ཨ་རིའི་རྒྱལ་སྤྱིའི་ཆོས་དད་རང་དབང་ཚོགས་འདུ་ཐེངས་དང་པོའི་ཐོག་༧གོང་ས་རྒྱལ་བ་རིན་པོ་ཆེ་མཆོག་ནས་གསུང་འཕྲིན་བསྩལ་ཏེ་ཆོས་ལུགས་ཚང་མར་གུས་བརྩི་བྱས་ཏེ་འགྲོ་བ་མི་སྤྱི་ལ་ཞབས་འདེགས་སྒྲུབ་དགོས་པ་གལ་ཆེན་ཡིན་སྐོར་གསུངས་འདུག
ཟླ་འདིའི་ཕྱི་ཚེས་ ༢༤ ནས་ཉིན་ ༣ རིང་ཨ་རིའི་ཕྱི་སྲིད་ལས་ཁུངས་ཀྱི་གོ་སྒྲིག་འོག ཨ་རིའི་རྒྱལ་སྤྱིའི་ཆོས་དད་རང་དབང་ཚོགས་འདུ་ཐེངས་དང་པོ་ཚོགས་ཡོད་པ་དང་། ཚོགས་འདུའི་ཐོག་འཛམ་གླིང་རྒྱལ་ཁབ་ ༨༠ ལྷག་ནས་ཕྱི་སྲིད་བློན་ཆེན་ ༤༠ ཙམ་ཕེབས་ཡོད་པ་དང་། དེ་བཞིན། ཆོས་ཕྱོགས་ཀྱི་དབུ་འཁྲིད་དང་སྐུ་ཚབ། གཞུང་འབྲེལ་མ་ཡིན་པའི་ཚོགས་པ་བཅས་ནས་མི་གྲངས་ ༤༠༠ ཙམ་མཉམ་ཞུགས་གནང་ཡོད་འདུག ཐེངས་འདིའི་ཚོགས་འདུའི་ཐོག་༧གོང་ས་རྒྱལ་བ་རིན་པོའི་སྐུ་ཚབ་ཏུ་དེ་མོ་རིན་པོ་ཆེ་བསྟན་འཛིན་ཕུན་ཚོགས་མཆོག་ཕེབས་ཡོད་པ་དང་། ཆབ་སྲིད་བཙོན་ཟུར་མགོ་ལོག་འཇིགས་མེད་ལགས་ནས་བོད་ནང་གི་ཆོས་དད་རང་དབང་སོགས་ཀྱི་གནས་སྟངས་སྐོར་ལ་གཏམ་བཤད་གནང་ཡོད་པ་རེད། གཞན་ཡང་། ཚོགས་འདུའི་ཐོག་ཨ་རིའི་སྐུ་ཚབ་དོན་གཅོད་དངོས་གྲུབ་ཚེ་རིང་མཆོག་དང་རྒྱལ་སྤྱིའི་བོད་དོན་ལས་འགུལ་ཁང་གི་བུ་ཆུང་ཚེ་རིང་ལགས་རྣམ་གཉིས་ཀྱང་ཕེབས་ཡོད་འདུག
ཐེངས་འདིའི་ཚོགས་འདུ་ཐོག་ཏུ་རྒྱ་ནག་ནང་གི་ཆོས་དད་རང་དབང་སྐོར་གླེང་སློང་གནང་ཡོད་པ་མ་ཟད། བོད་དོན་སྐོར་ལ་དམིགས་བསལ་གླེང་སློང་གནང་ཡོད་པ་དང་། ཆོས་དད་རང་དབང་གི་དམིགས་བསལ་སྐུ་ཚབ་ས་མུལ་བྷི་རོང་བྷད་ཀུ་ (Samuel Brownback) ལགས་ནས་བོད་ནང་གི་ཆོས་དད་རང་དབང་སྐོར་ལ་ཤུགས་ཆེན་གླེང་སློང་གནང་ཡོད་འདུག་ལ། ཨ་རིའི་ཕྱི་སྲིད་བློན་ཆེན་གཞོན་པས་ཆོས་དད་རང་དབང་ནི་ཧ་ཅང་གལ་ཆེན་པོ་ཡིན་སྟབས། རང་དབང་མེད་མཁན་ཚོར་རང་དབང་ཡོད་མཁན་ཚོས་རྒྱབ་སྐྱོར་བྱེད་དགོས་སྐོར་གསུངས་ཡོད་པ་མ་ཟད། ཨ་རིས་རྒྱ་ནག་གཞུང་ལ་ཆོས་དད་རང་དབང་སྐོར་གླེང་སློང་བྱས་ཏེ་གནོན་ཤུགས་སྤྲོད་རྒྱུ་ཡིན་སྐོར་གསུངས་འདུག
