དབྱིན་ཡུལ་གྱི་བྷི་ལན་ཧེམ་ཕོ་བྲང་གི་ཨ་སྒོར་ས་ཡ་ ༦ གི་རིན་ཐང་ལྡན་པའི་གསེར་གྱི་གསང་སྤྱོད་རྐུན་མས་བརྐུས་ཏེ་རྩད་གཅོད་བྱེད་བཞིན་པའི་སྒང་ཡིན་འདུག
ཁ་སང་རྒྱལ་སྤྱིའི་བརྒྱུད་ལམ་ཁག་ཏུ་གནས་ཚུལ་ཐོན་པ་ལྟར་ན། ཟླ་འདིའི་ཕྱི་ཚེས་ ༡༤ ཉིན་གྱི་ཞོགས་པའི་ཆུ་ཚོད་ ༤།༥༠ སྟེང་དབྱིན་ཡུལ་གྱི་ལྷོ་ཤར་རྫོང་(West Oxford)དུ་ཡོད་པའི་བྷི་ལན་ཧེམ་ཕོ་བྲང་(Blenheim Palace)གི་གསེར་གྱི་གསང་སྤྱོད་རྐུན་མས་ཁྱེར་ཡོད་པ་དང་། ཉེན་རྟོག་པས་གནད་དོན་དེར་འབྲེལ་བ་ཡོད་པའི་དོགས་གཞིའི་འོག་རང་ལོ་ ༦༦ ཡིན་པའི་སྐྱེས་པ་ཞིག་འཛིན་བཟུང་བྱས་ཡོད་པ་དང་། ཨ་སྒོར་ས་ཡ་ ༦ རིན་ཐང་ལྡན་པའི་གསེར་གྱི་གསང་སྤྱོད་དེ་རྩད་གཅོད་བྱེད་བཞིན་པའི་སྒང་ཡིན་འདུག
ཨི་ཊ་ལི་ནས་ཡིན་པའི་གསེར་གྱི་གསང་སྤྱོད་བཟོ་འགོད་པ་མའོ་རི་ཛི་ཨོ་ཁ་ཊི་ལན་(Maurizio Cattelan)གྱིས། ཟླ་འདིའི་ཕྱི་ཚེས་ ༡༢ ཉིན་ནས་མགོ་འཛུགས་ཀྱིས་ཟླ་རྗེས་མའི་ཚེས་ ༢༧ བར་དབྱིན་ཡུལ་རྒྱལ་པོ་(John Churchill)ཕོ་བྲང་དུ། ཁོ་རང་གི་སྒྱུ་རྩལ་བརྩམས་ཆོས་རྣམས་འགྲེམས་སྟོན་བྱེད་བཞིན་ཡོད་པ་དང་། གསེར་གྱི་གསང་སྦྱོད་དེ་ནི་ཁོའི་བརྩམས་ཆོས་ཁྲོད་ཀྱི་ཡང་སྙིང་ལྟ་བུ་ཡིན་པས། ཁོས་གསེར་གྱི་གསང་སྤྱོད་དེར་ཨ་རི་ཞེས་པའི་མིང་བཏགས་ཡོད་པ་དང་། དེ་ལྟར་འདོགས་དོན་ནི་མི་ཞིག་གིས་ཨ་སྒོར་ ༡༠༠ དང་། ཡང་ན་ཨ་སྒོར་ ༢༠༠ ཡི་ཟ་མ་ཟས་ཀྱང་། མཐའ་འཇུག་གི་གྲུབ་འབྲས་གསང་སྤྱོད་ནང་མ་གཏོགས་འགྲོ་ས་མེད་པས་གཅིག་མཚུངས་ཡིན་པ་བསྟན་ཏེ། འབྱོར་ལྡན་གྲལ་རིམ་ལ་ངོ་རྒོལ་གྱི་ཚུལ་དུ་བསྐྲུན་པ་ཞིག་ཡིན་སྐོར་བརྗོད་འདུག
ཊ་མི་སི་ཝེ་ལི་(Thames Valley)ས་གནས་ཀྱི་ཉེན་རྟོག་ཁང་གི་མགོ་འཁྲིད་གཞོན་པ་ཇི་སི་མིལ་ནེ་(Jess Milne)ཡིས། ང་ཚོས་རླངས་འཁོར་གཉིས་ཅན་གྱི་ནག་ཚོགས་ཤིག་ལ་དོགས་གཞི་བྱེད་ཀྱི་ཡོད་ལ། གང་ཐུབ་ཅི་ཐུབ་ཀྱིས་གསེར་གྱི་གསང་སྤྱོད་དེ་ལག་སོན་ཡོང་སླད་ཉེས་ཅན་པ་འཚོལ་ཞིབ་བྱེད་བཞིན་ཡོད། ད་ལྟ་ང་ཚོས་རྗེས་འདེད་བྱེད་བཞིན་པའི་སྒང་ཡིན་པ་མ་ཟད། ང་ཚོས་ཉེས་ཅན་འཚོལ་ཞིབ་རིང་བྷི་ལན་ཧེམ་ཕོ་བྲང་དུ་ཉེན་རྟོག་པ་འགྲེམས་འཇོག་གིས་སྲུང་སྐྱོབ་བྱེད་ཀྱི་ཡོད། ཅེས་བརྗོད་འདུག
