ལེགས་བཤད་དུམ་བུ་བཀོད་པར་དགོངས་དག་ཞུས།

འཇར་མན་གྱི་རླངས་འཁོར་བཟོ་གྲྭ་ཞིག་གི་རླངས་འཁོར་ཁྱབ་བསྒྲགས་དང་མཉམ་དུ་༧གོང་ས་རྒྱལ་བ་རིན་པོ་ཆེ་མཆོག་གི་ལེགས་བཤད་གསུང་དུམ་ཞིག་བཀོད་པར་བརྟེན་ཁ་རྡུང་དྲག་པོ་བཏང་ནས་དགོངས་དག་ཞུ་དགོས་ཁེལ་ཡོད་འདུག

དེ་རིང་རྒྱལ་སྤྱིའི་གསར་ལམ་ཁག་ཏུ་གནས་ཚུལ་ཐོན་པ་ལྟར་ན། ཟླ་འདིའི་ཕྱི་ཚེས་ ༣ ཉིན་འཇར་མན་གྱི་རླངས་འཁོར་བཟོ་གྲྭ་མེར་སི་ཌིར་སིའི་(Mercedes)་གཞུང་འབྲེལ་སྤྱི་ཚོགས་དྲ་ལམ་(Instagram)ཐོག་བཟོ་གྲྭ་དེའི་རླངས་འཁོར་ཞིག་ཁྱབ་བསྒྲགས་བཏང་བ་དང་སྦྲགས། ༧གོང་ས་མཆོག་གི་ལེགས་བཤད་གསུང་དུམ་ཞིག་བཀོད་པ་དེར་རྒྱ་ནག་གི་སྤྱི་ཚོགས་དྲ་ལམ་ནས་ཁ་རྡུང་ཤུགས་ཆེན་བཏང་བར་བརྟེན། ཁ་སང་ཕྱི་ཚེས་༦ ཉིན་རླངས་འཁོར་བཟོ་གྲྭ་དེས་རྒྱ་ནག་མི་མང་ལ་དགོངས་དག་ཞུས་ཡོད་འདུག

བཟོ་གྲྭ་ཁང་དེས་ཁྱབ་བསྒྲགས་མཉམ་དུ་བཞག་པའི་༧གོང་ས་རྒྱལ་བ་རིན་པོ་ཆེ་མཆོག་གི་ལེགས་བཤད་དེ་ནི། གནས་སྟངས་ལ་ཕྱོགས་ཡོངས་ནས་ལྟོས་དང་ཁྱེད་རང་གི་མཐོང་རྒྱ་ཇེ་ཡངས་སུ་འགྲོ་བ་རེད། ཅེས་གསུངས་པ་དེ་ཡིན་ཞིང་། ལེགས་བཤད་གསུང་དུམ་དེ་ནི་སྤྱིར་བཏང་གི་ལམ་སྟོན་བཀའ་སློབ་ཅིག་ཡིན་པ་ལས་རྒྱ་ནག་གི་ཆབ་སྲིད་དང་འབྲེལ་བ་གང་ཡང་མེད་ཀྱང་། ༧གོང་ས་རྒྱལ་བ་རིན་པོ་ཆེ་མཆོག་གི་མཚན་བཀོད་པ་ཙམ་གྱིས་མ་འདོད་པའི་རྣམ་འགྱུར་བསྟན་པ་ཞིག་ཡིན་འདུག

