བོད་མིའི་སྒྲིག་འཛུགས་ཀྱིས་གངས་ཅན་སྐྱིད་གཤོངས་ནང་ལོགས་སུ་རླངས་འཁོར་འགྲོ་འོང་སྟངས་འཛིན་ཆེད་གངས་སྐྱིད་ཀྱི་ཕྱི་སྒོར་ལྕགས་སྒོ་རྒྱག་འཆར་ཡོད་ཀྱང་ཡུལ་མི་གླ་འཁོར་གཏོང་མཁན་ཚོས་ངོ་རྒོལ་བྱེད་ཀྱི་འདུག
བོད་མིའི་སྒྲིག་འཛུགས་ཀྱི་ལྟེ་གནས་གངས་ཅན་སྐྱིད་གཤོངས་ནང་ལོགས་སུ་རླངས་འཁོར་འགྲོ་འོང་ལ་སྟབས་བདེ་དང། འགྲིམ་འགྲུལ་སྟངས་འཛིན་ཡོང་ཆེད་གངས་སྐྱིད་ཀྱི་ཕྱི་སྒོར་ལྕགས་སྒོ་ཞིག་རྒྱག་འཆར་ཡོད་ཀྱང་། ཟླ་འདིའི་ཕྱི་ཚེས་ ༣ ཉིན། ས་གནས་ཀྱི་གླ་འཁོར་གཏོང་མཁན་རྒྱ་གར་བ་སྐོར་ཞིག་གིས་ལྕགས་སྒོ་བརྒྱབ་མི་ཆོག་ཅེས་ངོ་རྒོལ་བྱས་ཡོད་པ་མ་ཟད། ལས་འཆར་དེ་ཁྲིམས་མཐུན་མིན་ཚུལ་བརྗོད་ནས་ས་གནས་གྲོང་སྡེ་ལྷན་ཁང་ལ་ཞུ་གཏུག་བྱས་ཡོད་པ་དང་། གྲོང་སྡེ་ལྷན་ཁང་ནས་ཆེད་མངག་ཡུལ་དངོས་ལ་རྟོག་ཞིབ་གནང་སྟེ་གྲོས་བསྡུར་གནང་བཞིན་པ་རེད་འདུག་ལ། འཆར་གཞི་དེ་གནས་སྐབས་རིང་འཇོག་དགོས་པའི་བཀའ་ཁྱབ་བཏང་ཡོད་འདུག
ཟླ་འདིའི་ཕྱི་ཚེས་ ༢༩ ཉིན་བླ་ཆེན་ཁག་གི་ལྷན་ཚོགས་མ་འཚོགས་གོང་ནས་རྒྱལ་སྒོའི་ལས་འཆར་དེ་འགྲུབ་ཐུབ་པའི་རེ་བ་གནང་གི་ཡོད་པས། གྲོང་སྡེ་ལྷན་ཁང་ནས་ཐག་གཅོད་གང་མགྱོགས་གནང་རྒྱུ་དང་། གལ་ཏེ་ལྕགས་སྒོ་བརྒྱབ་རྒྱུའི་ཆོག་མཆན་མ་གནང་ཚེ། རླངས་འཁོར་སྟངས་འཛིན་བྱེད་རྒྱུའི་གཞུང་འབྲེལ་ཆོག་མཆན་ཞིག་དང་། འགྲིམ་འགྲུལ་ཉེན་རྟོག་པ་ཞིག་ཀྱང་གྲ་སྒྲིག་གནང་དགོས་པའི་རེ་འདུན་བཏོན་ཡོད་འདུག
