འཛམ་གླིང་གི་གློག་ཆས་བཟོ་ཚོང་ཁང་ཆེ་ཤོས་སམ་སང་གི་སྤྱི་གཉེར་བ་ལི་ཅེ་ཡོན་གྱི་ཁྲིམས་ཆད་ཕྱིར་འགྱང་ཆག་ཡང་བཏང་སྟེ་ཁ་སང་ཀློད་གྲོལ་བཏང་ཡོད་འདུག
རྒྱལ་སྤྱིའི་བརྒྱུད་ལམ་ཁག་གིས་གནས་ཚུལ་སྤེལ་བ་ལྟར་ན། ན་ནིང་ཕྱི་ཟླ་ ༨ ཚེས་ ༥ ཉིན་སྐབས་དེར་ལྷོ་ཀོ་རི་ཡའི་སམ་སང་གློག་ཆས་ཚོང་གཉེར་ཁང་གི་སྤྱི་ཁྱབ་འགན་འཛིན་གཞོན་པ་དང་སྤྱི་གཉེར་བ་གཅིག་ལྕོགས་ལི་ཅེ་ཡོན་གྱིས། ཡུལ་དེའི་སྲིད་འཛིན་ཟུར་པ་ཕག་ཅིན་ཧའེ་ལ་ལྐོག་རྔན་སྤྲད་པ་དང་། བཟོ་གྲྭའིི་སྤྱི་རྒྱུ་ཧམ་བཟུང་བྱས་པའི་ཉེས་མིང་འོག་ལོ་ ༥ རིང་བཙོན་འཇུག་ཁྲིམས་ཐག་བཅད་ཡོད་ཀྱང་། སམ་སང་ཚོང་གཉེར་ཁང་ནས་ལྷོ་ཀོ་རི་ཡའི་ཁྲིམས་ཁང་ལ་ཞུ་གཏུགས་བྱས་པ་བརྒྱུད། ཁྲིམས་ཁང་གིས་ལི་ཅེ་ཡོན་དང་ཁོའི་ལས་རོགས་བཞིའི་བཙོན་འཇུག་དུས་ཡུན་ཕྱེད་ཀ་མར་བཅག་པ་དང་། ལྐོག་རྔན་སྤྲོད་ལེན་བྱས་པའི་ཉེས་ཆད་ལོ་བཞིར་ཕྱིར་འགྱང་བྱས་ཏེ་ཁ་སང་ལི་ཅེ་ཡོན་དང་གཞན་མི་གཉིས་བཅས་བཙོན་ཁང་ནས་ཀློད་གྲོལ་བཏང་ཡོད་འདུག
སྤྱི་གཉེར་བ་ལི་བཙོན་གྲོལ་ཐོབ་རྗེས་ཁོའི་ཁྲིམས་རྩོད་པ་སོན་ཝོ་ཆོལ་(Song Wu-Cheol)གྱིས། སྐུ་ཞབས་ལི་ཡིས་ཁྲིམས་ཁང་ནས་ཐོ་འགོད་བྱས་ཡོད་པའི་རང་ཉིད་ཀྱི་ནག་ཉེས་ཁག་དག་སེལ་ཡོང་ཆེད། བསྐྱར་དུ་ཁྲིམས་རར་ཞུ་གཏུག་བྱ་རྒྱུའི་འཆར་གཞི་བཟོ་ཡི་ཡོད། ཅེས་བརྗོད་ཡོད།
ལི་ཡིས་ལྷོ་ཀོ་རི་ཡའི་གཞུང་འཛིན་མཐོ་རིམ་མི་སྣར་ལྐོག་རྔན་སྤྲད་པའི་གསང་བ་ཕྱིར་ཤོར་ཏེ། སྐབས་དེའི་ལྷོ་ཀོ་རེ་ཡའི་སྲིད་འཛིན་ལྕམ་ཕག་ཅིན་ཧའེ་ཡིས་ཁོའི་ལག་ནས་ལྐོག་རྔན་འབོར་ཆེན་ཞིག་བླངས་པའི་ཉེས་མིང་འོག་འཛིན་བཟུང་བྱས་ཡོད་པ་དང་། ལི་ཅེ་ཡོན་ནི་སམ་སང་ཚོང་གཉེར་ཁང་བཙུགས་ནས་ལོ་ ༨༠ མ་ཟིན་ཙམ་གྱི་རིང་སྤྱི་གཉེར་བ་ཞིག་བཙོན་ཁང་ནང་བསྡད་པ་ཐོག་མ་དེ་ཆགས་ཡོད་པ་རེད།