ཚོགས་འདུའི་ཐོག་༧གོང་ས་རྒྱལ་བ་རིན་པོ་ཆེ་མཆོག་ཆེད་དུ་གདན་འདྲེན་ཞུས་ཡོད་ཀྱང་། ལ་དྭགས་ཁུལ་གྱི་མཛད་འཆར་སྔོན་སོང་ལྟར་དངོས་སུ་ཕེབས་ཐུབ་མེད་པར་བརྟེན། སྐར་མ་༣ ཙམ་གྱི་བརྙན་ཐུང་གསུང་འཕྲིན་ཞིག་བསྩལ་ཡོད་པ་དེ་ཁ་སང་ཕྱི་དྲོར་ཨ་རིའི་གྲོས་ཚོགས་ར་བའི་ནང་དུ་སྒྲོག་སྦྱངས་གནང་འདུག གསུང་འཕྲིན་ནང་དུ་ངོས་ཀྱིས་འདི་ལྟ་བུའི་ཚོགས་འདུ་ནི་དུས་རབས་ ༢༡ ནང་ཧ་ཅང་འབྲེལ་བ་ཡོད་པ་དང་གལ་ཆེན་དུ་མཐོང་གི་འདུག ཆོས་དད་ནི་གལ་ཆེན་པོ་ཡིན་པ་རེད། ཆོས་ལུགས་ཀྱིས་མིའི་སྤྱི་ཚོགས་ནང་བཟང་ཕྱོགས་ཀྱི་འགྱུར་བ་ཐེབས་ཆེད། ཆོས་ལུགས་ཕན་ཚུན་མཐུན་སྒྲིལ་ནི་ཧ་ཅང་གལ་ཆེན་རེད། དེར་བརྟེན་ངོས་ཀྱིས་ཚོགས་འདུ་འདི་ཧ་ཅང་ཕན་ཐོགས་ཡོད་པ་ཞིག་མཐོང་གི་འདུག
ངོས་ཀྱིས་རྟག་ཏུ་ནང་ཆོས་ཀྱི་ཐོག་ནས་གཞན་ལ་ཕན་ཐོགས་ཐུབ་པར་འབད་བཞིན་ཡོད། འོན་ཀྱང་། ནང་ཆོས་གཞན་ལ་ཁྱབ་གདལ་གཏོང་ཐབས་རྩ་བ་ནས་བྱེད་ཀྱི་མེད། ངོས་ཀྱིས་རྟག་ཏུ་ནང་ཆོས་ཀྱིས་འགྲོ་བ་ཡོངས་ལ་ཇི་ལྟར་ནང་སེམས་ཀྱི་ཞི་བདེ་སྐྲུན་པར་བསམ་བློ་གཏོང་གིན་ཡོད། ངོས་ཀྱི་རེ་བར་ཆོས་ལུགས་ཚང་མས་འགྲོ་བ་མི་སྤྱིའི་བདེ་སྡུག་ལ་བསམ་བློ་གཏོང་དགོས་པ་དང་། དེ་ལྟར་བྱུང་ཚེ་འགྲོ་བ་མི་ཡོངས་རྫོགས་ཆོས་ལུགས་གཅིག་གི་རྗེས་འབྲང་པར་མི་འགྱུར་ལ། མ་འོངས་པའི་དུས་རབས་འགའི་རྗེས་སུ་ཡང་ཆོས་ལུགས་ཚང་མ་གནས་ཐུབ་ཀྱི་རེད་ལ། འགྲོ་བ་མི་ལ་ཞབས་འདེགས་སྒྲུབ་ཐུབ་པའི་དགེ་ཕན་ཆེན་པོ་ཡོད་པ་རེད།
