སྤྱི་འཐུས་བློ་བཟང་ཆོས་འབྱོར།
སྐབས་ ༡༦ པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་ ༧ པའི་ལས་ཉིན་ ༤ པར་བཀའ་བློན་གྱི་འོས་གཞིར་གསང་བའི་འོས་ཤོག་བླུགས་རྗེས་བརྒྱ་ཆའི་གྲངས་ཀ་བརྩི་ཕྱོགས་ཐད། གྲོས་ཚོགས་དང་ཆེས་མཐོའི་ཁྲིམས་ཞིབ་ཁང་བར་མཐུན་མིན་བྱུང་སྟེ། སྤྱི་ཚོགས་བརྒྱུད་ལམ་ཁག་ཏུ་དེའི་སྐོར་གྱི་གནས་ཚུལ་ཁྱབ་སྤེལ་བྱུང་བ་མ་ཟད། དཔལ་ལྡན་ཆེས་མཐོའི་ཁྲིམས་ཞིབ་ཁང་གིས་ཤོག་ལྷེ་ ༩ ཅན་གྱི་གསར་འགོད་གསལ་བསྒྲགས་ཤིག་ཡོངས་བསྒྲགས་གནང་། གནད་དོན་འདི་བཞིན་མགོ་ཉོག་ཚ་པོ་ཞིག་མིན་ཀྱང་། བཀུར་འོས་རྒྱ་ཆེ་མི་མང་ལ་གོ་བརྡ་སྤྲོད་ཕྱོགས་ཀྱི་དབང་གིས་མགོ་ཉོག་ཚ་རུ་དང་ཞིབ་ཚགས་མཁྱེན་རྒྱུར་སུན་སྣང་ཆེ་རུ་བཏང་ཡོད། ཡིག་ཐོག་ཏུ་རྒྱ་ཁྱབ་གསལ་བསྒྲགས་སྤེལ་སྐབས་ངེས་པར་གནད་འདུས་པ། གོ་བདེ་བ། གོ་བདེ་བ་དེ་ཡང་ཚང་ལ་མ་ནོར་བ། ལག་ཏུ་ལེན་བདེ་བ་ཞིག་དགོས་པ་ཞུ་མ་དགོས་ཀྱང་། དེ་ལྟར་བྱུང་མེད་པ་ནི་ཞན་ཆ་ཡིན་ཡང་བྱ་ཐབས་ཟད།
ཆེས་བཀུར་བར་འོས་པའི་དཔལ་ལྡན་ཆེས་མཐོའི་ཁྲིམས་ཞིབ་པ་ཆེ་བ་མཆོག་དང་ཁྲིམས་ཞིབ་པ་གཞན་གཉིས། སྤྱི་ཁྱབ་ཁྲིམས་དྲུང་བཅས་པ་ཡང་གུས་པ་ལྟར་བསྐོས་པའི་ཐུགས་འགན་སྟེང་གསར་པ་ཡིན་པ་དང་། ལྷག་པར་བོད་མི་མང་སྤྱི་འཐུས་ལྷན་ཚོགས་ཀྱི་ལམ་ལུགས་དང་ཁྲིམས་སྒྲིག་དགོངས་དོན་ལྟར་གྱི་ཚོགས་འདུའི་འགྲོ་ལུགས་གཉིས་ཀར་ཐུགས་རྒྱུས་ཆེར་མེད་སྟབས། བཅའ་ཁྲིམས་དོན་ཚན་ ༢༢ དང་འབྲེལ་བའི་ཀླན་ཀ་བྱུང་བ་ནི་སྨྲས་མེད་ཅིག་རེད། བོད་མི་མང་སྤྱི་འཐུས་ལྷན་ཚོགས་ཀྱི་སྲིད་པ་ས་ལ་ཆགས་པ་ཙམ་ནས་མིན་པར། སྐབས་ ༡༡ ནས་བཅའ་ཁྲིམས་རིན་པོ་ཆེ་གཏན་ལ་ཕབ་རྗེས་ཀྱང་། སྒྲིག་གཞིར་མ་གསལ་བའི་སྲོལ་རྒྱུན་ནམ་ལམ་ལུགས་རྩ་ཆེར་བཟུང་ཡོད་ལ། ལམ་ལུགས་དེ་དག་ལ་འགྱུར་བ་གཏོང་དགོས་བྱུང་ཚེ་ཚོགས་གཙོ་སྦྲེལ་པོས་བཀའ་གནང་བའམ། ཡང་ན་སྤྱི་འཐུས་གང་ཡང་རུང་བས་གྲོས་འཆར་བཏོན་པར་དགག་བྱ་མ་བྱུང་ཚེ་འགྱུར་བ་གཏོང་འཐུས་ཀྱི་ལམ་ཁ་བཏོད་ཡོད། ལམ་ཁ་བཏོད་མཁན་དེ་དག་ཀྱང་བཅའ་ཁྲིམས་དང་གྲོས་ཚོགས་ཀྱི་འགྲོ་ལུགས་གཉིས་ཀའི་ཡབ་ཆེན་ལྟ་བུར་གྱུར་བ་དག་ཡིན་པས། ཁྲིམས་སྒྲིག་ཡོད་ཚད་ཡིག་ཐོག་ཏུ་ཡོད་དགོས་པའི་ངེས་པ་མེད་པའང་གནད་འདི་དག་ལ་ཐུག་པ་མིན་ནམ་སྙམ།
དཔལ་ལྡན་ཆེས་མཐོའི་ཁྲིམས་ཞིབ་ཁང་ནས་སྤེལ་བའི་ཤོག་ལྷེ་ ༩ ཅན་གྱི་གསར་འགོད་གསལ་བསྒྲགས་ནང་ངོས་ལེན་ཞུ་དགོས་པའི་གནད་དོན་ཁ་ཤས་འདུག་པ་ནི། བཅའ་ཁྲིམས་དོན་ཚན་ ༤༦ པ་དང་། དོན་ཚན་ ༤༩ ནང་གསེས་ ༡། དོན་ཚན་ ༥༨ ནང་གསེས་ ༡ ། ༢། བཅས་ཀྱི་གོ་དོན་ནི་དེ་ག་རང་ཡིན་ཅིང་། དེ་དག་ནི་ད་ཆ་གསལ་བོ་ཆགས་ཟིན་པས་གླེང་སློང་བྱེད་དགོས་མ་མཐོང་ཡང་། བཀའ་བློན་འོས་འདེམས་བྱས་རྗེས་ཀྱི་རྗེས་འབྲེལ་ཀླན་ཀའི་རིགས་ལ་འཐམས་ཏེ་དོན་གནད་ལྟེ་བ་ཟུར་འཇོག་བྱེད་ཐབས་མེད་པས། བཅའ་ཁྲིམས་རིན་པོ་ཆེའི་དོན་ཚན་ ༢༢ པར་འགྲེལ་བཤད་བསྐྱོན་སྟངས་ཀྱི་གནད་འགག་ཁ་ཤས་གསལ་བཟོ་དགོས་པ་དུས་ལ་བབ་འདུག་སྙམ།
དོན་ཚན་ ༢༢ པ་ཇི་བཞིན་བཀོད་ན། ”འདེམས་ཐོན་ཐོག་དམ་འབུལ་ཟིན་པའི་སྲིད་སྐྱོང་དེས་རང་གི་བཀའ་ཤག་ལྷན་ཚོགས་སུ་བཀའ་བློན་ཇི་དགོས་མང་མཐའ་བདུན་ལས་མ་བརྒལ་བའི་མི་འགྲོའི་མིང་དང་ལོ་རྒྱུས་བཅའ་ཁྲིམས་དོན་ཚན་ ༢༡ པར་གསལ་བའི་འོས་ཆོས་ཚང་ལུགས་བཅས་སྤྱི་འཐུས་ལྷན་ཚོགས་སུ་གསལ་བཤད་དང་སྦྲགས་འབུལ་རྒྱུ་དང་། དེའི་ཐོག་སྤྱི་མོས་བྱུང་ན་སྨོས་མེད། མ་བྱུང་ཚེ་སྤྱི་མོས་མ་བྱུང་བའི་འོས་གཞི་སོ་སོའི་ཐོག་ངོ་ཡོད་སྤྱི་འཐུས་ཡོངས་རྫོགས་ཀྱིས་གསང་བའི་འོས་ཤོག་འཕངས་ཏེ་འོས་འདེམས་བྱེད་དགོས། ངོ་ཡོད་སྤྱི་འཐུས་ཀྱི་བརྒྱ་ཆ་ལྔ་བཅུ་ལས་མ་ཉུང་བའི་འོས་ཤོག་ཐོབ་ན་བཀའ་བློན་དུ་འོས་ཐོན་གསལ་བསྒྲགས་བྱ་རྒྱུ། གྲོས་ཚོགས་སུ་སྤྱི་མོས་སམ་མང་མོས་ཐོན་པའི་རིགས་ལ་སྲིད་སྐྱོང་གིས་བཀའ་བློན་དུ་བསྐོ་བཞག་བྱ་རྒྱུ། སྲིད་སྐྱོང་གིས་བཏོན་པའི་འོས་གཞི་ཡོངས་རྫོགས་སམ་གང་རུང་ལ་མང་མོས་མ་ཐོབ་ཚེ་འོས་གཞི་གསར་པ་སྲིད་སྐྱོང་གིས་གོང་བཞིན་སྤྱི་འཐུས་ལྷན་ཚོགས་སུ་འབུལ་རྒྱུ།”ཞེས་གསལ་བ་ལས། གཅིག བརྒྱ་ཆ་ལྔ་བཅུ་ལས་མ་ཉུང་བའི་འོས་ཤོག་ཐོབ་དགོས་པ་དང་། གཉིས། འོས་འཕེན་མཁན་ནི་ངོ་ཡོད་སྤྱི་འཐུས་ཡོངས་རྫོགས་ཡིན་པ། གསུམ། འོས་ཤོག་འཕེན་སྟངས་ནི་གསང་བའི་འོས་ཤོག་བསྡུ་དགོས་པ་བཅས་ཆེས་མཐོའི་ཁྲིམས་ཞིབ་ཁང་ནས་གནད་འགག་ཏུ་བརྩིས་ཡོད། དེ་ལ་རྩོད་གཞི་གང་ཡང་མེད། ཚིག་གི་ངོ་གདོང་ནས་སུས་གཟིགས་ཀྱང་མཁྱེན་པའི་གནད་དོན་ཞིག་ཏུ་གྱུར་ཡོད་པས། དེ་ལ་འགྲེལ་བརྗོད་དང་རྩོད་གླེང་ཡོང་ཤེས་མེད།
འོན་ཀྱང་། བཅའ་སྒྲིག་ཁག་གི་དགོངས་དོན་གཞིར་བཟུང་གྲོས་ཚོགས་གཙོ་སྐྱོང་བྱེད་སྲོལ་དང་མཉམ་དུ། གོང་དུ་ཞུས་པ་བཞིན་སྲོལ་རྒྱུན་ནམ་ལམ་ལུགས་ཀྱི་དབང་དུ་བྱས་པའི་གྲོས་ཚོགས་གཙོ་སྐྱོང་བྱེད་སྲོལ་ཡོད་པའང་མ་མཁྱེན་ན་ཚང་ལ་མ་ནོར་བ་ཞུ་བ་དེ་ཡོང་ཐབས་བྲལ། དེའི་རྐྱེན། གཅིག ལམ་སྲོལ་གྱི་དབང་དུ་བྱས་ན་ཚོགས་གཙོ་སྦྲེལ་པོ་གྲོས་ཚོགས་ཀྱི་འོས་བསྡུའི་ནང་ཞུགས་ཀྱི་མེད་པ། གཉིས། ངོ་ཡོད་སྤྱི་འཐུས་ཀྱི་གྲངས་ཀ་བརྩི་སྐབས་ཚོགས་གཙོ་སྦྲེལ་པོ་དེའི་ཁོངས་བརྩི་དགོས་ཀྱི་མེད་པ། གསུམ། ལམ་ལུགས་དང་སྲོལ་རྒྱུན་དེ་རིགས་ལ་འགྱུར་བ་གཏོང་སྟངས་ཚོགས་གཙོ་སྦྲེལ་པོས་ཐག་གཅོད་དམ། སྤྱི་འཐུས་སུ་རུང་གིས་གྲོས་ཚོགས་སུ་གྲོས་ཆོད་འཁྱེར་ཏེ་སྤྱི་མོས་མང་མོས་གང་རུང་ཐོབ་པའམ། གཞུང་འབྲེལ་གྲོས་ཆོད་ཀྱི་ལམ་ནས་རྒྱབ་སྐྱོར་ཐོབ་སྟེ་གྲོས་ཚོགས་ཀྱིས་ལམ་སྟོན་ཕེབས་ན་མ་གཏོགས་སྲོལ་རྒྱུན་ནམ་ལམ་ལུགས་ལ་འགྱུར་བ་གཏོང་གཞི་མི་འདུག་ལ། ལྷག་པར་གནད་དོན་བྱེ་བྲག་པ་ཞིག་དང་འབྲེལ་ཏེ་བཅའ་སྒྲིག་དགོངས་དོན་དང་ལམ་ལུགས་བར་རྩོད་པ་བྱུང་ཚེ། དེ་ལ་བོད་མི་མང་སྤྱི་འཐུས་ལྷན་ཚོགས་རང་ཁོ་ནས་རྗེས་མའི་བྱེད་ཕྱོགས་ཐག་གཅོད་ལམ་སྟོན་གསལ་བོ་གནང་རྒྱུ་ལས་ཐབས་གཞན་མེད་པ་གསལ་བོ་རེད། དེའི་ཆ་ནས་བཅའ་ཁྲིམས་དོན་ཚན་ ༢༢ དགོངས་དོན་བཀའ་བློན་འོས་འདེམས་གནང་ཡོད་ཀྱང་། ཚོགས་གཙོས་འོས་འཕེན་མིན་དང་ངོ་ཡོད་གྲངས་ཀ་བརྩི་སྟངས་བཅས་པ་སྔར་གྱི་སྲོལ་རྒྱུན་ལྟར་གནང་ཡོད་པས། གྲོས་ཚོགས་ཀྱི་ཐག་གཅོད་དེར་ནོར་འཁྲུལ་གང་ཡང་ཤོར་མེད།
དེའི་ཁུངས་ལུང་ཅི་ལྟར་ཡོད་ཅེ་ན། སྐབས་ ༡༡ གྲོས་ཚོགས་ཚོགས་དུས་ ༩ སྟེང་། ཚོགས་གཙོ་སྦྲེལ་པོར་གྲོས་ཚོགས་ནང་འོས་ཤོག་འཕེན་པའི་ཐོབ་ཐང་ཡོད་པ་མ་རེད་ཅེས་པའི་གོ་དོན་ཅི་ཡིན་ལ་ལས་རིམ་རྣམ་བཞག་བཏོན་པར། སྐབས་དེའི་དཔལ་ལྡན་ཚོགས་གཙོ་མཆོག་གིས། ”སྐབས་བཅུ་པ་ཕན་ཆད་ཀྱི་བོད་མི་མང་སྤྱི་འཐུས་ལྷན་ཚོགས་སུ་ཚོགས་གཙོ་གཅིག་དང་ཚོགས་གཞོན་གཅིག་ས་མིག་ཐོག་འོས་འདེམས་བྱས་སྲོལ་འདུག་ཅིང་། ཚོགས་གཙོའི་ལས་དོན་སྒྲུབ་པའི་སྐབས་སུ། གཉིས་ཀ་འདྲ་མཉམ་གྱིས་ལས་དོན་བསྒྲུབས་སྲོལ་འདུག