བཙོན་ཁང་གཏོར་སྟེ་བཙོན་པ་བསད།

གཏོར་རྒོལ་ཚོགས་པ་ཞིག་གིས་སྦིར་ཛིལ་གྱི་བཙོན་ཁང་ཞིག་ཏུ་འབར་རྫས་གཡུགས་སྟེ་མི་གྲངས་ ༢༣ ལ་ཤི་རྨས་བྱུང་ཡོད་འདུགསྦིར་ཛིལ་བྷི་བྷི་སི་སོགས་ནས་གནས་ཚུལ་སྤེལ་བ་ལྟར་ན། ཁ་སང་ཕྱི་ཚེས་༡༠ཉིན་སྦིར་ཛིལ་གྱི་བྱང་ཕྱོགས་སུ་ཡོད་པའི་གྲོང་འཁྱེར་སྦེལ་ལེམ་(Belem)གྱི་བཙོན་ཁང་ཞིག་ཏུ། ཡུལ་དེའི་གཏོར་རྒོལ་ཚོགས་པ་ཞིག་གིས་བཙོན་པ་རྣམས་དང་གསང་གྲོས་བྱས་པ་བརྒྱུད། འབར་རྫས་གཡུགས་སྟེ་བཙོན་ཁང་གི་གྱང་ར་གཏོར་ཡོད་པ་དང་། གཏོར་སྐྱོན་ཁྲོད་མི་ ༢༣ ལ་རྨས་སྐྱོན་བཟོས་ཡོད་པ་མ་ཟད། དེའི་ནང་ནས་བཙོན་པ་དང་གཏོར་རྒོལ་པ། བཙོན་སྲུང་བ་བཅས་མི་ ༡༩ རྐྱེན་འདས་སུ་ཕྱིན་ཡོད་འདུག

ས་གནས་ཀྱི་བདེ་སྲུང་ཁང་གིས་བརྗོད་པ་ལྟར་ན། ད་ལན་གྱི་གཏོར་སྐྱོན་དེ་བཙོན་ཁང་གི་ཕྱི་ནང་གཉིས་ཀ་ནས་སྤེལ་ཡོད་པའི་གནས་ཚུལ་ཤེས་རྟོགས་བྱུང་ཡོད་པ་དང་།  འདས་པའི་ནང་བཙོན་ཁང་དེ་དང་ཕྱིའི་གཏོར་རྒོལ་རུ་ཁག་བར་གདོང་ཐུག་གིས་དྲག་འཛིང་ཡང་ཡང་བྱས་ཡོད་སྐོར་བརྗོད་འདུག

བཙོན་ཁང་གཏོར་རྒོལ་གྱི་གནད་དོན་དེ་ཐེངས་དང་པོ་མིན་པར་འདི་ལོའི་ཕྱི་ཟླ་ ༡ ཚེས་༡ཉིན་གྱི་ཕྱི་དྲོར། སྦིར་ཛིལ་དབུས་ཀྱི་ས་གནས་གྷའོ་ཡ་སི་(GOIAS)ཞེས་པའི་ནང་གི་བཙོན་ཁང་ཞིག་ལ་གཏོར་རྒོལ་ཚབས་ཆེན་ཕོག་སྟེ། ཉུང་མཐར་མི་གྲངས་ ༩ རྐྱེན་འདས་དང་མི་ ༡༤ ལྷག་ལ་རྨས་སྐྱོན་ཕོག ཟིང་འཁྲུག་ཁྲོད་ཁྱོན་བཙོན་པ་ ༡༠༦ ཙམ་བྲོས་བྱོལ་དུ་ཕྱིན། གཏོར་རྒོལ་དོན་རྐྱེན་བྱུང་ཉིན་དེར་མི་ ༢༩ འཛིན་བཟུང་བྱས་ཡོད་པའི་གནས་ཚུལ་ཐོན་ཡོད་པ་རེད།

ཕྱི་ལོ་ ༢༠༡༦ ལོའི་གཞུང་ཕྱོགས་གྲངས་ཐོ་ལྟར་ན། སྦིར་ཛིལ་ནང་ཁྱོན་བཙོན་པ་ ༧༢༦༠༠༠ ལྷག་ཡོད་སྟབས། བཙོན་ཁང་གི་མི་གྲངས་ཤོང་ཚད་ ༣༦༨༠༠༠ ལས་ལྡབ་གཉིས་ཆགས་ཡོད་པ་དང་། གྲངས་འབོར་ཚད་ལས་བརྒལ་བའི་བཙོན་ཁང་དུ་བཙོན་པར་མནར་གཅོད་དང་སྡུག་སྦྱོང་ཤུགས་ཆེན་གཏོང་བཞིན་ཡོད་སྐོར་བརྗོད་ཀྱི་འདུག