རྡོ་སྦིས་ཟླ་བ་ཚེ་རིང་།
ངས་དེ་རིང་འདི་ནས་རང་སེམས་དམར་བོ་ནང་གཅུན་མ་བྱས་པར་ཁ་ནས་ཅི་བཤད་འདི་བཤད་མེད་པའི་ཚིག་ཉོག་འགའ་ཤོར་སོང་པས། རྣ་ལ་མི་སྙན་པ་དང་སེམས་ལ་མི་བདེ་བ་ཚོར་མཁན་རེ་ཡོད་ཚེ་དགོངས་པ་མ་ཚོམས་ལགས་ཞེས་པའི་སེམས་པ་སྔོན་དུ་སོང་བའོ།།
སྤྱིར་འཛམ་གླིང་སྟེང་ནས་བྱིས་པའི་སློབ་གསོ་ཡག་ཤོས་དེ་ནི་ནུབ་ཕྱོགས་ཀྱི་སློབ་གསོ་དེ་ཡིན་མོད། དེ་ལའང་ཕྱིའི་ཁོར་ཡུག་དང་ནང་བསམ་བློའི་ཆ་རྐྱེན་གྱིས་མ་འདང་ཚེ་བྱིས་པའི་རང་ནུས་ཀྱི་འཚར་ལོངས་ལ་འགོག་རྐྱེན་བཟོ་ངེས། རྒྱུ་མཚན་ནི་ང་ཚོར་ཕྱི་ནང་གཉིས་ཀྱི་ཆ་རྐྱེན་གང་ཡང་མེད་པར་མཛུབ་མོ་གང་སྟོན་ཤར་དུ་སྒོམ་ནས་ཨུ་ཚུགས་ཀྱིས་མདུན་མཆོངས་བྱས་པ་དེ་ནི་བོད་ཀྱི་སོན་རྩ་དེ་དག་དབྱིན་མིན་བོད་མིན་དུ་བསྒྱུར་བའི་སྟ་གོན་མ་ཡིན་ནམ། མ་གཞི་ནས་བོད་ཀྱི་སློབ་གསོ་བ་ཡིན་ཟེར་མཁན་འདི་དག་ནི་མགོ་སེར་བོ་ཚོས་གང་བཤད་གསུང་ལ་ཉན་པའི་བསམ་བློའི་གཡོག་པོ་ཞིག་དང་གང་བྲིས་ཁ་ནས་ཀློག་མཁན་གྱི་གཟུགས་པོའི་གཡོག་པོ་ཞིག་ཡིན་པ་ལས་བསྲེགས་བཅད་བརྡར་གསུམ་གྱིས་བོད་པའི་སློབ་ཕྲུག་གི་བསམ་བློའི་གནས་སྟངས་དང་ཁོར་ཡུག་གི་འཚོ་བའི་གནས་སྟངས། གོམས་གཤིས་ཀྱི་དགའ་མོས་གནས་སྟངས་སོགས་ལ་ཉམས་ཞིབ་བམ་ཞིབ་འཇུག་གནང་ནས་གསུང་མཁན་གྱི་སློབ་གསོ་བ་ཞིག་མ་ཡིན་པས་རེད། དེ་མ་ཡིན་པའི་རྒྱུ་མཚན་གྱིས་ཁོང་ཚོས་བསམ་བློའི་ནང་དུ་སློབ་སྦྱོང་ཟེར་བ་འདི་དཀའ་ལས་རྒྱག་མ་དགོས་པར། སྡུག་རུས་བྱ་མ་དགོས་པར། བརྩོན་པ་བསྐྱེད་མ་དགོས་པར་སྐྱིད་པོ་བྱས་ནས་གཉིད་ཉལ་ནས་ཤེས་ཀྱི་རེད་ཟེར་བའི་སེམས་ཚོར་འདི་ཡོད་པས་རེད།སེམས་ཚོར་འདི་ཡོད་པའི་རྒྱུ་མཚན་གྱིས་སྤྱི་ཚོགས་དང་སྤྱི་ཚོགས་ལ་མི་འཚམ་པའི་སློབ་གསོའི་ཐབས་ལམ་དང་ཁོར་ཡུག་དང་ཁོར་ཡུག་ལ་མི་འཚམ་པའི་སློབ་གསོ་ཐབས་ལམ། མི་དང་མིའི་དབར་ལ་མི་འཚམ་པའི་སློབ་གསོ་ཐབས་ལམ་རྐྱང་བླང་དོར་རམ་ཞིབ་འཇུག་མེད་པར་སྦྱར་ཅི་ཐུབ་ཀྱི་སེམས་