དེའི་ཕྱིར་ཚོགས་གཙོ་ཚོགས་གཞོན་གཉིས་ཀ་ལ་གྲོས་ཚོགས་སུ་གྲོས་གཞིའི་ཐོག་མཐུན་ཕྱོགས་དང་མི་མཐུན་ཕྱོགས་སུ་སྐད་ཆ་ཤོད་རྒྱུ་དང་འོས་བསྡུའི་ཐོབ་ཐང་མེད་པ་སྲོལ་རྒྱུན་ལས་བྱུང་འདུག་”ཅེས་དང་། ཡང་”དེ་འདྲ་ཡིན་ཙང་ང་ཚོ་སྐབས་བཅུ་གཅིག་པའི་གྲོས་ཚོགས་སུ་བཅའ་ཁྲིམས་གཏན་འབེབས་བྱས་པའི་རྗེས་ལ་འདེམས་ཐོན་བྱུང་བའི་ཚོགས་གཙོ་གཉིས་ཀྱིས་གྲོས་བྱས་ཏེ་དུས་ཚོད་གཅིག་ལ་ཚོགས་གཙོ་གཅིག་གིས་ལས་ཀ་བྱེད་རྒྱུ་དེ་ལ་གྲོས་འཆམ་བྱུང་བ་རེད། འོན་ཀྱང་ཚོགས་གཙོ་གཞོན་པ་གྲོས་ཚོགས་སུ་བཞུགས་ཀྱང་གྲོས་གཞིའི་ཐོག་ཕྱོགས་འཛིན་གྱི་གསུང་བཤད་དང་འོས་བསྡུའི་ནང་ཆ་ཤས་མི་ལེན་པའི་སྲོལ་རྒྱུན་ཞིག་བཙུགས་པ་རེད། སྲོལ་རྒྱུན་དེ་ད་ལྟ་ཕན་ཆད་ལ་ལག་ལེན་བསྟར་བ་ལས་སྒྲིག་གཞི་གང་གི་ནང་ལའང་ཚོགས་གཙོ་བཞུགས་སྐབས་སུ་ཚོགས་གཞོན་གྱིས་སྨྲ་བརྗོད་དང་འོས་བསྡུའི་ནང་ཆ་ཤས་ལེན་མི་ཆོག་ཅེས་གསལ་མེད། ཚོགས་གཙོ་གཞོན་པའི་གོ་གནས་སུ་འདེམས་ཐོན་བྱུང་བའི་ཆ་ནས་མཐུན་ཕྱོགས་དང་མི་མཐུན་ཕྱོགས་ལ་གཏམ་བཤད་མི་བྱེད་པ་དང་། འོས་བསྡུའི་ནང་ཆ་ཤས་མི་ལེན་པའི་ལུགས་སྲོལ་ཞིག་བཙུགས་པ་རེད། སྲོལ་རྒྱུན་དེ་ལག་ལེན་བྱེད་ཀྱི་ཡོད་ཙང་། ཚོགས་གཙོ་གཉིས་ཕུད་པའི་མི་འབོར་དེ་ཕན་གནོད་འདྲེས་པའི་གྲངས་ཀའི་ནང་བརྩི་གི་ཡོད་ཅེས་ཞུས་པའི་རྒྱུ་མཚན་དེ་ལྟར་རེད། ད་རེས་སྲོལ་རྒྱུན་དེ་གཞི་བཞག་ནས་འགྲོ་དགོས་པ་ལས་ད་ལྟ་འོས་བསྡུ་བྱེད་ཁར་སྲོལ་རྒྱུན་དེར་འགྱུར་བ་གཏོང་དགོས་གསུངས་ན་འགྲིག་གི་མ་རེད། སྲོལ་རྒྱུན་དེ་ལ་འགྱུར་བ་གཏང་དགོས་པ་ཞིག་ཆགས་པ་ཡིན་ན། གྲོས་ཚོགས་ཀྱི་ལམ་སྟོན་གྲོས་ཆོད་བྱུང་བའམ། ཚོགས་གཙོ་གཉིས་ཀྱིས་རང་མོས་ཀྱིས་སྲོལ་རྒྱུན་དེ་དུས་འདི་ནས་འགྱུར་བ་བཏང་བ་ཡིན་ཞེས་གསལ་བསྒྲགས་ཤིག་གྲོས་ཚོགས་ནང་ཞུས་ཏེ། དེ་ལ་གྲོས་ཚོགས་ནང་དགག་པ་མ་བྱུང་བ་ཡིན་ན་དེ་ནས་སྲོལ་རྒྱུན་གསར་པ་ལག་ལེན་བསྟར་ཆོག་པ་ཆགས་ཀྱི་རེད། བྱས་ཙང་ད་ལྟའི་གནས་སྐབས་འདི་ལ་ངས་ཕན་གནོད་འདྲེས་པའི་སྤྱི་འཐུས་ཀྱི་གྲངས་ཀ་དེ་རིང་གི་གནས་སྐབས་ལ་ ༣༧ ལ་བརྩི་གི་ཡིན། འོན་ཀྱང་སྤྱི་འཐུས་རྣམ་པ་ཚོས་མ་འོངས་པའི་ཆེད་དུ་དེའི་སྲོལ་རྒྱུན་དེར་འགྱུར་བ་གཏོང་དགོས་ཀྱི་ཡོད་ན། དེའི་ཆེད་གྲོས་འཆར་བསྣམས་ཕེབས་པར་དགག་བྱ་ཡོད་མ་རེད།”ཅེས་གསུངས་འདུག་ལ། སྲོལ་རྒྱུན་འདི་ལ་ད་བར་འགྱུར་བ་གང་ཡང་ཕྱིན་མེད།
དེའི་རྐྱེན་གང་ཟག་བྱེ་བྲག་པ་གཅིག་བཀའ་བློན་འོས་འདེམས་དང་འབྲེལ་ཏེ་བཅའ་སྒྲིག་དགོངས་དོན་དང་སྲོལ་རྒྱུན་ལམ་སྲོལ་བར་རྩོད་གླེང་གནང་ན་གང་ཟག་ལ་ལྟོས་པའི་རྩོད་གཞི་ཆགས་ཉེན་ཡོད་པས། བོད་མི་མང་སྤྱི་འཐུས་ལྷན་ཚོགས་ཀྱིས་ད་ལྟ་བདམས་ཐོན་གསལ་བསྒྲགས་བསྐྱངས་པའི་བཀའ་བློན་ཕུད། རྗེས་མའི་གནང་ཕྱོགས་ལ་མ་འོངས་པར་བསམ་ཞིབ་གྲོས་བསྡུར་བྱ་ངེས་ལས། ཐག་གཅོད་ཟིན་རིགས་ལ་འགྱུར་བ་གཏོང་ཤེས་མེད་པ་ཧ་ཅང་གསལ་བོ་རེད་སྙམ། དེས་ན་དཔལ་ལྡན་ཆེས་མཐོའི་ཁྲིམས་ཞིབ་ཁང་གིས་གྲོས་ཚོགས་ཀྱི་སྲིད་པ་ས་ལ་ཆགས་པའི་སྲོལ་རྒྱུན་ལམ་སྲོལ་ལ་བརྩི་བཀུར་གྱིས་དམ་བཅའ་ངོས་བཞེས་གནང་ན་ལེགས་སྙམ།
