རྩེད་འགྲན་པའི་ཆེད་ལས་ཐོག་བོད་པའི་གཤིས་ཀ་དེ་འཁྱེར་ནས་འགྲོ་དགོས།

 ༧གོང་ས་རྒྱལ་བ་རིན་པོ་མཆོག་གིས་གོ་ནེ་ཧྥ་རྒྱལ་སྤྱིའི་རྐང་རྩེད་སྤོ་ལོའི་འགྲན་སྡུར་ནང་ཞུགས་མཁན་བོད་རིགས་རྩེད་འགྲན་པ་ཚོར་ས་གནས་གང་དུ་བསླེབ་ཀྱང་བོད་པའི་རིག་གཞུང་གོམས་གཤིས་འཁྱེར་ནས་འགྲོ་ཡི་ཡོད་པ་དེ་མ་བརྗེད་པ་བྱོས་ཞེས་གསུངས་འདུག

དེ་རིང་ཉིན་གུང་ཆུ་ཚོད་ ༡༢ ཡོལ་ཙམ་གྱི་ཐོག་བོད་མིའི་སྒྲིག་འཛུགས་ཀྱི་བཀའ་ཤག་ཚོགས་ཁང་དུ། བོད་རྒྱལ་ཡོངས་རྩེད་རིགས་ཚོགས་པའི་གོ་སྒྲིག་འོག མི་འགྱང་བར་བོད་ཀྱི་རྐང་སྤོལ་རུ་ཁག་གོ་ནེ་ཧྥ་རྒྱལ་སྤྱིའི་རྐང་རྩེད་སྤོ་ལོའི་འགྲན་སྡུར་(CONIFA World Football Cup)ནང་ཐེངས་དང་པོ་འཛུལ་ཞུགས་བྱ་རྒྱུ་གཏན་འཁེལ་བྱུང་ཡོད་པའི་སྐོར་ལ་གསར་འགོད་ལྷན་ཚོགས་ཤིག་བསྐོངས་གནང་སོང་བ་དང་། ལྷན་ཚོགས་ཐོག་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་ནས་གོ་ནེ་ཧྥ་རྒྱལ་སྤྱིའི་རྐང་སྤོལ་རྩེད་འགྲན་ནང་མཉམ་ཞུགས་གནང་མཁན་རྩེད་འགྲན་པ་དང་ལས་བྱེད་བཅས་ནས་བཙན་བྱོལ་བོད་མི་ཙམ་མ་ཟད། བོད་མི་ས་ཡ་ ༦ གི་ཚབ་མཚོན་བྱས་ཏེ་འགྲོ་ཡི་ཡོད་པས་འོས་འགན་ཆེན་པོ་ཡོད་པ་ལྟར་འགྲན་སྡུར་ཡག་པོ་བྱེད་དགོས་སྐོར་གསུངས་སོང་།

ལྷན་ཚོགས་ཐོག་བོད་རྒྱལ་ཡོངས་རྩེད་རིགས་ཚོགས་པའི་ཚོགས་གཙོ་པ་སངས་རྡོ་རྗེ་ལགས་ཀྱིས། ང་ཚོ་བོད་མི་རིགས་བཙན་བྱོལ་བ་ཆགས་ནས་ལོ་མང་འགྲོ་ཡི་ཡོད་ཀྱང་། ད་རེས་བོད་ཀྱི་རྐང་སྤོལ་རུ་ཁག་འཛམ་གླིང་རྐང་སྤོལ་རྩེད་འགྲན་(FIFA) ནང་མ་ཚུད་པ་དང་རང་བཙན་མེད་པའི་རྒྱལ་ཁབ་ཁག་ལ་རྐང་སྤོལ་རྩེད་འགྲན་གྱི་སྡིངས་ཆ་ཚད་མཐོ་ཤོས་སུ་གྱུར་བའི་རྒྱལ་སྤྱིའི་གོ་ནེ་ཧྥ་རྐང་སྤོལ་རྩེད་འགྲན་ནང་ཐོག་མར་ཞུགས་ཐུབ་པ་ནི་དགའ་འོས་པ་དང་སྤོབས་པ་སྐྱེས་འོས་པ་ཞིག་ཆགས་ཡོད་པར་བརྟེན། ད་རེས་དགའ་སྤོབས་ཀྱི་ཚོར་བ་ཤུགས་ཆེན་ཐོག་ནས་གསར་འགོད་ལྷན་ཚོགས་འདི་ཚོགས་པ་ཡིན། ཞེས་བརྗོད་སོང་།

