བོད་རིགས་གཞོན་སྐྱེས་ཚོར་ནང་ཁུལ་ཕྱོགས་ཞེན་དང་རྩོད་རྙོག་གི་ན་ཚ་རིགས་འགོས་པ་ཡིན་ན་ང་ཚོས་མི་ལོ་༦༠ ཉེ་བར་བོད་དོན་ཆེད་འཐབ་རྩོད་བྱས་པའི་མ་རྩ་དེ་བརླགས་ཚར་བ་རེད།
ཟླ་འདིའི་ཕྱི་ཚེས་༢༡ ཉིན་གྱི་ཕྱི་དྲོར་བྷང་ལོར་ཧི་མ་ལ་ཡའི་གསོལ་མགྲོན་ཁང་དུ། ས་གནས་བོད་ཀྱི་ཁྲིམས་ལུགས་རིག་པ་བའི་ཚོགས་པའི་གོ་སྒྲིག་འོག དེང་གི་བཙན་བྱོལ་སྤྱི་ཚོགས་ཞེས་པའི་བརྗོད་གཞིའི་ཐོག་ས་གནས་གཞོན་ནུ་ལྷན་ཚོགས་དང་ས་གནས་བོད་རང་བཙན་སློབ་ཕྲུག་ཚོགས་པ། ས་གནས་འཕྲོད་བསྟེན་གླིང་། ས་གནས་ཁྲིམས་ལུགས་རིག་པ་བའི་ཚོགས་པ་བཅས་ནས་གཞོན་སྐྱེས་སློབ་ཕྲུག་ཚོའི་བར་བགྲོ་གླེང་ཚོགས་འདུ་ཞིག་ཚོགས་ཡོད་པ་དང་། བགྲོ་གླེང་ཚོགས་འདུའི་ཐོག་སྐུ་མགྲོན་གཙོ་བོར་མཉམ་འབྲེལ་ཚོགས་གཙོ་ཟུར་པ་བཀྲ་ཤིས་དབང་ཕྱུག་ལགས་དང་བགྲོ་གླེང་གཏམ་བཤད་པ་སློབ་ཕྲུག་གཙོས་ཟུར་ཉན་དུ་ཕེབས་མཁན་སློབ་མ ༢༠ ལྷག་བཅས་ཁྱོན་མི་གྲངས་༣༠ ལྷག་ཅིག་འཛོམས་ཡོད་འདུག
འདི་གའི་གསར་འགོད་པར་ས་གནས་ཁྲིམས་ལུགས་རིག་པ་བའི་ཚོགས་གཙོ་དཀོན་མཆོག་རིན་ཆེན་ལགས་ཀྱིས་བགྲོ་གླེང་ཚོགས་དགོས་པའི་དམིགས་ཡུལ་སྐོར་བརྗོད་དོན། བགྲོ་གླེང་དེ་ཚོགས་དགོས་པའི་དམིགས་ཡུལ་གཙོ་བོ་ནི། ཕྱི་ལོ་༡༩༥༩ ལོ་ནས་བོད་མིས་ཞི་བའི་སྒེར་ལངས་བྱས་ཏེ་ད་ལོ་ནས་ལོ་ངོ་༥༩ འགྲོ་བཞིན་པ་དང་། ༧པཎ་ཆེན་རིན་པོ་ཆེ་མཆོག་རྒྱ་ནག་གཞུང་གིས་སྐུ་བཀྲོངས་ནས་ལོ་ངོ་༢༩ འཁོར་གྱི་ཡོད་པ། བོད་ནང་ས་བྱི་ཞི་རྒོལ་ཆེན་མོ་ལངས་ཏེ་ལོ་ངོ་བཅུ་འཁོར་བ། ལྷག་པར་དུ་བོད་ཕྱི་ནང་གཉིས་སུ་བོད་མི་མང་པོས་རང་ལུས་མེར་བསྲེགས་གནང་བ་སོགས་ལ་བོད་ཕྱི་ནང་གཉིས་ཀྱི་གཞོན་སྐྱེས་ཚོས་ནུས་པ་མཉམ་སྤུངས་ཀྱིས་བོད་དོན་འཐབ་རྩོད་ལ་གདུང་སེམས་མཉམ་སྐྱེད་བྱས་པ་ཞིག་མཚོན་གྱི་ཡོད། ཅེས་བརྗོད་བྱུང་།
