བྷི་བྷི་སི་གསར་ཁང་གིས་གནས་ཚུལ་སྤེལ་བ་ལྟར་ན། ཁ་སང་ནོར་ཝེའི་རྒྱལ་ས་ཨོ་སི་ལོ་ (Oslo) ནང་སྤྱིའི་རྡུལ་མཚོན་རྩ་མེད་བཟོ་བའི་ལས་འགུལ་ཚོགས་པར་ (International Campaign to Abolish Nuclear Weapons)ལ་འདི་ལོའི་ནོ་བྷེལ་ཞི་བདེའི་གཟེངས་རྟགས་འབུལ་བའི་མཛད་སྒོ་ཚོགས་ཡོད་པ་དང་། མཛད་སྒོའི་ཐོག་རྒྱལ་སྤྱིའི་རྡུལ་ཕྲན་མཚོན་ཆ་རྩ་མེད་བཟོ་བའི་ལས་འགུལ་ཚོགས་པའི་འགན་འཛིན་ལྕམ་སྐུ་བྷི་ཏི་རིས་ཕི་འེན་ (Beatrice Fihn) ལགས་ཀྱིས། ང་ཚོར་རང་གི་ཚེ་སྲོག་དགོས་དང་ཡང་ན་རྡུལ་ཕྲན་མཚོན་ཆ་དགོས་གདམ་ག་ཡོད་སྐོར་བརྗོད་འདུག
དེ་ཡང་ནོ་བྷེལ་ཞི་བདེའི་གཟེངས་རྟགས་འབུལ་བའི་མཛད་སྒོའི་གཏམ་བཤད་སྐབས་ལྕམ་སྐུ་བྷི་ཏི་རིས་ཕི་འེན་ལགས་ཀྱིས། ཚེ་སྲོག་ས་ཡ་མང་པོ་མེད་པ་འགྱུར་བར་ཕལ་ཆེར་ཁོང་ཁྲོ་ལང་དང་མ་ལང་ཙམ་གྱི་ཁྱད་པར་ལས་མི་འདུག ཅེས་དང་། ང་ཚོས་རང་གི་ཚེ་སྲོག་བློས་གཏང་བྱ་རྒྱུ་ཡིན་ནམ། ཡང་ན། རྡུལ་ཕྲན་མཚོན་ཆ་རྩ་མེད་བཟོ་རྒྱུ་ཡིན། འདི་ནི་ང་ཚོར་ཡོད་པའི་གདམ་ག་རེད། དེང་སྐབས་དམག་གི་གོ་ཚོན་ནི་གྲང་དམག་ (Cold war) ལས་ཀྱང་ནུས་ཤུགས་ཆེ་རུ་ཕྱིན་ཡོད་པ་རེད། ཅེས་བརྗོད་ཡོད་པ་རེད།
ཁ་སང་ནོ་བྷེལ་ཞི་བདེའི་གཟེངས་རྟགས་མ་ཕུལ་གོང་དུ་ནོ་བྷེལ་གཟེངས་རྟགས་ལྷན་ཚོགས་ཀྱི་འགན་འཛིན་བྷི་རིཊ་རི་འིས་ (Berit Reiss-Andersen) ལགས་ཀྱིས། རྡུལ་ཕྲན་མཚོན་ཆ་ཡོད་པའི་རྒྱལ་ཁབ་ལ་འགན་འཁུར་མེད་པའི་མགོ་འཁྲིད་ཅིག་བསྐོ་བཞག་བྱེད་མ་སྲིད་པ་མིན་སྐོར་དང་། ཚོགས་པ་དེའི་ངོས་ནས་རྒྱལ་སྤྱིའི་སྟེང་དུ་རྡུལ་ཕྲན་མཚོན་ཆ་ནི་འཇིགས་སུ་རུང་བ་ཞིག་ཡིན་པ་ངོ་སྤྲོད་བྱས་ཐུབ་ཡོད་པ་མ་ཟད། རྡུལ་ཕྲན་མཚོན་ཆ་དེ་དག་རྩ་མེད་གཏོང་བར་འབད་བརྩོན་ཆེན་པོ་བྱས་ཡོད་སྐོར་ཡང་ངོ་སྤྲོད་གནང་ཡོད་འདུག
