སྐབས་ ༡༨ པའི་བོད་མི་མང་སྤྱི་འཐུས་ཀྱི་དངོས་གཞིའི་འོས་མི་གསལ་བསྒྲགས་གནང་སོང་། 

དབུས་འོས་བསྡུ་ལས་ཁང་གིས་གཞོན་སྐྱེས་རྣམས་ལ་མ་འོངས་བོད་ཀྱི་འཐབ་རྩོད་སྣེ་ཁྲིད་ཀྱི་ལས་འགན་ཡོད་པར་བརྟེན་དངོས་གཞིའི་འོས་བསྡུའི་ནང་ངེས་པར་ཆ་ཤས་བཞེས་དགོས་སྐོར་གསུངས་སོང་།

དེ་རིང་སྔ་དྲོའི་ཆུ་ཚོད་ ༡༡ ཐོག་ཕྱི་དྲིལ་ལྷག་པ་ཚེ་རིང་དྲན་རྟེན་ཚོགས་ཁང་དུ་དབུས་འོས་བསྡུ་ལས་ཁང་གིས་སྐབས་ ༡༨ པའི་བོད་མི་མང་སྤྱི་འཐུས་ཀྱི་དངོས་གཞིའི་འོས་མི་གསལ་བསྒྲགས་དང་འབྲེལ་བའི་གསར་འགོད་ལྷན་ཚོགས་ཤིག་འཚོགས་སོང་། གསར་འགོད་ལྷན་ཚོགས་སྟེང་། འདི་ལོ་འཛམ་གླིང་རྒྱལ་ཁབ་གྲངས་ ༢༧ ནང་ཕྱི་ལོ་ ༢༠༢༥་་༢༦ ལོའི་བོད་མིའི་སྒྲིག་འཛུགས་ཀྱི་སྲིད་སྐྱོང་དང༌། སྐབས་ ༡༨ པའི་བོད་མི་མང་སྤྱི་འཐུས་ཀྱི་སྔོན་འགྲོའི་འོས་བསྡུ་ལེགས་བསྒྲུབས་ཀྱིས་སྔོན་འགྲོའི་འོས་དམིགས་གསལ་བསྒྲགས་ཞུས་ཟིན་པ་བཞིན། འོས་བསྡུའི་སྒྲིག་གཞི་དོན་ཚན་ ༤༩ ནང་གསལ་ས་གནས་སོ་སོར་སྔོན་འགྲོ་འོས་གཞིའི་གསལ་བསྒྲགས་གཏོང་ཚེས་དང་དངོས་གཞིའི་འོས་དམིགས་གསལ་བསྒྲགས་མ་བྱས་བར་སྒྲིག་གསལ་ཉིན་གྲངས་ ༣༠ འཇོག་དགོས་རྒྱུ་དང༌། དུས་ཡུན་དེའི་རིང་ས་གནས་འོས་བསྡུ་ལས་ཁང་སོ་སོའི་ཁྱབ་ཁོངས་སུ་འོས་གཞིར་ཞུགས་མཁན་རྣམས་ཀྱི་ལོ་རྒྱུས་དང་། འདྲ་པར་རེ་བསྡུ་ལེན་གྱིས་དབུས་འོས་བསྡུ་ལས་ཁང་དུ་འབུལ་འབྱོར་དང་། འོས་གཞིར་ཞུགས་འདུན་མེད་རིགས་ནས་དགོངས་ཞུ་འབུལ་རྒྱུའི་དུས་ཚོད། དེ་བཞིན་འོས་གཞི་རྣམ་པའི་སྒྲིག་གསལ་འོས་ཆོས་ཚང་ཡོད་མེད་དང་། དཔྱ་དངུལ་འབུལ་ཆད་ཡོད་མེད་བརྟག་ཞིབ་རྩད་གཅོད། དགོངས་ཞུའི་རིགས་བཅས་གྲུབ་རྗེས་དངོས་གཞིའི་འོས་གཞི་གསལ་བསྒྲགས་བྱེད་དགོས་ཞེས་གསལ་བ་ལྟར། དེ་རིང་གསར་འགོད་གསལ་བསྒྲགས་འདི་བརྒྱུད་ཐོབ་ཁུངས་སོ་སོའི་དངོས་གཞིའི་འོས་དམིགས་གཏན་འབེབས་གསལ་བསྒྲགས་དང་ལམ་སྟོན་ཁག་ཅིག་ཞུ་རྒྱུ་ནི་ ༡། འོས་བསྡུའི་སྒྲིག་གཞི་དོན་ཚན་ ༤༩ ནང་གསེས་ ༣ པའི་ ཀ༽ ནང་། ”དངོས་གཞིའི་འོས་བསྡུ་བྱ་རྒྱུའི་ཉིན་གྲངས་ ༢༠ གོང༌། དབུས་འོས་བསྡུ་ལས་ཁང་ནས་གསལ་བསྒྲགས་སྔོན་སོང་ནང་གསལ་ཐོབ་ཁུངས་སོ་སོའི་ཐོབ་ཆའི་གྲངས་ཚད་ཀྱི་ཉིས་ལྡབ་ཐོག་དང་བླངས་ཇི་ཡོད་སོ་སོའི་ལོ་རྒྱུས་མདོར་བསྡུས་རེ་དང་། འདྲ་པར། འོས་གཞིའི་མཚོན་རྟགས་བཅས་མཐའ་བསྡོམས་གཏན་འབེབས་ཀྱིས་ཡོངས་ཁྱབ་གསལ་བསྒྲགས་བྱེད་དགོས་”ཞེས་གསལ་བ་བཞིན། ཐོབ་ཁུངས་སོ་སོའི་དངོས་གཞིའི་འོས་དམིགས་སུ་དབུས་གཙང་ཆོལ་ཁའི་ཁོངས་འོས་གཞི་གྲངས་ ༢༠ དང་། མདོ་སྟོད་ཆོལ་ཁའི་ཁོངས་འོས་གཞི་གྲངས་ ༢༠ ཐོག་དང་བླངས་ ༡། མདོ་སྨད་ཆོལ་ཁའི་ཁོངས་འོས་གཞི་གྲངས་ ༢༠། ཆོས་བརྒྱུད་ལྔ་ནས་འོས་གཞི་གྲངས་ ༤ རེ་དང་། ཡུ་རོབ་དང་ཨ་ཧྥི་རི་ཀ་ནས་འོས་གཞི་གྲངས་ ༤ ཐོག་དང་བླངས་ ༡། ལྷོ་བྱང་ཨ་རི་ནས་འོས་གཞི་གྲངས་ ༤ སྟེང་དང་བླངས་ ༡། རྒྱ་བལ་འབྲུག་གསུམ་ཕུད་པའི་ཨེ་ཤ་ཡ་དང་ཨོ་སེ་ཀྲེ་ལི་ཤི་ཡའི་ཐོབ་ཁོངས་ནས་འོས་གཞི་ ༢ བཅས་ལ་སྒྲིག་གསལ་ལྟར་གཏན་འབེབས་ཞུས་ཡོད། ༢། སྐབས་ ༡༨ པའི་བོད་མི་མང་སྤྱི་འཐུས་ཀྱི་དངོས་གཞིའི་འོས་མི་རྣམས་ཀྱི་མཚན་གཞུང་དང་དོ་བདག་སོ་སོའི་ལོ་རྒྱུས་ས་གནས་འོས་བསྡུ་ལས་ཁང་བརྒྱུད་འགྲེམས་སྤེལ་ཞུ་རྒྱུ་དང༌། དེ་བཞིན་དབུས་འོས་བསྡུ་ལས་ཁང་གི་གཞུང་འབྲེལ་དྲྭ་རྒྱའི་ནང་ལའང་འཇོག་རྒྱུ་ཡིན་པར། འོས་འཕེན་པ་རྒྱ་ཆེ་མང་ཚོགས་ནས་ཐུགས་སྣང་ངེས་པར་གནང་དགོས་རྒྱུ། ཞེས་འདུག

