ཊོམ་ཕུ་གཞུང་གིས་རྒྱ་ནག་གི་དངོས་ཟོག་ནང་འདྲེན་ལ་རྒྱལ་ཁྲལ་བརྒྱ་ཆ་ ༢༥ སྤར་བའི་ལས་གཞི་དངོས་སུ་མགོ་བཙུགས་ཏེ་ལག་བསྟར་བྱེད་བཞིན་འདུག
ཟླ་འདིའི་ཕྱི་ཚེས་ ༦ ཉིན་ནས་ཨ་རིས་རྒྱ་ནག་གི་དངོས་ཟོག་ཐེར་འབུམ་ ༣༤ ཙམ་ལ་རྒྱལ་ཁྲལ་བརྒྱ་ཆ་ ༢༥ དངོས་སུ་སྤར་མགོ་ཚུགས་ཡོད་པ་དང་། དེ་ནི་ད་ལོའི་ཕྱི་ཟླ་ ༦ པའི་ནང་སྲིད་འཛིན་ཊོམ་ཕུ་གཞུང་གིས་རྒྱ་ནག་གི་དངོས་ཟོག་ཐོན་རྫས་རྣམ་གྲངས་ ༨༠༠ ལ་རྒྱལ་ཁྲལ་སྤར་རྒྱུ་ཡིན་ལུགས་བསྒྲགས་པའི་སྲིད་བྱུས་ཀྱི་ཆ་ཤས་ཤིག་ཡིན་པ་དང་། བདུན་ཕྲག་གཉིས་ཀྱི་རྗེས་སུ་བསྐྱར་དུ་དངོས་ཟོག་རིན་གོང་ཨ་སྒོར་ཐེར་འབུམ་ ༡༦ ལ་རྒྱལ་ཁྲལ་སྤར་རྒྱུ་དང་རིམ་པས་ཨ་སྒོར་ཐེར་འབུམ་ ༢༠༠ དང་ ༣༠༠ བཅས་ཀྱི་རིན་འབབ་དངོས་ཟོག་ལ་རྒྱལ་ཁྲལ་སྤར་རྒྱུ་ཡིན་སྐོར་བསྒྲགས་འདུག
ཐེངས་འདིའི་ཨ་རིས་རྒྱ་ནག་གི་དངོས་ཟོག་རྒྱལ་ཁྲལ་སྤར་བ་དེས་རྒྱ་ནག་གི་ཕྱིར་འཚོང་དངོས་ཟོག་ཨ་སྒོར་ཐེར་འབུམ་༣༧༥ ལྷག་གི་རིན་འབབ་ལ་གྱོང་གུད་ཐེབས་ཀྱི་ཡོད་པ་དང་། ཕྱི་ཟླ་ ༦ ཉིན་རྒྱ་ནག་ཕྱི་སྲིད་ལྷན་ཁང་གི་མགྲིན་ཚབ་པས་རྒྱ་ནག་གི་ཨ་རིའི་དངོས་ཟོག་ལ་གཅིག་མཚུངས་ལྟར་རྒྱལ་ཁྲལ་སྤར་རྒྱུ་ཡིན་སྐོར་བརྗོད་ཡོད་པ་དང་། ཨ་རྒྱ་གཉིས་ཀྱི་ཚོང་དམག་མགོ་མ་ཚུགས་གོང་ནས་རྒྱལ་སྤྱིའི་ཁྲོམ་རའི་ནང་དངོས་ཟོག་གི་གོང་ཚད་འཕར་རྒྱུ་ཡིན་པའི་འཇིགས་སྣང་ཆེན་པོ་བྱེད་ཀྱི་ཡོད་པ་མ་ཟད། རྒྱ་ནག་ནང་དུ་ཡོད་པའི་ཨ་རིའི་བཟོ་གྲྭ་དང་ཚོང་ལས་གཉེར་མཁན་ཚོས་ལྷག་ཏུ་སེམས་འཚབ་བྱེད་ཀྱི་ཡོད་འདུག
ཨ་རིའི་སྲིད་འཛིན་ཊོམ་ཕུ་ཡིས་ཨ་རི་དང་པོར་འཇོག་དགོས་པའི་སྲིད་བྱུས་མཁྲེགས་པོ་འཛིན་གྱི་ཡོད་པ་ལྟར། རྒྱ་ནག་གིས་ཨ་རིའི་ནང་གི་ཆེད་ལས་པའི་བསམ་བློའི་ཐོན་རྫས་དེ། འཆར་འགོད་དང་ཚོང་གི་བསམ་བློ་གསར་པ་སོགས་རྒྱ་ནག་གི་ཚོང་གཉེར་ཁྲོམ་རའི་ནང་ལེན་ཐབས་དང་རྐུ་འཁྱེར་བྱེད་བཞིན་པར་ཁ་གཏད་གཅོག་ཆེད་དང་གནོན་ཤུགས་སྤྲོད་ཐབས་ཡིན་སྐོར་བརྗོད་ཀྱི་ཡོད་ན་ཡང་། ཨ་རིའི་ཟླ་སྔོན་མ་ནས་ཡུ་རོབ་མཐུན་ཚོགས་དང་། མེག་སི་ཀོ་བཅས་ནས་ནང་འདྲེན་བྱེད་བཞིན་པའི་ལྕགས་ཀྱི་ཅ་དངོས་ལ་རྒྱལ་ཁྲལ་བརྒྱ་ཆ་ ༢༥ དང་། ཧ་ཡང་གི་ཅ་དངོས་ལ་བརྒྱ་ཆ་ ༡༠ སྤར་རྒྱུ་དངོས་སུ་ལག་བསྟར་བྱས་ཡོད་སྟབས། མཐུན་ཕྱོགས་རྒྱལ་ཁབ་ཁག་གི་མགོ་འཁྲིད་ཚོས་སྲིད་འཛིན་ཊོམ་ཕུའི་བྱེད་སྟངས་དེ་དག་ལ་སྐྱོན་བརྗོད་ཤུགས་ཆེན་བྱེད་ཀྱི་ཡོད་འདུག