ཚོར་འདི་ཡོད་པས་ན། བོད་ཀྱི་སོན་རྩ་འདི་དག་ནི་མི་བུ་ཕུང་གསུམ་པ་ཞིག་སྟེ་ཕྱིའི་ངོ་གདོང་བོད་མི་དང་ནང་གི་བསམ་བློ་མགོ་སེར་ཡིན་པའི་ར་མ་ལུག་གི་སོན་རྩ་རྐྱང་འཚར་འཚར་ལོངས་ལོངས་བྱེད་ཀྱིན་ཡོད་པ་འདི་རེད།གཅིག་བྱས་ན་འདི་དག་ནི་བོད་ཀྱི་སློབ་གསོ་བ་ཚོས་ལོ་ངོ་ལྔ་བཅུ་ལྷག་ལ་སྐུ་ངལ་བསྐྱོན་པའི་གྲུབ་འབྲས་དམར་ལྡང་མ་དེ་ཡིན་སྲིད།
གང་ལྟར་སྤྱི་ཡོངས་ཀྱི་ཤེས་བྱ་ཡོན་ཏན་ཟེར་བ་འདི་འབད་བརྩོན་བྱ་དགོས་པ་ཞིག་དང་སྡུག་རུས་བྱ་དགོས་པ་ཞིག དཀའ་ལས་རྒྱག་དགོས་པ་ཞིག་ཡིན་པ་ནི་བོད་ཀྱི་ཁ་དཔེ་སྟེ་“ཡོན་ཏན་ཚང་མ་བརྩོན་འགྲུས་ཀྱི་རྗེས་སུ་འགྲོ་”ཟེར་བའི་ཚིག་རྐང་འདི་ལས་གསལ་བོར་བསྟན་ཡོད་ལ། མ་ཟད་ཤར་ནུབ་གཉིས་ཀྱི་མཁས་པ་དེ་དག་གི་ལོ་རྒྱུས་དང་མཛད་རྗེས་ལ་གཟིགས་དང་དཀའ་ལས་མ་བསྐྱོན་པར་སྐྱིད་པོ་བྱས་ནས་གཉིད་ཉལ་ནས་མཁས་པ་ཆགས་སོང་པའི་ལོ་རྒྱས་དུས་ད་ལྟ་བར་དུ་གུས་པས་མཇལ་མྱོང་མེད་ལ་ཡོད་ཀྱང་མི་སྲིད། རྒྱུ་མཚན་ནི་མགོ་སངས་རྒྱས་བཅོམ་ལྡན་འདས་ནས་བཟུང་སྟེ་ལོ་དྲུག་ལ་དཀའ་ལས་རྒྱབ་པའི་མཛད་རྣམ་ཡོད་ལ་ནུབ་ཕྱོགས་ཀྱི་རྩོམ་རིག་ཡབ་ཆེན་ཤྰར་ཁི་སི་ཕེ་ཡར་(William Shakespeare)གྱིས་དཀའ་ལས་བསྐྱོན་པ་མང་དྲགས་ནས་ཆུང་མ་ལེན་པའི་དུས་ཚོད་ཀྱང་མེད་པར་བཤད། བློས་གཏོང་འདི་འདྲ་བྱ་དགོས་པའི་སློབ་གསོའི་རྡོ་རིང་ཡོད་བཞིན་དུ་མ་ཤེས་མ་མཐོང་ཁུལ་གྱི་གཞན་བསྟེན་སློབ་གསོ་སྟེ་དྲི་བ་གཅིག་ལ་སློབ་ཕྲུག་ལྔ་ཡིས་ལན་རྒྱག་པའི་སློབ་གསོ་དང་ལས་འཆར་གཅིག་ལ་སྡེ་ཚན་ཞིག་དང་མཉམ་ལས་བྱ་བའི་སློབ་གསོ་འདི་དག་གིས་བོད་ཀྱི་སོན་རྩ་དེ་དག་གི་བསམ་བློ་ནང་དུ་གཞན་བསྟེན་ཏེ་ལས་ཀ་ཅི་ཞིག་བྱ་རུང་རོགས་པ་དགོས་པའི་ས་བོན་ཞིག་རང་བཞིན་གྱིས་བཏབ་ཡོད་པས། ཉི་མ་འདི་ནས་བཟུང་སྟེ་བོད་ཀྱི་སོན་རྩ་ཚོས་རང་འགན་རང་ཁུར་གྱི་སེམས་ཚོར་དེ་བརླག་ཡོད་ལ། རང་ངོ་རང་ཤེས་ཀྱི་འདུ་ཤེས་དེ་ཡང་བརླག་ཚར་ཡོད་དེ་ཁོ་ཚོའི་སེམས་རྒྱུད་ན་