ཡང་གསལ་བསྒྲགས་ནང་། ༣། དེ་རིང་ ༢༠༢༦ ཟླ་ ༣ ཚེས་ ༡༨ ཉིན་ནས་གཏན་འབེབས་འོས་མི་སོ་སོ་དང་དེ་དག་གི་རྒྱབ་སྐྱོར་བ་རྣམས་ནས་འོས་སྒྲིག་ལྟར་འོས་བསྡུའི་དྲིལ་བསྒྲགས་གནང་ཆོག་པ་ཡིན། ༤། འོས་བསྡུའི་སྒྲིག་གཞི་དོན་ཚན་ ༢༤ (༧)(ཁ) དགོངས་དོན་ལྟར། ཕྱི་ལོ་ ༢༠༢༦ ཟླ་ ༤ ཚེས་ ༢༣ ཕྱི་དྲོ་ཕྱག་ཚོད་ ༥།༠༠ ནས་འོས་བསྡུའི་དྲིལ་བསྒྲགས་ལས་དོན་ཡོངས་རྫོགས་མཚམས་འཇོག་དགོས་རྒྱུ། ༥། ཕྱི་ལོ་ ༢༠༢༦ ཟླ་ ༤ ཚེས་ ༢༦ ཉིན་འོས་བསྡུའི་ལས་རིམ་གཏན་འབེབས་ལྟར་བོད་མིའི་འདུ་སྡོད་ས་ཁུལ་ཡོངས་ལ་དངོས་གཞིའི་འོས་བསྡུ་གནང་རྒྱུ་ཡིན་པར་སོང་། རྒྱ་ཆེ་མང་ཚོགས་ནས་འོས་བསྡུའི་ནང་ཆ་ཤས་ངེས་པར་དུ་བཞེས་དགོས་པ་ནན་སྐུལ་ཞུ་རྒྱུ། ༦། དངོས་གཞིའི་འོས་འཕེན་སྐབས་འོས་ཤོག་ནང་འོས་འདེམས་སུར་བྱེད་རེའུ་མིག་ནང་གསལ་ཨང་རིམ་སྟེང་འོས་ཐམ་མ་ནོར་བ་རྒྱག་དགོས་པ་ལས། འགྲིག་རྟགས་དང་ནོར་རྟགས་སོགས་རྒྱག་མི་ཆོག ༧། འོས་བསྡུའི་སྒྲིག་གཞི་དོན་ཚན་ ༣༤(༢) དགོངས་དོན་ལྟར་དངོས་གཞིའི་འོས་འཕེན་སྐབས་འོས་འདེམས་སུར་བྱས་ཀྱི་པར་བཤུས་སྤྱི་ཚོགས་དྲྭ་ལམ་ཁག་ཏུ་ཁྱབ་སྤེལ་བྱས་པ། འོས་ཐམ་གང་ཡང་མི་གསལ་བ། གྲངས་ཚད་ལས་བརྒལ་བའི་འོས་ཐམ་རྒྱབ་པ། འོས་འདེམས་སུར་བྱས་ངོས་འཛིན་མི་བདེ་བའི་འོས་ཐམ་རྒྱབ་པ། འོས་ཤོག་ནང་མི་གསལ་བའི་རང་མོས་འོས་གཞིའི་མིང་བཀོད་པ། འོས་ཤོག་ངོ་མ་མ་ཡིན་པའི་དོགས་གནས་ཅན་སོགས་འཐོན་ཚེ་འོས་ཤོག་རྩིས་མེད་གཏོང་རྒྱུ་ཡིན་པས་ཐུགས་གཟབ་གནང་གལ། ༨། འོས་བསྡུའི་སྒྲིག་གཞི་དོན་ཚན་ ༡༩ ནང་གསེས་ ༡ ནང་གསལ་ལྟར། དངོས་གཞིའི་འོས་བསྡུའི་སྐབས་ལོང་བ་དང༌། ལག་པ་གཉིས་ཀ་མེད་པའི་དབང་པོ་སྐྱོན་ཅན་ཁོ་ནར་འོས་བསྡུའི་སྤྱིལ་བུའི་ནང་རོགས་པ་མཉམ་ཁྲིད་ཆོག་པ་ཡིན། ༩། ད་ལན་སྔོན་འགྲོའི་འོས་བསྡུའི་སྐབས་ས་གནས་རེ་བཟུང་ལ་འོས་བསྡུའི་སྒྲིག་གཞི་དང་རྩ་འཛིན་ལམ་སྟོན་ཁག་ཅིག་ལ་འགལ་འཛོལ་བྱུང་ཡོད་སྐོར་འདི་གར་སྙན་སེང་ཞུ་མཁན་བྱུང་ཡོད་པ་དཔེར་ན། འོས་བསྡུའི་སྒྲིག་གཞི་ ༢༤ (༧)(ཁ) དགོངས་དོན་འོས་བསྡུའི་ཉིན་གཉིས་གོང་འོས་བསྡུའི་དྲིལ་བསྒྲགས་མཚམས་འཇོག་བྱེད་དགོས་པ་དེ་ལྟར་ཡང་། ས་གནས་ཁག་ཅིག་ལ་དེ་ལྟར་མ་བྱུང་བ་མ་ཟད་འོས་བསྡུའི་ཉིན་མོར་ཡང་འོས་གཞིའི་མིང་གཞུང་ཤོག་འཛར་འགྲེམས་སྤེལ་བྱེད་པ་སོགས་བྱུང་འདུག་པ་སྒྲིག་འགལ་ཚབས་ཆེ་ཞིག་ལ་ངོས་འཛིན་ཞུ་བཞིན་ཡོད་ན། དངོས་གཞིའི་འོས་བསྡུའི་སྐབས་སྒྲིག་འགལ་དེ་རིགས་བྱུང་ཚེ་ཉེས་ཆད་ཡན་པོར་མ་སོང་བ་གཏོང་རྒྱུ་ཡིན་པ་ཐུགས་གཟབ་གནང་དགོས་རྒྱུ། ༡༠། ལྷག་པར་དུ་མཐོ་སློབ་བསྐྱོད་བཞིན་པའི་རང་རེའི་གཞོན་སྐྱེས་མང་དག་ཅིག་ནས་ད་ལམ་སྔོན་འགྲོའི་འོས་བསྡུ་ནང་ཆ་ཤས་བཞེས་ཐུབ་མེད་པ་ནི་བློ་འཚབ་ཀྱི་རང་བཞིན་ལ་སོང་། གཞོན་སྐྱེས་རྣམས་ལ་མ་འོངས་བོད་ཀྱི་འཐབ་རྩོད་སྣེ་ཁྲིད་ཀྱི་ལས་འགན་ཡོད་པར་བརྟེན་དངོས་གཞིའི་འོས་བསྡུའི་ནང་ངེས་པར་ཆ་ཤས་བཞེས་དགོས། ཞེས་གསལ་འདུག