ཡང་གཟེངས་རྟགས་འབུལ་བའི་མཛད་སྒོའི་ཐོག ཕྱི་ལོ་ ༡༩༤༥ ལོར་འཛམ་གླིང་དམག་ཆེན་གཉིས་པའི་སྐབས་ཨ་རིས་ཉི་ཧོང་གི་གྲོང་ཁྱེར་ཧི་རུ་ཤི་མར་ (Hiroshima) རྡུལ་ཕྲན་མཚོན་ཆ་གཡུགས་སྐབས། ཡུལ་དངོས་སུ་ཡོད་པའི་ཉི་ཧོང་གི་བུད་མེད་རང་ལོ་༨༥ ཡིན་པ་སིཏ་སུ་ཀོ་ཐར་ལོ་ (Setsuko Thurlow) ལགས་ཀྱིས། ཨ་རིས་ཉི་ཧོང་ཐོག་རྡུལ་ཕྲན་མཚོན་ཆ་གཡུགས་སྐབས་ཀྱི་གནས་སྟངས་ཕྱིར་དྲན་བྱས་ཏེ། ཉེན་ཚབས་ཅན་ལ་དོ་སྣང་སྤྲོད་དགོས་པ་མ་ཟད། ལས་དོན་གང་ཞིག་ཡིན་ཡང་དེའི་རྗེས་ཕྱོགས་འབྲས་བུ་ག་རེ་ཡོང་གི་ཡོད་མེད་ཐོག་བསམ་ཤེས་བྱེད་དགོས་པ་དང་། སྐྱེས་འགྲོ་ཡོངས་ལ་གནོད་པའི་ལས་བརྩམས་པ་ཡིན་ན། རང་ཉིད་ཀྱང་འགྲོ་བ་མིའི་སྡེ་ཁག་ནང་ཡོད་སྟབས་རང་ལའང་གནོད་པ་ཡོད་པ་དེ་ཤེས་དགོས་པ་རེད། ཅེས་བརྗོད་འདུག་ལ། ལྕམ་སིཏ་སུ་ཀོ་ལགས་ནི་རྒྱལ་སྤྱིའི་རྡུལ་ཕྲན་མཚོན་ཆ་རྩ་མེད་བཟོ་བའི་ལས་འགུལ་ཚོགས་པའི་རྒྱུས་ལས་ཤིག་ཀྱང་ཡིན་འདུག
རྒྱལ་སྤྱིའི་རྡུལ་ཕྲན་མཚོན་ཆ་རྩ་མེད་བཟོ་བའི་ལས་འགུལ་ཚོགས་པ་ནི་གཞུང་འབྲེལ་མིན་པའི་ཚོགས་པ་བརྒྱ་ཕྲག་ཁ་ཤས་འདུས་པའི་ཚོགས་པ་ཞིག་ཡིན་པ་དང་། ཚོགས་པ་དེ་༢༠༠༧ ལོར་ཐོག་མར་གསར་འཛུགས་བྱས་ཡོད་འདུག ཚོགས་པ་དེའི་དམིགས་ཡུལ་ནི་འཛམ་གླིང་འདིའི་སྐྱེས་འགྲོ་ཡོངས་ལ་གནོད་ཚབས་ཆེ་བའི་རྡུལ་ཕྲན་མཚོན་ཆ་འགོག་ཐབས་ཀྱི་ལས་འགུལ་སྤེལ་རྒྱུ་དེ་ཡིན་པ་དང་། ད་ལོའི་ལོ་མགོར་ནོ་བྷེལ་གཟེངས་རྟགས་ལྷན་ཚོགས་ཀྱིས། འདི་ལོའི་ནོ་བྷེལ་ཞི་བདེའི་གཟེངས་རྟགས་རྒྱལ་སྤྱིའི་རྡུལ་ཕྲན་མཚོན་ཆ་རྩ་མེད་བཟོ་བའི་ལས་འགུལ་ཚོགས་པར་འབུལ་གཏན་འཁེལ་བ་ཡོངས་བསྒྲགས་གནང་ཡོད་པ་རེད།
གསར་འགོད་པ། ཉི་མ་ཚེ་རིང་།
དང་པོ་ཚན་རྩལ་ཡིན་ཞེས་རྡུལ་ཕྲན་མཚོན་ཆ་བཟོས་།
གཉིས་པ་རྡུལ་ཕྲན་མཚོན་ཆའི་མགྲན་བསྡུར་བྱས་།
གསུམ་པ་རྡུལ་ཕྲན་མཚོན་ཆ་བཀག་འགོག་བྱས་།
མཐའ་མ་རྡུལ་ཕྲན་ཆ་ཞི་བདེའི་རྟགས་མར་ཕྱོགས་།
མཚན་རྩལ་རིག་པས་འཛམ་གླིང་འཇིག་པའི་ཉེན་།
མཚན་རྩལ་རིག་པས་ཞི་བདེ་གཏོར་བའི་ཉེན་།
མཚན་རྩལ་རིག་པས་མི་སྲོག་འཕྲོག་པའི་ཉེན་།
མཚན་རྩལ་རིག་པས་སྲོག་ཆགས་སྟོང་བའི་ཉེན་།