨ་རིའི་(Fox)གསར་ཁང་གིས་གནས་ཚུལ་སྤེལ་བ་ལྟར་ན། ཨ་རིའི་མངའ་སྡེ་ཁ་ལོ་རཱ་ཌོ་(Colorado)ཡི་མིང་ལ་བྷོ་རོ་ཁུ་ཧྥི་རན་ཁུ་ལིན་(Brock Franklin)ཟེར་བའི་སྐྱེས་པ་ཞིག་གིས། ན་ཚོད་མ་ལོན་པའི་བུ་མོ་ཆུང་ཆུང་མང་པོར་མགོ་སྐོར་བཏང་སྟེ་སྨད་ཚོང་གི་ལས་སུ་ཞུགས་བཅུག་སྟེ་མི་ཚོང་བརྒྱབས་པ་དང་། བཙན་གཡེམ་དང་དྲག་སྤྱོད་སྤེལ་བ་སོགས་ཁྲིམས་འགལ་རིགས་ ༣༠ བཟོས་ཡོད་པའི་ནག་ཉེས་འོག ཟླ་འདིའི་ཕྱི་ཚེས་ ༢༡ ཉིན་ཡུལ་དེའི་ཁྲིམས་ཁང་ནས་ཁོ་ལ་ལོ་ ༤༧༢ བཙོན་འཇུག་ཁྲིམས་ཐག་བཅད་ཡོད་པ་དང་། དེ་ནི་ཨ་རིའི་ལོ་རྒྱུས་ནང་མི་ནག་ཚོང་གི་ཁྲིམས་ཆད་དུས་ཡུན་རིང་ཤོས་དེ་ཆགས་ཡོད་པ་རེད།

ཁོ་ལོ་རཱ་ཌོ་ཡི་ཁྲིམས་རྩོད་པ་གཞོན་པ་ལྕམ་ལྗན་ནེ་ཊི་ཌི་རེ་ཁུ་(Janet Drake)ཞུ་བ་ཞིག་གིས།  ལོ་ངོ་བཞི་བརྒྱ་ལྷག་གི་ཁྲིམས་ཆད་དེས་ཨ་རིའི་རྒྱལ་ཡོངས་ནང་ང་ཚོས་བུད་མེད་དང་། གཉོམ་ཆུང་མི་མང་ལ་བཙན་གནོན་དྲག་ཤུགས་ཀྱི་ལས་རིགས་སྤེལ་པར་བཟོད་བསྲན་བྱ་ཐབས་མེད་པའི་བརྡ་ཞིག་བསྟན་ཡོད།  ཅེས་བརྗོད་འདུག

ཧྥི་རན་ཁུ་ལིན་གྱིས་བཙན་གཡེམ་བཏང་མྱོང་བའི་བུད་མེད་བྷིར་ཧན་ནཱ་ལེ་རེ་(Brehannah Leary)ལགས་ཀྱིས། དེ་རིང་ཁོ་ལ་ཁྲིམས་ཆད་གཅོད་ཀྱི་ཡོད་པ་ཤེས་སྟབས་འདིར་ཡོང་བ་ཡིན། འོན་ཀྱང་། ཁོས་ངའི་མི་ཚེའི་ནང་སྤྲད་པའི་གྱོང་གུད་དག་འགྲེལ་བརྗོད་བྱ་མི་ཐུབ་པའི་གནས་སྟངས་ཤིག་ཆགས་ཡོད། དེ་རིང་ཁོ་ངའི་མདུན་དུ་བསྡད་དེ་ངའི་སྐད་ཆ་ཉན་དགོས་པ་དེས་ང་ལ་བདེ་སྐྱིད་ཅིག་སྤྲད་པ་མ་ཟད།  ང་འདིར་ཡོང་དགོས་པའི་དམིགས་ཡུལ་ཡང་དེ་ཡིན།  ཞེས་བརྗོད་ཡོད་པ་རེད།

ཁྲིམས་ཁང་དུ་ཧྥི་རན་ཁུ་ལིན་གྱི་ཁྲིམས་རྩོད་པས་ཁོ་ལ་བརྩོན་འཇུག་དུས་ཡུན་ཇེ་ཉུང་དུ་བཏང་སྟེ། ལོ་༩༦ གི་བརྩོན་འཇུག་ཁྲིམས་ཐག་གཅོད་དགོས་པའི་རེ་འདུན་བཏོན་ཡོད་ཀྱང་། ཁ་གཏད་གྱོད་གཏུག་པས་ཧྥི་རན་ཁུ་ལིན་ལ་བརྩོན་འཇུག་གི་དུས་ཡུན་ཇེ་མང་དུ་གཏོང་དགོས་པའི་རེ་བ་ཞུས་པར་བརྟེན། ཁྲིམས་ཆད་ལ་འགྱུར་བ་གཏོང་ཐུབ་མེད་པ་རེད།

རང་ལོ་ ༣༡ ཡིན་པའི་ཧྥི་རན་ཁུ་ལིན་གྱིས་བུད་མེད་ལ་མགོ་སྐོར་བཙན་འཁྲིད་བྱས་པའི་དོགས་གཞིའི་འོག ཕྱི་ལོ་ ༢༠༡༥ ལོར་འཛིན་བཟུང་བྱས་ཡོད་པ་མ་ཟད། ཁོས་ཁ་ལོ་རཱ་ཌོ་(Denver)མེ་འཁོར་འབབ་ཚུགས་ཀྱི་མགྲོན་ཁང་ཁག་མང་པོའི་ནང་ཁྲིམས་འགལ་གྱི་ལས་ཀ་བྱས་ཡོད་པའི་དོགས་གཞི་བྱུང་ཡོད་པ་རེད།

གསར་འགོད་པ།  སྐལ་བཟང་སྦྱིན་པ།