 ཡང་གོ་ནེ་ཧྥ་རྐང་སྤོལ་རྩེད་འགྲན་ནང་འཛུལ་ཞུགས་བྱེད་ཐབས་དང་གྲྭ་སྒྲིག་སོགས་ཀྱི་སྐོར་ལ་ཁོང་གིས། བོད་ཀྱི་རྐང་སྤོལ་རུ་ཁག་ནས་ལོ་གཅིག་ལྷག་གི་གོང་ནས་རྒྱལ་སྤྱིའི་གོ་ནེ་ཧྥ་རྐང་སྤོལ་རྩེད་འགྲན་ནང་ཚུད་པར་སྙན་ཞུ་ཕུལ་ཏེ་སྦྱོང་བརྡར་གྲ་སྒྲིག་བྱས་ཡོད་པ་མ་ཟད། རྒྱ་གར་གྱི་རྩེད་འགྲན་རུ་ཁག་བར་འགྲན་སྡུར་བྱས་པ་སོགས་དཀའ་ལས་གང་མང་བརྒྱབས་ཏེ། སང་ཉིན་དྷ་ས་ནས་ཐོན་འགྲོ་ཡི་ཡོད་སྐོར་དང་། བོད་ཀྱི་རྐང་སྤོལ་རུ་ཁག་དབྱིན་ཡུལ་དུ་ཕྱོགས་ཐོན་བྱེད་པར་བོད་མིའི་སྒྲིག་འཛུགས་ནས་འགྲུལ་སྐྱོད་ཆེད་ཧིན་སྒོར་འབུམ་ ༡༥ གནང་ཡོད་པ་དང་། དེ་བཞིན་ཡིག་ཆ་ཁག་ལེགས་འགྲུབ་བྱུང་བར་བོད་མིའི་སྒྲིག་འཛུགས་གཙོས་ལྡི་ལིའི་དོན་གཅོད་དང་། དབྱིན་ཡུལ་དོན་གཅོད་ཁང་སོགས་འབྲེལ་ཡོད་མང་པོ་ཞིག་གིས་དཀའ་ལས་བརྒྱབས་ཏེ། ད་རེས་བོད་ཀྱི་རྐང་སྤོལ་རུ་ཁག་ལ་རྒྱལ་ཁ་ཆེན་པོ་འདི་འདྲ་ཞིག་ཐོབ་པར་ང་ཚོ་བོད་མི་རིགས་ཀྱི་རྣམ་པ་སྟོན་སའི་སྡིངས་ཆ་གལ་ཆེན་ཞིག་ཆགས་ཡོད་སྐོར་སོགས་བརྗོད་སོང་།

