ཡང་ཁྲིམས་རྩོད་པ་བཀྲ་ཤིས་དབང་ཕྱུག་ལགས་ལ་ཐུག་ཏུ་བཅུག་མི་འདུག

རྒྱ་ནག་གཞུང་གིས་བཀྲ་ཤིས་དབང་ཕྱུག་ལགས་ཀྱིས་ཁྲིམས་ཆད་དྭང་ལེན་བྱེད་ཀྱི་མེད་པས་དམིགས་བསལ་སྟངས་འཛིན་འོག་ཡོད་སྐོར་བརྗོད་དེ་ཁྲིམས་རྩོད་པ་གཉིས་ལ་ཡང་ཐུག་ཏུ་བཅུག་མི་འདུགདེ་རིང་ཞོགས་པར་བོད་ཀྱི་སྐད་ཡིག་སློབ་གསོའི་ཐོབ་ཐང་དོན་གཉེར་བ་བཀྲ་ཤིས་དབང་ཕྱུག་ལགས་ཀྱི་ཁྲིམས་རྩོད་པ་ཉིང་ཞོ་ཅིན་(梁小军)ལགས་ཀྱིས། སྒེར་གྱི་ཊེ་ཊིར་སྤྱི་ཚོགས་དྲ་ལམ་དུ་ཁ་སང་ཞོགས་པར་ཁོང་དང་ཁོང་གི་ལས་རོགས་ཁྲིམས་རྩོད་པ་ལིན་ཆི་ལི་ (Lin Qilei)གཉིས། མཚོ་སྔོན་ཞིང་ཆེན་ཏོང་ཁྲན་(Dongchuan)བཙོན་ཁང་དུ་བཀྲ་ཤིས་དབང་ཕྱུག་ལགས་ལ་ཐུག་འཕྲད་ཆེད་ཕྱིན་ཡོད་ཀྱང་ཐུག་ཏུ་བཅུག་མེད་པའི་གནས་ཚུལ་སྤེལ་འདུག

ཁྲིམས་རྩོད་ཉིང་ཞོ་ཅིན་ལགས་ཀྱིས། བཀྲ་ཤིས་དབང་ཕྱུག་ལགས་ལ་ཐུག་འཕྲད་བྱེད་དུ་འཇུག་དགོས་པའི་རེ་བ་ཞུས་རྗེས། དོ་དམ་མི་སྣས་ཐུག་འཕྲད་དང་འབྲེལ་བའི་ཡིག་ཆ་འཁུར་ནས་ཡར་ཞུ་བྱས་ཡོད་པ་དང་། ཆུ་ཚོད་ཕྱེད་ལྷག་འགོར་རྗེས་པེ་ཅིན་ཁྲིམས་འཛིན་ལྷན་ཁང་ནས་རྒྱབ་གཉེར་ཡི་གེ་དགོས་པའི་ལན་སྤྲད་པར་བརྟེན། རྒྱ་ནག་གཞུང་གི་བྱ་སྤྱོད་དེ་ནི་ཁྲིམས་འགལ་ཡིན་ལུགས་གསལ་འདེབས་བྱས་པ་དང་། མཐའ་མ་དེར་མཚོ་སྔོན་ཞིང་ཆེན་བཙོན་ཁང་དོ་དམ་ཁང་ལ་ཞུ་སྐབས། སྲིད་དོན་བཙོན་པ་དོ་དམ་གྱི་མགོ་འཁྲིད་གཞོན་པས་རྣམ་འགྱུར་ལེགས་པོའི་ཐོག་ནས་ཚོར་བ་སྐྱེན་པའི་གྱོད་དོན་རིགས་ལ་དམིགས་བསལ་སྟངས་འཛིན་བྱེད་ཀྱི་ཡོད་པ་དང་། བཀྲ་ཤིས་དབང་ཕྱུག་ལགས་ཀྱིས་བཙོན་ཁང་དུ་ཁྲིམས་ཆད་དྭང་ལེན་དང་། དོ་དམ་གཞོགས་འདེགས་བྱེད་ཀྱི་མི་འདུག་པས། ཁོང་ལ་ལྷག་པར་དུ་དམིགས་བསལ་གྱི་སྟངས་འཛིན་བྱེད་ཀྱི་ཡོད་སྐོར་བརྗོད་དེ་ཐུག་ཏུ་བཅུག་མེད་པ་བརྗོད་འདུག

