ཆེས་མཐོའི་དམག་དཔོན་གཉིས་ལ་ནག་ཉེས་ཕོག

རྒྱ་ནག་གཞུང་གིས་དབུས་དམག་དོན་ལྷན་ཁང་གི་རྒྱུན་ལས་ཟུར་པ་ཧྥང་ཧྥིན་ཧེ་དང་དབུས་རྒྱུན་ཟུར་པ་འདས་པོ་ཀྲང་ཡཱང་གཉིས་ཀྱིས་ལྐོག་ཟ་རུལ་སུངས་དང་ལྐོག་རྔན་འབོར་ཆེན་བླངས་བའི་ནག་ཉེས་འོག་དམར་ཤོག་ཚོགས་པ་ནས་ཕུད་དེ་གོ་ཐོབ་ཚང་མ་ཕྱིར་བསྡུ་བྱས་ཡོད་སྐོར་བསྒྲགས་འདུག ཁ་སང་ཕྱི་ཚེས་ ༡༦ ཉིན། རྒྱ་ནག་གཞུང་ཕྱོགས་ནས་བསྒྲགས་པའི་གནས་ཚུལ་ལྟར་ན། རྒྱ་ནག་དམར་ཤོག་ཚོགས་པའི་དབུས་དམག་དོན་ལྷན་ཁང་གི་རྒྱུན་ལས་ཟུར་པ་དང་དམག་དོན་མཉམ་འབྲེལ་གྱི་ཚོགས་སྡེ་ཞིག་གི་འགན་འཛིན་ཟུར་པ་ཧྥང་ཧྥིན་ཧེ་(Fang Fenghui)དང་། རྒྱ་ནག་དབུས་དམག་དོན་ལྷན་ཁང་གི་རྒྱུན་ལས་ཟུར་པ་དང་དམག་དོན་ཆབ་སྲིད་ཚན་པའི་མགོ་འཁྲིད་ཟུར་པ་འདས་པོ་ཀྲང་ཡཱང་(Zhang Yang)གཉིས་ཀྱིས། ལྐོག་ཟ་རུལ་སུངས་དང་ལྐོག་རྔན་འབོར་ཆེན་བླངས་བའི་ནག་ཉེས་འོག་རྒྱ་ནག་དམར་ཤོག་ཚོགས་པ་ནས་ཕྱིར་འཕུད་དང་གོ་ཐོབ་བཅས་ཕྱིར་བསྡུ་བྱས་ཡོད་འདུག

རྒྱ་ནག་གཞུང་འབྲེལ་ཤིན་ཧྭ་གསར་ཁང་གིས་སྤེལ་བའི་གནས་ཚུལ་ནང་། དམག་དོན་ཆེས་མཐོའི་མགོ་འཁྲིད་གཉིས་ཀྱིས་ལྐོག་ཟ་རུལ་སུངས་དང་ལྐོག་རྔན་བླངས་བའི་བྱས་ཉེས་ཧ་ཅང་ཚབས་ཆེན་ཡིན་སྟབས། དམར་ཤོག་ཚོགས་པའི་ལམ་ལུགས་ལ་གཏོར་བཤིག་ཆེན་པོ་བཏང་ཡོད་སྐོར་བསྒྲགས་པ་ཙམ་ལས་ཁ་གསལ་བཟོས་མེད་ན་ཡང་། རྒྱ་ནག་གཞུང་གི་འབྲེལ་ཡོད་མི་སྣ་ཞིག་གིས་ཐེངས་འདིར་ཧྥང་ཧྥིན་ཧེ་ཡིས་ནག་ཉེས་དང་འབྲེལ་ནས་དམག་དོན་ལྷན་ཁང་གི་མགོ་འཁྲིད་དང་ལས་བྱེད་ ༣༠༠ ཙམ་ཉེས་དོན་ནང་ཚུད་རྒྱུ་ཡིན་པ་དང་། ཁོས་རྒྱ་སྒོར་ས་ཡ་ ༡༠༠ ཡི་ལྐོག་ཟ་རུལ་སུངས་དང་ལྐོག་རྔན་བླངས་ཡོད་པའི་དོགས་གཞིའི་འོག་དམར་ཤོག་ཚོགས་པ་ནས་ཕྱིར་ཕུད་དང་གོ་གནས་མེད་པ་བཟོས་ཡོད་སྐོར་བརྗོད་འདུག

