བོད་རིགས་གཞོན་སྐྱེས་ཚོར་ནང་ཆོས་ངོ་སྤྲོད།

༧གོང་ས་རྒྱལ་བ་རིན་པོ་ཆེ་མཆོག་གིས་བོད་རིགས་གཞོན་སྐྱེས་ཚོར་ཁྱེད་རང་ཚོ་བོད་གངས་ཅན་གྱི་ཤ་ཁྲག་རུས་གསུམ་ལས་མཆེད་པ་ཡིན་པས་མ་ཤི་བར་བོད་རིགས་ཞེས་པའི་མིང་དེར་འགྱུར་བ་གཏོང་རྒྱུ་གང་ཡང་མེད་སྐོར་གསུང་སོང་།

དེ་རིང་སྔ་དྲོའི་ཆུ་ཚོད་ ༩:༣༠ སྟེང་། ༧གོང་ས་རྒྱལ་བ་རིན་པོ་ཆེ་མཆོག་གིས་བཞུགས་སྒར་ཐེག་ཆེན་གཙུག་ལག་ཁང་དུ་བོད་རིགས་གཞོན་སྐྱེས་རྣམས་ལ་རྒྱལ་སྲས་ཐོགས་མེད་བཟང་པོས་མཛད་པའི་ལག་ལེན་སོ་བདུན་མའི་གསུང་ཆོས་དབུ་འཛུགས་གནང་སོང་བ་དང་། ཐེངས་འདིའི་གསུང་ཆོས་སྟེང་བོད་རིགས་སློབ་ཕྲུག་ ༣༠༠༠ ལྷག་གཙོའི་ཕྱི་རྒྱལ་བ་དང་དྷ་ས་ཁུལ་གྱི་དད་ལྡན་སེར་སྐྱ་མི་མང་བཅས་ཁྱོན་མི་གྲངས་ ༥༠༠༠ བརྒལ་བ་འཛོམས་ཡོད་པ་དང་། གསུང་ཆོས་ཀྱི་ཐོག་མར་༧གོང་ས་རྒྱལ་བ་རིན་པོ་ཆེ་མཆོག་གིས། དེ་རིང་ཆོས་འབྲེལ་བྱེད་ས་གཙོ་བོ་བོད་རིགས་སློབ་ཕྲུག་ཚོ་ཡིན་པ་དང་། སློབ་ཕྲུག་ཁྱེད་ཚོ་བོད་གངས་ཅན་ལྗོངས་ཀྱི་ཤ་ཁྲག་རུས་གསུམ་ནས་མཆེད་བསྡད་པ་ཞིག་ཡིན་པ་དང་། ཁྱེད་རང་ཚོ་མང་པོ་ཞིག་སྐྱེས་ས་རྒྱ་གར་དང་ལུང་པ་གཞན་པ་འདྲ་མིན་ནང་སྐྱེས་ཡོད་ན་ཡང་། ང་རང་ཚོ་ཚང་མ་སྐྱེས་པ་ནས་བོད་རིགས་ཞེས་པའི་མིང་ཞིག་ཁུར་བསྡད་ཡོད་པ་རེད། བོད་རིགས་ཟེར་བའི་མིང་དེ་མ་ཤི་བར་དུ་ཁུར་རྒྱུ་མ་གཏོགས་དེ་ལ་འགྱུར་བ་གཏོང་རྒྱུ་གང་ཡང་ཡོད་པ་མ་རེད། ཅེས་གསུངས་སོང་།

