སློབ་ཕྲུག་གཏན་སློབ་ཁག་ཏུ་འཇོག་པ་ནི་ཕ་མས་བུ་ཕྲུག་གི་འཚར་ལོངས་ལ་འགན་མ་ཁུར་བའི་མཚོན་རྟགས་རེད།

རྡོ་སྦིས་ཟླ་བ་ཚེ་རིང།

འུ་ཚོའི་ཕ་མ་ཚོས་བྱིས་པའི་འཚར་ལོངས་ཀྱི་ཆེད་དུ་སློབ་གསོ་ཅི་ཞིག་བསླབ་མྱོང་ངམ། འུ་ཚོའི་ཕ་མ་ཚོས་བྱིས་པའི་འཚར་ལོངས་ཀྱི་ཆེད་དུ་བློས་བཏང་ཅི་ཞིག་བྱ་མྱོང་ངམ། འུ་ཚོས་ཕ་མ་ཚོས་བྱིས་པའི་འཚར་ལོངས་ཀྱི་ཆེད་དུ་དཔེ་དེབ་ཅི་ཙམ་བཀླགས་མྱོང་ངམ། ཟེར་བའི་དྲི་བ་འདི་དག་ནི་ནུབ་གླིང་གི་མགོ་སེར་བོའི་ཕ་མ་ཚོར་ཆེད་རྒྱུན་ལྡན་གྱི་དྲི་རྟགས་ཤིག་ཡིན་ནའང། རང་ཅག་ཁ་བ་བོད་ཀྱི་བྱམས་བརྩེ་སེམས་ས་བོན་དུ་སྒོམ་པའི་དྲིན་ཅན་ཕ་མ་ཚོར་མཚོན་ན་བསམ་བློ་གཏོང་རིན་ཡོད་པའི་དྲི་རྟགས་རྣལ་མ་ཞིག་རེད། དེ་ནི་འུ་ཚོ་ལ་བྱིས་པའི་གཉོར་སྐྱོང་སྐོར་གྱི་སློབ་གསོའི་གླེགས་བམ་དཀོན་པས་ཡིན། རྒྱུ་མཚན་འདི་ལ་བརྟེན་ནས་འུ་ཚོའི་ཕ་མ་ཚོས་བྱིས་པ་སློབ་གྲྭར་བཏང་ན་ཡོད་ཚད་ཤེས་ངེས་ཡིན་སྙམ་པའི་སེམས་ཚོར་འདིས་བྱིས་པ་ལོ་ངོ་བདུན་བརྒྱད་ནས་བཟུང་སྟེ་ཕ་མའི་རིམ་ཁ་དྲོད་མོ་དང་བྲལ་ནས་གཏན་སློབ་ཏུ་འཇོག་ཅི་ཐུབ་བྱེད་ཀྱི་ཡོད་ལ། བཞག་ཐུབ་པ་དེ་ཡང་ཕ་མ་ཚོའི་སེམས་སུ་ཕྲུ་གུའི་མདུན་ལམ་གྱི་ཆེད་དུ་ཡིན་སེམས་ཀྱི་ཡོད་མོད། ཡིན་ནའང་ཕྲུ་གུ་ཚོ་བཅའ་སྡོད་སློབ་གྲྭ་རུ་བཞག་པའི་ཉིན་དང་པོ་དེ་ནས་བཟུང་སྟེ་སེམས་སུ་དཀའ་སྡུག་འཕར་མ་ཞིག་གིས་གཅུན་ནས་ཡོང་བར་མ་ཟད་། ཉིན་མཚན་མེད་པར་བྱིས་པ་དེ་དག་གི་ངོ་གདོང་སྟོན་ས་ནི་སློབ་ཚན་དགེ་རྒན་གྱི་ཁ་བརྡུང་དང་སློབ་གྲྭའི་མ་མས་ཉེས་བརྡུང་གི་ཁོར་ཡུག་ཅིག་གི་འོག་ནས་གསེར་དང་འདྲ་བའི་སྔ་དགོང་གི་དུས་ཚོད་དེ་སློབ་གྲྭའི་སྒྲིག་གཙོ་ཞིག་གིས་དོན་མེད་དུ་རྫོགས་ཀྱི་ཡོད་པ་འདི་རེད།