ངོས་ཀྱིས་གསལ་པོ་བཟོ་འདོད་པ་ཞིག་ལ་རྒྱ་གར་གྱི་ལུགས་ལྟར་ན། ཆོས་ལུགས་རིས་མེད་ཀྱི་དོན་ནི་ཆོས་ལུགས་ཚང་མར་གུས་བརྩི་དགོས་པ་མ་ཟད། ཆོས་དད་མེད་མཁན་རྣམས་ལའང་གུས་བརྩི་ཡོད་དགོས་པ་དེ་རེད། འདི་ནི་དངོས་ཡོད་དང་མཐུན་པ་ཞིག་རེད། གོ་ལ་འདིའི་སྟེང་ཆོས་དད་མེད་མཁན་མི་གྲངས་དུང་ཕྱུར་གཅིག་ལྷག་ཡོད་པ་རེད། ཁོང་ཚོས་ཀྱང་སེམས་ཀྱི་ཞི་བདེ་འདོད་ཀྱི་ཡོད་པ་རེད། དེ་བས་ཆོས་ལུགས་ཚང་མར་གུས་བརྩི་བྱས་ཏེ་འགྲོ་བ་མི་སྤྱི་ལ་ཞབས་འདེགས་སྒྲུབ་དགོས་པ་གལ་ཆེན་ཏུ་མཐོང་གི་འདུག ཅེས་བླང་དོར་གྱི་བཀའ་སློབ་བསྩལ་འདུག
དེ་རིང་འདི་གའི་གསར་འགོད་པས་ཐེངས་འདིའི་ཚོགས་ཐོག་གཏམ་བཤད་པ་མགོ་ལོག་འཇིགས་མེད་ལགས་སུ། ཚོགས་འདུའི་སྟེང་ཁོང་གིས་ག་རེའི་སྐོར་གཏམ་བཤད་གནང་ཡོད་དྲིས་པར་ཁོང་གིས། ངས་བོད་ཀྱི་ཆོས་དད་རང་དབང་དང་འབྲེལ་བའི་ཁོར་ཡུག་སྲུང་སྐྱོབ་སྐོར་ལ་བཤད་པ་ཡིན། བོད་ནང་གི་གནས་རི་རྩ་ཆེན་དང་གལ་ཆེན་སྐོར་དང་དེ་མཚུངས་སུ་འཛམ་གླིང་གི་ཕྱོགས་སོ་སོའི་ཁོར་ཡུག་གི་གནས་སྟངས་ཀྱི་རྐྱེན་པས་དཀའ་ངལ་འཕྲད་བཞིན་པ་སོགས་འགྲེལ་བརྗོད་བྱས་ཏེ། མ་འོངས་པར་མཉམ་འབྲེལ་རྒྱལ་ཚོགས་ཀྱི་ཁོར་ཡུག་ཚན་པས་ཆོས་དད་དང་འབྲེལ་བའི་ཁོར་ཡུག་སྲུང་སྐྱོབ་ཐད་རྒྱབ་སྐྱོར་གནང་རྒྱུ་གལ་ཆེན་པོ་ཡིན་སྐོར་འབོད་སྐུལ་ཞུས་པ་ཡིན། ཚོགས་ཆུང་ཚོགས་པའི་སྐབས་སུའང་ང་ལ་སྐར་མ་ལྔར་གཏམ་བཤད་བྱེད་པའི་གོ་སྐབས་ཐོབ་སོང་བས། དུས་ཚོད་ཐུང་ཐུང་ནང་བོད་དོན་སྐོར་ལ་ངོ་སྤྲོད་ཡག་པོ་བྱེད་ཐུབ་སོང་། ཞེས་བརྗོད་བྱུང་།