དེའི་རྗེས་༧གོང་ས་རྒྱལ་བ་རིན་པོ་ཆེ་མཆོག་གིས་བོད་མི་རིགས་དེ་ལོ་རྒྱུས་ཡུན་རིང་ལྡན་པའི་མི་རིགས་ཤིག་ཡིན་པའི་སྐོར་ལ། བོད་མི་རིགས་དེ་ལོ་རྒྱུས་ཀྱི་སྟེང་ནས་ཕ་སྤྲེའུ་རྒན་བྱང་ཆུབ་སེམས་དཔའ་དང་མ་བྲག་སྲིན་མོ་ཞེས་བཤད་རྒྱུ་ཡོད་པ་རེད་དེ། དེ་ཚོ་ཏག་ཏག་ཅིག་ཡོད་མེད་ངོས་ཀྱིས་ཞེ་དྲག་ཡིད་ཆེས་བྱེད་ཀྱི་མེད། ལོ་སྟོང་ཕྲག་ཕྱིན་པའི་ལོ་རྒྱུས་དེ་ཚོ་དད་པ་ཡིན་པའི་ཟོལ་འདྲ་བོ་འདྲ་མི་འདྲ་བཤད་ཡོང་དུས། དེ་ལ་ཡིད་ཆེས་རྙེད་རྒྱུ་དེ་ཙམ་ཁག་པོ་འདྲ་ཞིག་རེད། ཡིན་ན་ཡང་ང་རང་ཚོར་མིག་མཐོང་ལག་ཟིན་ག་རེ་ཡོད་པ་རེད་ཅེས་ན་བོད་གངས་ཅན་གྱི་ལྗོངས་ལ་མི་རིགས་ཆགས་ནས་ལོ་ཁྲི་ ༤ ནས་ ༥ ཕྱིན་པའི་ལོ་རྒྱུས་ཀྱི་དཔང་རྟགས་ཡོད་པ་རེད། བོད་མི་རིགས་དེ་མི་རིགས་རྙིང་པའི་གྲས་ཤིག་ཆགས་ཀྱི་ཡོད་པ་རེད། གང་ལྟར་མི་རིགས་རྙིང་པ་ཡིན་པ་ཙམ་གྱིས་ངོ་མཚར་སྐྱེས་རྒྱུ་དང་ཧ་ལས་པ་གང་ཡང་མེད་པ་དང་། མི་རིགས་དེས་ལོ་སྟོང་ཕྲག་ལྷག་གི་རིང་ལ་གསར་གཏོད་ག་རེ་བྱས་ཡོད་པ་དེར་བསམ་བློ་གཏོང་རྒྱུ་གལ་ཆེན་པོ་རེད། ཅེས་གསུངས་སོང་།བོད་མི་ཚོས་གསར་གཏོད་ག་བྱེ་བྱས་ཡོད་པའི་སྐོར་ལ་ཁོང་ཉིད་ཀྱིས། དུས་རབས་བདུན་པའི་ནང་ལ་ཆོས་རྒྱལ་སྲོང་བཙན་སྒམ་པོས་བོད་ཡིག་གསར་གཏོང་གནང་ཡོད་པ་དང་། ཡི་གེ་དེ་ཡང་དབྱངས་དང་གསལ་བྱེད་ཡོད་པའི་ཡི་གེ་རྒྱ་སྐད་དང་རྒྱ་གར་སྐད་གང་ལ་ཡང་མི་འདྲ་བའི་ཡི་གེ་ཞིག་གསར་གཏོད་གནང་ཡོད་པ་རེད། ཡེ་གེའི་གཟུགས་དེ་རྒྱ་གར་ཡིག་གཟུགས་ལ་དཔེ་བལྟས་ཡོད་ན་ཡང་རྩ་བ་ང་རང་ཚོ་བོད་པའི་སྐད་རང་ལ་གཞིར་བཞག་ནས་བཟོས་ཡོད་པ་དང་། མཁན་ཆེན་ཞི་བ་འཚོ་དུས་རབས་བརྒྱད་པའི་ནང་ལ་ཆོས་རྒྱལ་ཁྲི་སྲོང་ལྡེའུ་བཙན་གྱི་གདན་ཞུ་གནང་བ་དང་། མཁན་ཆེན་ཞི་བ་འཚོས་ཁྱེད་རང་ཚོར་བོད་ཡིག་གི་གཟུགས་འདུག་མོད། དེ་འདྲ་ཡིན་སྟབས་ཁྱེད་རང་ཚོས་ལེགས་སྦྱར་སྐད་དང་རྒྱ་གར་སྐད་བསླབ་དགོས་མ་རེད། དེ་ལས་ལེགས་སྦྱར་དང་པཱ་ལེ་གཞུང་དེ་དག་ག་ཚོད་ཐུབ་ཐུབ་བོད་ཡིག་ནང་སྒྱུར་དགོས་པ་རེད་ཅེས་གསུང་ཡོད་པ་དང་། ང་རང་གི་ངོ་ཤེས་པ་དེ་འདྲས་མཁན་ཆེན་ཞི་བ་འཚོ་ཁོང་རང་གིས་ཀྱང་བོད་ཡིག་སྦྱོང་རྒྱུར་འབད་བརྩོན་གནང་བ་རེད་ཅེས་གོ་མྱོང་ལ། བཀའ་འགྱུར་བསྟན་འགྱུར་པོ་ཏི་གསུམ་བརྒྱ་ལྷག་ཏེ་མཁན་ཆེན་ཞི་བ་འཚོས་བཀའ་སློབ་གནང་བའི་ལེགས་སྐྱེས་དང་། རྒྱ་གར་གྱི་རིག་གཞུང་དེ་ཚུར་བླངས་ནས་སྐད་ཡིག་སོ་སོ་རང་གི་སྐད་ཡིག་ནང་དུ་ཡོད་པ་ཞིག་གནང་ཡོད་པ་རེད། ཅེས་གསུངས་སོང་།འདས་པའི་ལོ་རྒྱུས་དེ་ཅུང་ཙམ་གཟི་བརྗིད་ཆེན་པོ་བྱུང་ཡོད་པ་དང་། ད་ལྟའི་དུས་སྐབས་ལ་ནང་པ་སངས་རྒྱས་པའི་ཆོས་དེ་འཛམ་གླིང་ཤར་ཕྱོགས་ཀྱི་ཉི་མ་ལྟ་བུ་རེད་ཟེར་བཞིན་ཡོད། འཛམ་གླིང་ནུབ་ཕྱོགས་ཡེ་ཤི་མ་ཤི་ཀའི་ཆོས་བརྒྱུད་རྗེས་འབྲངས་བ་ཡིན་པ་དང་། འཛམ་གླིང་དཀྱིལ་ཤར་མང་ཆེ་བ་ཁ་ཆེའི་ཆོས་ལུགས་རྗེས་འབྲངས་བ་ཡིན་པ་དང་། ཆོས་ལུགས་དེ་དག་གིས་མི་ལ་ཕན་ཐོགས་ཆེན་པོ་བྱུང་གི་ཡོད་པ་རེད། དེ་ནས་རྒྱ་གར་ལ་མཚོན་ན་ཧིན་རྡུ་ལུགས་ཡོད་པ་རེད། སྤྱིར་རྒྱ་གར་དེ་འཛམ་གླིང་གི་ཆོས་ལུགས་མང་ཆེ་བ་ཡོད་ས་ཧ་ལས་པ་ཞིག་རེད་འདུག