ཧིན་རྡུ་ཉི་ཤི་ཡའི་རྒྱལ་ས་ནས་ཡུལ་དེའི་པང་གཱལ་པི་ཎཱང་མཚོ་གླིང་ལ་འཕུར་བའི་འགྲུལ་བ་ ༡༨༨ ཅན་གྱི་གནམ་གྲུ་ཞིག་གནམ་གྲུའི་སྟངས་འཛིན་ཁང་དང་འབྲེལ་བ་ཆད་ནས་མཚོ་ནང་ལ་བརྡབ་སྐྱོན་བྱུང་ཡོད་འདུག
དེ་རིང་སྔ་དྲོའི་རྒྱ་གར་གྱི་ཆུ་ཚོད་ ༥།༠༡ སྟེང་། ཧིན་རྡུ་ཉི་ཤི་ཡའི་སེང་གེ་རྟགས་ཅན་གྱི་གནམ་གྲུ་(JT610)ཞིག་ཡུལ་དེའི་རྒྱལ་ས་ཇཱ་ཀར་ཏ་ (Jakarta)ནས་པང་གཱལ་པི་ཎཱང་(Pangkal Pinang)མཚོ་གླིང་ལ་འཕུར་མགོ་ཚུགས་ནས་སྐར་མ་ ༡༣ ཙམ་མ་སོང་བར་གནམ་གྲུའི་སྟངས་འཛིན་ཁང་དང་འབྲེལ་བ་ཆད་དེ་མཐར་མཚོ་ནང་ལྷུང་ཡོད་པ་དང་། ད་ལྟའི་ཆར་དོན་རྐྱེན་ཁྲོད་མི་ལ་ཤི་རྨས་བྱུང་བའི་གནས་ཚུལ་སོགས་གསལ་ཁ་མི་འདུག
ཧིན་རྡུ་ཉི་ཤི་ཡའི་རྒྱལ་ཡོངས་འཚོལ་ཞིབ་དང་ཉེན་སྐྱོབ་ལྷན་ཁང་གི་མགྲིན་ཚབ་པ་ཡུ་སུབ་ལ་ཊིབ་(Yusuf Latif) ཀྱིས་གསར་འགོད་པར། གནམ་གྲུ་དེ་བརྡབ་སྐྱོན་ཤོར་ཟིན་པར་གཏན་འཁེལ་བྱས་ཡོད་པ་དང་། གནམ་གྲུ་དེ་མཚོའི་གཏིང་རིམ་རྨིད་ ༤༠ ལྷག་གི་ནང་ལྷུང་ཡོད་སྐོར་བརྗོད་འདུག
ཐེངས་འདིར་བརྡབ་སྐྱོན་ཤོར་བའི་གནམ་གྲུ་ནང་ཁྱོན་འགྲུལ་བ་ ༡༨༨ ཡོད་པ་དང་། འགྲུལ་བ་ ༡༧༨ མི་རྒན་པ་དང་ཕྲུ་གུ་ ༣ ། ཁ་ལོ་བ་ ༢ དང་མཁའ་འགྲུལ་ཞབས་ཞུ་བ་ ༥ བཅས་ཡོད་པ་དང་། དོན་རྐྱེན་དེའི་སྐོར་ལ་སེང་གེ་རྟགས་ཅན་གྱི་མཁའ་གྲུའི་འགན་འཛིན་ཨེ་ཌེ་ཝ་ཌི་(Edward)ཡིས་རུ་ཊར་གསར་ཁང་ལ། ང་ཚོས་ད་ལྟ་མི་ལ་ཤི་རྨས་བྱུང་ཡོད་མེད་སོགས་ཀྱི་སྐོར་ལ་ཅི་ཡང་བཤད་ཐུབ་ཀྱི་མི་འདུག་ལ། ང་ཚོས་གང་ཐུབ་ཀྱིས་གནས་ཚུལ་མཁོ་སྒྲུབ་བྱེད་བཞིན་པའི་སྒང་ལ་ཡིན། ཞེས་བརྗོད་འདུག
སེང་གེ་རྟགས་ཅན་གྱི་གནམ་གྲུ་དེ་(Boeing 737 MAX 8)ཨང་རྟགས་ཅན་གྱི་ཐོན་དངོས་མ་དཔེ་ཡིན་པ་དང་། གནམ་གྲུའི་མ་དཔེ་དེ་ཕྱི་ལོ་ ༢༠༡༦ ལོ་ནས་སྤྱོད་མགོ་བརྩམས་ཡོད་པ་དང་། འདི་ལོའི་ཕྱི་ཟླ་བརྒྱད་པར་སེང་གེ་གནམ་གྲུ་སྤྱི་གཉེར་ཁང་ལ་མཁོ་འདོན་བྱས་ཡོད་འདུག ཆེད་ལས་མི་སྣ་ཞིག་གིས་བྷི་བྷི་གསར་ཁང་ལ། མཱེག་སི་(MAX 8) མ་དཔེ་ཅན་གྱི་གནམ་གྲུ་དེར་ཐེངས་མང་ལ་བརྡབ་སྐྱོན་སོགས་ཀྱི་གནས་ཚུལ་མང་པོ་བྱུང་མྱོང་ཡོད་སྐོར་བརྗོད་འདུག
ཧིན་རྡུ་ཉི་ཤི་ཡར་ནམ་རྒྱུན་གནམ་གྲུའི་བརྡབ་སྐྱོན་སོགས་མང་པོ་བྱུང་བཞིན་ཡོད་པ་དང་། ཕྱི་ལོ ༢༠༠༤ ལོར་སེང་གེ་རྟགས་ཅན་གྱི་གནམ་གྲུ་ ༥༣༨ དེ་སོ་ལོ་གྲོང་ཁྱེར་དུ་བརྡབ་སྐྱོན་ཤོར་ཏེ་མི་གྲངས་ ༢༥ རྐྱེན་ལམ་ཏུ་བཏང་ཡོད་པ་དང་། ཡང་ཕྱི་ལོ་ ༢༠༡༣ ལོར་འགྲུལ་བཞུད་པ་ ༡༠༨ ཡོད་པའི་སེང་གེ་རྟགས་ཅན་གྱི་གནམ་གྲུ་ ༩༠༤ དེ་མཚོ་ནང་ལྷུང་སྟེ་བརྡབ་སྐྱོན་བྱུང་ཡོད་ན་ཡང་། སྐབས་དེའི་དོན་རྐྱེན་ཁྲོད་འགྲུལ་བར་ཤི་སྐྱོན་གང་ཡང་བྱུང་མི་འདུག
གསར་འགོད་པ། པ་སངས་ཚེ་རིང་།