ལར་ནས་དཔལ་ལྡན་ཆེས་མཐོའི་ཁྲིམས་ཞིབ་ཁང་ལ་ཐུགས་ཁག་མེད་པ་གང་ཡང་མ་མཐོང་། བཅའ་ཁྲིམས་ལ་འགྲེལ་བཤད་བྱེད་པའི་དབང་ཆ་ཡོད་ལུགས་གསུང་པ་དངོས་བདེན་ཡིན་ན་ཡང་ཉེ་ཆར་གྱི་གནང་ཕྱོགས་དེ་ནི་བཅའ་ཁྲིམས་ལ་འགྲེལ་བཤད་ཅིག་མིན་པར་དཔལ་ལྡན་བོད་མི་སྤྱི་འཐུས་ཀྱི་ལས་དོན་ལ་ཐེ་བྱུས་བྱས་པ་ཞིག་ཆགས་ཡོད་པས་ཆེས་མཐོའི་ཁྲིམས་ཞིབ་ཁང་གིས་ནོར་སོང་སྙམ།
བཅའ་ཁྲིམས་ཀྱི་འབྲུ་དོན་ལ་འགྲེལ་བཤད་དེ་ལྟར་ཡིན་དུ་ཆུག་རུང་དཔལ་ལྡན་བོད་མི་མང་སྤྱི་འཐུས་ཀྱིས་ཐུགས་ཐག་བཅད་ཟིན་པ་ལ་ངོས་ལེན་མི་བྱེད་པ་ནི་དཔལ་ལྡན་ཆེས་མཐོའི་ཁྲིམས་ཞིབ་ཁང་རང་ཉིད་ཀྱི་དབང་ཚད་ལས་ཡོངས་སུ་བརྒལ་བ་རེད།
བཅའ་ཁྲིམས་ཀྱི་འབྲུ་དོན་ལ་འགྲེལ་བཤད་བྱེད་ལུགས་ཀྱི་ལེགས་བཅོས་ལས་འགུལ་རྗེས་སུ་གནང་འོས་པ་ཞིག་ལས་བདམས་ཐོན་གསལ་བསྒྲགས་བཏང་ཟིན་པ་ལ་ངོས་ལེན་མི་བྱེད་པ་ནི་ཁྲིམས་ལུགས་ཡིག་ཆ་གང་དུ་ཡང་མ་གསལ་བ་མ་ཟད་། ཀ་བ་གསུམ་པོས་ནང་ཕན་ཚུན་གཅིག་གིས་གཅིག་གི་ལས་དོན་ཐེ་བྱུས་བྱེད་མི་ཆོག་པའི་འབྲུ་དོན་དང་ཡོངས་སུ་འགལ་བ་ཞིག་རེད་དོ།
དེ་རིང་དཔལ་ལྡན་སྤྱི་འཐུས་བློ་བཟང་ཆོས་འབྱོར་ལགས་ཀྱིས་བློ་གཟུར་བོར་གནས་པའི་རྩོམ་ཞིག་བྲིས་འདུག་སྙམ། ངས་ཀྱང་ཁོང་གིས་བྲིས་པ་དེ་འདྲ་ཞིག་བསམ་ཡོད།
ཧ་ཧ་་ད་ཐེངས་གྲོས་ཚོགས་འཐུས་མི་ཡོང་རྫོགས་དུས་མིན་འཁྱུར་དགོས་ཀྱི་གནས་སྟངས་ཤིག་གི་ཉེན་ཁ་འདུག་པས་སྐུ་ངོ་རྣམ་པ་ཞེད་སྣང་ཡོང་གི་ཡོད་པ་འདྲ། མང་གཙོའི་ལམ་ལུགས་ལ་ཁྲིམས་ཀྱིས་དབང་བསྒྱུར་ཟེར་བ་ལས་ལམ་ལུགས་བརྩི་སྲོལ་ཡོད་རེད་དམ། གལ་སྲིད་ཡོད་ན། སྐུ་ངོ་སྲིད་སྐྱོང་བློ་བཟང་མཆོག་གི་བྱེད་སྟངས་མང་པོ་ཞིག་ལ་སྤྱི་འཐུས་ཚོས་ཁྲིམས་མཐུན་བྱུང་མི་འདུག་སོགས་ཅི་ལ་ཞུ་དགོས་པ་རེད། སྔར་ཡང་སྐུ་ངོ་ཟམ་གདོང་རིན་པོ་ཆེའི་སྐབས་སུའང་ལམ་ལུགས་ལམ་ལུགས་གསུངས་ནས་མང་པོ་གནང་ཡོད་པ། མཐའ་ན་གྲོས་ཚོགས་ནས་བཀའ་ཤག་གི་སྲིད་བྱུས་ལ་ཐེ་གཏོགས་བྱེད་མི་ཆོག