བཀྲ་ཤིས་དབང་ཕྱུག་ལགས་ལ་ལོ་ལྔ་ཡི་བཙོན་འཇུག་ཁྲིམས་ཐག་བཅད་རྗེས།  ཁྲིམས་རྩོད་པ་ཁོང་ལ་ཐུག་ཏུ་མ་བཅུག་པ་ད་ལན་ཐེངས་དང་པོ་མ་རེད། འདི་ལོའི་ཕྱི་ཟླ་ ༢ པའི་ནང་བཀྲ་ཤིས་དབང་ཕྱུག་ལགས་ལ་ཁྲིམས་ཐག་བཅད་དེ་བཙོན་ཁང་དུ་བཅུག་ནས་ལོ་གཅིག་འགོར་བ་དང་བསྟུན། ཁྲིམས་རྩོད་པ་ཉིང་ཞོ་ཅིན་ལགས་བཙོན་ཁང་དུ་ཁོང་ལ་ཐུག་འཕྲད་བྱེད་པར་ཕྱིན་ཡོད་ཀྱང་། རྒྱ་ནག་གཞུང་གིས་བཀྲ་ཤིས་དབང་ཕྱུག་ལགས་ཀྱི་གྱོད་དོན་ནི་དམིགས་བསལ་སྟངས་འཛིན་དགོས་པའི་ཚོར་བ་སྐྱེན་པའི་རིགས་ཡིན་ལུགས་བརྗོད་དེ་ཐུག་ཏུ་བཅུག་མེད་པ་དང་། ཕྱིས་སུའང་ཁྲིམས་རྩོད་པ་ཁོང་གིས་ཐེངས་མང་ལ་ཐུག་འཕྲད་ཀྱི་རེ་སྐུལ་ཞུས་ཡོད་ཀྱང་ཐུག་ཏུ་བཅུག་མེད་འདུག

འདི་ལོའི་ཕྱི་ཟླ་ ༦ ནང་ཁྲིམས་རྩོད་པ་ལིན་ཆི་ལི་(Lin Qilei)ལགས་ཀྱིས། བཀྲ་ཤིས་དབང་ཕྱུག་ལགས་ཀྱིས་ཉེས་པ་གང་ཡང་བསགས་མེད་ན་ཡང་། རྒྱ་ནག་གཞུང་གིས་ཁོང་ལ་ཁྲིམས་ཐག་བཅད་པ་ནི་ཁྲིམས་འགལ་ཡིན་པ་དང་། རྒྱ་ནག་གི་ཁྲིམས་ནི་ཆབ་སྲིད་ཁོ་ནའི་དབང་བསྒྱུར་འོག་ཡོད་སྐོར་སྐྱོན་བརྗོད་གནང་ཡོད་པ་དང་། དེ་བཞིན་ཨ་རི་སོགས་ཀྱི་རྒྱལ་སྤྱིའི་འགྲོ་བ་མིའི་ཚོགས་སྡེ་ཁག་ནས་ཀྱང་རྒྱ་ནག་གཞུང་གིས་བཀྲ་ཤིས་དབང་ཕྱུག་ལགས་ལ་དྲང་བདེན་མིན་པའི་ཁྲིམས་ཆད་བཏང་ཡོད་སྐོར་སྐྱོན་བརྗོད་གནང་བཞིན་ཡོད་པ་རེད།

ཕྱི་ལོ་ ༢༠༡༥ ལོར་བཀྲ་ཤིས་དབང་ཕྱུག་ལགས་ཀྱིས་པེ་ཅིན་དུ་གནས་སྡོད་ནེའུ་ཡོག་དུས་བབ་ཡན་ལག་གི་གསར་འགོད་པར་རྒྱ་ནག་གཞུང་གི་སྲིད་བྱུས་འོག བོད་ཁུལ་གྱི་སློབ་གྲྭ་ཁག་ཏུ་བོད་སྐད་ཡིག་སློབ་གསོ་རྩ་མེད་བཟོ་ཡི་ཡོད་པ་དང་། བོད་ཕྲུག་བྱིས་པའི་བོད་སྐད་ཡིག་གི་གནས་ཚད་ཉེན་ཚབས་ཅན་དུ་གྱུར་ཡོད་སྐོར་འགྲེལ་བརྗོད་བྱས་པར་བརྟེན། ཕྱི་ལོ་ ༢༠༡༦ ཟླ་༡ ཚེས་ ༢༧ ཉིན་རྒ་སྐྱེ་རྒུ་མདོའི་ཉེན་རྟོག་པས་ཁོང་འཛིན་བཟུང་བྱས་ཏེ་ལོ་གཉིས་ལྷག་རིང་བཀག་ཉར་འོག་བཞག་ཡོད་པ་དང་། ཕྱི་ལོ་ ༢༠༡༨ ཟླ་ ༥ ཚེས་ ༢༢ ཉིན་རྒ་སྐྱེ་རྒུ་མདོའི་འབྲིང་རིམ་མི་མང་ཁྲིམས་ཁང་ཟེར་བ་ཞིག་གིས། བཀྲ་ཤིས་དབང་ཕྱུག་ལགས་ཀྱིས་རྒྱལ་ཁབ་ཁ་བྲལ་གཏོང་ཐབས་ཀྱི་བྱ་སྤྱོད་སྤེལ་བའི་ཉེས་མིང་གཡོགས་ཏེ་ལོ་ ༥ ཡི་བཙོན་འཇུག་ཁྲིམས་ཐག་བཅད་ཡོད་པ་རེད།

གསར་འགོད་པ། སངས་རྒྱས་དཀོན་མཆོག