ལས་ཀ་ཅི་ཞིག་བྱ་ཚེ་རོགས་པ་ཞིག་མཁོ་བ་ལས་རང་གཅིག་པོས་སྒྲུབ་མི་ཐུབ་པའི་བག་ཆགས་ཀྱིས་ཟིན་ཡོད་པས་རེད། འོ་ན། ཕྱིི་གླིང་ཚོས་འདི་ལྟར་སྒྲུབ་དགོས་པའི་རྒྱུ་མཚན་ཅི་ཡིན་ཟེར་ན། ཁོང་ཚོའི་སྤྱི་ཚོགས་ནི་འགན་ཁུར་ཅན་གྱི་སྤྱིགས་ཚོགས་ཤིག་སྟེ། ན་གཞོན་ལོ་ཚོད་བཅོ་བརྒྱད་བསླེབས་རྗེས་རང་འགན་རང་ཁུར་གྱིས་རང་གི་མི་ཚེ་རང་གིས་བཟོ་དགོས་པའི་ཁྲིམས་ཀྱི་སྒྲིག་གཞི་ཡོད་པའི་རྒྱུ་མཚན་གྱིས་སློབ་ཕྲུགདང་སློབ་ཕྲུག་བར་གྱི་འགྲན་བསྡུར་དང་མི་དང་མི་བར་གྱི་འགྲན་བསྡུར། སྤྱི་ཚོགས་དང་སྤྱི་ཚོགས་བར་གྱི་འགྲན་བསྡུར་ཆེ་དྲགས་པའི་རྐྱེན་གྱིས་སློབ་ཕྲུག་ཚོའི་སེམས་སུ་རང་ཤུགས་ཀྱིས་དཀའ་ངལ་ཞིག་དང་སྡུག་ངལ་ཞིག་རང་བཞིན་གྱིས་འཁོར་ནས་ཡོང་གི་ཡོད་པས་མགོ་སེར་པོའི་སློབ་གསོ་བ་དེ་དག་གིས་ཁོང་ཚོའི་སྤྱི་ཚོགས་ཀྱི་དཀའ་ངལ་འདི་སེལ་བའི་ཆེད་ལག་ལེན་དུ་བསྟར་དགོས་པ་ཞིག་ཡིན་པ་ལས་སྤྱི་ཚོགས་གང་ཡིན་ཡང་ལག་ལེན་དུ་བསྟར་དགོས་པར་མ་སེམས་སོ།། མ་གཞི་ནས་འུ་ཚང་གི་སྤྱི་ཚོགས་ཀྱི་ཁོར་ཡུག་དང་སློབ་གྲྭའི་ཁོར་ཡུག་སོགས་ནི་འགྲན་སེམས་མེད་པར།ཧམ་སེམས་མེད་པའི་བོད་ཕྲུག་དག་ལོ་ངོ་སུམ་བཅུ་ལ་བསླེབས་ནའང་ཕ་མར་བསྟེན་དགོས་པའི་ལེ་ལོ་དང་སྒྱུད་ལུག་གི་འཚོ་བ་སྐྱེལ་མཁན་གྱི་ཁོར་ཡུག་ཅིག་ཡིན་པའི་ཁར། ད་དུང་ཡང་བོད་ཀྱི་སློབ་གསོ་བ་ཚོས་བརྟག་དཔྱད་དང་ཞིབ་འཇུག་མི་བྱེད་པར་ལེ་ལོ་དང་སྒྱུད་ལུག་གི་ཐབས་ལམ་འདི་དག་ཁྱེར་ནས་ཡོང་ན་བོད་ཀྱི་སོན་རྩ་ཚོ་སྒྱུད་ལུག་ནས་ཡང་ལུག་ཏུ་གྱུར་བར་ཁག་ཅི་ལ་མེད། འདི་ལྟར་ཕྱི་ནང་གཉིས་ཀྱི་ཆ་རྐྱེན་ཅི་ཡང་མེད་པར་མགོ་སེར་བོ་ཚོའི་ཟེར་སྒྲོས་སུ་ཤི་འཐམ་རོ་འཐམ་བྱས་པ་འདི་བོད་ཀྱི་སློབ་གསོ་དང་བོད་ཀྱི་སོན་རྩ་ཚོར་འགན་མ་ཁུར་བའི་བྱིས་པའི་བསམ་བློ་ཞིག་ཅི་ལ་མིན། བོད་ཀྱི་ངེས་པ་དོན་གྱི་སློབ་གསོ་བ་མཁས་དབང་ཞང་སྟོན་བསྟན་པ་རྒྱ་མཚོས་“མཐོང་ཚད་ལད་མོ་བྱས་ན་ཀླད་མེད་ཡིན”་ཟེར་བ་ལྟར་གོ་ཐོས་ཡོད་ཚད་དང་མཐོང་བ་ཡོད་ཚད་ཁྱེར་ནས་ཡོང་རྒྱུ་དེ་མ་ཡིན་པར་དང་པོར་བསྲེགས་བཅད་བརྡར་གསུམ་གྱིས་བོད་ཀྱི་སྤྱི་ཚོགས་ལ་འཚམ་མིན་དང་བོད་ཀྱི་སོན་རྩ་ཡང་དག་ཡོང་མིན་ལ་གཟིགས་དགོས་པ་གལ་གནད་དུ་ཆེའོ།།