གྲོས་ཆོད་མ་གཞག་པ་གང་ལའང་ཐེ་བྱུས་བྱེད་མི་ཆོག ཐེ་བྱུས་བྱེད་ན་གྲོས་ཆོད་འཇོག་དགོས་སོགས་སྤྱི་འཐུས་ཚོར་མགོ་གནོན་མང་དུ་བྱེད་ཡོད་རེད་དོ།།
ད་ཐེངས་ཤར་ཁུག་གིས་འཇུས་ས་འཆང་ས་མེད་པའི་སྐད་ཆ་ཞིག་བཤད་འདུག ངོ་ཡོད་སྤྱི་འཐུས་ ༣༧ རེད་ཟེར། ཚོགས་གཙོ་ཚོགས་གཞོན་ངོ་ཡོད་སྤྱི་འཐུས་མ་རེད་ཟེར། གྲོས་ཚོགས་ལ་ཁྲིམས་སྒྲིག་ལས་གལ་ཆེ་བའི་ལམ་སྲོལ་ཞིག་ཡོད་རེད་ཟེར། ཧཧཧ
ཧཧ་རྟ་རྒྱུགས་ཚར་ཐལ་ཚུབ་ཡལ་ཚར་ནས་ད་མང་པོ་བཤོད་ས་ཨ་ཡོད་ན་
མང་གཙོ་ཁྲིམས་ཀྱི་དབང་བསྒྱུར་ལ་སྲོལ་རྒྱུན་ཟེར་བའི་ཐ་སྙད་དེའི་ནུས་པ་
ག་ཚོད་འདོན་ཐུབ་ཀྱི་ཡོད་དམ་ཧཧཧ
བཀྲ་ཤིས་ནས་བཤད་ན་བཀྲ་ཤིས་་བདེན་བདེན། དོན་གྲུབ་ཀྱིས་བཤད་ན་དོན་གྲུབ་བདེན་བདེན།
ཤར་ཁུག་ཁྱོད་སྤྱི་འཐུས་ཚོགས་གཙོ་ཞབས་ཏེག་རག་ཡག་ཁག་གོ ཅི་སྟེ་ཚོགས་གཙོ་ལས་འགན་བྱུང་ན་ཁྱོད་ཀྱིས་ལམ་ནོར་ཁོ་ནར་འཁྱོགས་པས་དེ་བས་རང་སོར་ཁ་ནང་དུ་ལོག་ནས་རང་རྒྱུད་ལ་བརྟགས་པར་བྱོས། ཁྱོད་གྲྭ་ལོག་ཞིག་ཡིན་དུས་ཏོག་ཙམ་གང་ཟབ་གནང་རོག་མི་ནག་ཕལ་པ་རང་མི་འདྲ་བ་ཞིག་ཆོས་ཀྱི་གོ་རྟོག་ཡོད་ལེ་ཆེ་སྙམས། མ་གཞི་ཁྱོད་ལྟ་བུ་ནི་རྡ་་སཱི་ཉེ་འགྲམ་གྱི་ཧབ་ཕྲུག་ཟོལ་དུ་རོལ་བ་ཅན་ཡིན་པ་ངས་ཤེས། ་ནམ་ཞིག་ཁོ་བོ་རྡ་ས་ལ་འབྱོར་སྐབས་ཁྱོད་ལ་ཐུག་འདོང་འདུག་་་བཀའ་མོལ་ལྷོད་ལྷོད་ཞུ་འདོད་ཨ། དེ་བར་ངུ་ཁྱོད་དང་། བསྟན་པ་ཡར་འཕེལ་་གཉིས་ལ་བགྲོ་གླེང་ཞུ་ཆོག་པ་ཞུ། དེ་ཙམ་ཡིན།