དགེ་རྒན་ཞིག་གིས་ལས་ཡུན་རིང་ནོར་འཁྲུལ་ཤོར་ན་མི་སྟོང་ཕྲག་མང་པོའི་མདུན་ལམ་ཆུད་ཟོས་སུ་འགྲོ་ཡི་ཡོད།

ཤེས་རིག་ཚོགས་ཆེན་ཐེངས་བདུན་པའི་ཐོག་བོད་པའི་སློབ་གྲྭ་ཁག་གི་སློབ་མའི་སྐད་ཡིག་ཡར་རྒྱས་ཡོང་ཐབས་སུ་སྐད་ཡིག་དགེ་རྒན་ལ་ཀློག་དེབ་འཁྲིད་ཐུབ་མཁན་གྱི་དགེ་རྒན་ཞིག་ཡོད་པ་ཙམ་གྱིས་མི་འགྲིག་པར་སྐད་དང་ཡི་གེ་སློབ་ཐུབ་མཁན་ཞིག་དགོས་ཀྱི་ཡོད་པའི་གྲོས་ཆོད་བཞགདེ་རིང་ཚོགས་ཆེན་གྱི་ཉིན་མཐའ་མའི་སྔ་དྲོར་བཀའ་བློན་ཁྲི་ཟུར་མཁས་དབང་ཟམ་གདོང་རིན་པོ་ཆེ་མཆོག་ཕེབས་ཏེ། དགེ་རྒན་གྱི་ལས་གནས་ནི་ལས་ཚན་གཞན་ལས་ཁྱད་པར་དུ་འཕགས་པ་ཡིན་སྐོར་གྱི་བཀའ་སློབ་གསུང་བཤད་གནང་སྐབས། འདས་པའི་ལོ་ངོ་ ༦༠ རིང་༧གོང་ས་རྒྱལ་བ་རིན་པོ་ཆེ་མཆོག་ནས་གནའ་དེང་གི་སློབ་གསོ་དང་། རང་གི་སྐད་ཡིག་དང་རིག་གཞུང་སྲུང་སྐྱོབ་བྱེད་དགོས་པའི་དགོངས་པ་དང་ལམ་སྟོན་དག་ནི་བླ་ན་མེད་པ་ཞིག་ཡིན་ལ། སྤྱི་ཡོངས་ནས་བོད་ཀྱི་ཤེས་ཡོན་གྱི་ལོ་རྒྱུས་ཐད་ནས་བཤད་ན། སྔ་མོ་བོད་ཀྱི་མི་སེར་དཀྱུས་མའི་ནང་ཡིག་རྨོངས་མང་པོ་ཡོད་ཀྱང་། རྒྱལ་ཁབ་གཅིག་གིས་ཀྱང་བོད་ལྟར་མཁས་པ་མང་པོ་བཏོན་མེད་ལ། བོད་ལྟར་རྩོམ་རིག་དང་སྒྲ་བསྒྱུར་གྱི་ལས་གཞི་དེ་འདྲ་སྤེལ་མྱོང་མེད་སྐོར་སོགས་གསུངས་སོང་།

ཡང་ཁོང་གིས། བོད་ནང་ལ་མཚོན་ན། རྒྱ་ནག་གཞུང་གིས་མངོལ་གསལ་མེད་པའི་སྒོ་ནས་བོད་ཀྱི་ཆོས་དད་དང་། རིག་གཞུང་སྐད་ཡིག་བཅས་རྩ་མེད་གཏོང་རྒྱུའི་འཆར་གཞི་འཐེན་གྱི་ཡོད་པ་དང་། དེར་བཙན་འོག་ཏུ་ཡོད་པའི་བོད་མི་ཚོས་ཁ་གཏད་གཅོག་ཐབས་མེད་ཀྱང་། རང་དབང་གི་ལུང་པའི་ནང་ཡོད་པའི་བོད་པའི་སྤྱི་ཚོགས་ཀྱིས་ཁ་གཏད་གཅོག་དགོས་ཀྱི་ཡོད་པ་དང། འདས་པའི་ལོ་ངོ་ ༦༠ རིང་བཙན་བྱོལ་བོད་མིས་ཞབས་འདྲེན་ཞུས་མེད་སྐོར་དང་། འདས་པའི་ལོ་ངོ་ ༦༠ རིང་བཙན་བྱོལ་བོད་མི་རྣམས་རྒྱ་བལ་འབྲུག་གསུམ་ནང་མཉམ་འདུས་ཀྱི་ཐོག་ནས་གནས་པར་བརྟེན། བཙན་བྱོལ་གྱི་སྤྱི་ཚོགས་དང་སློབ་གྲྭ་དག་གནས་ཐུབ་པ་བྱུང་ཡོད། ཡིན་ན་ཡང་སྤྱི་ཚོགས་མཉམ་འདུས་ཀྱི་གནས་སྟངས་དང་ཁ་འཐོར་གྱི་གནས་སྟངས་གཉིས་འདྲ་ཡི་མེད་པར་བརྟེན། ང་ཚོས་འབྱུང་འགྱུར་གྱི་གནས་བབ་ལ་གྲ་སྒྲིག་བྱེད་གལ་ཆེན་ཡིན་པ་དང་། ཆབ་སྲིད་དང་འཛུགས་བསྐྲུན་སོགས་ནང་ནོར་འཁྲུལ་ཕྱིན་ཚེ། དེས་གནས་སྐབས་ཙམ་ལ་མ་གཏོགས་གྱོང་གུད་ཆེན་པོ་ཐེབས་ཀྱི་མེད་ཀྱང་། ཤེས་ཡོན་གྱི་ཐོག་ལ་ནོར་འཁྲུལ་ཤོར་ཚེ། སློབ་མ་གཅིག་གི་མི་ཚེ་ཧྲིལ་པོ་འཕྲོ་བརླག་འགྲོ་གི་ཡོད་པ་དང་། འཛིན་ཁང་གཅིག་ལ་མཚོན་ན། སློབ་མ་ ༤༠ ཙམ་གྱི་མི་ཚེ་ཆུད་ཟོས་སུ་འགྲོ་ཡི་ཡོད་པར་བརྟེན། དེ་ནི་ཧ་ཅང་གིས་ཉེན་ཚབས་ཅན་ཞིག་ཡིན་པ་དང། དགེ་རྒན་ཞིག་གིས་ལས་ཡུན་རིང་གལ་ཏེ་ནོར་འཁྲུལ་ཤོར་ཚེ། མི་སྟོང་ཕྲག་མང་པོའི་མི་ཚེའི་མདུན་ལམ་ཆུད་ཟོས་སུ་འགྲོ་ཡི་ཡོད་སྐོར་གསུངས་སོང་།

དེའི་རྗེས་དྲི་བ་དྲིས་ལན་གྱི་སྐབས་ཚོགས་བཅར་བ་ཞིག་གིས། བཙན་བྱོལ་བོད་མིའི་སློབ་གྲྭའི་དགེ་རྒན་རྣམས་ལ་ཕྱིའི་མཐུན་རྐྱེན་སྦྱོར་སྟངས་ཐད་ལ་དགོངས་ཚུལ་གང་ཡོད་བཀའ་འདྲི་ཞུས་པར་རིན་པོ་ཆེ་མཆོག་གིས། སྤྱིར་དགེ་རྒན་གྱི་ལས་གནས་ཟེར་བ་དེ་དགེ་རྒན་གང་ཟག་གི་ཆ་ནས་གཞན་དང་ཁྱད་པར་དུ་འཕགས་པ་དང་། ལས་ཚན་གྱི་ངོས་ནས་ལས་ཚན་གཞན་དང་ཁྱད་པར་དུ་འཕགས་པ་ཞིག་ཡིན་དགོས་པ་དང། ལས་གནས་དེའི་གླ་ཕོགས་དང་མཐུན་རྐྱེན་སོགས་ཀྱི་ཐད་ནས་ལས་ཚན་གཞན་ལས་ཁྱད་དུ་འཕགས་པ་ཞིག་ཡིན་དགོས། རྒྱ་གར་ལ་མཚོན་ན། འཛིན་སྐྱོང་གི་གནས་འཁུར་བ་ཚོའི་བསམ་བློའི་ནང་ལས་ཚན་ཀུན་གྱི་ནང་ནས་འཛིན་སྐྱོང་དེ་ཆེས་གལ་ཆེན་ཞིག་ཏུ་རྩི་བཞིན་ཡོད་པར་བརྟེན། རྒྱ་གར་གཞུང་གི་དྲུང་ཆེ་ཞིག་གི་གླ་ཕོགས་དེ་གཙུག་ལག་སློབ་གྲྭ་ཞིག་གི་ཉེ་བའི་རིག་བདག་ཅིག་གི་གླ་ཕོགས་ལས་སྒོར་ ༣༠༠ ཡིས་མཐོ་བ་ཡོད། དེ་ལྟར་བྱེད་དགོས་དོན་ཡང་ཁྱད་པར་མཚོན་པའི་ཆེད་དུ་ཡིན་སྐོར་དང་། སྤྱི་ཚོགས་ཀྱི་མཚན་མཐོང་དང་མཐུན་རྐྱེན་ལ་དམིགས་ནས་དགེ་རྒན་བྱེད་པ་དེ་བརྩེ་བའི་བདག་ཉིད་ཅིག་མིན་པར་བརྟེན། འདི་ལྟ་བུའི་ལྟ་ཚུལ་འཛིན་མཁན་དེ་དགེ་རྒན་ཚད་ལྡན་ཞིག་མིན་ཡང་། འཛིན་སྐྱོང་ངོས་ནས་དགེ་རྒན་གྱི་མཐུན་རྐྱེན་དང་གླ་ཕོགས་སོགས་ལ་བསམ་བློ་གཏོང་དགོས་པ་དེ་གལ་ཆེན་ཡིན་སྐོར་སོགས་གསུངས་སོང་།

ཕྱི་དྲོར་ཤེས་རིག་བཀའ་བློན་པདྨ་དབྱངས་ཅན་མཆོག་གིས་ཚོགས་འདུ་མཇུག་བསྡོམས་ཀྱི་གསུང་བཤད་གནང་སྐབས། ཐེངས་འདིའི་ཚོགས་ཆེན་སྟེང་གྲོས་ཆོད་དོན་ཚན་བཞི་གཏན་འབེབ་བྱུང་ཡོད་སྐོར་གསུངས་དོན། བཙན་བྱོལ་བོད་མིའི་སློབ་གྲྭ་ཁག་ནང་སློབ་ཕྲུག་དེ་ཙམ་མེད་པས་སློབ་གྲྭ་ཕན་ཚུན་ཟླ་སྒྲིལ་གཏོང་གལ་ཆེ་ནའང་། གཞིས་ཆགས་སྲ་བརྟན་དང་འབྲེལ་ནས་མ་མཐའ་ཡང་དམའ་རིམ་ཙམ་གྱི་སློབ་གྲྭ་ཞིག་ས་གནས་སུ་བཙུགས་ཏེ་ཕྲུ་གུ་ཕ་མ་དང་ཐག་ཉེ་སར་འཇོག་གལ་གཟིགས་ཀྱི་ཡོད་ཀྱང་།  གཞིས་ཆགས་གཅིག་ནང་སློབ་ཕྲུག་ལྔ་དྲུག་ཙམ་ལས་མེད་ཚེ་སློབ་ཕྲུག་རེ་འགའི་ཆེད་དུ་སློབ་གྲྭ་ཞིག་འཛིན་སྐྱོང་བྱེད་ཐུབ་ཀྱི་མེད་སྐོར་དང་། ཤེས་ཡོན་སྲིད་བྱུས་ལག་བསྟར་ཚད་ལྡན་ཡོང་བར་སློབ་ཕྲུག་དང་འབྲེལ་བ་ཡོད་པའི་དགེ་རྒན་དང་ལས་བྱེད། ཕ་མ་སོགས་ལ་སྲིད་བྱུས་དེར་གོ་རྟོགས་ཡོད་དགོས་པ་དང་། གོ་རྟོགས་ཡོད་པའི་སྒང་ནས་སློབ་འཁྲིད་དང་འཛིན་སྐྱོང་བྱ་ཐུབ་ཚེ་སློབ་མ་དེ་ཤེས་ཡོན་སྲིད་བྱུས་ཀྱི་དགོངས་དོན་བཞིན་སྐྱེད་སྲིང་བྱ་ཐུབ་ཀྱི་ཡོད་པ་དང་། ལྷག་པར་དུ་དགེ་རྒན་གསར་འཇུག་སྐབས་ཐོག་མར་དགེ་རྒན་དེར་ཤེས་ཡོན་སྲིད་བྱུས་ངོ་སྤྲོད་བྱེད་དགོས་གལ་ཆེ་བ་དང་། དེ་བཞིན་སློབ་མའི་སྐད་ཡིག་ཡར་རྒྱས་ཡོང་ཐབས་སུ་སྐད་ཡིག་དགེ་རྒན་ལ་ཀློག་དེབ་འཁྲིད་ཐུབ་མཁན་གྱི་དགེ་རྒན་ཞིག་ཡོད་པ་ཙམ་གྱིས་མི་འགྲིག་པར་སྐད་དང་ཡི་གེ་སློབ་ཐུབ་མཁན་ཞིག་དགོས་ཀྱི་ཡོད་སྐོར་གསུངས་སོང་།ཡང་ཁོང་མོས། སློབ་གྲྭའི་འཛིན་སྐྱོང་ནི་སློབ་མ་གསོ་སྐྱོང་བྱེད་མཁན་གྱི་མི་སྣ་རླབས་ཆེན་དེ་དགེ་རྒན་ལ་སྐྱོར་རྒྱག་མཁན་ཡིན་པ་དང་། འཛིན་སྐྱོང་ངོས་ནས་ཉིན་རེའི་སློབ་གྲྭའི་འཁྲིད་གཞི་སོགས་བགོ་འགྲེམ་བྱ་རྒྱུ་ཁོ་ན་མིན་པར། ལས་བགོས་ཀྱི་རྗེས་སུ་ཡང་དེའི་ནང་མཉམ་ཞུགས་ཀྱིས་ལས་ཀ་ཚགས་ཚུད་ཡོང་བར་ཆ་ཤས་ལེན་དགོས་པ་དང་། སློབ་གྲྭའི་ཁོར་ཡུག་དེ་ཞེད་སྣང་དང་འཚེར་སྣང་ཅན་ཞིག་སྐྲུན་རྒྱུ་མེད་པ་དང་། དགེ་རྒན་གྱི་འཁྲིད་ཐབས་ལ་རྒྱུས་ལོན་དང་བསམ་ཚུལ་ཤེས་རྟོགས། དེ་བཞིན་དགེ་རྒན་དང་སློབ་མ། འཛིན་སྐྱོང་བཅས་ཀྱི་བར་ཐག་ཇེ་ཉེ་དང་གུ་ཡངས་ཀྱི་ཁོར་ཡུག་ཞིག་སྐྲུན་གལ་ཆེ་བ་དང་། དེ་བཞིན་སློབ་གྲྭའི་ལས་རིགས་སྦྱོང་བརྡར་གལ་ཆེན་ཡིན་སྐོར་སོགས་གསུངས་སོང་།

ཟླ་འདིའི་ཕྱི་ཚེས་ ༢༧ ཉིན་གྱི་ཤེས་རིག་ལས་ཁུངས་དང་དེའི་ཁྱབ་ཁོངས་སློབ་གྲྭ་ཁག་གིས་༧གོང་ས་རྒྱལ་བ་རིན་པོ་ཆེ་མཆོག་ལ་བརྟན་བཞུགས་བསྟར་འབུལ་དང་འབྲེལ་དམ་བཅའ་ག་རེ་གནང་གི་ཡོད་པའི་སྐོར་ལ་ཤེས་རིག་བཀའ་བློན་མཆོག་གིས། བོད་ཀྱི་སོན་རྩ་རྣམས་མགོན་པོ་གང་གི་བཀའ་དགོངས་ལྟར་འདབ་གཤོག་གཉིས་ལྡན་དང་ཡ་རབས་བཟང་སྤྱོད་ལྡན་པའི་བོད་མི་ཚད་ལྡན་ཤ་སྟག་གསོ་སྐྱོང་ཐོག ལྷག་བསམ་གཡོ་མེད་དང་རང་ནུས་གང་ཡོད་ཀྱིས་རྒྱབ་མདུན་ངོ་ལྐོག་མེད་པར་སློབ་མ་ཀུན་ལ་ཉེ་རིང་མེད་པ་ཞུ་རྒྱུ་དང་། སྒོས་སུ་མགོན་པོ་གང་གི་དམ་བཅའ་དང་པོ་འགྲོ་བ་མིའི་བཟང་སྤྱོད་གོང་མཐོར་སྤེལ་ཐབས་དང་འབྲེལ་བའི་ཤེས་ཡོན་སློབ་གསོའི་གོམས་གཤིས་དང་། ཆོས་ལུགས་དང་མ་འབྲེལ་བའི་བཟང་སྤྱོད་ཀྱི་མཛད་འཕྲིན་འཛམ་གླིང་ཁྱོན་ཡོངས་ལ་བསྐྱངས་དང་སྐྱོང་བཞིན་པ་ལྟར། ཤེས་རིག་ལས་ཁུངས་དང་ཁྱབ་ཁོངས་སློབ་གྲྭ་ཁག་ནས་ཀྱང་དེ་ལྟར་སློབ་འཁྲིད་ཚགས་ཚུད་ལག་བསྟར་གྱིས་འཛམ་གླིང་ཁྱོན་ཡོངས་ལ་མིག་དཔེ་སྟོན་ཐུབ་པ་ཞིག་ཡོང་རྒྱུར་འབད་བརྩོན་གང་ས་ནས་བྱ་རྒྱུ་ཁས་ལེན་བྱེད་ཀྱི་ཡོད་སྐོར་གསུངས་ཏེ། སློབ་གྲྭ་ཁག་དང་ཕ་མ་སོགས་ཀྱིས་དེར་ཤུགས་སྣོན་རྒྱག་དགོས་པའི་སྐུལ་མ་ཡང་གནང་སོང་།མཇུག་ཏུ་གསར་འགོད་པས་ཤེས་རིག་ལྷན་ཁང་གི་ཤེས་ཡོན་འགན་འཛིན་ལགས་སུ་ཐེངས་འདིའི་ཚོགས་ཆེན་སྟེང་སློབ་གྲྭ་ཁག་ཟླ་སྒྲིལ་བྱ་རྒྱུ་དེ་གལ་ཆེན་པོར་རྩིས་ནས་གྲོས་ཆོད་བཞག་ཡོད་པ་ལྟར། ཤེས་རིག་ལྷན་ཁང་ངོས་ནས་སློབ་གྲྭ་ཁག་ཟླ་སྒྲིལ་བྱ་རྒྱུའི་ཐད་ཐུགས་རེ་གཙོ་བོ་ག་རེ་གནང་གི་ཡོད་པ་དང་། སློབ་གྲྭ་ཁག་དུས་ཡུན་ག་ཚོད་ཅིག་གི་ནང་ལ་ཟླ་སྒྲིལ་གཏང་ཐུབ་པའི་རེ་བ་རྒྱག་གི་ཡོད་མེད་དྲིས་པར་ཁོང་གིས། ཚང་མའི་ཤེས་གསལ་ལྟར་འདས་པའི་ལོ་ ༥ ནང་སློབ་ཕྲུག་གི་གྲངས་འབོར་ལ་བལྟས་པ་ཡིན་ན་བོད་རིགས་སློབ་ཕྲུག་གི་གྲངས་འབོར་ཇེ་ཉུང་དུ་ཕྱིན་ཡོད་པ་དང་། ང་ཚོས་གནད་དོན་དེའི་སྒང་ལ་ཚོགས་འདུ་རིམ་པ་མང་པོ་ཚོགས་ཡོད་པ་དང་། གཙོ་བོ་གཅིག་ད་ལྟ་ང་ཚོས་ཆེས་མཐོའི་འཛིན་སྐྱོང་ལྷན་ཚོགས་ཤིག་གཏན་འབེབ་གནང་ཚར་ཡོད་པ་རེད་ལ། ཆེས་མཐོའི་ལྷན་ཚོགས་ཀྱིས་སློབ་གྲྭ་ཁག་ཟླ་སྒྲིལ་གཏོང་བར་གནང་སྟངས་གནང་ལུགས་ག་རེ་དགོས་ཀྱི་འདུག་སྐབས་དེ་དུས་རིམ་པ་བཞིན་བསླེབ་ཀྱི་རེད་བསམ་ཡོད། དེ་མིན་ད་ལྟའི་ཆར་སློབ་གྲྭ་ཁག་ཟླ་སྒྲིལ་གཏོང་བར་འདི་ལྟ་བུ་བྱེད་དགོས་རེད་ཅེས་ཐག་བཅད་ནས་བཤད་ཐུབ་ཀྱི་མི་འདུག་མོད། མདོར་བསྡུས་ནས་བཤད་ན། སློབ་གྲྭའི་སྡེ་ཁག་སོ་སོའི་ངོས་ནས་ཡིན་ནའང་འགྲོ་གྲོན་སོགས་ཀྱི་ཐད་དཀའ་ངལ་ཆེན་པོ་ཡོད་དུས། དྷ་ས་ཁུལ་ལྟ་བུ་ལ་མཚོན་ན། སློབ་གྲྭ་དེ་འདྲའི་མང་པོ་དགོས་རེད་དམ་མ་རེད། གཉིས་ནས་བོད་རིགས་སློབ་ཕྲུག་ཤ་སྟག་གི་སློབ་གྲྭ་དགོས་ས་རེད་དམ་མ་རེད་དེ་ལྟ་བུ་གནད་དོན་མང་པོ་ཞིག་གི་ཐད་གོ་བསྡུར་གནང་དགོས་ཀྱི་ཡོད་དུས་ཐག་གཅོད་ཅིག་གི་སྒང་ལ་འགྲོ་དགོས་པ་ལས་ད་ལྟ་རང་ཐག་གཅོད་ཐུབ་པ་མི་འདུག ཅེས་བརྗོད་སོང་།

ཡང་གསར་འགོད་པས་ཆེས་མཐོའི་འཛིན་སྐྱོང་ལྷན་ཚོགས་ནང་མི་སྣ་སུ་སུ་ཡོད་དྲིས་པར་ཁོང་གིས། ཆེས་མཐོའི་འཛིན་སྐྱོང་གི་ཚོགས་གཙོ་དཔལ་ལྡན་སྲིད་སྐྱོང་བློ་བཟང་སེང་གེ་མཆོག་དང་ཚོགས་གཞོན་ཤེས་རིག་བཀའ་བློན་པདྨ་དབྱངས་ཅན་མཆོག ཚོགས་གཞོན་ཤེས་རིག་དྲུང་ཆེ་ཀརྨ་སེང་གེ་ལགས། དེ་བཞིན་སམ་བྷོ་ཊ་སློབ་གྲྭའི་འགན་འཛིན་ལགས་དང་མ་སུ་རི་བོད་ཁྱིམ་དྲུང་ཆེ་ལགས། བོད་ཁྱིམ་སློབ་གྲྭའི་དབུ་འཛིན་དང་ཤེས་ཡོན་འགན་འཛིན་བཅས་ཀྱིས་གྲུབ་པའི་ལྷན་ཚོགས་ཤིག་བཟོས་ཡོད་པ་རེད། ཅེས་བརྗོད་སོང་།

དེ་རིང་ཚོགས་ཆེན་གྱི་ཉིན་མཐའ་མའི་མཇུག་བསྡོམས་ཐོག་ཤེས་རིག་བཀའ་བློན་མཆོག་ནས་༧གོང་ས་རྒྱལ་བ་རིན་པོ་ཆེ་མཆོག་གི་དགོངས་བཞེད་ཆོས་ལུགས་ལ་མ་བརྟེན་པའི་བཟང་སྤྱོད་སྐོར་ལ་ལྟ་སྤྱོད་བདེ་པོ་ཡོང་ཐབས་སུ་དམིགས་པའི་དྲ་རྒྱ་གསར་པ་ཞིག་དབུ་འབྱེད་གནང་སོང་བ་དང་། དྲ་རྒྱ་དེའི་ནང་༧གོང་ས་མཆོག་ནས་བརྗོད་གཞི་དེ་དང་འབྲེལ་ནས་གསུང་བཤད་གནང་པའི་བརྙན་དང་། དེ་བཞིན་མཁས་དབང་ཟམ་གདོང་རིན་པོ་ཆེ་མཆོག་དང་དགེ་བཤེས་ལྷག་རྡོར་ལགས། དགེ་བཤེས་ཐུབ་བསྟན་སྦྱིན་པ་ལགས་སོགས་ཀྱི་བཀའ་སློབ་ཀྱི་བརྙན་ཕལ་མོ་ཆེ་དང་། བསླབ་གཞི་རྩ་འཛིན་དང་དཔེ་དེབ་ཁག ཨེ་མོ་རི་གཙུག་ལག་སློབ་ཁང་གི་བསླབ་གཞི་རྩ་འཛིན་རགས་ཟིན་ལ་གཞི་བཅོལ་ཡོད་པའི་ཆོས་ལུགས་ལ་མ་བརྟེན་པའི་བཟང་སྤྱོད་ལ་སྐུལ་བའི་དཔེ་མཚོན་བཅུ་སོགས་དྲ་རྒྱ་དེའི་ནང་བཅུག་འདུག

གསར་འགོད་པ། ཀླུ་མགོན་ཐར།