རྒྱ་ནག་གཞུང་གིས་བལ་ཡུལ་ནང་ལོ་གསུམ་རིང་རང་བྱུང་གོད་ཆག་རོགས་རམ་ཆེད་ཨ་སྒོར་ས་ཡ་ ༢༡ དང་བལ་ཡུལ་གྱི་དམག་མི་ཚོར་མྱུར་སྐྱོབ་ཡོ་ཆས་མཁོ་སྤྲོད་བྱ་རྒྱུ་ཡིན་འདུག
ཁ་སང་ཕྱི་ཚེས་ ༢༡ ཉིན། བལ་ཡུལ་གཞུང་ཕྱོགས་ནས་གསལ་བསྒྲགས་པའི་གནས་ཚུལ་ལྟར་ན། རྒྱ་ནག་གིས་བལ་ཡུལ་ནང་ལོ་གསུམ་རིང་རང་བྱུང་གོད་ཆག་གི་རོགས་དངུལ་ཆེད། ཨ་སྒོར་ས་ཡ་ ༢༡ ཙམ་སྤྲད་ཡོད་པ་དང་། རོགས་དངུལ་དེ་ནི་བདུན་ཕྲག་སྔོན་མའི་ནང་བལ་ཡུལ་གྱི་རྒྱལ་སྲུང་བློན་ཆེན་ (Ishwar Pokharel) ལགས་རྒྱ་ནག་གི་རྒྱལ་ས་པེ་ཅིན་ལ་སྐོར་སྐྱོད་སྐབས། རྒྱ་ནག་གཞུང་མོས་མཐུན་ས་རྟགས་བརྒྱབ་ནས་སྤྲད་པ་ཞིག་ཡིན་འདུག
གསར་འགོད་གསལ་བསྒྲགས་སྐབས་བལ་ཡུལ་རྒྱལ་སྲུང་བློན་ཆེན་གྱིས། ང་ཚོའི་དམག་མིའི་དགོས་མཁོ་ལ་གཞིགས་ནས་མ་འོངས་ལོ་གསུམ་གྱི་རིང་མིའི་བདེ་སྡུག་དང་རང་བྱུང་གོད་ཆག་མྱུར་སྐྱོབ་ཆེད། རྒྱ་ནག་གཞུང་གིས་བལ་ཡུལ་གྱི་དམག་མི་ཚོར་མྱུར་སྐྱོབ་ཡོ་ཆས་སྤྲོད་ཀྱི་ཡིན་སྐོར་བརྗོད་ན་ཡང་། ད་ལྟའི་ཆར་རྒྱ་ནག་གཞུང་གིས་བལ་ཡུལ་གྱི་དམག་མིར་མྱུར་སྐྱོབ་ཡོ་ཆས་ག་རེ་སྤྲོད་འཆར་ཡོད་མེད་ཐག་གཅོད་བྱས་མེད་སྐོར་བརྗོད་འདུག
ཟླ་འདིའི་ཕྱི་ཚེས་ ༡༢ ཉིན་ནས་ཉིན་གཉིས་རིང་རྒྱ་ནག་གི་སྲིད་འཛིན་ཞི་ཅིན་ཕིན་བལ་ཡུལ་ལ་སྐོར་སྐྱོད་དུ་བསླེབས་ཡོད་པ་དང་། སྐབས་དེར་ཕྱོགས་གཉིས་ནས་གྲོས་ཆོད་ཁག་ཅིག་བཞག་ཡོད་པའི་ཁྲོད། རྒྱུད་གཅིག་ལམ་གཅིག་གི་ལས་གཞིའི་འོག་བལ་བོད་གཉིས་བར་མཐུད་པའི་མེ་འཁོར་དང་གཞུང་ལམ་ལས་འཆར་གཉིས་ལ་གྲོས་ཆོད་བཞག་ཡོད་པ་དང་། དེ་ནི་རྒྱ་ནག་གི་སྲིད་འཛིན་ཞིག་ལོ་ངོ་ ༢༠ ལྷག་རིང་བལ་ཡུལ་ནང་གཞུང་འབྲེལ་སྐོར་སྐྱོད་དུ་ཕྱིན་པ་ཐོག་མ་དེ་ཆགས་ཡོད་པ་རེད།