སྤྱིར་བཏང་གི་སློབ་གསོ་ཟེར་བའི་དམིགས་ཡུལ་འདི་ནི་རྒྱལ་ཁབ་དང་རྒྱལ་ཁབ་དབར་གྱི་སློབ་གསོའི་དམིགས་ཡུལ་འདྲ་མི་སྲིད་ལ་མི་རིགས་དང་མི་རིགས་དབར་གྱི་སློབ་གསོའི་དམིགས་ཡུལ་ཡང་མི་འདྲ་བས་ན་བོད་རང་ཉིད་ལ་སློབ་གསོའི་དམིགས་ཡུལ་བརྟན་པོ་ཞིག་དགོས་པ་ལས་ནུབ་ཕྱོགས་ཀྱི་སློབ་གསོ་ཁོ་ན་བོད་སློབ་ཁག་ཏུ་ལག་བསྟར་བྱས་པ་འདིས་བོད་མི་ཡང་དག་ཅིག་ཡོང་པར་བསམ་བློ་ལ་སྒོ་ལྕགས་རྒྱབ་ཡོད་པ་བོད་ཀྱི་སློབ་གསོ་བ་ཡིན་ཟེར་མཁན་དེ་དག་གིས་མཁྱེན་ཡོད་ངེས་རེད། གང་ཡིན་ཟེར་ན། ཁ་སང་དེ་རིང་བོད་སློབ་ཁག་ཏུ་འདྲ་མཉམ་དང་རང་དབང་གི་དོན་དག་རྟོགས་མེད་པར་མིང་རྡོག་སྐམ་པོ་ཞིག་ལ་མགོ་འཁོར་ནས་བོད་མིའི་སེམས་རྒྱུད་ཀྱི་གཤིས་སུ་གྲུབ་པའི་ཡ་རབས་བཟང་སྤྱོད་དེ་རྒན་པར་གུས་ཞབས་དང་ཆུང་བར་བྱམས་སྐྱོང་གི་བག་ཆགས་དེ་དག་དུས་ད་ལྟ་བོད་སློབ་ཁག་ཏུ་མཐོང་རྒྱུ་མེད་པར་མ་ཟད། དགེ་རྒན་གྱི་གསུང་མི་བརྩི་བར་ནང་ལས་བྲི་མི་བྲི་དེ་ཡང་རང་དབང་ཡོད་སྙམ་པའི་སེམས་ཚོར་ཡོད་པ་དང་གཅིག ཕ་མར་གུས་ཞབས་མི་བྱེད་པར་འདྲ་མཉམ་གྱིས་ཁ་ལན་སློག་པའི་བསམ་བློ་འདི་དག་གི་འབྱུང་རྐྱེན་ནི་ནུབ་ཕྱོགས་ཀྱི་སློབ་གསོ་ལག་བསྟར་བྱས་ཀྱང་ཕྱི་ནང་གི་ཆ་རྐྱེན་མ་ཚང་བའི་སྐྱོན་དང།བོད་ཀྱི་སློབ་གསོ་བ་ཚོས་བསྲེགས་བཅད་བརྡར་གསུམ་གྱི་ཞིབ་འཇུག་མེད་པར་དབྱིན་ཡིག་ཏུ་གང་བྲིས་ཡོད་པ་དེ་བོད་པའི་སྤྱི་ཚོགས་སུ་བརླན་རྐྱང་བྱས་པ་མ་གཏོགས་དེ་དག་གི་གོ་དོན་དང་ཐ་སྙད་རེ་རེ་ནས་རང་སྐད་དུ་བསྒྱུར་བའི་སྐུ་ལས་མི་བསྐྱོན་པར་སོ་བཞག་གིས་འགྲེལ་བཤད་གནང་ནས་ལག་ལེན་བསྟར་བའི་ཉེར་ལེན་ཁོ་ནའོ།།
