བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་པདྨ་འབྱུང་གནས་མཆོག་གིས་བོད་ཕྱི་ནང་གི་བོད་མི་རྣམས་ཀྱི་ཚབ་ཏེ་བོད་དོན་རྒྱབ་སྐྱོར་བ་ཇོར་རྗི་ཧྥར་ནན་ཌེ་སི་མཆོག་སྐུ་གྲོངས་བར་ཁོང་གི་ནང་མི་ཤུལ་ལུས་རྣམས་ལ་ཐུགས་གསོ་ཞུས་འདུག
དེ་རིང་ཉིན་རྒྱབ་ཏུ་བོད་ཐོག་ཁང་ཆེན་མོའི་ཚོགས་ཁང་དུ། བོད་མིའི་སྒྲིག་འཛུགས་ཀྱི་དམངས་གཙོའི་ཀ་བ་གསུམ་གྱི་མཛད་གཙོ་རྣམ་པ་དང་སྲི་ཞུ་ལས་བྱེད་བཅས་ནས་བོད་དོན་རྒྱབ་སྐྱོར་བ་དང་། རྒྱ་གར་གྱི་བློན་ཆེན་ཟུར་པ་སྐུ་ཞབས་ཇོར་རྗི་ཧྥར་ནན་ཌེ་སི་མཆོག་སྐུ་གྲོངས་པར་མཆོད་འབུལ་སྨོན་ལམ་ཚོགས་སོང་བ་དང་། དེ་བཞིན་བོད་མི་མང་སྤྱི་འཐུས་ཚོགས་གཙོ་པདྨ་འབྱུང་གནས་མཆོག་ནས་དམ་པ་དེ་ཉིད་ཀྱི་ལྕམ་ལེ་ལཱ་ཀཱ་བྷིར་ལགས་ཀྱིས་གཙོས་ཤུལ་ལུས་ནང་མི་དང་འབྲེལ་ཡོད་རྣམས་ལ་ཐུགས་གསོའི་གསུང་འཕྲིན་གནང་ཡོད་པ་དང་། དེ་བཞིན་བོད་ཀྱི་གཞོན་ནུ་ལྷན་ཚོགས་དང་བུད་མེད་ལྷན་ཚོགས་སོགས་ནས་ཀྱང་དམ་པ་ཁོང་གི་བཀའ་དྲིན་རྗེས་དྲན་དང་ཤུལ་ལུས་ནང་མིར་ཐུགས་གསོ་ཞུས་འདུག
དེ་ཡང་སྤྱི་འཐུས་ཚོགས་གཙོ་མཆོག་གི་གསུང་འཕྲིན་ནང་། ངས་བོད་མི་མང་སྤྱི་འཐུས་ལྷན་ཚོགས་དང་། བོད་ཕྱི་ནང་གཉིས་སུ་ཡོད་པའི་བོད་མི་ཡོངས་ཀྱི་ཚབ་ཞུས་ཏེ་སྐུ་ཞབས་ཇོར་རྗི་ཧྥར་ནན་ཌེ་སི་མཆོག་གྲོངས་བའི་ཡིད་སྐྱོའི་དུས་སྐབས་འདིར་ཐུགས་གསོ་ཞུ་ཡི་ཡོད། ཅེས་དང་། དམ་པ་ཁོང་ནི་སྤྱི་དམངས་ཐོབ་ཐང་ཀྱི་སྣེ་འཁྲིད་པ་ཞིག་ཡིན་པ་མ་ཟད། དུས་ནམ་ཡང་བཤུ་གཞོག་ཐེབས་པའི་དགོས་ངེས་ཅན་གྱི་མི་མང་རྣམས་ཀྱི་ཐོབ་ཐང་ཆེད་སྐུ་ལས་སྐྱོན་མཁན་ཞིག་ཡིན་སྐོར་དང་། དམ་པ་ཁོང་འདས་གྲོངས་གྱུར་བ་དེས་རྒྱ་གར་ལ་མཚོན་ན་དབུ་འཁྲིད་དང་འཐབ་རྩོད་པ་ཁྱད་པར་བ་ཞིག་མེད་པར་གྱུར་བ་ཡིན། ཅེས་གསུངས་འདུག
ཡང་ཁོང་གིས། སྐུ་ཞབས་ཇོར་རྗི་ཧྥར་ནན་ཌེ་སི་མཆོག་གིས་ཕྱི་ལོ་ ༡༩༥༩ ལོ་ནས་བཟུང་བོད་དོན་ཐད་ལ་མུ་མཐུད་རྒྱབ་སྐྱོར་ཤུགས་ཆེན་པོ་གནང་བར་བོད་མི་རྣམས་ལ་མཚོན་ན་བཀའ་དྲིན་ཆེན་པོ་ཡིན་པ་དང་། དམ་པ་ཁོང་གིས་རྒྱ་གར་གྲོས་ཚོགས་ཕྱི་ནང་གཉིས་ཀ་ནས་བོད་དོན་འབོད་སྒྲ་བསྒྲགས་ཡོད། ཅེས་དང་། དམ་པ་ཁོང་དང་རྒྱ་གར་གྲོས་ཚོགས་འཐུས་མི་གཞན་རྣམ་པས་ཕྱི་ལོ་ ༡༩༩༤ ལོར་རྒྱ་གར་རྒྱལ་ས་ལྡི་ལི་རུ་བོད་དོན་ཐད་ལ་རྒྱལ་སྤྱིའི་གྲོས་ཚོགས་རང་བཞིན་གྱི་ཚོགས་འདུ་ཐེངས་དང་པོ་དེ་གསར་འཛུགས་གནང་ཡོད་པ་རེད། ཅེས་གསུངས་འདུག་ལ། མཇུག་ཏུ་དམ་པ་ཁོང་གི་ཤུལ་ལུས་ནང་མི་རྣམ་པས་འགྱུར་བ་གཏོང་ཐབས་མེད་པའི་གནས་སྟངས་འདིར་བློ་སྟོབས་སྐྱེད་གནང་བའི་རེ་བ་དང་སྨོན་ལམ་ཞུ་ཡི་ཡོད། ཅེས་གསུངས་འདུག
སྐུ་ཞབས་ཇོར་རྗི་ཧྥར་ནན་ཌེ་སི་དམ་པ་ཁོང་འདས་གྲོངས་སུ་ཕྱིན་པའི་ཡིད་སྐྱོའི་གནས་ཚུལ་ཐོན་རྗེས། བོད་ཀྱི་གཞུང་འབྲེལ་མ་ཡིན་པའི་ཚོགས་པ་སྐྱིད་སྡུག་དང་མི་སྒེར་བཅས་ནས་ཀྱང་ཐུགས་གསོ་ཞུས་ཡོད་པ་ལྟར། བོད་ཀྱི་གཞོན་ནུ་ལྷན་ཚོགས་ནས་ཐུགས་གསོ་ཞུ་པའི་ནང་། བོད་ཀྱི་གཞོན་ནུ་ལྷན་ཚོགས་ལྟ་བུར་མཚོན་ན། སྐུ་ཞབས་ཇོར་རྗི་ཧྥར་ནན་ཌེ་སི་མཆོག་སྐབས་མི་ཉུང་བ་ཞིག་ལ་གཞོན་ལྷན་གྱི་ཚོགས་འདུ་ཁག་གི་སྐུ་མགྲོན་དུ་གདན་འདྲེན་ཞུ་ཐུབ་ཡོད་པ་དེ་ལྷན་ཚོགས་ཀྱི་ཆེ་མཐོང་ཞིག་ཏུ་རྩི་བཞིན་ཡོད་པ་དང་། དེ་ཡང་ཕྱི་ལོ་ ༢༠༠༧ ལོར་རྒྱ་གར་རྒྱལ་ས་ལྡི་ལིའི་ཇན་ཏཱར་མན་ཏཱར་(Jantar Mantar) དུ་བོད་ཀྱི་གཞོན་ནུ་ལྷན་ཚོགས་ནས་ཟས་བཅད་ངོ་རྒོལ་གྱི་ལས་འགུལ་སྤེལ་སྐབས། དམ་པ་ཁོང་ཆེད་དུ་ཕེབས་ཏེ་ལས་འགུལ་བ་རྣམས་ལ་ཚ་ལུ་མ་གནང་སྟེ་ཟས་བཅད་ལས་འགུལ་ལེགས་པར་གྲུབ་ཡོད་པ་དང་། ཁོང་གི་བོད་དོན་ཆེད་དུ་སྐུ་ལས་བསྐྱོན་པ་རྣམས་བོད་མིས་ནམ་ཡང་བརྗེད་མི་སྲིད་ལ། བོད་ཀྱི་ལོ་རྒྱུས་ནང་འགོད་ངེས་ཡིན་སྐོར་དང་། བོད་ཀྱི་གཞོན་ནུ་ལྷན་ཚོགས་ཀྱི་ཚོགས་མི་ཡོངས་ཀྱི་ཚབ་བྱས་ཏེ་དམ་པ་ཁོང་ལ་སྨོན་ལམ་དང་ནང་མི་ཀུན་ལ་ཐུགས་གསོ་ཞུ་ཡོད་སྐོར་བརྗོད་འདུག
གཞན་ཡང་། བོད་ཀྱི་བུད་མེད་ལྷན་ཚོགས་ཀྱི་ངོ་དེབ་ཐོག་ཐུགས་གསོའི་ཞུ་འཕྲིན་ཞིག་བཀོད་པའི་ནང་། དམ་པ་ཁོང་ནི་མི་ཁྱད་པར་བ་དང་། མི་མང་པོར་ཡར་སྐུལ་གནང་མཁན་ཞིག་ཡིན་ལ། དེ་བཞིན་༧གོང་ས་རྒྱལ་བ་རིན་པོ་ཆེ་མཆོག་གི་གྲོགས་པོ་དང་། བོད་དོན་ཐད་རྒྱབ་སྐྱོར་ཤུགས་ཆེན་པོ་གནང་མཁན་ཞིག་ཡིན་པས་དམ་པ་ཁོང་སྐུ་གྲོངས་པར་བློ་ཕམ་བྱུང་སྐོར་བཀོད་འདུག
གསར་འགོད་པ། པ་སངས་ཚེ་རིང་།