བཟོ་གྲྭ་དེས་དགོངས་དག་ཞུ་ཡིག་ནང་དུ། ང་ཚོའི་གཞུང་འབྲེལ་སྤྱི་ཚོགས་དྲ་བའི་སྟེང་ཧ་ཅང་ནོར་འཁྲུལ་ཆེ་བའི་ཡི་གེ་ཞིག་ཁྱབ་བསྒྲགས་བྱས་ཡོད་པ་དེ་རིང་ཞོགས་པར་ཤེས་རྟོགས་བྱུང་བ་དང་། དེ་མ་ཐག་བསུབས་ཟིན་པ་མ་ཟད། གནད་དོན་དེར་སེམས་གཏིང་ནས་དགོངས་དག་ཞུ་བཞིན་ཡོད། གནད་དོན་དེས་ང་ཚོའི་ལས་རོགས་རྣམས་ཚུད་པའི་རྒྱ་ནག་མི་མང་གི་སེམས་ཁམས་ལ་ཕོག་ཐུག་དང་གནོད་པ་ག་ཚོད་བཟོས་ཡོད་མེད་གསལ་བོར་ཤེས་སོང་སྟབས། རྗེས་ཕྱོགས་དེ་ལྟར་གཏན་ནས་མི་ཡོང་བའི་དམ་བཅའ་བཞག་པ་ཡིན། ཞེས་འཁོད་འདུག

རྒྱ་ནག་གཞུང་འབྲེལ་མི་མང་ཉིན་རེའི་ཚགས་པར་གྱི་རྩོམ་སྒྲིག་པའི་གཏམ་གྱི་ཁ་བྱང་དུ། མེར་སི་ཌི་སི་བྷན་ཛི(Mercedes-Benz)་ང་ཚོ་རྒྱ་ནག་མི་མང་ཁྱོད་རང་གི་དགྲ་བོ་བཟོས་སོང་ཞེས་བརྗོད་ཡོད་པ་དང་། དེ་བཞིན་རྒྱ་ནག་གི་ཝེ་པོ་གཙོ་བོར་གྱུར་བའི་སྤྱི་ཚོགས་དྲ་ལམ་ཕལ་ཆེ་བའི་ཐོག་མི་མང་གིས་བཟོ་གྲྭ་དེར་སྡུག་དམོད་དང་ཚིག་རྩུབ་སྣ་ཚོགས་སྤེལ་བཞིན་ཡོད་འདུག

རྒྱ་ནག་གཞུང་གིས་བོད་དང་༧གོང་ས་རྒྱལ་བ་རིན་པོ་ཆེ་མཆོག་ལ་འབྲེལ་བ་ཡོད་པའི་རྒྱལ་སྤྱིའི་བཟོ་གྲྭ་དང་ཁེ་ལས་ཁང་། དེ་བཞིན་གྲགས་ཅན་སྒྱུ་རྩལ་བ་དང་ཤེས་ཡོན་པ་སོགས་ལ་སྐྱོན་བརྗོད་དང་བཀག་སྡོམ་བྱས་པའི་གནད་དོན་ཐེངས་མང་བྱུང་ཡོད། འདི་ལོའི་ཕྱི་ཟླ་ ༡ པོའི་ནང་མྰ་རོ་ཊི་རྒྱལ་སྤྱིའི་མགྲོན་ཁང་(Marriott)དང་། ཨ་རིའི་མཁའ་ལམ་ཞབས་ཞུ་ཁང་(DeltaAirLines)གཉིས་ཀྱིས། བོད་དང་ཐའེ་ཝན། ཧོང་ཀོང་སོགས་རྒྱལ་ཁབ་ཀྱི་ཐོ་ཁོངས་སུ་བཅུག་པར་བརྟེན། རྒྱ་ནག་གཞུང་འབྲེལ་དྲ་ལམ་དང་སྤྱི་ཚོགས་དྲ་ལམ་ནས་ཁ་བྲལ་གྱི་བྱ་སྤྱོད་སྤེལ་གྱི་ཡོད་པའི་སྐྱོན་འཛུགས་ཤུགས་ཆེན་བྱས་རྗེས། རྒྱ་ནག་གཞུང་དང་རྒྱ་ནག་མི་མང་ལ་དགོངས་དག་ཞུ་དགོས་ཁེལ་ཡོད་པ་རེད།

གསར་འགོད་པ། སངས་རྒྱས་དཀོན་མཆོག