དོན་དེད་ན་སོན་རྩ་ཚོས་རང་དབང་ཟེར་བའི་མིང་ཚིག་འདིའི་གཉའ་གནོན་ན་ཁྲིམས་ཀྱི་སྒྲིག་གཞི་ཟེར་བ་ཞིག་ཡོད་པ་འདི་ཡང་ཤེས་ཀྱི་མེད་ཚོད་རེད། གང་ལྟར་འདི་ལྟར་མུ་མཐུད་ནས་སོང་ན་བོད་མི་རིགས་དང་བོད་ཀྱི་གོམས་གཤིས། ཡ་རབས་བཟང་སྐྱོད་སོགས་ཀྱི་ཁ་གཏད་དུ་མི་ཆགས་པའི་ངེས་པ་མེད་དེ། རྗེ་གུང་ཐུང་བསྟན་པའི་སྒྲོན་མེས་“སྡིག་གྲོགས་ཡིན་ཞེས་རྭ་ཅན་མི་འབྱུང་གིས། གཅེས་ཤིང་ཕན་པའི་ཟོལ་གྱིས་འཛུམ་བསྟན་ནས།།”ཟེར་བའི་བསླབ་བྱ་དམར་རྗེན་མ་འདི་ལའང་བོད་ཀྱི་སློབ་གསོ་བ་ཚོས་བསམ་གཞིག་བྱ་རན་རེད་སེམས་སོ།།
ཉེས་རྡུང་བཀལ་ཏེ་སློབ་ཕྲུག་རྣམས་སྒྲིག་ལམ་ནང་གཅུན་ཟེར་བ་རྒྱལ་སྤྱི་དང་རྒྱལ་ནང་གི་ཁྲིམས་དང་འགལ་བ་མ་ཟད། སུ་འདྲ་ཞིག་ཡིན་རུང་རྩུབ་པ་ལ་དགའ་མོས་བྱེད་མཁན་ཧ་ཅང་དཀོན་མོད། འོན་ཀྱང་ལས་ཀྱི་སྣེ་མོ་བ་ཚོ་སློབ་ཕྲུག་དང་ཐད་ཀར་འབྲེལ་འདྲིས་མི་དགོས་པར་སོང་། དགེ་རྒན་རྣམས་ལ་སློབ་ཕྲུག་ལ་ཉེས་རྡུང་མི་ཆོག་ཅེས་བཀའ་ཕབ་པ་ལས་སླ་བའི་ལས་ཀ་ཞིག་ག་ལ་ཡོད། དེས་ན་ཉེས་རྡུང་ལས་གཞན་པའི་ཐབས་བྱུས་ཅི་འདྲ་ཞིག་དགའ་བའི་སྐོར་དགོངས་པ་བཞེས་ཀྱི་ཡོད་དམ། ཡང་ན་སློབ་ཕྲུག་ཚོའི་འགན་ཁུར་ཅི་ཞིག་ཡིན་པའི་སྐོར་མར་སློབ་ཕྲུག་ཚོར་ལམ་སྟོན་ཁ་ཏ་བྱེད་ཀྱི་ཡོད་དམ།
དེ་མ་བྱས་པར་དགེ་རྒན་ཚོར་སློབ་ཕྲུག་གི་བྱ་སྤྱོད་ཅི་འདྲ་ཞིག་བསྟན་རུང་བྱམས་སྙིང་རྗེ་བྱང་ཆུབ་ཀྱི་སེམས་བསྒོམས་ཏེ་ཞི་འཇམ་ཚིག་སྙན་གྱིས་སློབ་ཕྲུག་གི་བྱ་སྤྱོད་བཅོས་དགོས་ཟེར་ན། མ་འོངས་པར་དགེ་རྒན་གསར་འཇུག་བྱེད་པར་བྱང་ཆུབ་ཀྱི་སེམས་ཀྱི་ཉམས་ལེན་དང་། བརྙས་སྨོད་དང་དཀའ་ཐུབ་ཐེག་བཟོད་པའི་ནུས་པ་སུ་ལ་ལྡན་མིན་གྱི་ཚོད་བགམ་བྱས་ཏེ་དེ་ལའང་བརྒྱ་ཆ་མཐོ་ཤོས་ཤིག་ལོས་སྤྲོད་དགོས།
གང་ལྟར་ལས་ཀྱི་སྣེ་མོ་བ་ཚོས་དགེ་རྒན་ཚོར་སློབ་ཕྲུག་ལ་ཉེས་རྡུང་བྱེད་ན་སྒྲིག་འགལ་ཤོར་བའི་ཉེས་ཆད་འདི་དང་འདི་གཏོང་གི་ཡིན་ཟེར་བའི་ཉེར་ལེན་གྱི་སློབ་གྲྭ་ཁག་མང་པོའི་ནང་དགེ་རྒན་རྣམས་ནས་སློབ་ཁྲིད་ཀྱི་ལས་འགན་གཙོ་བོ་ལས་སློབ་ཕྲུག་གི་བྱ་སྤྱོད་བཟང་པོར་བསྒྱུར་རྒྱུར་འགན་མི་ལེན་པ་མང་པོ་ཡོད་སྐད་འདུག