ཡང་ཁོང་གིས། ད་ལྟ་ང་ཚོའི་གནས་སྟངས་ཧ་ཅང་ཛ་དྲག་ཅན་དུ་གྱུར་ཡོད་པའི་སྐབས་འདིར་གཞོན་སྐྱེས་ཚོས་འཐབ་རྩོད་ལ་འགན་འཁུར་དང་གཅིག་སྒྲིལ་གྱི་ནུས་པ་མཉམ་སྤུངས་བྱ་རྒྱུ་གལ་ཆེན་པོ་རེད་ལ། ང་ཚོའི་འདས་པའི་ཉམས་མྱོང་གཞི་ལ་བཞག་ནས་བཤད་ན། གཞོན་སྐྱེས་ཚོར་མགོ་འཁྲིད་ཀྱི་ལམ་སྟོན་ཡག་པོ་ཞིག་བྱེད་ཐུབ་པ་ཡིན་ན། ང་ཚོར་ཆོལ་ཁ་ཆོས་ལུགས་དང་ལུང་ཚན་ཕྱོགས་ཞེན་གྱི་རིགས་དེ་གཏན་ནས་མེད་པ་རེད་ལ། ད་ལྟའི་ཆར་ང་ཚོའི་སྤྱི་ཚོགས་དང་ལྷག་པར་དུ་གྲོས་ཚོགས་ར་བའི་ནང་ཆོལ་ཁ་ཆོས་ལུགས་དང་ལུང་ཚན་ཕྱོགས་སྒྲིག་གིས་ཕྱོགས་ཞེན་དང་ཆིག་སྒྲིལ་མེད་པའི་གནས་སྟངས་མང་པོ་ཞིག་ཡོང་གི་ཡོད་ན་ཡང་། ང་ཚོ་གཞོན་སྐྱེས་ཚོར་ན་ཚ་དེའི་རིགས་གཏན་ནས་ཡོད་པ་མ་རེད་ཅེས་ན་འགྲིག་གི་ཡོད་པ་རེད། དེ་བཞིན་ང་ཚོར་མཚོན་ན་བཀུར་འོས་པའི་སྤྱི་འཐུས་ཚོར་གྲོས་ཚོགས་ར་བའི་ནང་ཕྱོགས་ཞེན་དང་ནང་ཁུལ་གྱི་རྙོག་དྲ་མང་པོ་ཞིག་བཤད་མ་བསྡད་པར་བོད་སྤྱི་བའི་རྩ་དོན་ལ་ཕན་པ་དང་ཕར་དགྲ་བོ་ལ་ཁ་འཁོར་ཏེ། བོད་གཞིས་ལུས་རྒྱ་ཆེའི་སྤུན་ཟླ་མི་མང་ཚོའི་རེ་བ་འགྲུབ་ཐུབ་པ་ཞིག་བྱ་རྒྱུ་གལ་ཆེན་པོ་རེད་ལ། དེ་བཞིན་གཞོན་སྐྱེས་ཚོར་ནང་ཁུལ་ཕྱོགས་ཞེན་དང་རྩོད་རྙོག་གི་ན་ཚ་འགོས་མི་འཇུག་རྒྱུ་གལ་ཆེན་རེད། གལ་དེ་ན་ཚ་དེ་རིགས་འགོས་པ་ཡིན་ན་ང་ཚོས་མི་ལོ་༦༠ ཉེ་བར་བོད་དོན་ཆེད་འཐབ་རྩོད་བྱས་པའི་མ་རྩ་དེ་བརླགས་ཚར་བ་རེད། ཅེས་བརྗོད་བྱུང་།
བགྲོ་གླེང་དེའི་ཐོག་གཙོ་བོ་གཞོན་སྐྱེས་རྣམས་ཀྱིས་རང་གི་སྤྱི་ཚོགས་དང་སྒྲིག་འཛུགས་སོགས་ལ་བཟུང་བའི་ལྟ་ཚུལ་དང་། བཙན་བྱོལ་བོད་མིའི་མཐུན་ལམ་གོང་མཐོར་གཏོང་དགོས་པ། གཞོན་སྐྱེས་རྣམས་ཀྱི་བརྒྱུད་ལ་སྤྱི་ཚོགས་རྙིང་པའི་ཕྱོགས་ཞེན་གྱི་ན་ཚ་སྔོན་འགོག་བྱ་དགོས་པའི་སྐོར་དང་། དཔྱད་ཞིབ་དང་རྒྱུས་ལོན་མེད་པར་སྤྱི་ཚོགས་བརྒྱུད་ལམ་ཁག་གི་གནས་ཚུལ་གང་ལའང་ཡིད་འཇོག་བྱ་མི་རུང་བའི་སྐོར་སོགས་གླེང་སློང་བྱས་ཡོད་འདུག
གསར་འགོད་པ། སངས་རྒྱས་དཀོན་མཆོག
གཞན་སྐྱེས་ཀྱིས་བགྲོ་གླེང་འདི་ལྟ་བུ་ཚུགས་ཐུབ་པར་འཚམས་འདྲིའི་བཀྲིས་བདེ་ལེགས་ཞུ།