 དེའི་རྗེས་སྲིད་སྐྱོང་བློ་བཟང་སེང་གེ་མཆོག་གིས། བོད་ཀྱི་རྐང་རྩེད་སྤོ་ལོའི་རུ་ཁག་གིས་ན་ནིང་སི་ཀེམ་དུ་ (Sikkim Governor Gold Cup)ཞེས་པའི་རྐང་རྩེད་སྤོ་ལོའི་རྩེད་འགྲན་སྐབས་འགྲན་སྡུར་ཡག་པོ་བྱས་ཏེ་རྒྱ་གར་གྱི་རྐང་རྩེད་སྤོ་ལོའི་རུ་ཁག་གྲགས་ཆེ་ཤོས་(Mohun Bagan)དང་སྡུར་ཐུབ་པ་བྱུང་ཡོད། དེར་བརྟེན་བོད་ཀྱི་རྐང་སྤོལ་རུ་ཁག་ལ་སྔར་ལས་ལྷག་གིས་གྲུབ་འབྲས་ཐོན་པ་བྱུང་ཡོད་པར་བསྔགས་བརྗོད་ཞུ་ཡི་ཡོད། ད་རེས་འཛམ་གླིང་གི་རྒྱལ་ཁབ་ཁག་ ༣༨ ཀྱི་རྩེད་འགྲན་ནང་ང་ཚོ་ཚུད་ཐུབ་པ་དེས་བོད་ཀྱི་གཞོན་སྐྱེས་རྣམས་ལ་བརྡ་ལན་ཡག་པོ་ཞིག་སྤྲོད་ཐུབ་ཡོད་པ་རེད།  དང་པོ་དེར་དཀའ་ལས་བརྒྱབས་ནས་རྩེད་མོ་བརྩེས་ན་རྒྱལ་ཡུམ་ཆེན་མོ་ཕུད་པའི་རྒྱལ་སྤྱིའི་སྡིངས་ཆའི་སྒང་བསྐྱོད་ཐུབ་ཀྱི་ཡོད་པ་དང་། དེ་བཞིན་རྒྱ་གར་གྱི་རྩེད་འགྲན་ཁག་ཆེ་གྲས་ནང་འཛུལ་ཞུགས་བྱེད་ཐབས་ཡོད་པའི་བརྡ་ལན་གསལ་པོ་སྤྲོད་ཐུབ་ཡོད། གཉིས་ནས་༧གོང་ས་མཆོག་གི་བཀའ་དགོངས་ལྟར་འཕྲོད་བསྟེན་གྱི་ཐོག་ནས་སྔོན་འགོག་ཆེད་བོད་རིགས་གཞོན་སྐྱེས་ཚོས་ཐ་མག་ཉལ་ཐ་འཐེན་པ་ལས་རྩེད་མོའི་རིགས་ལ་དོ་སྣང་བྱས་ན་འཕྲོད་བསྟེན་ཡག་པོ་ཡོད་པ་དང་། སྤྱི་ཚོགས་ལ་ཕན་ཐོགས་ཡོང་བའི་བརྡ་ལན་གསལ་པོ་སྤྲོད་ཐུབ་པ་བྱུང་ཡོད། ཅེས་དང་། བོད་མིའི་སྒྲིག་འཛུགས་ཀྱི་ངོས་ནས་རྩེད་རིགས་དང་འཕྲོད་བསྟེན་ཆེད་བོད་མིའི་གཞིས་ཆགས་ཁག་ཚང་མའི་ནང་རྐང་སྤོལ་དང་ལག་སྤོལ་རྩེད་ཐང་འཛུགས་སྐྲུན་སོགས་ལ་མཐུན་སྦྱོར་གནང་སྟེ། ས་གནས་ཁག་ཕན་ཚུན་བར་འགྲན་སྡུར་དང་། ལྷོ་དང་བྱང་གཉིས་བར་འགྲན་སྡུར། དེ་བཞིན་རྒྱལ་ཡུམ་ཆེན་མོ་དང་། རྒྱལ་སྤྱིའི་སྡིངས་ཆའི་སྒང་བསྐྱོད་ཐུབ་པ་སོགས་ཀྱི་འཆར་གཞི་ཡོད་སྐོར་དང་། རྒྱལ་སྤྱིའི་གོ་ནེ་ཧྥ་རྐང་སྤོལ་རྩེད་འགྲན་ནང་མཉམ་ཞུགས་གནང་མཁན་རྩེད་འགྲན་པ་དང་ལས་བྱེད་བཅས་ནས་བཙན་བྱོལ་བོད་མི་ཙམ་མ་ཟད། བོད་མི་ས་ཡ་ ༦ གི་ཚབ་མཚོན་བྱས་ཏེ་འགྲོ་ཡི་ཡོད་སྟབས་འོས་འགན་ཆེན་པོ་ཡོད་པ་དང་། ཕྱོགས་གཞན་ཞིག་ནས་རྩེད་འགྲན་སྐབས་སྤོབས་པ་དང་གདེང་ཚོད་ཆེན་པོའི་ཐོག་རྩེད་འགྲན་ཡག་པོ་བྱེད་དགོས་སྐོར་སོགས་གསུངས་སོང་།