བརྒྱུད་ལམ་ཁག་གི་གནས་ཚུལ་ལྟར་ན། ལྷོ་ཀོ་རི་ཡའི་ནང་ཕྱུག་བདག་བཙོན་འཇུག་བྱས་པ་ཧ་ཅང་ཉུང་ཉུང་ཡིན་འདུག ལི་ཡི་ཨ་ཕ་ལིའི་ཀོན་ཧེ་(Lee Kun-hee)ལ་ཁྲིམས་འགལ་གྱི་གནད་དོན་ཐེངས་གཉིས་བྱུང་ཡོད་པ་དང་། དེ་བཞིན། ལི་ཡི་སྤོ་ལགས་ལི་ཆན་ཝོ་(Lee Chan-woo)ཡིས་ཀྱང་ལྐོག་ཟ་རུལ་སུངས་བྱས་པའི་ནག་ཉེས་བྱུང་ཡོད་ཀྱང་། ཁོ་གཉིས་ཀ་བཙོན་འཇུག་བྱས་མེད་པ་རེད། འོན་ཀྱང་། ཕྱི་ལོ་ ༢༠༡༦ ལོར་ལྷོ་ཀོ་རི་ཡའི་མི་མང་སྟོང་ཕྲག་མང་པོ་འདུ་འཛོམས་ཀྱིས་ཡུལ་དེའི་ནང་ལྐོག་ཟ་རུལ་སུངས་ཚར་གཅོད་གཏོང་དགོས་པའི་ལས་འགུལ་སྤེལ་རྗེས། སྲིད་འཛིན་ཟུར་པ་ཕག་ཅིན་ཧའེ་དང་ལི་ཅེ་ཡོན་གཉིས་སྔ་གཞུག་ཏུ་འཛིན་བཟུང་བྱས་ཡོད་པ་དང་། དེ་ནི་མི་མང་ལས་འགུལ་བའི་གྲུབ་འབྲས་ཡག་ཤོས་ཤིག་ཏུ་ངོས་འཛིན་བྱེད་ཀྱིན་ཡོད་འདུག
ཕྱི་ལོ་ ༢༠༡༤ ལོར་འཛམ་གླིང་ནང་གློག་ཆས་ཚོང་གཉེར་ཁང་ཆེ་ཤོས་སུ་གྱུར་བའི་སམ་སང་གི་སྤྱི་གཉེར་བ་ལི་ཀོན་ཧེ་ལ་སྙིང་ནད་ཕོག་རྗེས། བུ་ལི་ཅེ་ཡོན་གྱིས་མ་རྩ་ཨ་སྒོར་ཐེར་འབུམ་ ༧།༩ ལྷག་ཡོད་པའི་ཁྱིམ་རྒྱུད་ཚོང་ལས་རྒྱུན་འཛིན་གྱིས་སྤྱི་གཉེར་བ་དང་སྤྱི་ཁྱབ་འགན་འཛིན་གཞོན་པའི་འགན་འཁུར་ཡོད་པ་དང་། ལི་ཅེ་ཡོན་ད་ལྟ་རང་ལོ་ ༤༩ ཡིན་ཞིང་། ཨ་རིའི་ཧར་ཝ་ཌི་གཙུག་ལག་སློབ་གཉེར་ཁང་དུ་དཔལ་འབྱོར་རིག་པའི་ཐོག་སློབ་མཐར་ཕྱིན་ཡོད་པ་དང་། ད་ལྟ་ཁོང་ལ་བུ་གཅིག་དང་བུ་མོ་གཅིག་ཡོད་འདུག
གསར་འགོད་པ། སྐལ་བཟང་སྦྱིན་པ།