འཛམ་གླིང་གི་དཔལ་འབྱོར་རིག་པའི་དཔྱད་བརྗོད་པ་མང་མོས་ཨ་རྒྱ་གཉིས་ཀྱི་ཚོང་དམག་ཐད་ཕན་ཚུན་གྲོས་མོལ་བྱས་ཏེ་འགྲིག་མཐུན་ཡོང་རྒྱུ་ཁག་པོ་ཡིན་པ་དང་། གནད་དོན་དེའི་ཁྲོད་ཨ་རྒྱ་གཉིས་ཙམ་མ་ཟད་རྒྱལ་སྤྱིའི་དངོས་ཟོག་ཁྲོམ་ར་དང་དཔལ་འབྱོར་ཐད་དཀའ་རྙོག་ཆེན་པོ་ཞིག་བྱུང་རྒྱུ་ཡིན་པ་དང་། མཐའ་མར་ཕྱོགས་གཉིས་ལ་གྱོང་གུད་ཆེན་པོ་ཐེབས་ཏེ་རང་འགུལ་གྱིས་མཚམས་འཇོག་རྒྱུ་ཡིན་སྐོར་བརྗོད་ཀྱི་ཡོད་ན་ཡང་། ཨ་རིའི་སྤྱི་གཉེར་ཁེ་ལས་ཚོགས་པའི་ཚོགས་གཙོ་ཝེ་ལིམ་ཛཱ་རི་ཊི་(William Zarit)ཡིས་ཨ་རྒྱ་གཉིས་ཀྱི་ཚོང་འབྲེལ་གནས་བབ་ངན་ཕྱོགས་སུ་སོང་བ་ཡིས་རྒྱ་ནག་ལ་གྱོང་གུད་ཐེབས་རྒྱུ་ཡིན་སྐོར་བརྗོད་འདུག
ཨ་རིའི་ཞིང་ལས་སྡེ་ཚན་ཁག་ཅིག་གིས་ཨ་རིའི་གཞུང་ལ་རྒྱ་ནག་ནི་ཨ་རིའི་ཞིང་ལས་ཐོན་རྫས་ཉོ་མཁན་ཆེ་ཤོས་གྲས་ཤིག་ཡིན་པས། ཕྱོགས་གཉིས་བར་གྱི་ཚོང་དམག་གིས་ཞིང་ལས་ཐོན་རྫས་རྣམས་ལ་རྒྱལ་ཁྲལ་ཆེན་པོ་རྒྱག་དགོས་པ་ཆགས་རྒྱུའི་ཉེན་ཁ་ཡོད་སྟབས། ཨ་རིའི་གཞུང་ལ་འཆར་གཞི་ཡོད་པ་ལྟར་རྒྱལ་ཁྲལ་ལག་ལེན་མི་བསྟར་བའི་རེ་སྐུལ་ཞུས་ཡོད་འདུག
གསར་འགོད་པ། སངས་རྒྱས་དཀོན་མཆོག
![The Dalai Lama offers blessings to his followers at his Himalayan residence in the northern hill town of Dharamshala, India, on December 20, 2024 [Priyanshu Singh/Reuters]](https://tibettimes.net/wp-content/uploads/2025/05/Screen-Shot-2025-05-09-at-3.37.35-PM-360x180.png)
ཁྱི་སྤྱང་ལག་སྦྲེལ་རྐུན་རྒྱབ་ཇག་ལང་དང་།
དཔོན་ངན་མི་ངན་ཁ་མཐུན་ཡུལ་བདེ་བཅོམ་།
ཧཧཧཧཧ
ཝཻ། གུང་ཁྲན་ཏང་། ད་ཡིན་ད་་་ བོད་དང་ཤིན་ཅང་ལ་ རྡོག་བརྫིས་བཏང་བ་གཞི་ཟུང་ ད་ཨ་རི་ལ་ ཡིན་ད། དེ་སྔ་ བོད་དང་ ཤིན་ཅང་ལ་ ཙི་ཙི་ལ་སྟག་དོན་པ་རེད། ད་ ཨ་རི་ལ་ སྟག་རེད་འདུག ཞི་མི་རེད་འདུག ལྟ་བཞིན་ཡོད་དོ།
ཨ་རྒྱའི་ཁ་དམག་འཛམ་གླིང་ཚོང་ལས་ཉམས་།
ཨ་རྒྱའི་ཁ་དམག་འཛམ་གླིང་ཞི་བདེར་གནོད་།
ཨ་རྒྱའི་ངན་འཆར་འཛམ་གླིང་ཟ་སེམས་ལ་།
ཨ་རྒྱ་གཉིས་ལ་འཛམ་གླིང་དོགས་ཟོན་ཟབ་།