དེ་རིང་སྔ་དྲོར་༧གོང་ས་རྒྱལ་བ་རིན་པོ་ཆེ་མཆོག་ནས་བོད་རྒྱལ་ཡོངས་རྩེད་རིགས་ཚོགས་པའི་རྩེད་འགྲན་པ་དང་ལས་བྱེད་བཅས་ལ་མཇལ་ཁ་བཀའ་སློབ་བསྩལ་ཡོད་པ་དང་། སྐབས་དེར་༧རྒྱལ་བ་རིན་པོ་ཆ་ེམཆོག་གིས་རྩེད་འགྲན་བྱེད་པར་གང་དུ་ཕྱིན་པ་ཡིན་ནའང་རྩེད་འགྲན་པའི་ཆེད་ལས་ཐོག་བོད་པའི་གཤིས་ཀ་དེ་འཁྱེར་ནས་འགྲོ་དགོས། ས་ཆ་གང་དུ་བསླེབ་ཀྱང་ང་ཚོ་བོད་མི་རིགས་ཀྱི་མཚན་མཐོང་ལ་རྒྱ་བཅས་ལ་ཕན་པ་ཞིག་བྱ་རྒྱུ་དེ་ཧ་ཅང་གལ་ཆེན་པོ་རེད། ང་ཚོ་བོད་པ་ནི་སྤོབས་པ་བྱེད་ཐུབ་པ་ཞིག་རེད། དེ་སྔོན་ང་ཚོ་རྒྱ་གར་ལ་འབྱོར་སྐབས་ཆོས་དང་རིག་གཞུང་། སྐད་ཡིག་བཅས་ལ་བདག་པོ་བརྒྱབ་ཐུབ་ན་བསམ་པ་ཙམ་ལས་བསམ་བློ་རྒྱ་ཆེན་པོ་མེད། བར་ལམ་ལོ་བཞི་བཅུ་ལྔ་བཅུ། དྲུག་ཅུ་ཕྱིན་པའི་སྐབས་ང་ཚོར་བྱམས་བརྩེ་ཡི་རིག་གཞུང་ཞིག་ཡོད་པ་རེད། ང་ཚོས་སྨོན་ལམ་ག་དུས་བརྒྱབ་པ་ཡིན་ནའང་ཁ་ནས་སེམས་ཅན་ཐམས་ཅད་ཅེས་བྱམས་བརྩེ་དང་ལྡན་པའི་སྨོན་ལམ་རྒྱག་གི་ཡོད་པ་རེད།དེ་ཡང་ཚན་རིག་དང་མཐུན་པ་ཧ་ལས་པ་ཞིག་རེད། བྱམས་བརྩེ་ཅན་གྱི་མི་ཞིག་བཟོས་ནས་ཁོ་འཚོ་ཐུབ་པའི་སྤྱི་ཚོགས་བྱམས་བརྩེ་ལྡན་པ་ཞིག་བཟོ་རྒྱུ་ཧ་ཅང་གལ་ཆེན་ཞིག་རེད། དེ་འདྲ་ཡིན་དུས། ཁྱེད་ཚོ་ས་གནས་གང་དུ་བསླེབ་ཀྱང་བོད་པའི་རིག་གཞུང་གོམས་གཤིས་འཁྱེར་ནས་འགྲོ་ཡི་ཡོད་པ་དེ་མ་བརྗེད་པ་བྱོས། ཉིན་གུང་རྩེད་མོ་རྩེ་མཚན་མོར་ཆང་རག་འཐུང་ནས་རྒྱག་རེས་བརྒྱབ་མ་སྡོད་ཨང་། ཞེས་བཀའ་སློབ་གནང་འདུག

བོད་རྒྱལ་ཡོངས་རྩེད་རིགས་ཚོགས་པ་ནི་རྒྱ་གར་གཞུང་ལ་དེབ་སྐྱེལ་བྱས་པའི་ཚོགས་པ་ཞིག་ཡིན་པ་དང་། ཚོགས་པ་འདིའི་དམིགས་ཡུལ་གཙོ་བོ་ནི་བོད་མིའི་སྤྱི་ཚོགས་ནང་རྩེད་མོའི་ནུས་པ་གོང་འཕེལ་སྤྱི་དང་། ལྷག་པར་དུ་རྒྱ་གར་དང་རྒྱལ་སྤྱིའི་རྩེད་འགྲན་ཁག་ཏུ་བོད་ཀྱི་སྐུ་ཚབ་མཚོན་ཐུབ་པའི་རྩེད་འགྲན་རུ་ཁག་འདེམས་སྒྲུག་དང་གསོ་སྐྱོང་བྱེད་པ་བཅས་ཡིན་འདུག ད་ལྟའི་ཆར་ཚོགས་པ་རྒྱ་སྐྱེད་ཀྱིས་རྒྱ་བལ་གཉིས་དང་ཕྱི་རྒྱལ་ཡུ་གྲུ་ཁག་མང་པོའི་ནང་ས་གནས་རྩེད་འགྲན་ཚོགས་ཆུང་བཙུགས་ཏེ། ད་རེས་གོ་ནེ་ཧྥ་རྒྱལ་སྤྱིའི་རྐང་སྤོལ་རྩེད་འགྲན་ནང་རྒྱ་གར་ནས་བོད་རིགས་རྩེད་འགྲན་པ་ ༡༥ དང་། ཨ་རི་ནས་རྩེད་འགྲན་པ་ ༢ ། ཁེ་ན་ཌ་ནས་ ༢ ། དེ་བཞིན་ཡུ་རོབ་ནས་ ༣། དབྱིན་ཡུལ་ནས་ ༡ བཅས་ཁྱོན་བོད་རིགས་རྩེད་འགྲན་པ་ ༢༣ མཉམ་ཞུགས་བྱས་ཏེ། ཟླ་འདིའི་ཕྱི་ཚེས་ ༣༡ ནས་ཟླ་རྗེས་མའི་ཚེས་ ༡༠ བར་གྱི་རྩེད་འགྲན་ནང་ཞུགས་གཏན་འཁེལ་ཡོད་འདུག

གསར་འགོད་པ། ཚེ་རིང་ནོར་བུ་དང་སྐལ་བཟང་སྦྱིན་པ།