མེ་སྐྱོན་བྱུང་བའི་དུད་ཚང་ ༡༦ ལ་རོཊ་དངུལ་འབུམ་ ༣༦ ལྷག་གནང་འདུག

བོད་མིའི་སྒྲིག་འཛུགས་ནང་སྲིད་ལས་ཁུངས་ནས་ཨེ་ཊ་ནཱ་གྷར་གྱི་བོད་མིའི་དུད་ཚང་ ༡༦ གི་ཚོང་ཁང་ཟ་ཁང་ལ་མེ་སྐྱོན་ཚབས་ཆེན་བྱུང་བ་དེར་རོགས་དངུལ་ཧིན་སྒོར་ ༣༦,༣༩,༣༦༢ བསྡུ་རུབ་གནང་འདུག

འདི་ལོའི་ཕྱི་ཟླ་ ༢ ཚེས་ ༡༤ ཉིན་གྱི་མཚན་མོར། ཨ་རུ་ན་ཅལ་མངའ་སྡེའི་རྒྱལ་ས་ཨེ་ཊ་ནཱ་གྷར་ཉེ་འདབས་སུ་ཡོད་པའི་ནཱ་ཧར་ལཱ་གྷན་ (Naharlagun)གྱི་ཀྲ་ཀར་ཚོང་རར་(Takar Comlex)མེ་སྐྱོན་ཆེན་པོ་བཟོས་ཏེ། བོད་མིའི་དུད་ཚང་ ༡༦ གི་ཚོང་ཁང་ཟ་ཁང་ཚང་མ་མེར་ཚིག་ནས་གྱོང་གུད་ཚབས་ཆེན་བྱུང་རྗེས། ས་གནས་བོད་མིའི་འཐུས་ཚབ་ཅིག་དྷ་རམ་ས་ལར་ཡོང་ནས་སྲིད་སྐྱོང་བློ་བཟང་སེང་གེ་མཆོག་དང་བོད་མི་མང་སྤྱི་འཐུས་ཚོགས་གཙོ་མཆོག དེ་བཞིན་ནང་སྲིད་ལས་ཁུངས་བཅས་སུ་ཆེད་བཅར་གྱིས། ཡིག་ངག་གཉིས་ཐོག་ནས་གོད་ཆག་གི་གནས་སྟངས་ཡར་ཞུ་བྱས་ཏེ་རོགས་རམ་གནང་སྐྱོང་ཡོང་བའི་རེ་འབོད་ཞུས་ཡོད་པ་ལྟར། བོད་མིའི་སྒྲིག་འཛུགས་ནང་སྲིད་ལས་ཁུངས་ནས་རོགས་དངུལ་ཧིན་སྒོར་འབུམ་ ༣༦ ལྷག་བསྡུ་རུབ་གནང་ཡོད་འདུག

དེ་རིང་བོད་མིའི་སྒྲིག་འཛུགས་ཀྱི་དྲ་བའི་ཐོག་དེའི་སྐོར་ལ་གསར་འགོད་གསལ་བསྒྲགས་ཤིག་སྤེལ་བའི་ནང་། བོད་མིའི་སྒྲིག་འཛུགས་ནང་སྲིད་ལས་ཁུངས་ནས་ཚབས་ཆེའི་གནས་དོན་བྱུང་མ་ཐག་ཕྱི་ནང་རོགས་ཚོགས་སྤྱི་སྒེར་དང་། རྒྱ་བལ་འབྲུག་གསུམ་ནང་གནས་སྡོད་བོད་རིགས་སྤུན་ཟླ་ཡོངས་ལ་གདུང་སེམས་མཉམ་བསྐྱེད་དང་གཅིག་ཕན་གཅིག་གྲོགས་མཚོན་བྱེད་ཞལ་འདེབས་བསྡུ་སློང་ཞབས་བསྐུལ་གསལ་བསྒྲགས་བསྐྱངས་དོན་བཞིན། གཏོང་ཕོད་ཅན་གྱི་རོགས་ཚོགས་དང་མང་ཚོགས་བཅས་ནས་དུས་བཀག་ནང་ཚུད་ཞལ་འདེབས་ཧིན་སྒོར་ ༣༦,༣༩,༣༦༢ ཐོབ་པ་བྱུང་ཡོད། ཅེས་དང་། ས་གནས་ཀྱི་དུད་ཚང་ ༡༦ དེ་ལ་གཅིག་མཚུངས་ཆ་བགོས་ཀྱིས་དུད་ཚང་རེར་ཧིན་སྒོར་ ༢,༢༧,༠༠༠ རེ་འཐོབ་རྒྱུ་དང་། ལྷག་འཕྲོས་ཧིན་སྒོར་ ༧,༣༦༢ འབྲེལ་ཡོད་ས་མགོའི་ལས་ཁུངས་ནས་ཞལ་འདེབས་བགོ་འགྲེམས་སྐབས་སུ་སྣུམ་འཁོར་སོགས་འགྲོ་གྲོན་ཙག་ཙིག་ཆེད་བཏང་ཟིན་ཡོད། ཅེས་གསུངས་འདུག