སྤྱིར་འགྲོས་ལྟར་སློབ་གྲྭ་ནི་ཤེས་ཡོན་སྣ་ཚོགས་བསླབ་སའི་ཁོར་ཡུག་ཅིག་རེད་མ་གཏོགས་བྱིས་པའི་སེམས་ཀྱི་དཀའ་སྡུག་ཞུ་ས་དང་ལུས་གཟུགས་བདག་སྐྱོང་བྱེད་སའི་ཁོར་ཡུག་ཅིག་དེ་ལས་ཀྱང་མ་རེད། སློབ་གྲྭ་ནི་ཤེས་ཡོན་འགྲན་བསྡུར་གྱི་ཁོར་ཡུག་ཅིག་རེད་མ་གཏོགས་སྤྲོ་སྐྱིད་གཏོང་ས་དང་ལྗོངས་རྒྱུ་བྱེད་སའི་ཁོར་ཡུག་ཅིག་དེ་ལས་ཀྱང་མ་རེད། སློབ་གྲྭ་ནི་མི་ཚེའི་རིན་ཐང་འཇལ་སའི་ཁོར་ཡུག་ཅིག་རེད་མ་གཏོགས་ལྷོད་ཡངས་གཏོང་ས་དང་བདག་མེད་ཡོང་སའི་མགྲོན་ཁང་ཞིག་དེ་ལས་ཀྱང་མ་རེད། དེ་བས་གནས་མཆོག་འདི་ནས་བླུན་པོ་ཞིག་མཁས་པར་བཟོ་སྲིད་ལ་མི་བཟང་ཞིག་མི་ངན་ལའང་འགྱུར་སྲིད། རྒྱུ་མཚན་དེའི་ན། ཕ་མ་ཚོས་བྱིས་པའི་མདུན་ལམ་ཡོད་ཚད་སློབ་གྲྭ་དང་དགེ་རྒན་ལ་བཅོལ་བ་ནི་གླེན་རྟགས་ཁོ་ནའོ།།

དགེ་རྒན་ཚོས་བྱིས་པའི་ཕ་མ་ལྟར་བརྩེ་བ་ཁྱད་མཉམ་ཞིག་དུས་ཚོད་དང་གྲངས་འབོར་གྱི་དབང་གིས་སྤྲད་ཁག་པས། འདི་དག་གི་འགན་ཁུར་གཙོ་བོ་ནི་ཕ་མ་ཚོར་ཡོད་ལ། ཕ་མ་ནི་བྱིས་པའི་དགེ་རྒན་དང་ཤོས་དེ་ཡིན་ཟེར་བའི་རྒྱུ་མཚན་ཡང་འདི་ན་ཡོད། མ་ཟད་ཕ་མའི་བརྩེ་བ་ནི་དགེ་རྒན་ལས་ལྷད་མེད་པ་ཞིག་དང་དགེ་རྒན་ལས་འདང་ཆེ་བ་ཞིག་ཡིན་པ་དྲིན་ཅན་ཕ་མ་ཟེར་བའི་མིང་རྡོག་རྡོག་ལས་ཤེས་ཐུབ། ལྷག་པར་དུ་བྱིས་པའི་སེམས་ཐག་ཉེ་ས་དང་བརྩེ་བ་བྱེད་ས་ཡང་ཕ་མའི་བརྩེ་བ་ཡིན་པས། ཕ་མ་ལས་བྱིས་པའི་སེམས་སུ་བདེ་སྐྱིད་ཅིག་དང་རེ་བ་ཞིག་འཁོར་གྱིན་ཡོད་པའི་ན། སེམས་ཁམས་སྐྱིད་པོ་དང་རེ་བ་འཕར་མ་ཞིག་གི་ཐོག་ལ་སློབ་གྲྭའི་སློབ་གསོ་སྣོན་ཐུབ་ཚེ་ད་གཟོད་མི་བུ་ཚོར་ཤུགས་ཅན་ཞིག་དང་ཤེས་རྟོགས་ཐུབ་མཁན་ཞིག་ཡོང་ངེས་རེད། གང་ལྟར་སྐད་ཆ་དྲང་མོ་བཤད་ན། བློས་གཏོང་ཅི་ཙམ་བྱས་ན་འབྲས་བུ་དེ་བཞིན་སྨིན་པ་ནི་ས་བོན་ཅི་ཞིག་བཏབས་ན་སྟོན་འབྲས་དེ་ག་རང་སྨིན་པའི་དཔེར་ཡིན་མོད། འུ་ཚོའི་ཕ་མ་ཚོས་བྱིས་པའི་ཆེད་དུ་དཀའ་ལས་གཅིག་ཀྱང་མི་རྒྱག་པར་རེ་བ་ཆེན་པོ་ཞིག་བཟུང་བ་ནི་འཇའ་ཚོན་ལ་ལག་འཇུ་བྱ་འདོད་ཀྱི་སེམས་ཚོར་སྟོང་པ་ཡིན་པས། བྱིས་པའི་ཆེད་དུ་དུས་ཚོད་གཏོང་དགོས་ལ། བྱིས་པའི་མཉམ་དུ་གླེང་མོལ་བྱ་དགོས། བྱིས་པའི་ཆེད་དུ་རྩེད་མོ་ཡང་རྩེས་དགོས་པའི་ན། བྱིས་པའི་སེམས་སུ་ཕ་མ་ནི་བློ་གཏོང་སའི་དྲིན་ཅན་གྱི་ཕ་མ་ཡིན་པར་མ་ཟད། སེམས་གཏམ་བཤད་སའི་གྲོགས་པོའང་ཡིན་མོད། ཡིན་ནའང། འུ་ཚོའི་ཕ་མ་ལ་ལ་ཡིས་ཁེ་དབང་དང་བདེ་སྐྱིད་ཀྱི་ཆེད་དུ་དུས་ཚོད་ཡོད་ཚད་རང་དོན་དུ་བཏང་ནས་བྱིས་པ་གཏན་སློབ་ཏུ་མངགས་ཀྱི་ཡོད་ལ། འུ་ཚོའི་ཕ་མ་ལ་ལ་ཡིས་ཞོགས་པ་སྔ་ལངས་དང་ཟས་བསྐོལ་གཡོས་སྦྱོར་ལ་ཉོབ་ནས་བྱིས་པ་གཏན་སློབ་ཏུ་བཏང་གིན་ཡོད། འདི་ལྟར་འུ་ཚོའི་ཕ་མ་ཚོས་དུས་ཚོད་དང་བློས་གཏོང་ཅུང་ཙམ་ཡང་མི་བྱེད་པར་རེ་བ་འཐོན་པོ་ཞིག་བཟུང་བ་ནི་རྨི་ལམ་མ་ཡིན་ནམ།