སྤྱིར་བཏང་གངས་སྐྱིད་ཡུལ་མི་རྣམས་ཀྱི་ཆེད་དུ་རྒྱ་གར་གཞུང་རང་ནས་བོད་ཀྱི་དཔེ་མཛོད་ཁང་གི་རྒྱབ་ལོགས་ནས་ལམ་ཁ་ཞིག་གསར་བཟོ་བྱས་ཡོད་ཀྱང་། ཡུལ་མི་གླ་འཁོར་གཏོང་མཁན་ཕལ་ཆེ་བས་གངས་སྐྱིད་ཀྱི་ལམ་བུ་རང་སྤྱོད་བཞིན་ཡོད་སྟབས། གངས་སྐྱིད་ནང་འགྲིམ་འགྲུལ་འགྲོ་འོང་གི་དཀའ་ངལ་སེལ་ཆེད། བོད་མིའི་སྒྲིག་འཛུགས་ནས་གླ་འཁོར་གཏོང་མཁན་ཚོར་དཔེ་མཛོད་ཁང་གི་རྒྱབ་ཕྱོགས་ཀྱི་ལམ་ཁ་དེར་གླ་འཁོར་འཇོག་ས་ཞིག་ཀྱང་མཐུན་འགྱུར་གནང་རྒྱུ་ཡིན་སྐོར་གསུངས་ཡོད་འདུག
དེ་རིང་འདི་གའི་གསར་འགོད་པས་བོད་མིའི་སྒྲིག་འཛུགས་ནང་སྲིད་ལྷན་ལས་ཁུངས་ཀྱི་དྲུང་འཕར་ཚེ་དབང་རྒྱལ་པོ་ཨརྱ་ལགས་སུ་ལྕགས་སྒོ་བརྒྱབ་དགོས་དོན་གང་ཡིན་སོགས་དྲིས་པར་ཁོང་གིས། སྤྱིར་དེང་སྐབས་ང་ཚོས་གངས་སྐྱིད་ཀྱི་ལས་ཁུངས་ཁག་དང་ལམ་ཁ་རྣམས་ཉམས་བཟོ་བྱེད་བཞིན་ཡོད་པ་དང་། གངས་སྐྱིད་ཀྱི་ར་བ་དེ་ཆུང་ཆུང་ཡིན་པས། ནམ་རྒྱུན་ནས་རླངས་འཁོར་འགྲིམ་འགྲུལ་གྱི་ཐད་ནས་དཀའ་ངལ་རབ་དང་རིམ་པ་འཕྲད་བཞིན་ཡོད་པ་དང་། མ་འོངས་པར་བོད་མིའི་སྒྲིག་འཛུགས་ཀྱི་འགྲེམ་སྟོན་ཁང་འགོ་བརྩམས་རྗེས། ཕྱི་མི་མང་པོ་ཕེབས་ངེས་ཡིན་པ་དང་། ཕྱོགས་གཞན་ནས་གཞུང་འཁོར་དང་། ལས་བྱེད་པའི་སྦག་སྦག སྒེར་ཕེབས་སྦག་སྦག ཡུལ་མིའི་སྦག་སྦག་སོགས་མང་པོ་ཞིག་ལམ་བུ་ཆུང་ཆུར་དེར་འཚང་ཁ་ཐེབས་ཏེ། འགྲིམ་འགྲུལ་ཐད་ལ་སྔར་བས་འགོག་རྐྱེན་དང་མགོ་རྙོག་ཆེ་བ་འབྱུང་ངེས་ཡིན་སྟབས། རླངས་འཁོར་དང་སྦག་སྦག་འགྲོ་འོང་ལ་སྟངས་འཛིན་བྱེད་ཆེད་ལྕགས་སྒོ་ཞིག་དང་སྒོ་སྲུང་བ་ཞིག་འཇོག་རྒྱུ་བྱས་ཡོད་ཀྱང་། ཟླ་འདིའི་ཚེས་ ༣ ཉིན་གངས་སྐྱིད་གཡས་གཡོན་གྱི་ཡུལ་མི་གླ་འཁོར་གཏོང་མཁན་ ༣༠ ལྷག་གིས་ལྕགས་སྒོ་བརྒྱབ་མི་ཆོག་ཟེར་ནས་ངོ་རྒོལ་བྱས་ཡོད་པ་རེད། འདི་གའི་ལས་བྱེད་ཅིག་གིས་ཤེས་རྟོགས་བྱུང་བ་ལྟར་ན། ངོ་རྒོལ་བའི་ནང་གནད་དོན་དེའི་སྐོར་གང་ཡང་མི་ཤེས་མཁན་གྱི་ཡུལ་མི་རྒས་པོ་ཞིག་ཀྱང་ཡོད་འདུག དེ་ནི་ཁོ་ཚོས་མི་རེ་འགའི་འདོད་པ་དེ་མི་མང་པོའི་འདོད་པ་ཡིན་ཚུལ་གྱི་རྣམ་པ་ཙམ་སྟོན་པའི་ཆེད་དུ་རེད། ཅེས་བརྗོད་བྱུང་།
ཡང་ཁོང་གིས། ང་ཚོས་ལྕགས་སྒོ་བརྒྱབ་སྟེ་ཡུལ་མི་དང་ཡུལ་མིའི་གླ་འཁོར་རྣམས་ཕར་འགྲོ་ཚུར་འོང་བྱེད་མི་ཆོག་ཅེས་བརྗོད་ཀྱི་མེད། ཁོ་ཚོའི་ངོས་ནས་ང་ཚོར་ཡུལ་མི་གླ་འཁོར་གཏོང་མཁན་གྱི་ཐོ་གཞུང་ཞིག་སྤྲད་ན། ཐོ་གཞུང་ནང་གི་གླ་འཁོར་རྣམས་ལ་དམིགས་བསལ་ཐོག་ནས་ཕར་འགྲོ་ཕྱིར་འོང་བྱེད་པར་གུ་ཡངས་གཏོང་རྒྱུ་ཡིན་ཞེས་བརྗོད་པ་ཡིན། ཡིན་ནའང་། དེར་ལན་གང་ཡང་སྦྱིན་མ་སོང་། མ་གཞི་ནས་ཁོ་ཚོར་གོ་ནོར་ཐེབས་འདུག་ལ། འགྲེལ་བརྗོད་ཀྱང་བྱེད་ཐབས་མི་འདུག ཁོ་ཚོས་ལྕགས་སྒོ་བརྒྱབ་ན་ཁོ་ཚོར་ཕར་འགྲོ་ཚུང་འོང་ལ་འགོག་རྐྱེན་བཟོ་སྲིད་པ་རེད་བསམ་ནས་ངོ་རྒོལ་བྱས་པ་རེད་དེ། དོན་དངོས་ཐོག་དེ་ལྟར་མ་རེད། ལྕགས་སྒོ་དེ་བརྒྱབ་ཚེ་ཕྱོགས་གཉིས་ཀར་འགྲིམ་འགྲུལ་ཐད་ནས་སྟབས་བདེ་དང་མགོ་རྙོག་མི་ཡོང་རྒྱུའི་ཁེ་ཕན་ཡོད་པ་རེད། ཅེས་བརྗོད་བྱུང་།
འདི་གའི་གསར་འགོད་པའི་ངོ་རྒོལ་ནང་མཉམ་ཞུགས་བྱས་པའི་ཡུལ་མི་གླ་འཁོར་གཏོང་མཁན་ཞིག་ལ་དེའི་སྐོར་སྐད་ཆ་དྲིས་པར་ཁོས། ང་ཚོ་ཡུལ་མི་གླ་འཁོར་གཏོང་མཁན་ ༡༥ ལྷག་ཡོད་པ་དང་། ང་ཚོ་ཉིན་མོར་ཕར་རྒྱུག་ཚུར་རྒྱུག་བྱས་ཏེ། གླ་འཁོར་དགོང་མོ་མ་གཏོགས་གངས་སྐྱིད་ནང་འཇོག་གི་མེད་པ་དང་། ལྕགས་སྒོ་བརྒྱབ་ཚེ་ང་ཚོར་འགྲོ་འོང་གི་རང་དབང་མེད་པས། གལ་ཏེ་ཡུལ་མི་ཞིག་ལ་ཛ་དྲག་ནད་མནར་བྱུང་ཚེ་ང་ཚོས་ག་རེ་བྱེད་དགོས་པ་རེད། ཅེས་བརྗོད་བྱུང་།