ཡང་ཚོགས་ཐོག་ཏུ་བོད་ནང་གི་ཆོས་དད་རང་དབང་སྐོར་ལ་སྡོམ་ཚིག་འདྲ་བོ་ག་འདྲ་བཀོད་ཡོད་དྲིས་པར། རྒྱ་ནག་དང་ཝེ་ཐི་ནམ། ཨེ་རན་གསུམ་ནི་ཆོས་དད་རང་དབང་གི་གནས་སྟངས་སྐྱོ་ཤོས་ཀྱི་རྒྱལ་ཁབ་ཡིན་པ་ཐེར་འདོན་ཤུགས་ཆེན་བྱས་ཡོད་པ་དང་། ད་ཐེངས་ཕྱོགས་གང་ཐད་ནས་རྒྱ་ནག་གི་སྐོར་གླེང་སློང་བྱེད་སྐབས་དང་པོར་ཡུ་གུར་གྱི་ཆོས་དད་རང་དབང་སྐོར་དང་། རྒྱ་ནག་ནང་གི་ཡེ་ཤུའི་ཆོས་དཔོན་ཇོན་ཚའོ་ (John Cao) ཡི་སྐོར་ནས་མང་པོ་བཤད་དེ། ཚོགས་འདུའི་ཉིན་དང་པོར་རྒྱ་ནག་གི་སྐོར་ལ་ཐེངས་གཉིས་གླེང་སློང་བྱུང་ཡོད་སྟབས། ཨ་རིའི་གཞུང་ནས་དམིགས་བསལ་གྱིས་རྒྱ་ནག་ནང་གི་ཆོས་དད་རང་དབང་གི་གནས་སྟངས་ཐད་ནུས་པ་འདོན་གྱི་ཡོད་པ་འདྲ་པོ་ཚོར་སོང་སྐོར་བརྗོད་བྱུང་།
དེ་རིང་ཨ་རིའི་སྲིད་འཛིན་གཞོན་པ་(Mike Pence)མཆོག་དང་ཕྱི་སྲིད་བློན་ཆེན་མཆོག་ནས་མགོ་ལོག་འཇིགས་མེད་ལགས་དང་ལྷན་དུ་སྐར་མ་ ༢ ཙམ་རིང་ཟུར་དུ་བོད་དོན་སྐོར་གླེང་སློང་གནང་བའི་ལས་རིམ་བཟོས་ཡོད་སྟབས། མགོ་ལོག་འཇིགས་མེད་ལགས་ནས་གླེང་མོལ་སྐབས་ཁོང་གིས་བོད་དོན་སྐོར་ནས་༧གོང་ས་རྒྱལ་བ་རིན་པོ་ཆེ་མཆོག་བརྒྱུད་བོད་རྒྱའི་དཀའ་རྙོག་གང་མགྱོགས་སེལ་ཐབས་དགོས་པ་དང་། ད་སྔ་བོད་དོན་ཐད་ཊོམ་ཕུ་སྲིད་གཞུང་གིས་ཁ་གསལ་གཏིང་གསལ་གྱིས་རྒྱབ་སྐྱོར་བྱས་མེད་སྟབས། སྲིད་གཞུང་གསར་པའི་ངོས་ནས་བོད་དོན་ལ་རྒྱབ་སྐྱོར་གནང་རོགས་ཞེས་འབོད་སྐུལ་ཞུ་འཆར་ཡོད་ཅེས་བརྗོད་བྱུང་།
གསར་འགོད་པ། ཀླུ་མགོན་ཐར།
ཆོས་དད་ཀྱི་རང་དབང་ཟེར་བ་ནི་ ཕྱོགས་གཅིག་ལ་གད་མོ་ཤོར་ཡ་རེད། དཔེར་ན་་་ རྒྱ་གར་ལ་མཚོན་ན་ རྒྱ་གར་གྱི་རྩ་ཁྲིམས་དམངས་གཙོ་རང་དབང་ཅན་ཞིག་རེད། ཁ་རྒྱུན་ལ་ རྒྱ་གར་ ཁུ་ཤི་ལུང་པ། དབང་ཆ་ དམ་བསྒྲགས་བྱེད་མཁན་ནི་ ཆོས་པ་ཚོ་རེད། རིག་རུས་དབྱེ་ཕྱེད་བྱེད་མཁན་ཆོས་ཀྱི་ཐོག་ནས་རེད། ཧིན་དུ་སྐྱེད་པ་ཞིག་གི་ ཁ་ཆེ་བོུ་གཉམ་དུ་འགྲོ་བ་དང་ ཁ་ཆེ་སྐྱེད་པ་ཞིག་གི་ ཧིན་དུ་བོུ་གཉམ་དུ་སྡད་ན་ རྙོག་འཛིང་བཟོ་ཁན་ཚང་མ་ཆོས་ཀྱི་ཐོག་ནས་ཡོང་གི་འདུག་ག འཛམ་གླིང་ནང་ མི་དམངས་ལ་ འཇིགས་སྣང་སྐུལ་མཁན་དང་ བཤུ་གཞོག་གཏོང་ཁན་ དམ་བསྒྲགས་བྱེད་མཁན་ ཆོས་ཕྱོགས་ཀྱི་ཐོག་ནས་རེད་འདུག་ག ཆོས་ལུགས་ཀྱི་དཀྲུག་ཤིང་། དམག་དྲངས། འཐབ་འཛིང་བྱེད། དབང་ཡོད་བཤད་ནས་ཆོས་ལུགས་གྱུར་བ། ལྐོག་རྔན་དང་རོགས་རམ་བྱེད་ནས་ཆོས་ལུགས་གྱུར་བ། མགོ་སྐོར་གཏོང་མཁན་ཆོས་ཕྱོགས་ནས་ཡོང་སྡད་ཀྱི་འདུག་ག འཛམ་གླིང་ནང་ དངུལ་ པད་ཤ་མ་གཏོག་བསམ་རྒྱུ་མེད་མཁན་ཚོང་པ་འབྱོར་ལྡན་ ཕྱུག་དག དཔོན་པོ། ཆོས་དཔོན་ཚོ་ཁ་མཐུན། དཀའ་སྡུག་མྱོང་མཁན་ མི་མང་སྐྱུད་མ་ དབུལ་པོ། དངུལ་ ཟས་ ཕྲན་བུས་ལྟོག་ལྷག་གིས་་་ ཁོང་ཚོའི་ག་པ་ ཚུ ཚུ ཚུ ལབ་ན་རྒྱུག་འགྲོ་མཁན་ཡོད། ད་ལྟ་༧གོང་ས་མཆོག་ཡོད་པའི་ཐུགས་རྗེ་བཀའདྲིན་རེད་མ་གཏོག ངས་ཅག་བོད་པ་ཚང་ཞེད་སྣང་ཚ་པོ་ཡིན་པ། མི་མང་སྤྱང་གྲུང་དང་ཟབ་ཟབ་གནང་གལ་ཆེ། ཆོས་མཁས་མི་ལེན་མཁན་ག་རེ་ཁག་མེད་པ་འདྲ་པོ་ཡོད། ང་ཚོ་བོད་པའི་སྤྱི་ཚོགས་ནང་ཆོས་ལ་སྐྱོན་བརྗོད་བྱེད་མཁན་ཡོད། ཆོས་དད་རང་མོས་རེད། ཡིན་ནས་མིའི་རྣམ་སྤྱོད་ཐོག་ནས་དཔྱད་ཞིབ་བྱེས་ནས་ར་སྤྲོད་ཐུབ་པ་ཞིག་བྱ་དགོས། བོད་པའི་སྤྱི་ཚོགས་ནང་ཆོས་གཉིས་ཡོད་པ་འདྲ་པོ་ཡིན། གཅིག་ནི་དམོངས་དད་དང་ལམ་དང་ལུགས་སྲོལ་བྱས་ནས་འགྲོ་སྡད་མཁན་ཞིག་དང་། ཕྱོགས་གཅིག་ནི་ ནང་པ་སངས་རྒྱས་རང་གི་ལྟ་གྲུབ་ཐོག་ནས་སློབ་སྦྱོང་བྱེད་ནས་འགྲོ་མཁན་བཅས་གཉིས་ཡོད། ཡིན་ནས་དེང་སང་ ༧གོང་ས་མཆོག་གིས་ཐུགས་རྗེ་བཀའ་དྲིན་ལ་ དུས་རྒྱུན་ཆོས་མཁས་མི་ལེན་མཁན་ཚན་རིག་པ་ཚོ་ཡང་ནང་པ་སངས་རྒྱས་པའི་ལྟ་གྲུབ་ལ་ཡིད་་དབང་འཕྲོག་བཞིན་ཡོད་དོ།