གསང་མྱུལ་བའི་དོགས་གཞིའི་འོག་བོད་མི་ཞིག་འཛིན་བཟུང་བྱས།

སི་ཝེ་ཌན་གཞུང་གིས་བོད་མི་ཞིག་འཛིན་བཟུང་བྱས་ཏེ་རྒྱ་ནག་གཞུང་གི་གསང་མྱུལ་བ་ཡིན་པའི་བདེན་དཔང་ཆ་ཚང་ཡོད་སྐོར་བསྒྲགས་འདུགསི་ཝེ་ཌན་གསར་ཁང་(TheLocal)ཞེས་པས་གནས་ཚུལ་སྤེལ་བ་ལྟར་ན།  བཙན་བྱོལ་བོད་མི་སྤྱི་དང་ཡུ་རོབ་ཁུལ་ཏུ་ཡོད་པའི་བོད་མི་སྒེར་གྱི་འགྲོ་འདུག་སྤྱོད་གསུམ་དང་། འཆར་གཞི་གང་ཡིན་པ་སོགས་ཀྱི་གནས་ཚུལ་རྒྱ་ནག་གཞུང་ལ་རྩིས་སྤྲོད་བྱས་པའི་དོགས་གཞིའི་འོག བོད་མི་ཞིག་འཛིན་བཟུང་བྱས་ཏེ་ཁ་སང་ཡུལ་དེའི་ཁྲིམས་ཁང་ནས་ཁྲིམས་བཤེར་བྱས་ཡོད་ཀྱང་། ཁོའི་ཁྲིམས་རྩོད་པས་དཔང་རྟགས་ཁ་གསལ་མེད་སྐོར་བརྗོད་དེ་ནག་ཉེས་ངོས་ལེན་བྱས་མེད་པར་བརྟེན། ཁོ་རང་བདུན་ཕྲག་གཉིས་རིང་བཀག་ཉར་འོག་བཞག་ཡོད་འདུག

འདི་གའི་གསར་འགོད་པས་ཁ་པར་བརྒྱུད་སི་ཝེ་ཌན་བོད་རིགས་ཚོགས་པའི་ཚོགས་གཙོ་འཇམ་དབྱངས་ཆོས་སྒྲོན་ལགས་སུ་དེའི་སྐོར་སྐད་ཆ་དྲིས་པར་མོས། སི་ཝེ་ཌན་གསང་བའི་ལས་ཁུངས་ནས་བོད་མི་དེས་གནད་ཚབས་ཆེ་བའི་གནས་ཚུལ་རྒྱ་ནག་གཞུང་ལ་མཁོ་སྤྲོད་བྱས་ཡོད་པའི་དོགས་གཞིའི་འོག་འཛིན་བཟུང་བྱས་ཡོད་ཀྱང་། སི་ཝེ་ཌན་ནང་བོད་རིགས་ཉུང་ཉུང་ཞིག་ལས་མེད་དུས་རྒྱ་ནག་གཞུང་གིས་གསང་མྱུང་བ་གཏོང་དགོས་དོན་གང་ཡིན་ཧ་གོ་ཡི་མེད་པ་དང་། དམིགས་བསལ་བོད་མི་སྤྱིའི་གནས་སྟངས་དང་། ལྷག་པར་དུ་སི་ཝེ་ཌན་ནང་ཡོད་པའི་བོད་རིགས་མང་ཆེ་བའི་ནང་མི་སྤུན་མཆེད་སོགས་བོད་ནང་བཞུགས་ཡོད་སྟབས། སི་ཝེ་ཌན་ཁྲིམས་ཁང་ནས་བོད་མི་དེར་ཁྲིམས་ཐག་མ་བཅད་བར་དུ་སི་ཝེ་ཌན་བོད་རིགས་ཚོགས་པའི་ངོས་ནས་ཁོ་རང་གསང་མྱུར་བ་ཡིན་པར་ངོས་འཛིན་བྱེད་ཀྱི་མེད་སྐོར་སོགས་བརྗོད་བྱུང་།