རྒྱ་ནག་དབུས་དམག་དོན་ལྷན་ཁང་ནས་བསྒྲགས་ཡིག་སྤེལ་བའི་ནང་། ཧྥང་ཧྥིན་ཧེ་ལ་མཚོན་ན་དམར་ཤོག་ཚོགས་པར་བློ་དཀར་སེམས་དཀར་མིན་པ་དང་བྱས་ཉེས་ཚབས་ཆེན་བསགས་པ་སོགས་ཀྱིས། དམར་ཤོག་ཚོགས་པ་དང་དབུས་དམག་དོན་ལྷན་ཁང་གི་སྒྲིག་ཁྲིམས་ལ་གཏོར་བཤིག་ཆེན་པོ་བཏང་ཡོད་སྐོར་དང་། དམག་དོན་ཆབ་སྲིད་ཚན་པའི་མགོ་འཁྲིད་ཟུར་པ་ཀྲང་ཡཱང་གིས་ལྐོག་ཟ་རུལ་སུངས་ཚབས་ཆེན་བྱས་ཡོད་པ་མ་ཟད། ན་ནིང་ལོར་དབུས་སྒྲིག་ཁྲིམས་ཞིབ་བཤེར་ཁང་ནས་ལྐོག་ཟ་རུལ་སུངས་ཀྱི་དོགས་གཞིའི་འོག་འདྲི་རྩད་བྱེད་དུ་འགྲོ་སྐབས་རང་ཁྱིམ་ནས་རང་སྲོག་བཅད་ཡོད་པ་དང་། ཉེས་ཆད་ལ་གཡོལ་ནས་རང་སྲོག་བཅད་པ་དེས་དམར་ཤོག་ཚོགས་པའི་ལམ་ལུགས་ལ་གནོད་སྐྱོན་ཆེན་པོ་བཟོས་ཡོད་སྟབས། དམག་དོན་ལྷན་ཁང་གི་སྐྱིད་སྡུག་ནས་ཕྱིར་འཕུད་ཀྱིས་ཐོབ་ཐང་ཚང་མ་ཕྱིར་བསྡུ་བྱས་ཡོད་སྐོར་བརྗོད་འདུག

དམག་སྤྱི་ཆེན་མོ་ཀྲང་ཡཱང་ནི་རྒྱ་ནག་དབུས་དམག་དོན་ལྷན་ཁང་ཆབ་སྲིད་ཚན་པའི་འགན་འཛིན་དང་དམག་སྤྱི་ཆེན་མོ་ཡིན་པ་དང་། ཕྱི་ལོ་ ༢༠༡༧ ཟླ་ ༡༡ ཚེས་ ༢༣ ཉིན་ལྐོག་ཟ་རུལ་སུངས་ཀྱི་དོགས་གཞི་བསླེབས་པ་དང་བསྟུན་རང་ཁྱིམ་དུ་སྐེ་བཏགས་ནས་རང་ཤི་བརྒྱབས་ཡོད་འདུག  སྐབས་དེར་རྒྱ་ནག་གཞུང་འབྲེལ་གསར་ཁང་ཁག་གིས་ཁོ་ཕྱི་ལོ་༢༠༡༦ ལོར་ལྐོག་ཟ་རུལ་སུངས་དོགས་གཞིའི་འོག་འཛིན་བཟུང་བྱས་པའི་རྒྱ་ནག་མི་མང་བཅིངས་གྲོལ་དམག་གི་དམག་སྤྱི་ཆེན་མོ་ཟུར་པ་གོ་པའོ་ཞོང་ (Guo Boxiong) དང་། ཕྱི་ལོ་ ༢༠༡༤ ལོར་འཛིན་བཟུང་བྱས་པའི་རྒྱ་ནག་དབུས་དམག་དོན་ལྷན་ཁང་གི་གཙོ་འཛིན་གཞོན་པ་ཟུར་པ་ཞི་ཚེ་ཧུའུ་ (Xu Caihou) གཉིས་དང་འབྲེལ་བ་ཡོད་སྐོར་བརྗོད་ཡོད་པ་རེད།

ལྐོག་ཟ་རུལ་སུངས་ཚབས་ཆེན་བྱས་པའི་དོགས་གཞིའི་འོག་ལོ་སྔོན་མའི་ཕྱི་ཟླ་ ༨ ཚེས་ ༢༨ ཉིན་རྒྱ་ནག་དབུས་སྒྲིག་ཁྲིམས་ཞིབ་བཤེར་ལྷན་ཁང་གིས་ཀྲང་ཡཱང་གི་ཁྲིམས་འགལ་དོགས་གཞིར་ཞིབ་བཤེར་ཆོག་པའི་ཆོག་མཆན་སྤྲད་ཡོད་པ་དང་། ཁོའི་ཁྱིམ་དུ་འདྲི་རྩད་ཞིབ་བཤེར་བྱས་པ་བརྒྱུད་ཁྲིམས་སྒྲིག་དང་འགལ་བའི་ནག་ཉེས་ཚབས་ཆེན་བསགས་ཡོད་པ་མ་ཟད། སྒེར་གྱི་རྒྱུ་དངོས་མང་པོའི་འབྱུང་ཁུངས་གསལ་པོ་མེད་པ་སོགས་ཀྱི་ནག་ཉེས་ར་འཕྲོད་བྱུང་ཡོད་སྐོར་བརྗོད་པ་དང་། ཐེངས་འདིར་དམག་དོན་ལྷན་ཁང་གིས་བཏོན་པའི་ཡི་གེའི་ནང་ལྷན་ཁང་དེའི་མི་གྲངས་ ༤༠ ལྷག་ཀྲང་ཡཱང་གི་ནག་དོན་ནང་ཚུད་ཡོད་པ་དང་། དེའི་ཁྲོད་ནས་དམག་སྤྱི་གཉིས་ལ་གཟའ་ཟླ་བ་ནས་འདྲི་རྩད་ཞིབ་བཤེར་བྱེད་མགོ་ཚུགས་ཡོད་སྐོར་བརྗོད་འདུག

གསར་འགོད་པ། སངས་རྒྱས་དཀོན་མཆོག