དབུས་འོས་བསྡུ་ལས་ཁང་གི་སྤྱི་ཁྱབ་འགན་འཛིན་བློ་བཟང་ཡེ་ཤེས་ལགས་ཀྱིས། དབུས་འོས་བསྡུ་ལས་ཁང་གིས་དཔྱད་ཁྲ་བཏང་བ་དེ་ཇི་མ་ཇི་བཞིན་མང་ཚོགས་ལ་འགྲེལ་བཤད་རྒྱག་དགོས་རྒྱུ་གལ་ཆེན་པོ་ཡིན་སྐོར་དང་། འོས་བསྡུ་ལས་ཁང་གིས་འོས་བསྡུའི་སྒྲིག་གཞིའི་ཐོག་ནས་འོས་བསྡུ་དྲང་པོ་དང་འདྲ་མཉམ། ཚགས་ཚུད་པོ་ཡོང་རྒྱུར་འབད་བརྩོན་ཞུ་ཡི་ཡོད། བོད་མི་མང་སྤྱི་འཐུས་ལྷན་ཚོགས་ནས་གཏན་འབེབས་གནང་བའི་འོས་བསྡུའི་སྒྲིག་གཞི་དེ་དག་ལ་མང་ཚོགས་ཀྱིས་སྲུང་སྐྱོབ་དང་བརྩི་སྲུང་བྱ་རྒྱུ་གལ་ཆེན་པོ་ཡིན་སྐོར། དེ་སྔ་སྔོན་འགྲོའི་འོས་བསྡུའི་སྐབས་དངོས་སུ་འོས་འཕེན་པའི་གྲངས་འབོར་ཧ་ཅང་ཉུང་ཉུང་རེད་འདུག མང་ཚོགས་ནས་དངོས་སུ་ཆ་ཤས་ལེན་རྒྱུ་ཤིན་ཏུ་གལ་ཆེན་པོ་ཡིན་པར་བརྟེན། དངོས་གཞིའི་འོས་བསྡུའི་སྐབས་མང་ཚོགས་ནས་བླངས་ནས་འོས་གང་མང་མང་འཕེན་ཐུབ་དགོས་ཀྱི་ཡོད་སྐོར་དང་། བོད་མིའི་སྒྲིག་འཛུགས་ཀྱི་མང་གཙོའི་ཀ་བ་གསུམ་གྱི་ལངས་ཕྱོགས་ཀྱི་ཐོག་ལ་ཞུ་ཡིག་ཅིག་འབུལ་བའི་སྐབས། ཞུ་ཡིག་འདིའི་ནང་ཞུ་ཡིག་འབུལ་མཁན་གྱི་རྒྱབ་ལྗོངས་དང་། ཁ་བྱང་། ཁ་པར་ཨང་གྲངས། འབྲེལ་བ་བྱེད་ཡུལ། དཔང་རྟགས་ཡོད་པ་སོགས་ཀྱི་བརྒྱུད་ནས་ཞུ་ཡིག་འབུལ་དགོས་པ་ལས། ཞུ་ཡིག་ཕུལ་བ་དེ་སྤྱི་ཚོགས་དྲ་རྒྱ་དང་མང་ཚོགས་ནང་ཁྱབ་བསྒྲགས་བྱས་ཟིན་རྗེས་ཡིག་འཁྱམ་ཞིག་ལ་ངོས་འཛིན་གྱི་ཡོད་སྐོར། ད་ལན་གྱི་སྤྱི་འཐུས་འོས་མི་ཁག་ཅིག་ལ་ཛ་དྲག་གི་ཐོག་ནས་ཡི་གེ་བསྐུར་རྒྱུའི་གནས་སྟངས་བྱུང་བ་མ་གཏོགས། མང་ཆེ་བ་ལ་ཁ་པར་བརྒྱུད་ནས་འབྲེལ་བ་ཞུས་ཡོད་པ་དང་། དམིགས་བསལ་གྱིས་གང་ཟག་ལ་དབྱེ་བ་ཕྱེས་ནས་ཡི་གེ་བསྐུར་བ་དང་མ་བསྐུར་བ་དེ་འདྲ་རྩ་བ་ཉིད་ནས་མེད་སྐོར་གསུངས་སོང་།

གསར་འགོད་པ། བསྟན་འཛིན་ཕུར་བུ། རྩོམ་སྒྲིག་བྱེད་མཁན། སྐལ་བཟང་སྦྱིན་པ།