ཡང་ཁོས། གང་ལྟར་ང་ཚོས་ལྕགས་སྒོ་བརྒྱབ་མི་ཆོག་པའི་རེ་འདུན་བཏོན་ཡོད་པ་དང་། དེ་ནི་ཡུལ་མི་ཀུན་གྱི་རེ་འདུན་ཡིན་པས་ཕལ་ཆེར་བརྒྱབ་འཇུག་རྒྱུ་མ་རེད། ཅེས་བརྗོད་བྱུང་། གསར་འགོད་པས་གླ་འཁོར་གཏོང་མཁན་དེར་སྐད་ཆ་བཤད་སྐབས་ཉིན་གུང་ཆུ་ཚོད་ ༡༢ ཙམ་ཡིན་པ་དང་། དེ་དུས་གངས་སྐྱིད་ཀྱི་ར་བའི་ནང་གླ་འཁོར་ ༡༠ ཙམ་བཞག་ཡོད་པ་མཐོང་བྱུང་།
ངོ་རྒོལ་གྱི་ཉིན་དེ་རང་ལ་ཡུལ་མི་གླ་འཁོར་གཏོང་མཁན་དང་བོད་མིའི་སྒྲིག་འཛུགས་ཀྱི་འབྲེལ་ཡོད་ལས་བྱེད་བར་སྐད་ཆ་བྱུང་སྟེ། བོད་མིའི་སྒྲིག་འཛུགས་ནས་ནང་མོལ་བྱེད་རྒྱུའི་རེ་བ་བཏོན་འདུག་ཀྱང་། ཡུལ་མི་གླ་འཁོར་གཏོང་མཁན་གཅིག་ཀྱང་ནང་མོལ་བྱེད་དུ་བསླེབས་མེད་པ་མ་ཟད། གྲོང་སྡེ་ལྷན་ཁང་ལ་ཞུ་གཏུག་བྱས་ཡོད་སྟབས། ཟླ་འདིའི་ཕྱི་ཚེས་ ༥ ཉིན་ནང་སྲིད་ལས་ཁུངས་ཀྱི་དྲུང་འཕར་ཚེ་དབང་རྒྱལ་པོ་ཨརྱ་དང་ས་གནས་མགོ་འཛིན་ཟླ་བ་རིན་ཆེན་རྣམ་གཉིས་གྲོང་སྡེ་ལྷན་ཁང་ལ་ཆེད་བཅར་གྱིས། ནམ་རྒྱུན་གངས་སྐྱིད་ནང་རླངས་འཁོར་གྱི་འགྲིམ་འགྲུལ་ཐད་ནས་དཀའ་ངལ་མི་ཉུང་བ་ཞིག་ཡོད་སྐོར་དང་། ལྕགས་སྒོ་དེ་ཡུལ་མི་རྣམས་འགོག་ཆེད་མིན་པར་འགྲིམ་འགྲུལ་སྟབས་བདེ་ཡོང་ཆེད་ཡིན་སྐོར་སོགས་འགྲེལ་བརྗོད་གནང་སྐབས། གྲོང་སྡེ་ལྷན་ཁང་གིས་སྤྱིར་གངས་སྐྱིད་ཀྱི་ལམ་དེ་སྤྱི་པའི་ལམ་ཞིག་ཡིན་པས། ཕྱོགས་གཅིག་གིས་ཐག་གཅོད་བྱེད་ཐབས་མེད་པས། གནས་སྐབས་རིང་ལྕགས་སྒོ་བརྒྱབ་མི་ཆོག་པ་དང་། རིམ་པས་གྲོས་བསྡུར་བྱས་ཏེ་ཐག་གཅོད་བྱ་རྒྱུ་ཡིན་ལ། གནད་དོན་སེལ་ཆེད་ས་གནས་རང་ལ་རྟོག་ཞིབ་བྱེད་དུ་བསླེབ་རྒྱུ་ཡིན་སྐོར་བརྗོད་ཡོད་པ་ལྟར། ཟླ་འདིའི་ཕྱི་ཚེས་ ༡༦ ཉིན་གྲོང་སྡེ་ལྷན་ཁང་གི་སྡེ་དཔོན་དང་། སྡེ་དཔོན་གཞོན་པ། མགོ་འཛིན་གཞོན་པ་སོགས་གནད་ཡོད་མགོ་འཁྲིད་ལྔ་གངས་སྐྱིད་ལ་ཕེབས་ཏེ་རྟོག་ཞིབ་གནང་ཡོད་པ་དང་། དྲུང་འཕར་ལགས་ཀྱིས་བརྗོད་པ་ལྟར་ན། གྲོང་སྡེ་ལྷན་ཁང་གི་རྟོག་ཞིབ་པ་འགའ་ཤས་ནས་བོད་མིའི་སྒྲིག་འཛུགས་ཀྱི་ལྕགས་སྒོ་བརྒྱབ་རྒྱུའི་ལས་འཆར་དེར་མོས་མཐུན་གནང་ཡོད་འདུག
གཞན་ཡང་། གླ་འཁོར་གཏོང་མཁན་ཚོས་གྲོང་སྡེ་ལྷན་ཁང་ལ་བོད་མིའི་སྒྲིག་འཛུགས་ཀྱིས་གངས་སྐྱིད་ནང་བཀའ་འཁྲོལ་མེད་པའི་ཐོག་ནས་ལས་ཁུངས་སོགས་འཛུགས་བསྐྲུན་མི་ཉུང་བ་ཞིག་བྱས་ཡོད་པའི་ཞུ་གཏུག་བྱས་ཡོད་པའི་སྐོར་ལ་དྲུང་འཕར་ལགས་ཀྱིས། བོད་མིའི་སྒྲིག་འཛུགས་ཀྱིས་ད་བར་བཀའ་འཁྲོལ་མེད་པར་ཁྲིམས་འགལ་གྱི་ཐོག་ནས་འཛུགས་བསྐྲུན་གང་ཡང་བྱས་མེད་པ་དང་། གྲོང་སྡེ་ལྷན་ཁང་ལ་འཛུགས་བསྐྲུན་གྱི་བཀའ་འཁྲོལ་ཡིག་ཆ་དགོས་ཚེ་འབུལ་ཆོག་ཅེས་ཞུས་ཡོད་སྐོར་བརྗོད་བྱུང་།
བོད་མི་རྣམས་ནས་ཀྱང་གངས་སྐྱིད་ནང་འགྲིམ་འགྲུལ་དཀའ་ངལ་མི་ཡོང་ཆེད་མཐུན་འགྱུར་རོགས་རམ་ཞུ་དགོས་ཚུལ་སྐོར་ལ་ཁོང་གིས། ང་ཚོ་བོད་མི་དང་ལས་བྱེད་པ་རྣམས་ཀྱིས་གླ་འཁོར་རྣམས་གངས་སྐྱིད་ཀྱི་ཕྱི་སྒོར་འགོག་རྒྱུ་ལས་ནང་དུ་འཁྲིད་པའམ་སྐད་གཏོང་བ་སོགས་མ་གནང་ན་བཟང་བ་དང་། གཞུང་གི་སྒོ་སྲུང་བ་རྣམས་ལ་ནམ་རྒྱུན་རླངས་འཁོར་སྟངས་འཛིན་བྱེད་ཕྱོགས་སྐོར་ནས་ལམ་སྟོན་བྱེད་སྐབས། ཁོ་ཚོས་བོད་མི་ཚོས་གང་བྱུང་རླངས་འཁོར་འཁྲིད་པ་དང་། ལམ་ཟུར་ལ་འཇོག་པ། དེ་བཞིན་ལས་བྱེད་ཡིན་ཟེར་ནས་གང་མོས་བྱེད་ཀྱི་འདུག་པས། ང་ཚོར་ཐབས་ཤེས་མི་འདུག་ལབ་ཀྱི་འདུག་ཅེས་བརྗོད་བྱུང་།