ཆོས་ལུགས་ཚང་མ་མཉམ་དུ་གནས་ཐུབ་པ་དང་ཕན་ཚུན་གཙི་བཀུར་ཐུབ་པ་དེ་རྒྱ་གར་གྱི་ཐུན་མོང་མ་ཡིན་པའི་ཁྱད་ཆོས་གཙོ་བོ་ཞིག་ཡིན་པ་དང་། དེ་བཞིན་རྒྱ་གར་ནང་དུ་ནང་པ་ཉུང་ཤས་ཤིག་ཡོད་པ་དང་། དེའི་ཁྲོད་ཐེག་ཆེན་དང་ཐེན་དམན་གཉིས་དང་བོད་ལ་མཚོན་ན་དཔལ་དཔལ་ན་ལེན་ཌའི་ཆོས་བརྒྱུད་འཛིན་མཁན་ཡིན་པ་དང་། ཆོས་བརྒྱུད་དེ་དེང་དུས་འཛམ་གླིང་ནང་མིའི་རིགས་ལ་ཕན་ཐོགས་ཆེན་པོ་ཡོད་པ་དང་རིག་པའི་དཔྱད་པ་བྱེད་ཐུབ་པའི་མཚན་མིའི་གཞུང་ཞིག་ཆགས་ཡོད་པ་དང་། རིག་གཞུང་དེ་རྒྱ་ཡིག་ནང་དུ་མེད་པ་ཞིག་དང་རྒྱ་གར་ནང་ཉམས་ཚར་བ་རེད། ཆོས་བརྒྱུད་དེ་ཚན་རིག་དང་མཐུན་པ་ཡིན་པ་དང་བོད་མི་རིགས་ཀྱིས་དེ་སྔ་ཕན་ཆད་དཀའ་ལས་བརྒྱབ་ནས་བདག་པོ་བརྒྱབ་པ་རེད་ལ། མ་འོངས་པར་བོད་ཀྱི་རིག་གཞུང་གཏིང་ཟབ་པོ་ཞིག་ཡོད་བསྡད་པ་དེ་བདག་པོ་བརྒྱབ་ནས། ནང་པ་ཡིན་མིན་གྱི་སྐད་ཆ་མིན་པར་རིག་གཞུང་དེ་ཤེས་ཡོན་རང་བྱས་ཏེ་འཛམ་གླིང་འདིར་བོད་པ་ཚོས་བློ་སྐྱེད་ག་ཚོད་ཕུལ་ཐུབ་མིན་བལྟ་དགོས་སྐོར་གསུངས་རྗེས་གསུང་ཆོས་དངོས་སུ་དབུ་འཛུགས་གནང་སོང་།

བོད་རིགས་གཞོན་སྐྱེས་ནང་ཆོས་ངོ་སྤྲོད་དེ་ཕྱི་ལོ་ ༢༠༠༧ ལོ་ནས་བཟུང་ལོ་ལྟར་༧གོང་ས་རྒྱལ་བ་རིན་པོ་ཆེ་མཆོག་གིས་རྒྱ་གར་རྒྱལ་ཡོངས་ཀྱི་མཐོ་སློབ་ཁག་ཏུ་ཡོད་པའི་བོད་རིཊ་མཐོ་རིམ་སློབ་མ་གཙོས། ས་རཱ་དང་ནོར་གླིང་། སྨན་རྩིས་ཁང་བཅས་མཐོ་སློབ་ཁག་དང་། ངྷ་སྟེང་བོད་ཁྱིམ་དང་ངྷ་ཤོད་བོད་ཁྱིམ། གྷོ་པ་པུར་བོད་ཁྱིམ། སུ་ཇཱ་བོད་ཁྱིམ། ཤེས་རབ་དགའ་ཚལ་སློབ་གླིང་བཅས་བཞུགས་སྒར་ཉེ་འཁྲིས་ཀྱི་སློབ་གྲྭ་ཁག་གཙོའི་ཐག་ཉེ་རིང་ཀུན་གྱི་བོད་རིགས་སློབ་ཕྲུག་རྣམས་དང་། བཞུཊ་སྒར་ཁུལ་གྱི་དད་ལྡན་མང་ཚོཊ་བཅས་ལ་ནང་ཆོས་ངོ་སྤྲོད་ཀྱི་ཆོས་འབྲེལ་གནང་བཞིན་ཡོད་པ་རེད།

གསར་འགོད་པ། སངས་རྒྱས་དཀོན་མཆོག