བལ་ཡུལ་ནི་རྒྱ་གར་གྱི་རོགས་སྐྱོར་ལ་ཤུགས་ཆེན་བརྟེན་པའི་རྒྱལ་ཁབ་ཞིག་ཡིན་ནའང་། ཉེ་བའི་ལོ་འགའི་རིང་ནས་རྒྱ་དཀར་ནག་གཉིས་ལ་བཏང་སྙོམས་བསྟུན་མཁས་ཀྱིས་འབྲེལ་བ་འཛུགས་ཐབས་བྱས་ཏེ། ཕྱོགས་གཉིས་ནས་རོགས་རམ་འཚོལ་པར་འབད་བརྩོན་བྱེད་བཞིན་ཡོད་པས། རྒྱ་ནག་གཞུང་གིས་བལ་ཡུལ་ནང་ལས་གཞི་སྣ་མང་བརྩམས་ཏེ་ཤུགས་རྐྱེན་ཆེ་རུ་འགྲོ་བཞིན་པ་དང་བསྟུན། རྒྱ་གར་ལ་དོ་སྣང་དང་བློ་འཚབ་གསར་པ་ཞིག་སྐྱེས་ནས་ཕྱི་ལོ་ ༢༠༡༨ ནང་སྲིད་འཛིན་མུ་དྷུ་མཆོག་ཐེངས་གཉིས་ཙམ་ལ་ཕེབས་ཡོད་པ་རེད།
ཕྱི་ལོ་ ༢༠༡༥ ལོར་བལ་ཡུལ་ནང་ཚད་རིམ་ ༨ ཙམ་གྱི་ས་ཡོམ་བྱུང་སྟེ་མི་གྲངས་སྟོང་ ༩ ཙམ་འདས་གྲོངས་དང་ཁྲི་ ༢ ལྷག་ལ་རྨས་སྐྱོན་བྱུང་ཡོད་པ་མ་ཟད། རྒྱུ་དངོས་འབོར་ཆེན་ལ་གྱོང་གུད་ཐེབས་ཡོད་པ་པ་དང་། སྐབས་དེར་རྒྱ་ནག་གཞུང་བལ་ཡུལ་ལ་མྱུར་སྐྱོབ་རོགས་རམ་བྱེད་མཁན་ཐོག་མའི་གྲས་སུ་ཡོད་འདུག
གསར་འགོད་པ། ཀླུ་མགོན་ཐར།
རྒྱ་གུང་ཁྲན་དྲིན་ཆེན་ཕ་མ་རེད།
དངུལ་དཱ་་ཡངས་ཆར་པ་བབས་བབས་རེད།
རྒྱ་གུང་ཁྲན་གཡོ་རྒྱུའི་འཁོར་ལོ་རེད།
བལ་གཞུང་ཟབ་ཟབ་གནང་རོགས་གནང།
༄༅། གཟབ་དགོས་གཟབ་དགོས་བལ་གཞུང་གཟབ་དགོས། རྒྱ་ནག་དམར་པོའི་གཞུང་ལ་གཟབ་དགོས།
དང་ཐོག་ཁ་སྙན་དངུལ་གྱིས་བསུ་ནས་འཛུམ་ན་ཡང། རྗེས་སུ་རིམ་གྱི་བསྡུ་བཟུང་བྱེད་དེ་དྲག་གནོན་བྱེད།
མ་འཐམ་མ་འཐམ་རྒྱ་དམར་གཞུང་ལ་མ་འཐམ། ཟས་ཡོང་ཟས་ཡོང་སྒེར་གཞུང་གཉིས་ཀ་ཟས་ཡོང།