འདི་གའི་གསར་འགོད་པས་ནང་སྲིད་དྲུང་ཆེ་དཔེ་ཟུར་དབང་འདུས་ཚེ་རིང་ལགས་སུ་བོད་མིའི་སྒྲིག་འཛུགས་ནང་སྲིད་ལས་ཁུངས་ནས་བསྡུས་རུབ་གནང་པའི་རོགས་དངུལ་འབུམ ༣༦ ལྷག་དེ་ག་དུས་ཤིག་ལ་ས་གནས་མི་མང་གི་ལག་ཏུ་འབྱོར་གྱི་ཡོད་པ་དང་། ད་ལྟ་དངུལ་རོགས་བསྡུ་རུབ་མཚམས་བཞག་ཡོད་མེད་བཀའ་འདྲི་ཞུས་པར་ཁོང་གིས། དངུལ་དེ་དག་ས་གནས་མགོ་འཛིན་བརྒྱུད་ནས་མི་མང་ལ་འབུལ་གྱི་ཡོད་པ་དང་། ཉིན་གཅིག་གཉིས་ནང་དངུལ་ཚང་མ་མི་མང་གི་ལག་ཏུ་འབྱོར་ཐུབ་རྒྱུ་ཡིན་སྐོར་དང་། ཐེངས་འདིའི་རོགས་དངུལ་བསྡུ་ལེན་ཆེད་ནང་སྲིད་ལས་ཁུངས་ནས་ཟུར་དུ་མི་ལྔ་ལས་གྲུབ་པའི་ཚོགས་ཆུང་ཞིག་བཙུགས་ཏེ་བསྡུས་ཡོད་པ་དང་། ད་ལྟ་རོགས་དངུལ་བསྡུ་མཚམས་ཡོངས་སུ་བཞག་ཡོད་པ་རེད། ཅེས་གསུངས་བྱུང་།

ཡང་གསལ་བསྒྲགས་ཀྱི་མཇུག་ཏུ། གོ་སྐབས་འདི་བརྒྱུད་ད་ལན་མཐའ་མཚམས་ས་ཁུལ་ཨེ་ཊ་ནཱ་གྷར་ཁུལ་གནས་བོད་མི་རྣམས་ལ་ལྡོག་བྲལ་དཀའ་ཚེགས་ཀྱི་གནས་སུ་ལྷུང་བའི་སྐབས་འདིར་གཏོང་ཕོད་ཅན་གྱི་ཕྱི་ནང་རོགས་ཚོགས་དང་། མང་ཚོགས་བཅས་ནས་ཞལ་འདེབས་རྒྱ་གང་ཆེ་གནང་པར་བོད་མིའི་སྒྲིག་འཛུགས་ནང་སྲིད་ལས་ཁུངས་ནས་ཐུགས་རྗེ་བླ་མེད་དུ་ཆེ་ཞུ་རྒྱུ་དང་། སླད་ཀྱང་དེ་ལྟའི་གནས་དོན་ས་གནས་གང་དུ་བྱུང་ཡང་སྐྱིད་སྡུག་མཉམ་མྱོང་གི་རོགས་ཕན་རྒྱ་གང་ཆེ་གནང་ཐབས་ཡོང་བའི་འབོད་སྐུལ་གནང་འདུག

གསར་འགོད་པ། སངས་རྒྱས་དཀོན་མཆོག