ཟླ་འདིའི་ཕྱི་ཚེས་ ༡༧ ཉིན། ལྕགས་སྒོའི་གནད་དོན་དེའི་སྐོར་ལ་ས་གནས་ཀྱི་ཧིན་ཡིག་གསར་ཤོག་དྷེ་ཎིག་ཇཱག་རན་ཀང་གྷ་ར་(दैनिक जागरण काँगड़ा )དང་། པཱན་ཇཱབ་ཀེ་སི་རི་(पंजाब केसरी) ཞེས་པའི་ནང་། གལ་ཏེ་བོད་མིའི་སྒྲིག་འཛུགས་ཀྱིས་ལྕགས་སྒོ་བརྒྱབ་ན། གླ་འཁོར་གཏོང་མཁན་རྣམས་ཀྱིས་གླ་འཁོར་རྣམས་གཞུང་ལམ་ཐོག་མི་འཇོག་ཐབས་མེད་འགྱུར་གྱི་ཡོད་སྟབས། འགྲིམ་འགྲུལ་ཉེན་རྟོག་པས་ཁོ་ཚོར་ཆད་པ་གཅོད་སྲིད་པ་མ་ཟད། ས་གནས་ཡུལ་མི་ ༥,༠༠༠ ལྷག་ལ་དོ་ཕོག་འགྲོ་སྲིད་སྐོར་དང་། དེ་བཞིན་གངས་སྐྱིད་དུ་ཐོག་རྩེག་ལྔ་ཅན་གྱི་ཁང་ཆེན་བརྒྱབས་ཡོད་པ་དེའི་བཀའ་འཁྲོལ་ཡིག་ཆ་བདུན་ཕྲག་གཅིག་ནང་གྲོང་སྡེ་ལྷན་ཁང་ལ་སྤྲོད་དགོས་པའི་བཀའ་ཁྱབ་བཏང་ཡོད་ལུགས་སོགས་བཀོད་འདུག
གསར་འགོད་པ། པ་སངས་ཚེ་རིང་།
སྤྱིར་བཏང་བོད་པའི་ཀླད་ཚད་དེ་ཕྱིས་འབྱུང་གནས་ཚུལ་ལ་མ་སྙོབ་པར་ཕྱི་བཤོལ་གྱིས་རྒྱལ་ཁབ་རང་བཙན་ཤོར་བ་དང་ཤོར་ནས་བསྐྱར་གསོའི་ལས་དོན་ཆེ་ཕྲ་ཆུང་སོགས་དུ་མ་ཞིག་ལ་མཐུད་ཤོར་ཕྱིན་པ་དང་འགྲོ་བཞིན་པ་ནི་སྤྱིར་བཏང་བོད་པའི་གོམས་གཤིས་ངན་པའི་བཅོང་ནད་ཅིག་རེད། གཞིས་ཆགས་ཁག་གི་བོད་མིའི་ས་ཆ་ཡུལ་མིའི་ལག་ཏུ་ཤོར་བ། གཞིས་ཆགས་ནང་ཚལ་དང་ཅ་དངོས་ཅུང་ཚགས་འཚོང་མཁན་རྣམས་ཕྱིར་འབུད་མ་ཐུབ་པའི་དཀའ་ངལ་ལ་སོགས་པ་ཇི་སྙེད་ཅིག་བྱུང་ཡོད། ལར་ནས་དགུན་ཚོང་རྒྱག་མཁན་ཚོར་ཡང་ཚོང་སའི་བརྩོད་རྙོགས་སོགས་བྱུང་