འབྲི་ཆུའི་དཔལ་འབྱོར་རྒྱུད་ཀྱི་འཕེལ་རྒྱས་ཟེར་བའི་ལས་གཞིའི་འོག་ཟླ་འདིའི་ནང་ནས་བཟུང་ཡུལ་ཤུལ་ཁུལ་གྱི་རྨ་འབྲི་རྫ་གསུམ་གྱི་ཆུ་གཞུང་དང་། ཡན་ལག་གི་ཆུ། མཚེའུ་དང་ཆུ་མཛོད་སོགས་ཀྱི་ནང་ཉ་ཚེ་ཐར་གཏོང་མི་ཆོག་པ་བཟོས་འདུག
དེ་རིང་རྒྱ་ནག་གཞུང་ཕྱོགས་ནས་བསྒྲགས་པའི་གནས་ཚུལ་ལྟར་ན། ཡུལ་ཤུལ་བོད་རིགས་རང་སྐྱོང་ཁུལ་མི་དམངས་སྲིད་གཞུང་གིས་བརྡ་ཁྱབ་ཅིག་སྤེལ་ཏེ། རྨ་འབྲི་རྫ་གསུམ་གྱི་ཆུ་བོའི་རིགས་ཀྱི་སྐྱེ་ཁམས་ཁོར་ཡུག་སྲུང་སྐྱོབ་སྤྱི་དང་། དམིགས་བསལ་སྣ་མང་རང་བཞིན་ལྡན་པའི་ཆུ་སྐྱེས་སྲོག་ཆགས་དང་ཉ་རིགས་ཁྱད་པར་ཅན་གྱི་འཚོ་སྡོད་སྲུང་སྐྱོང་ཆེད། ཡུལ་ཤུལ་ཁུལ་གྱི་རྒྱལ་ཁབ་ཉ་ཁྲིམས་དང་རི་སྐྱེས་སྲོག་ཆགས་སྲུང་སྐྱོབ་ཀྱི་ཁྲིམས། དེ་བཞིན། ཆུ་སྐྱེས་སྲོག་ཆགས་སྐྱེ་འཕེལ་དང་གཞན་གཏོང་གི་ཁྲིམས་ཟེར་བ་གསུམ་གྱི་ཐོག་ནས། ཉ་རིགས་གཞན་རྨ་འབྲི་རྫ་གསུམ་གྱི་ཆུ་ཁོངས་སྤྱིའི་ནང་ཚེ་ཐར་གཏང་མི་ཆོག། ཅེས་བཀའ་ཁྱབ་བཏང་ཡོད་པ་དང་། ཉ་རིགས་གཞན་ཞེས་པ་ནི་ས་ཆ་གཞན་ནས་ཁྱེར་ཡོང་བའི་ཉ་རིགས་ལ་ཟེར་གྱི་འདུག
ཉེ་སྔོན་ཞི་ཅིན་ཕིན་གྱིས་འབྲི་ཆུ་ནི་ཀྲུང་ཧྭ་མི་རིགས་ཀྱི་མ་ཡུམ་གཙང་པོ་ཡིན་ལ། ཀྲུང་ཧྭ་མི་རིགས་འཕེལ་རྒྱས་ཀྱི་འདེགས་སྐྱོར་གལ་ཆེན་ཡང་ཡིན། འབྲི་ཆུའི་དཔལ་འབྱོར་རྒྱུད་ཀྱི་འཕེལ་རྒྱས་ལ་སྐུལ་འདེད་གཏོང་རྒྱུ་ནི་ཏང་ཀྲུང་དབྱང་གིས་གཏན་འཁེལ་གནང་བའི་བཀོད་ཇུས་གལ་ཆེན་ཡིན་པ་དང་། རྒྱལ་ཁབ་འཕེལ་རྒྱས་གཏོང་བ་དང་འབྲེལ་བ་ཡོད་པའི་ཁྱོན་ཡོངས་འཐབ་ཇུས་གལ་ཆེན་ཞིག་ཡིན། ཞེས་བསྒྲགས་འདུག
ཡང་རྒྱ་ནག་དབུས་བརྙན་འཕྲིན་ཁང་གིས་བསྒྲགས་པའི་གནས་ཚུལ་ལྟར་ན། འབྲི་ཆུ་སྲུང་སྐྱོབ་ཟེར་བའི་ལས་གཞིའི་འོག་འབྲི་ཆུའི་རྒྱུད་ཀྱི་འབྲོག་པ་དུད་ཁྱིམ་ ༡༢༨ ལྷག་ན་གོར་མོ་གྲོང་ཁུལ་ལྷོ་ནུབ་ཉེ་འདབས་ཤིག་ཏུ་གནས་སྤོ་རུ་བཅུག་ཡོད་འདུག
གནས་ཚུལ་དེའི་ནང་། དུད་ཁྱིམ་དེ་ཚོས་འབྲོག་པའི་འཚོ་བ་ལོངས་སུ་སྤྱོད་མཚམས་འཇོག་དགོས་བྱུང་བ་དང་། ཁོང་ཚོ་རྩྭ་ཐང་བེད་སྤྱོད་མཁན་ནས་སྐྱེ་ཁམས་སྲུང་སྐྱོབ་མཁན་ལ་གྱུར་བ་དང་། རྩྭ་ཐང་གི་བདག་སྐྱོང་བའི་ལས་ཀ་བསྒྲུབས་པ་དང་། གྲོང་ཁྱེར་དུ་ལས་ཀ་བྱས་པ་དང་བྱ་གཞག་གཏོད་པར་ཡོང་འབབ་བརྟན་པོ་བྱུང་ཡོད་སྐོར་བསྒྲགས་འདུག་པ་མ་ཟད། དེ་ནི་གྲོང་ཁྱེར་ནང་གནས་སྤོར་དང་གྲོང་ཁྱེར་གྱི་ཕྱོགས་བསྡུས་བཅོས་སྐྱོང་ཞེས་པའི་སྲིད་ཇུས་ཐད་གོམ་ཆུང་ཞིག་སྤོས་པ་དང་འདྲ་མོད། འབྲི་ཆུའི་སྐྱེ་ཁམས་སྲུང་སྐྱོང་ངོས་ནས་བཤད་ན་གོམ་ཆེན་ཞིག་སྤོས་ཡོད་ལུགས་བརྗོད་འདུག
རྒྱ་ནག་གཞུང་གིས་བོད་ཀྱི་ཆུ་བོ་སྲུང་སྐྱོབ་ལ་ཁ་གཡར ཏེ་སྲིད་ཇུས་འདྲ་མིན་ལག་བསྟར་བྱེད་ཀྱི་ཡོད་པ་དང་། རྒྱ་ནག་ནང་ལོགས་ཀྱི་ཆུའི་དཀའ་ངལ་སེལ་ཐབས་དང་། འཛུགས་སྐྲུན་སྣ་མང་ཆེད་བོད་ཀྱི་ཆུ་བོ་ཁག་གི་ཆུ་ཁ་བསྒྱུར་ཐབས་དང་། ལྷོ་ཆུ་བྱང་འདྲེན་ཟེར་བ་སོགས་ཀྱི་ཐབས་ཇུས་ལག་བསྟར་བྱས་ཏེ་ལོ་བཅུ་ཕྲག་འགྲོ་ཡི་ཡོད་པ་རེད།
གསར་འགོད་པ། སྐལ་བཟང་སྦྱིན་པ།