སྤྱི་ཚོགས་དྲ་ལམ་ཁག་ཏུ་བོད་མི་དེ་རྒྱ་གར་ནས་སི་ཝེ་ཌན་ནང་ཕྱིན་པ་ཡིན་སྐོར་བརྗོད་ཀྱི་འདུག་ཀྱང་། འཇམ་དབྱངས་ཆོས་སྒྲོན་ལགས་ཀྱིས་སི་ཝེ་ཌན་གསང་བའི་ལས་ཁུངས་ཀྱི་གནས་ཚུལ་ལྟར་ན། བོད་མི་དེས་རྒྱ་ནག་གི་མི་སེར་ཡིན་པའི་ཁ་ཆེ་མི་རིགས་ཀྱི་ལག་འཁྱེར་ཐོག་སི་ཝེ་ཌན་ནང་ཐད་ཀར་སྐྱབས་བཅོལ་ཞུས་ཡོད་སྐོར་བརྗོད་བྱུང་།

སི་ཝེ་ཌན་གྱི་ཁྲིམས་ཞིབ་པས། བོད་མི་དེས་སི་ཝེ་ཌན་གཙོས་ཡུ་རོབ་རྒྱལ་ཁབ་ཁག་མང་པོའི་ནང་བོད་དོན་དང་འབྲེལ་བའི་ཚོགས་ཆེན་ཁག་ཏུ་མཉམ་ཞུགས་བྱས་ཡོད་པ་དང་། ཁོའི་ལས་འགན་གཅོ་བོ་ནི། རྒྱ་ནག་དང་ཁ་གཏད་ཡིན་པའི་གནད་ཡོད་མི་སྣ་ཁག་གི་གནས་ཚུལ་རྒྱ་ནག་གཞུང་ཚབ་ཁང་དུ་མཁོ་སྤྲོད་བྱ་རྒྱུ་དེ་ཡིན་སྐོར་དང་། མི་དེས་པོ་ལན་ཌི་དང་ཧྥི་ལན་ཌིའི་རྒྱ་ནག་གཞུང་ཚབ་ཁང་ལ་འབྲེལ་བ་བྱས་ཏེ་ཐེངས་རེར་ཨ་སྒོར་སྟོང་ ༦ རེ་བླངས་ཡོད་སྟབས།  ཁོས་བོད་པའི་སྤྱི་ཚོགས་ཀྱི་གནད་ཡོད་མི་སྣ་མང་པོ་ཞིག་ལ་གནོད་སྐྱེལ་གྱིན་ཡོད་པ་མ་ཟད། ད་དུང་མུ་མཐུད་མི་མང་པོ་ཞིག་ལ་གནོད་སྐྱོན་ཚབས་ཆེན་སྤྲོད་ངེས་ཡིན་པར་བརྟེན། ཁོའི་ནག་ཉེས་ཧ་ཅང་ཚབས་ཆེན་ཡིན་སྐོར་བརྗོད་འདུག

སི་ཝེ་ཌན་གསང་བའི་ལས་ཁུངས་ཀྱིས་ཕྱི་ལོ་ ༢༠༡༥ ལོ་ནས་མི་དེར་གསང་བའི་ཞིབ་འཇུག་བྱས་ཡོད་པ་དང་། ཕྱི་ལོ་ ༢༠༡༧ ལོའི་བོད་ཀྱི་ལོ་གསར་སྐབས་ཁོ་འཛིན་བཟུང་བྱས་ཏེ་ཟླ་ ༢ མ་ཟིན་ཙམ་རིང་བཀག་ཉར་བྱས་ཡོད་ཀྱང་། ཕྱིས་སུ་ཀློད་གྲོལ་བཏང་སྟེ་ལྟ་ཞིབ་འོག་བཞག་རྗེས་བསྐྱར་དུ་འཛིན་བཟུང་བྱས་ཡོད་འདུག

ཡང་འཇམ་དབྱངས་ཆོས་སྒྲོན་ལགས་ཀྱིས་བརྗོད་པ་ལྟར་ན། དབྱར་དུས་མི་མང་པོ་ཞིག་གུང་གསེང་ལ་བུད་འགྲོ་ཡི་ཡོད་སྟབས། དབྱར་ཁ་རྫོགས་རྗེས་མ་གཏོགས་ད་ལྟ་ད་དུང་མི་དེ་ལ་ཁྲིམས་བཤེར་བྱ་ཐུབ་ཀྱི་མེད་པ་དང་། སི་ཝེ་ཌན་ནང་བོད་རིགས་ཉུང་ཉུང་ཡིན་པས་ཐོག་མར་བོད་རིགས་གསང་མྱུར་བ་ཞིག་འདུག་སྐོར་ལབ་དུས་ཧ་སང་སོང་ཞེས་བརྗོད་བྱུང་།

གསར་འགོད་པ། སྐལ་བཟང་སྦྱིན་པ།