དང་འབྱུང་བཞིན་པ་ཡང་ཡིན། དེ་དག་ནི་ཆུ་མ་ཡོང་སྔོན་ཚུད་རག་རྒྱག་རྒྱུ་དང་། རྐྱེན་ངན་མ་བྱུང་སྔོན་ནས་ཟློག་ཐབས་བྱེད་པའི་གོམས་གཤིས་ཀྱི་ཡོན་ཏན་དེ་ང་ཚོར་འཇགས་མེད་པའི་སྐྱོན་ཆ་ཁོ་ན་རེད། བཙན་བྱོལ་བའི་ནང་ཁྲིམས་ཀྱི་སློབ་སྦྱོང་བྱས་མྱོང་ཡོད་ཀྱང་གནད་འགག་ཆུང་ཚག་རིགས་ལ་ཁྲིམས་ཀྱི་འགྲོ་ལུགས་ལ་མཉམ་པར་མ་འཇོག་པར་རྗེས་ལུས་ཀྱི་རང་གཤིས་ལ་ཡུལ་མིས་མཐོང་ཆུང་བྱས་པའི་གནས་ཚུལ་ཕྱོགས་གང་སར་མི་ཉུང་བ་བྱུང་དང་འབྱུང་བཞིན་ཡོད་པས་དེ་དག་ལ་ཕྱིས་འབྱུང་ཤིན་ཏུ་དོ་གཟབ་དགོས་པར་མཐོང་ངོ་།
གང་དྲན་མ་གནང་རོགས།
གངས་སྐྱིད་རྒྱལ་སྒོ་རྒྱབ་ཡས་ཀྱི་གནས་ཚུལ་ཐོག་དང་ཐོག་ནས་བསམ་བློ་ནན་པོ་ཞིག་མ་བཏང་བར་རང་རེའི་སྒྲིག་འཛུགས་ནས་ཚོར་སྣང་གིས་ཐག་གཅོད་གནང་བ་གསལ་པོ་རེད་། གཟིགས་དང་རྒྱ་གར་གཞུང་གི་ལས་ཁུངས་གང་ཡོད་སར་རྒྱལ་སྒོ་རྒྱབ་ཡས་དང་སྣུམ་འཁོར་འཇོག་དངུལ་བསྡུ་བ་སོགས་དཀོན་པོ་རེད་། དེའི་རྒྱུ་ཚན་ནི་ལམ་ཁ་དེ་ཚོ་སྤྱི་པའི་རེད་། ད་ཆ་ཐག་གཅོད་དེ་འདྲ་བྱས་པར་ཡུལ་མི་ཚོས་ངོ་རྒོལ་རྒྱབ་སྟབས་གྲོང་སྡེ་ལས་ཁུངས་ནས་ཁོང་ཚོའི་ཐག་གཅོད་ལ་ཕྱིན་པ་ཡིན་ན་མ་འོངས་པར་ཡུལ་མིས་བོད་མིའི་ཐོག་བརྙས་སྤྱོད་དེ་ལས་མང་བ་བྱེད་སྲིད།
ལམ་ཟུར་དུ་སྣུམ་འཁོར་འཇོག་མི་འཇུག་ན་འགྲིག་པ་རེད་། དེའི་ཐོག་བལྟ་རྟོག་མི་སྣས་འགན་འཁྱེར་ན་འགྲིག་གི་རེད།
མ་ཟད་གངས་སྐྱིད་ལས་བྱེད་ཚོར་དེ་འདྲའི་ལས་དོན་བྲེལ་ཚུབ་ཞིག་ཨ་ཡོད་ན། མ་འོངས་པར་གངས་ཅན་སྐྱིད་ཤོང་དེ་གངས་ཅན་སྡུག་ཤོང་ཞིག་དུ་གཏོང་བ་འདུག ད་སོམ་དང་སོམ་རན་རེད་ད།