ལས་ཀྱི་སྣེ་མོ་བ་ཚོས་དགེ་རྒན་ལ་གཤེ་གཤེ་གཏོང་ཤག་དང་། དགེ་རྒན་ཚོས་ཀྱང་ངས་འདི་ལྟར་སེམས་ཤུགས་བྱས་ཏེ་སློབ་ཕྲུག་ཚོའི་བྱ་སྤྱོད་ལེགས་སྤེལ་ཉེས་འགོག་ཆེད་སེམས་ཁུར་བྱེད་ན། ང་རང་ལ་དོན་མེད་སློབ་ཕྲུག་ཚོས་མི་དགའ་བ་དང་འཛིན་སྐྱོང་ནས་ལྟ་ཚུལ་ཡོང་གི་རེད་སྙམ་ནས་སློབ་ཕྲུག་གི་བྱ་སྤྱོད་བཟང་ངན་ཇི་འདྲ་ཞིག་ཆགས་རུང་ང་ལ་འབྲེལ་བ་མེད་སྙམ་ན་དགེ་རྒན་ཞིག་གི་ལས་འགན་ཡང་དག་པར་མ་གྲུབ་པ་རེད་སྙམ།
དེར་བརྟེན་སློབ་ཕྲུག་ཚོས་སློབ་སྦྱོང་ལ་མ་བརྩོན་པ་དང་བྱ་སྤྱོད་མི་ལེགས་པ་ཞིག་བྱེད་ཀྱི་ཡོད་ཚེ་དགེ་རྒན་ཞིག་གིས་སློབ་ཕྲུག་དེར་སློབ་སྦྱོང་ལ་བརྩོན་དགོས་པ་དང་བྱ་སྤྱོད་ལེགས་པོ་དགོས་པའི་སློབ་གསོ་དང་དགོས་གལ་བྱུང་ཚེ་གཤེ་གཤེ་བཀའ་བསྐྱོན་གཏོང་ཐུབ་པའི་སྤོབས་པ་ཞིག་ལོས་དགོས།
གལ་ཏེ་འཛིན་སྐྱོང་དང་སློབ་གྲྭའི་འགོ་འཛིན་ཞིག་གིས་སློབ་ཕྲུག་གི་རང་དབང་སྲུང་བརྩི་ལ་ཁ་བཏགས་ཏེ་དོར་མ་འཕོངས་སྒང་ལ་གྱོན་རུང་། གྱོན་ཆས་བཟོ་དབྱིབས་གང་འདྲ་ཞིག་གྱོན་རུང་། སྐྲ་གྱེན་ལ་བསླང་རུང་སློབ་ཕྲུག་གི་རང་དབང་སྲུང་སྐྱོབ་དགོས་ཀྱི་རེད་གསུང་གི་ཡོད་ན། དེ་ལྟའི་འགན་འཛིན་གྱི་བསམ་བློ་དེ་ཇི་འདྲ་ཞིག་ཡིན་ནམ། ཡང་ན་དེ་ལྟའི་འགན་འཛིན་དེས་ཕྱི་རྒྱལ་ནུབ་ཕྱོགས་པའི་བསམ་བློའི་རང་དབང་སྲུང་སྐྱོབ་ཀྱི་ལྟ་གྲུབ་དེ་མཐིལ་ཕྱིན་པ་ཞིག་རྟོགས་རློམ་སྟེ་གཞན་རྣམས་གང་ཡང་མི་ཤེས་པར་སྒྲུབ་ཀྱི་ཡོད་སྲིད།
དེང་སང་སློབ་གྲྭ་ཁག་མང་པོ་ཞིག་ནང་སློབ་ཕྲུག་གི་སྨྲ་བརྗོད་རང་དབང་ཟེར་ཏེ་རྒན་གཞོན་གོ་རིམ་མེད་པར་གང་བརྗོད་ཚད་ལ་ལེགས་པར་རློམ་མཁན་ཚོས་མི་ཆོས་གཙང་མ་བཅུ་དྲུག་གི་ “རིགས་མཐོ་བ་དང་རྒན་པ་རྣམས་ལ་སྲི་ཞུ་ཕུ་དུད་བྱེད་པ་’ཞེས་རིགས་མཐོ་དམན་ནི་གལ་ཆེར་མ་མཐོང་ཡང་། རྒན་གཞོན་གོ་རིམ་ལ་བརྩི་བཀུར་ཞུ་རྒྱུ་ནི་བོད་མིའི་ཐུན་མིན་བཟང་སྤྱོད་ཅིག་ལ་བརྩིས་ཡོད།