སྤྱིར་བྱིས་པའི་མདུན་ལམ་ལམ་ལྷོང་ཡོང་པར་འཇམ་རྩུབ་གཉིས་ཀྱི་སློབ་གསོ་མཁོ་བ་ནི་མིའི་རིགས་ཀྱི་རྒྱུན་ལྡན་གྱི་འགྲོ་ལུགས་ཤིག་ཡིན་པས། ཁྱིམ་དང་སློབ་གྲྭའི་སློབ་གསོ་ཟུང་འབྲེལ་གྱི་ཐབས་ལམ་ལ་བརྟེན་ནས་བྱིས་པའི་དམིགས་ཡུལ་ལེགས་འགྲུབ་བྱ་རྒྱུ་ནི་ཕ་མ་དང་དགེ་རྒན་གཉིས་ཀྱི་འོས་འགན་རེད་མ་གཏོགས་དགེ་རྒན་ཁོ་ནའི་ཡོང་པའི་ལས་ཁུར་སླ་མོ་ཞིག་གཏན་ནས་མ་རེད། ཡང་ཕ་མ་ལ་ལས་བྱམས་སེམས་ལག་པ་རིང་དུ་བརྐྱངས་ནས་བྱིས་པའི་ལག་ཟུང་དུ་དངུལ་ལོ་མཐུག་པོ་འདོད་མེད་དུ་སྦྱིན་པ་དང་། བརྩེ་བའི་ལག་ཟུང་གཡང་མོར་རིང་དུ་བསྲེངས་ནས་བྱིས་པའི་མིག་ཟུང་ལ་ཀུ་ཤུ་ཁ་པར་བརླན་དུ་འཇུག་པ་ནི་བྱིས་པའི་འཚར་ལོངས་ལ་ཕན་པའི་ལྷད་མེད་སློབ་གསོ་ཞིག་ཨེ་ཡིན་ནམ་སྙམ། གང་ལྟར་ད་དུང་འདི་དང་འདི་འདྲ་བའི་གཏམ་རྒྱུད་མང་པས། ཕ་མ་ཁ་ཤས་ཀྱིས་བརྙན་འཕྲིན་ཆེན་པོ་ཞིག་ལ་ལྟ་ཞོར་མདུན་གྱི་བྱིས་པ་ལ་སློབ་སྦྱོང་བྱོས་ཟེར་ནས་རྫིག་རྫིག་དང་ཏན་ཏན་གྱིས་སྐུལ་མ་བྱ་ལ། ཕ་མ་ཁ་ཤོས་ཀྱིས་སྐད་འཕྲིན་དོན་མེད་གླེང་དུ་འཛུལ་ནས་ཧ་ཧ་དང་ཧོ་ཧོ་ཡི་སྨྱོན་གཏམ་བཤད་ཞོར་མདུན་གྱི་བྱིས་པ་ལ་ནང་སྦྱོང་བྱོས་ཟེར་ནས་བསླབ་བྱ་གནང་མཁན་གྱི་ཕ་མ་འདི་དག་གི་བྱིས་པའི་དགེ་རྒན་ཚོ་ནི་དངོས་གནས་སྙིང་རེ་རྗེ་ཨང།