བོད་མི་ཚོས་རྒྱ་གར་གླ་གཏོང་རླངས་འཁོར་མི་གླ་རྒྱུ་གལ་ཆེན་རེད། དེ་ལྟར་བྱེད་ཚེ་རྒྱ་གར་བ་ཚོས་ཁ་ནང་དུ་སྐྱག་པ་ཟ་རྒྱུ་རེད།
བློ་བསངས་དཀྲུག་རྒན་གྱིས། བོད་མི་ནང་འཁྲུག་བྱེད་འཇུག་ཐུབ་པ་ལས། གླ་འཁོར་ཁ་ལོ་པ་ཁ་ཤས་ལ་བསྐོ་སྐོན་བློ་འགུག་བྱེད་མི་ཐུབ་པར་ལྟོས་ན། ༧གོང་ས་མཆོག་མེད་ན་བློ་སངས་ལ་ངྡ་ས་ནས་ཉལ་ས་ཡང་རེག་ས་མ་རེད།
གཅིག གངས་སྐྱིད་ཀྱི་ནང་དུ་འདུག་མཁན་ཕལ་མོ་ཆེ་བོད་གཞུང་གི་ལས་བྱེད་དང་གཞུང་འབྲེལ་མིན་པའི་ཚོགས་པའི་ལས་བྱེད་སོགས་ཡིན་པས་རང་རང་གི་ངོས་ནས་རླངས་འཁོར་ནང་དུ་མ་འཁྲིད་པ་སོགས་ཀྱི་འགན་གཙང་མ་ཞིག་ཁུར་མ་ཐུབ་ན་དཀའ་ངལ་འདི་ལས་མཐར་མི་སྲིད།
གཉིས། རྒྱ་གར་བའི་ཡུལ་མིའི་བསམ་ཚུལ་འདི་ཡང་དོན་དངོས་ཐོག་བདེན་པ་ཡིན་ཅིང་། བོད་མིའི་སྒྲིག་འཛུགས་ཀྱིས་འགྲིམ་འགྲུལ་སྟབས་བདེ་མིན་ཚུལ་ཟེར་བའི་ལྟ་ཚུལ་མི་གསལ་བ་ཞིག་བཏོན་ཡོད་པ་འདིའི་ནང་དོན་ངོ་མ་ནི་རྒྱ་གར་བའི་རླངས་འཁོར་འགྲོ་སྐྱོད་ལ་བཀག་འགོག་ལ་དམིགས་པ་གསལ་བོ་རེད།
གསུམ། གསལ་སྲིད་རྒྱ་གར་ས་གནས་གཞུང་ནས་རྒྱལ་སྒོ་བརྒྱག་མི་ཆོག་ཟེར་ན་ས་གནས་མི་དམངས་གིས་ང་ཚོར་ངོ་རྒོལ་བྱེད་པའི་སྙིང་སྟོབས་ཆེ་རུ་སོང་ནས་མ་འོངས་པར་དཀའ་ངལ་ཆེན་པོ་ཞིག་ཡོང་བའི་གཞི་རྩ་བཟོས་པ་རེད། དེ་བས་སྤྱི་དམངས་ལ་མི་རྟོན་པ་ཞེས་པའི་གྷན་དྷིའི་ལྟ་བ་ལྟར་ང་ཚོས་རྒྱ་གར་བའི་རླངས་འཁོར་ནང་དུ་འཁྲིད་འཇོག་སོགས་མ་བྱས་ཚེ་དཀའ་ངལ་དེ་ལས་རིམ་བཞིན་གྲོལ་ཐུབ་པར་ངེས་པས་དེ་ལུགས་གངས་སྐྱིད་པ་ཚོས་མཁྱེན་མཛོད།
ཨ་ཁ་ལུང་པ་མེད་ན་དེ་འདྲ་རེད་
མུག་ས་དེ་ནས་བོད་མི་ཚོ་ ས་གཞན་ལ་ཕེབས་ན་ཡག་པོ་འདུག་