གཞན་ཡང་སློབ་ཕྲུག་གི་བསམ་སྤྱོད་རང་དབང་སྲུང་སྐྱོབ་བྱེད་པར་ཚད་ངེས་ཅན་ཞིག་ལོས་དགོས་སྙམ། དཔེར་ན་”ཁྲིམས་ནི་རྒྱུ་དང་མི་རྒྱུའི་ས་བཞིན་དུ། ཡོན་ཏན་ཀུན་གྱི་གཞི་རྟེན་ལེགས་པར་གསུངས་’ཞེས་པ་ལྟར་སྒྲིག་ཁྲིམས་ངེས་ཅན་ཞིག་ཡོད་ན་བཟང་པོའི་ཡོན་ཏན་འཇོ་ཐུབ་པ་མ་ཟད་རྩ་བ་ཡང་སྲ་བརྟན་ཞིག་ཏུ་འགྱུར་རྒྱུའི་དགེ་མཚན་མངོན།
ངས་རྡོ་སྦིས་བྲིས་པའི་བསམ་ཚུལ་དེར་རྒྱབ་སྐྱོར་གྱི་ཚུལ་དུ་མཆན་བྲིས་ཁུལ་ཡང་བསམ་ཚུལ་ངོ་མ་ལྟ་བུ་རིང་པོ་ཞིག་ཆགས་སོང་ལ། མཆན་བུར་གང་བྲིས་པ་ཚང་མ་ང་རང་སྒེར་གྱི་ལྟ་ཚུལ་རང་ཡིན་པས་མང་པོ་ཞིག་གིས་མོས་མཐུན་ཡོད་མེད་ཅི་རིགས་ཡོང་ཆོག་པ་ཡིན།
ཤིན་ཏུ་ནས་བདེན་ཡིནའང་ངོས་ལེན་གནང་བ་དཀའ་སྟེ་དེང་སང་ཞལ་མར་མི་མང་ལ་གཟིགས་སྟེ་བཀའ་སློབ་གནང་མཁན་ཚོས་ཀྱང(ཏ་རིག་དང་ཏ་རིག་)ཞེས་བོད་སྐད་ཕྱི་ཚེས་སམ་སྤྱི་ཚེས་ནི་ཤིན་ཏུ་ནས་གསུང་བ་དཀའ་(party)ཞེས་གསོལ་སྟོན་ནམ་ཐུགས་སྤྲོ་ནི་མི་གསུང་(ཀུང་སེ)ཞེས་ཚོང་ཁང་སོགས་ཀྱི་མིང་ཚིག་ནི་ཧ་ལམ་བརྗེ་བོ་རྒྱབ་ཟིན་པ་ལྟ་བུ་མཐོང་ཐོས་བྱུང་བ་བསམ་ཚེ་སྔོན་བྱོན་གྱི་ཆོས་རྒྱལ་བཀྲིན་ཅན་དང་ལོ་ཙ་བ་ཆེན་པོ་རྣམས་ཀྱིས་ལོ་མང་ཐ་ན་རང་གི་སྐུ་སོགས་ལ་ཉེན་ཀ་ལ་མ་གཟིཌ་པར་སྐུ་ངལ་སྐྱོན་པ་རྣམས་དང་དིང་གི་སྐྱེ་བོ་དམ་རྣམས་ཀྱི་བདེན་པས་བཀའ་སློབ་ཆར་པ་བབས་བབས་གནང་རུང་རྩིས་མེད་གཏོང་དང་གཏོང་བཞིན་པ་དེང་གི་བྱ་བ་དེ་ཚོ་མཐོང་དུས་ཡིད་སྐྱོ་བ་ལ་ཚད་མེད་ཅིང་མིག་ནས་ཆི་མ་ཟག་པ་ལ་རང་དབང་ནི་མེད་མཁོ་བས་དུས་བྱུང་ན་རང་གི་ཅེས་འཛིན་གྱི་ཕུངས་པོ་འདིའམ་ཁ་ཙམ་མིན་པ་བློས་གཏོང་ཡིན་ནོ་འདི་ནི་སེམས་ཐམས་ཅད་ཀྱི་བདེ་དོན་ཡིན་ནོ།
མིའི་ལད་བཟློས་ཁྱིའི་བྱས། ཁྱི་མཇུག་མ་མེའི་འཚིག མི་ཟེར་མཁན་དེ་འདོད་པ་ཚིམ་ཡ་མེད། ཧམ་པ་ཆེ་དུ་ཆེ་དུ། རྐུབ་བཞག་ས་རགས་ན་ རྐང་པ་དཔྱང་ས་ རྐང་པ་དཔྱང་ས་རགས་ན་ མགོ་བཞག་ས་ ! ! ! ! !