སྒྱུ་རྩལ་བ་མའོ་རི་ཛི་ཨོ་ཁ་ཊི་ལན་ལགས་ཀྱིས། དེ་རིང་སྔ་དྲོར་གསེར་གྱི་གསང་སྤྱོད་རྐུན་ལ་ཤོར་འདུག་པའི་གནས་ཚུལ་འབྱོར་བྱུང་། དེ་དུས་ངས་བསམ་པར་རྩེད་མཚར་ཡིན་རྒྱུ་རེད་བསམ་ནས་སྣང་མེད་བཏང་བ་ཡིན། འོན་ཀྱང་། རྗེས་སུ་གནས་ཚུལ་དངོས་གནས་ཡིན་པ་ཤེས་པས། དེ་ནི་གློག་བརྙན་རྫུན་བཟོ་བྱེད་བཞིན་པ་ལྟ་བུ་མ་ཡིན་པར་ངའི་གསང་སྤྱོད་རྐུན་མས་འཁྱེར་ཡོད་པ་རེད། ཅེས་དང་། སྙིང་ནས་བརྩེ་བའི་རྐུན་མ་ལགས། གལ་སྲིད་ཁྱེད་ཀྱིས་འཕྲིན་ཡིག་འདི་ཀློག་གི་ཡོད་ཚེ། ཁྱོད་གསེར་གྱི་གསང་སྤྱོད་དེར་དགའ་པོ་ཅི་ཙམ་ཡོད་པ་དང་། ཁྱེད་ཀྱིས་གསེར་ཐོག་ཏུ་གཅིན་པ་གཏོང་སྐབས་ཚོར་སྣང་ག་རེ་བྱུང་མིན་ང་ལ་བཤད་རོགས། ཞེས་སོགས་བརྗོད་འདུག
བྷི་ལན་ཧེམ་ཞེས་པའི་ཕོ་བྲང་དེ་ཕྱི་ལོ་ ༡༩༨༧ ལོར་འཛམ་གླིང་གི་ཤུལ་བཞག་རིག་གནས་སྲུང་སྐྱོབ་ཀྱི་ཁོངས་སུ་ཚུད་ཡོད་པ་དང་། ཨ་རི་ཞེས་པའི་གསེར་གྱི་གསང་སྤྱོད་དེ་ཕྱི་ལོོ་ ༢༠༡༦ ལོར་སྒྱུ་རྩལ་བ་མའོ་རི་ཛི་ཨོ་ཁ་ཊི་ལན་ལགས་ཀྱིས། ཨ་རིའི་ནེའུ་ཡོག་(The Guggenheim)འགྲེམས་སྟོན་ཁང་དུ་བཟོས་ཤིང་། ཐོག་མར་ཨ་རིའི་ནེའུ་ཡོག་གྲོང་ཁྱེར་དུ་འགྲེམས་སྟོན་བྱས་སྐབས། ཉིན་རེར་མི་གྲངས་སྟོང་ཕྲག་མང་པོས་གསང་སྤྱོད་དེ་བེད་སྤྱོད་བྱེད་པར་སྒུག་དགོས་བྱུང་ཡོད་པ་དང་། ཕྱི་ལོ་ ༢༠༡༧ ལོར་སླར་ཡང་ཨ་རིའི་ནང་འགྲེམས་སྟོན་བྱེད་སྐབས་ཨ་རིའི་སྲིད་འཛིན་ཊོམ་ཕུ་མཆོག་ལ་གཡར་མྱོང་ཡོད་པར་བཤད།
གསར་འགོད་པ། སྐལ་བཟང་སྦྱིན་པ།
ཕུང་པོ་མི་གཙང་ཟས་ཀྱིས་སྐྱལ་བ་རེད།
ཀྱག་ཅིན་གཡུགས་ས་གསེར་ལ་བཟོས་པ་དེ།
སྤྱོད་ངན་ངོམས་གསོ་མི་ན་ག་འདྲ་རེད།
ཕོ་རྒོད་རྐུ་མ་ཁྱོད་ལ་མཆོད་སེམས་བྱུང།
ཧཧཧཧཧ
ང་ཚོས་མཐོང་ཚད་རིག་ཚད་ཀྱི་དངོས་པོ་གྲངས་མེད་བཟས་པ་དེ་་་་གསེར་གྱི་དངོས་པོའི་ནང་དུ་གཏོང་བ་དེ་མ་འགྲིག་པ་ཅི།