ཁྱེད་ཀྱི་བཤད་པ་བདེན། ཁྱེད་ཀྱི་མིང་ལ་ རྡོ་རྦིས་ཚེ་རིང་མིན། ཁྱེད་ཀྱི་མིང་ལ་ བློ་སྟོབ་ཚེ་རིང་ཡིན་ད། དེང་དུས་སློབ་གྲྭ་འགྲོ་མྱོང་མཁན་མགོ་མི་ཆོད་མཁན་གླན་ལྐུག་ཚོ་ལ་་་ དབྱིན་ཇི་ཤེས་པ་བཙམ་གྱི་མི་ཕན། མིའི་མཚན་ཉིད་ཚང་ཡོད་མེད་ལྟ་དགོས། ཚང་ཡོད་ན་་་ ནང་ཆོས་ལ་དོ་སྣང་གྱིས། ནུབ་ཕྱོགས་པའི་ལྟ་བ་ རྟ་མཆོང་ས་ལ་ཝ་མཆོང་། ཝ་མོ་རྐེད་ཚིགས་ལོག དཔེ་ལྟར། ཧ་ཅང་ ཐལ་དྲག་ན་ སྤུ་མི་སྐྱེས་བར་འགྱུར་ཅིག མི་རིགས་འདྲ་མཉམ་ Equalitarianism དང་། Quantum Physic ཟེར བ་དེ་ཚོ་ སྣ་སྔ་མོ་ ལོ་ངོར་ 300-400 BC སྔོན་ནས་ནང་པའི་གཞུང་དུ་ཡོད། མི་རིགས་འདྲ་མཉམ་དང་ འཇིག་རྟེན་ཀུན་སྤྱོད་གཉིས་ ཁ་ཁ་རེད། ༧གོང་ས་མཆོག་ནས་བསྟོན་གནང་པའི་དེབ་་་ Beyond the Religion དེབ་དེ་ཀློག འགོ་རྟོགས་ལེན། རྒྱ་གར་སྲིད་ཟུར་ A.P.J.Abdul Kalam ཁོང་གིས་བཻང་ལུར་མཐོ་སློབ་ཞིག་ལ་་་ ང་ཚོ་རྒྱ་གར་གྱི་ རིན་ཆེན་གཏེར་མང་པོ་ཕྱིའི་རྒྱལ་ཁབ་ལ་ཤོར་ཡོད། ཕམ་པོ་ཞིག་རེད། བཀའ་སློབ་བསྩལ་ཡོད། ཁོང་གི་གསུང་ཡ་རིན་ཆེན་གཏེར་འདི་ རྒྱ་གར་གྱིས་ དཔལ་ན་ལཎ་ད་ཡི་ནང་ཆོས་གཞུང་ལ་ཞུས་པ་རེད། རིན་ཆེན་གཏེར་དེ་ཚོ་བོད་ཀྱི་ལག་པར་རགས་བསྡད་ཡོད། ཡང་ འགྲོ་མགོན་ཆོས་རྒྱལ་སྐབས་ སོག་པོའི་བོད་ལ་དམག་སླེབས། ཁོང་གིས་བོད་ལ་དམག་རྒྱག་ནས་ཕན་ཐོག་ནི་མེད། ང་ཚོ་ལ་རྒྱལ་ཁབ་གཞན་པ་ནང་བཞིན་སྟོབ་འབྱོར་གང་ཡང་མེད། ང་ཚོ་ལ་རྒྱལ་ཁབ་གཞན་ལ་མེད་པའི་དམིགས་བསལ་གྱིས་གཏེར་ཞིག་ཡོད། སོག་པོའི་རྒྱལ་པོའི་གཏེར་དེ་གང་ལ་ཞུས་པ་་་ རྒྱ་གར་གྱིས་སངས་རྒྱས་ཀྱི་ནང་པའི་ཆོས་འདི་རེད། དུས་དེ་ནས་བཟུང་སོག་པོའི་རྒྱལ་ཁབ་ནང་པ་ཆགས་པ་རེད་དོ།
རིན་ཐང་ཅན་གྱི་རྩོམ་ཞིག་འདི་ན་འདུག། ཞེན་ཁོག་དང་རྨོངས་འཆར་ཙམ་མིན་པར་དོན་དངོས་རང་བཞིན་ལྡན་པའི་རྩོམ་ཡིག་ཞིག་འདུག་གོ།
རྗེ་གུང་ཐང་།