བོད་ཀྱི་ཟློས་གར་ཚོགས་པ་ནས་༧གོང་ས་མཆོག་གི་བཀའ་དྲིན་རྗེས་དྲན་དང་སྐུ་གེགས་མཚན་མ་ཡོད་རིགས་ཞི་ནས་མཛད་འཕྲིན་ཕྱོགས་བཅུར་རྒྱས་པ་མཚོན་ཕྱིར་སྐུ་རྒྱུ་རིན་ཆེན་སྣ་ཚོགས་ལས་གྲུབ་པའི་དཔལ་ཕྱག་ན་རྡོ་རྗེའི་སྤྲུལ་པར་གྲགས་པ་གསང་བདག་རྔོན་པའི་སྣང་བརྙན་ཞིག་འབུལ་ལམ་ཞུས་སོང་།
དེ་རིང་སྔ་དྲོའི་ཆུ་ཚོད་ ༩ ཐོག་བཞུགས་སྒར་དྷ་སའི་བོད་ཀྱི་ཟློས་གར་ཁང་དུ། ཟློས་གར་ཚོགས་པ་དབུ་བརྙེས་ནས་ལོ་ངོ་ཧྲིལ་བོ་ ༦༠ འཁོར་བ་དང་རྒྱལ་སྤྱིའི་བོད་ཀྱི་ཟློས་གར་སྒྱུ་རྩལ་ཞིབ་འཇུག་བགྲོ་གླེང་ཚོགས་ཆེན་ཐེངས་དང་པོ་དབུ་འབྱེད་ཀྱི་མཛད་སྒོའི་ཐོག ༧གོང་ས་རྒྱལ་བ་རིན་པོ་ཆེ་མཆོག་ལ་ཇི་ལྟར་གསོལ་འདེབས་ཞུས་པ་ལྟར། ཆིབས་བསྒྱུར་བཀའ་དྲིན་བསྐྱངས་ཏེ་བོད་ཀྱི་ཟློས་གར་ཚོགས་པའི་བོད་ཀྱི་གར་གླུ་རིག་རྩལ་ཁང་གསར་པར་རབ་གནས་གནང་སོང་ལ། མཛད་སྒོའི་ཐོག་བོད་ཀྱི་ཟློས་གར་ཚོགས་པའི་འགན་འཛིན་ལྷན་ཚོགས་ནས་༧གོང་ས་མཆོག་ལ་མཎྜལ་རྟེན་གསུམ་འདེགས་འབུལ་དང་། བཀའ་དྲིན་རྗེས་དྲན་དང་མགོན་པོ་མཆོག་གི་སྐུ་གེགས་མཚན་མ་ཡོད་རིགས་ཞི་ནས། མཛད་འཕྲིན་ཕྱོགས་བཅུར་རྒྱས་པ་མཚོན་ཕྱིར་སྐུ་རྒྱུ་རིན་ཆེན་སྣ་ཚོགས་ལས་གྲུབ་པའི་དཔལ་ཕྱག་ན་རྡོ་རྗེའི་སྤྲུལ་པར་གྲགས་པ་གསང་བདག་རྔོན་པའི་སྣང་བརྙན་ཞིག་བཀའ་དྲིན་རྗེས་དྲན་གྱི་གཟེངས་རྟགས་སུ་འབུལ་ལམ་ཞུས་སོང་བ་དང་། དེ་བཞིན་དགུང་ལོ་ ༩༣ ལ་ཕེབས་པའི་བོད་ཀྱི་རོལ་མོ་བ་བསམ་ཕོ་འཇིགས་མེད་དབང་ཆེན་ལགས་ལ་བོད་གཞིས་བྱེས་གཉིས་ནང་བོད་ཀྱི་རོལ་ཆ་མཁན་སྐུ་ན་བགྲེས་ཤོས་ཀྱི་མི་གཡང་དང་། རྒྱལ་ཁབ་ཀྱི་གཅེས་ནོར་དཔེ་བཟང་ཕུལ་བྱུང་མི་སྣའི་མཚན་གསོལ་གཟེངས་རྟགས་ཤིག་གནང་། གཞན་ཡང་། བོད་ཀྱི་ཟློས་གར་ཚོགས་པའི་ཚོགས་ཁང་གསར་རྒྱག་ལས་གཞིའི་ཆེད་རོགས་དངུལ་སྤྲོད་མཁན་རྣམས་ལ་དྲིན་གཟོའི་ཕྱག་རྟགས་བཅས་གནང་སོང་།
མཛད་སྒོའི་ཐོག་བོད་ཀྱི་ཟློས་གར་ཁང་གི་སྤྱི་ཁྱབ་འགན་འཛིན་ངག་དབང་ཡོན་ཏན་ལགས་ནས་ལས་བསྡོམས་སྙན་སྒྲོན་ཞུ་སྐབས། རྒྱ་གར་བྱང་ཕྱོགས་མ་སུ་རིར་༧གོང་ས་རྒྱལ་བ་རིན་པོ་ཆེ་མཆོག་ནས་དགོས་པ་དུ་མའི་ཆེད་རང་རེའི་བོད་དོན་དྲིལ་བསྒྲགས་ཤུགས་སྣོན་ཆེད་གཏམ་བརྗོད་ཟློས་གར་ཚོགས་པ་ཞིག་འཛུགས་ཐུབ་ན་ཕན་རླབས་ཆེ་བའི་བཀའ་སློབ་ལམ་སྟོན་བསྩལ་བ་ནས་བཟུང་སྔ་རྗེས་སུ་ལམ་སྟོན་གནང་སྟེ། ཕྱི་ལོ་ ༡༩༥༩ ཟླ་ ༨ ཚེས་ ༡༡ ཉིན་ས་གནས་ཀ་ལིམ་པོང་དུ་དང་བླངས་ཚོགས་མི་ ༢༦ ལས་གྲུབ་པ་ཞིག་ལ་འཁྲབ་སྟོན་གྱི་ཟབ་སྦྱོང་སྤྲད་དེ་བོད་ཀྱི་ཤེས་རིག་ཟློས་གར་ཐོག་མར་མགོ་བཙུགས་པ་ནས་བཟུང་། ད་བར་དབུ་དགེ་ལས་ཟུར་ཚོགས་མི་གྲངས་ ༥༠༠ ལྷག་གིས་རྒྱལ་ཁབ་འདྲ་མིན་ ༣༥ ལྷག་གི་ནང་བོད་ཀྱི་ཐུན་མོང་མ་ཡིན་པའི་རིག་གཞུང་དྲིལ་བསྒྲགས་སྤེལ་ཐུབ་ཡོད་པར་བསྔགས་བརྗོད་དང་གཟེངས་རྟགས་འདྲ་མིན་ཐོབ་ཡོད་སྐོར་དང་། ལྷ་མོའི་འཁྲབ་གཞུང་དང་ཇོ་བོ་རྗེ་ཨ་ཏེ་ཤ། རྒྱལ་དབང་ལྔ་བ་ཆེན་པོ་དང་རྗེ་བཙུན་མི་ལ་རས་པ། སྟོན་པའི་མཛད་རྣམ་དང་༧ས་སྐྱ་པན་ཊི་ཏ་ཀུན་དགའ་རྒྱལ་མཚན། དེ་བཞིན་དེང་དུས་ཀྱི་གཏམ་བརྗོད་ཟློས་གར་ལམ་ནས་འཁྲབ་གཞུང་གྲངས་མི་ཉུང་བ་ཞིག་གསར་རྩོམ་གྱིས་བོད་མི་འདུས་སྡོད་ཁུལ་གྱི་གཞིས་ཆགས་སུ་འཁྲབ་སྟོན་ཞུས་ཡོད་པ་དང་། ད་ལྟ་ཟློས་གར་ཚོགས་པའི་སྒྱུ་རྩལ་འཛིན་རིམ་ ༤ ལ་སློབ་ཕྲུག་གྲངས་ ༤༠ དང་བྲོ་བ་རྒན་གྲས་གྲངས་བརྒྱད། དགེ་རྒན་གྲངས་ ༨ དང་རིག་གཞུང་སློབ་ཕྲུག་གྲངས་ ༢༡ སོགས་དགེ་ལས་སློབ་ཕྲུག་ཁྱོན་ ༡༠༧ ཡོད་སྐོར་དང་། ཚོགས་ཁང་གསར་རྒྱག་ཆེད་སྤྱི་འཐུས་གྲོས་ཚོགས་ནས་སྔོན་རྩིས་མ་དངུལ་ས་ཡ་ ༧༠ ཞུས་པ་ནས་བོད་མིའི་སྒྲིག་འཛུགས་བཀའ་ཤག་ནས་ས་ཡ་ ༥༥ དང་སུད་སིར་གནས་བཞུགས་ནོར་བཟང་ཐེབས་རྩ་ནས་ས་ཡ་ ༡༤ ཙམ། མཚན་མ་སྨྲོས་པའི་ཁག་ཅིག་ནས་ས་ཡ་ ༡ གསོལ་བསྩལ་བྱུང་ཡོད་སྐོར་སོགས་བརྗོད་སོང་།
རྒྱལ་སྤྱིའི་བོད་ཀྱི་ཟློས་གར་སྒྱུ་རྩལ་ཞིབ་འཇུག་བགྲོ་གླེང་ཚོགས་ཆེན་སྐབས་དང་པོ་གཙོ་སྐྱོང་གནང་མཁན་ཨ་མྱེས་རྨ་ཆེན་བོད་ཀྱི་རིག་གཞུང་ཞིབ་འཇུག་ཁང་གི་འགན་འཛིན་བཀྲ་ཤིས་ཚེ་རིང་ལགས་ཀྱིས་ངོ་སྤྲོད་གསུང་བཤད་གནང་སྐབས། བོད་ཀྱི་ཟློས་གར་སྒྱུ་རྩལ་ཞིབ་འཇུག་པ་བོད་མི་དང་ཕྱི་རྒྱལ་མི་སྣ་ ༥༠ ལྷག་མགྲོན་འབོད་ཞུས་ཀྱང་། དངོས་སུ་ཚོགས་བཅར་གནང་མཁན་བོད་མི་ ༦ དང་ཕྱིའི་རྒྱལ་ཁབ་ ༩ ནས་མཁས་དབང་མི་སྣ་ ༡༧ བཅས་ཁྱོན་བསྡོམས་ཞིབ་འཇུག་པ་བགྲེས་གཞོན་ ༢༣ ཕེབས་ཐུབ་པ་བྱུང་ཡོད་པ་དང་། ཐེངས་འདིའི་བགྲོ་གླེང་ཚོགས་ཆེན་བོད་ཀྱི་ཟློས་གར་ཚོགས་པའི་ཚོམས་ཆེན་གསར་པ་དང་ཕྱི་དྲིལ་གློག་ཀླད་སྡེ་ཚན་གྱི་ཚོགས་ཁང་གཉིས་ནང་འཚོག་འཆར་ཡོད་ལ། སྤྱི་ཡོངས་ཀྱི་ཆ་ནས་བོད་ཀྱི་ཟློས་གར་སྒྱུ་རྩལ་ཞེས་པའི་ཁྱབ་ཁོངས་ནང་དགོན་སྡེའི་གར་འཆམ་དང་། གདོན་རྟ་དབྱངས་གསུམ་སོགས་མདོར་ན་སྟོད་མངའ་རིས་སྐོར་གསུམ། བར་དབུས་གཙང་རུ་བཞི། སྨད་མདོ་ཁམས་སྒང་དྲུག་གི་ཁྱོན་སྤྱི་དང་། ཧི་མ་ལ་ཡའི་རི་བརྒྱུད་བོད་རིགས་ཡོངས་ནས་སྔར་ནས་ད་བར་ལག་ལེན་བྱེད་པའི་སྦུག་གཏོང་དཀྲོལ་གསུམ་གྱི་རོལ་ཆའི་རྣམ་གྲངས་ཚང་མ་ཚུད་ཀྱི་ཡོད་པ་དང་། ཚོགས་ཆེན་ཐོག་སྒྲོགས་སྦྱང་གནང་བའི་དབྱིན་བོད་དཔྱད་རྩོམ་ཡོངས་རྫོགས་ཚོགས་ཆེན་ཚར་རྗེས་ཟླ་བ་གསུམ་ནང་མཉམ་འདེབས་ཀྱིས་དཔར་འགྲེམ་གནང་འཆར་ཡོད་སྐོར་སོགས་བརྗོད་སོང་།
དམིགས་བསལ་སྐུ་མགྲོན་བོད་ཀྱི་ཟློས་གར་ཚོགས་པའི་འགན་འཛིན་ལྷན་ཚོགས་ཀྱི་ཚོགས་གཙོ་སྲིད་སྐྱོང་བློ་བཟང་སེང་གེ་མཆོག་གིས། བོད་རྒྱལ་ཁབ་ཤོར་ནས་བཙན་བྱོལ་དུ་འབྱོར་བའི་སྐབས་དེར། ང་ཚོར་གྲོགས་པོའམ་རྒྱབ་རྟེན་ས་གནམ་དང་ས་ལས་མེད་པའི་གནས་སྟངས་དེའི་འོག་ལ། ཐོག་མར་སྒྱུ་རྩལ་བ་འགའ་ཤས་ཤིག་༧གོང་ས་མཆོག་གི་གཟིམ་ཆུང་མཇལ་ཁར་བཅར་རྗེས། ༧གོང་ས་མཆོག་ནས་ད་ལྟ་ཁྱེད་རང་ཚོ་ཉུང་ཤས་ཙམ་ལས་ཡོད་པ་མ་རེད་དེ། སེམས་ཤུགས་མ་ཆགས་པར་ཧུར་ཐག་བྱས་ཏེ་དཀའ་ལས་རྒྱོབས་ཤོག རིམ་གྱིས་ང་ཚོའི་སྒྱུ་རྩལ་དང་ཟློས་གར་འདི་ཡར་རྒྱས་འགྲོ་ཡི་རེད་ཅེས་ལུང་བསྟན་གནང་བ་ནང་བཞིན། ད་ལན་ལོ་ ༦༠ རྗེས་ལ་ང་ཚོའི་བོད་ཀྱི་ཟློས་གར་གྱི་ཚོགས་པ་འདི་ལོ་ངོ་ ༦༠ འཁོར་བའི་དུས་དྲན་སྲུང་གཙི་ཞུ་རྒྱུའི་སྐལ་བ་བཟང་པོ་ཐོབ་པ་འདི། ཐོག་མ་རང་ནས་༧གོང་ས་མཆོག་ནས་མཁྱེན་པའི་ཐོག་ནས་སེམས་ཤུགས་དང་ལམ་སྟོན་གནང་རྗེས། དེ་དུས་སྒྱུ་རྩལ་བ་ཚོས་མི་ཐོག་མི་ཐོག་ནས་སྐུ་ལས་རབ་དང་རིམ་པ་བསྐྱོན་པ་ལ་བརྟེན་ནས་གྲུབ་འབྲས་སྨིན་པ་ཞིག་རེད། དེར་བརྟེན། ༧གོང་ས་མཆོག་གི་རླབས་ཆེན་གྱི་མཛད་འཕྲིན་མང་པོ་ཡོད་པའི་ནང་ནས་མཛད་འཕྲིན་གཅིག་ནི། བོད་ཀྱི་ཟློས་གར་ཚོགས་པ་དེ་ད་ལྟ་བར་དུ་གནས་ཐུབ་ཡོད་པ་མ་ཚད། སློབ་གྲྭ་ཁག་ཚང་མའི་ནང་ཟློས་གར་དགེ་རྒན་ཚོས་ཉིན་ལྟར་༧གོང་ས་མཆོག་གི་བཀའ་དགོངས་གཞིར་བཟུང་སྐུ་ལས་བསྐྱོན་པའི་རྐྱེན་གྱིས་དོ་སྣང་ཅན་གྱི་བོད་པའི་ཕྲུ་གུ་རྣམས་གཞས་གཏོང་རྒྱུ་དང་ཞབས་བྲོ་འཁྲབ་ཤེས་པར་གྱུར་ཡོད། དེ་བཞིན་ཕྱི་རྒྱལ་ཁག་ཏུ་ཡང་ང་ཚོའི་གཞས་སྣ་སྒྱུ་རྩལ་དེ་དག་ངོམ་དུ་ཆོག་པ་ཡོད་པ་དེ་ཡང་ཟློས་གར་འཁྲབ་མཁན་ཟུར་པ་ཚོ་ཕྱི་རྒྱལ་ཁག་ལ་ཕེབས་ཏེ། ༧གོང་ས་མཆོག་ནས་ཁྱེད་རང་ཚོ་བོད་པའི་རིག་གཞུང་གི་སྐུ་ཚབ་ལྟ་བུར་གནང་སྟེ་སྐུ་ལས་བསྐྱོན་ཤོག་ཨང་ཞེས་བཀའ་གནང་བ་བཞིན། རྣམ་པ་ཚོས་སྐུ་ལས་བསྐྱོན་ཏེ་འཛམ་གླིང་ཡོངས་ལ་ང་ཚོའི་རིག་གཞུང་དེ་ངོམ་དུ་ཆོག་པ་ཞིག་ཆགས་ཡོད། ཅེས་དང་། བོད་ནང་མཚོན་ན་བོད་སྡེ་རྒྱ་སྡེར་སྒྱུར་ཐབས་བྱེད་ཀྱི་ཡོད་ཀྱང་། བཙན་བྱོལ་ནང་དུ་ང་ཚོས་སྲོལ་རྒྱུན་ལམ་ལུགས་ཀྱི་སྒྱུ་རྩལ་དང་རིག་གཞུང་དག་སྲུང་སྐྱོབ་ཀྱིས་མ་ཚད་དར་སྤེལ་གནང་ཐུབ་པ་དེ། ༧གོང་ས་མཆོག་གི་བཀའ་དགོངས་གཞིར་བཟུང་རྣམ་པ་ཚོ་ཚང་མས་སྐུ་ལས་བསྐྱོན་པ་ལས་བྱུང་བ་ཞིག་ཡིན་པ་དང་། ད་ལན་ལོ་ ༦༠ ཡི་མཛད་སྒོ་འདི་ཡང་རླབས་ཆེན་གྱི་མཛད་འཕྲིན་ཞིག་ཡིན་སྟབས། བཀའ་ཤག་གི་ཚབ་ཞུས་ཏེ་རྣམ་པ་ཚོ་ཚང་མར་འཚམས་འདྲི་བཀྲ་ཤིས་བདེ་ལེགས་ཞུ་རྒྱུ་ཡིན། ཞེས་གསུངས་སོང་།
ཡང་ཁོང་གིས། བཙན་བྱོལ་བོད་མིའི་སྨན་རྩིས་ཁང་དང་གཞིས་ཆགས། སློབ་གྲྭ་དང་དགོན་སྡེ་ཁག་ཆ་ཚང་ཐོག་མའི་ཆར་༧གོང་ས་རྒྱལ་བ་རིན་པོ་ཆེ་མཆོག་གི་ལམ་སྟོན་ཇི་བཞིན་མི་ཐོག་རྒན་པ་རྣམས་ཀྱིས་སྐུ་ལས་བསྐྱོན་པ་ལ་བརྟེན་ནས་བྱུང་བ་ཞིག་ཡིན་སྐོར་དང་། བོད་མི་སྐྱབས་བཅོལ་བ་དེ་འཛམ་གླིང་གི་སྐྱབས་བཅོལ་བ་གཞན་དང་རྒྱལ་ཁབ་གཞན་འགའ་ཤས་དང་བསྡུར་ན་ཤེས་ཡོན་སོགས་ཀྱི་སྟེང་ནས་ངོམ་དུ་ཆོག་པ་ཤིག་ཡོད་སྐོར་དང་། ད་བར་༧གོང་ས་རྒྱལ་བ་རིན་པོ་ཆེ་མཆོག་རྒྱལ་ཁབ་ ༦༥ ལྷག་ལ་ཕེབས་ཡོད་པ་དང་། ཆེ་བསྟོད་གཟེངས་རྟགས་ ༡༥༠ ལྷག་ཕུལ་ཡོད་ལ། ཕྱག་དེབ་ ༡༠༠ ལྷག་ལྗགས་རྩོམ་གནང་བའི་བཀའ་དྲིན་གྱིས། བོད་མི་སུ་རུང་ཞིག་རྒྱལ་སྤྱིའི་སྡིངས་ཆ་དང་གྲོས་ཚོགས་འཐུས་མི། གནད་ཡོད་མི་སྣ་སུ་ཞིག་དང་ཐུག་འཕྲད་བྱུང་ན་ཡང་། ༧གོང་ས་རྒྱལ་བ་རིན་པོ་ཆེ་མཆོག་ལས་ལྷག་པའི་དབུ་འཁྲིད་ཅིག་འཛམ་གླིང་སྟེང་མེད་པ་དང་། བོད་མི་རྣམས་ཧ་ལས་པའི་བསོད་ནམས་ཆེན་པོ་ཡིན་པ། བོད་དོན་ཞུ་གཏུག་ལ་རྒྱབ་སྐྱོར་བྱ་རྒྱུ་ཡིན་སྐོར་བརྗོད་ཀྱི་ཡོད་པ་དང་། ད་ལྟ་བོད་མི་ཉུང་ཤས་ཙམ་ལས་མིན་ཡང་འཛམ་གླིང་ཐོག་མགོ་དགྱེ་དགྱེ་བྱས་ཏེ་འགྲོ་ཐུབ་པ་དང་། བོད་དོན་དེ་ཡང་འཛམ་གླིང་ཐོག་དར་སྤེལ་ཤུགས་ཆེན་པོ་བྱུང་བཞིན་པ་དེ་ཡང་༧གོང་ས་མཆོག་གི་བཀའ་དྲིན་ཉག་གཅིག་ལ་བརྟེན་ནས་བྱུང་བ་ཞིག་ཡིན་སྐོར་སོགས་གསུངས་སོང་།
དེའི་རྗེས་༧གོང་ས་རྒྱལ་བ་རིན་པོ་ཆེ་མཆོག་ནས་བཀའ་སློབ་ལམ་སྟོན་བསྩལ་སྐབས། ད་ཆ་ངོས་རང་མི་རྒན་ལོ་བརྒྱད་ཅུ་གྱ་ལྔའི་མཚམས་ལ་བསླེབས་ཡོད་པ་དང་། ཐོག་མར་ང་ཚོ་ཕྱི་ལོ་ ༡༩༥༩ ལོར་རྒྱ་གར་ལ་སླེབས་སྐབས་ངོ་ཤེས་པ་གནམ་དང་ས་མ་གཏོགས་མེད་པའི་སྐྱབས་མེད་མགོན་མེད་ལྟ་བུ་ཞིག་ཆགས་ཡོད། ཡིན་ནའང་ང་ཚོ་ལ་བོད་མི་རིགས་ཀྱི་སེམས་ཤུགས་དང་ལྷག་བསམ། སྙིང་སྟོབས་འགྲན་ཟླ་བྲལ་བ་ཞིག་ཡོད་སྟབས་བོད་མི་བཙན་བྱོལ་བ་ཉུང་ཤས་འབྱོར་བ་དེ་ཚོ་ཚང་མས་ཧུར་ཐག་འབད་ཐག་བྱས། ང་ཚོར་སེམས་ཤུགས་སྐྱེད་པའི་རྒྱུ་གཙོ་བོ་ནི་བོད་རྒྱ་ཆེ་མི་མང་དོན་གྱི་བདག་པོ་གཞིས་ལུས་བོད་མི་དེ་དག་རེད། དེ་དག་གིས་སྲོག་དང་བསྡོས་ནས་བོད་མི་རིགས་ཀྱི་ཐོབ་ཐང་དང་བོད་མི་རིགས་ཀྱི་ཆོས་དང་རིག་གཞུང་གཅེས་འཛིན་བྱས་ནས་ལོ་འདི་དག་གི་རིང་ལ་དཀའ་ལས་ཧ་ལས་པ་བརྒྱབ་པ་རེད། བོད་རྒྱ་ཆེའི་མི་མང་ལ་རང་དབང་བྲལ་ཏེ་ཐ་ན་སྲོག་ལ་ཉེན་ཁ་ཡོད་ཀྱང་བོད་ཀྱི་ཆོས་དང་རིག་གཞུང་དེ་དག་བཟུང་ནས་བསྡད་ཡོད་པས། ང་ཚོ་བཙན་བྱོལ་ནང་ཡོད་པའི་བོད་པ་ཚོ་རང་དབང་ལུང་པར་ཡོད་སྟབས། བོད་རྒྱ་ཆེའི་མི་མང་གི་ཚབ་ང་ཚོས་བྱེད་ཀྱི་ཡོད། འཛམ་གླིང་འདིའི་སྟེང་ང་ཚོས་བོད་དོན་བདེན་པ་ཇི་ལྟར་ཡིན་པ་སྟོན་ཐུབ་པ་ཞིག་དང་། གཙོ་བོ་ང་ཚོར་རིག་གཞུང་གཏིང་ཟབ་ཡོད་པ་དེ་མུ་མཐུད་འཛིན་ཐུབ་པ་བྱ་རྒྱུ་གལ་ཆེན་པོ་རེད། ཅེས་གསུངས་སོང་།
ཡང་བོད་ཀྱི་ཟློས་གར་སྐོར་ལ་༧གོང་ས་མཆོག་གིས། ངོས་རང་ཆུང་དུས་རྣམ་ཐར་ཤེས་ཀྱི་མེད་མ་གཏོགས་ལྷ་མོ་ཞེ་དྲག་འཁྲབ་མྱོང་ཡོད། སྔོན་མ་ནས་ངོས་ཀྱིས་ལབ་ཡོད། ཞབས་བྲོ་འཁྲབ་རྒྱུའི་གྲས་དེ་ཚོ་ནི་རྒྱ་མིས་བོད་ཀྱི་ཞབས་བྲོ་འཁྲབ་པ་དེ་འདྲ་ཡོང་གི་ཡོད་པ་རེད། ཡིན་ནའང་། ད་ལྟ་བར་དུ་རྒྱ་རིགས་ནང་བོད་ཀྱི་རྣམ་ཐར་གཏོང་མཁན་ཧ་ལམ་མཐོང་མ་མྱོང་། དེ་བོད་པ་རང་མ་གཏོགས་ཡོང་གི་མེད་པའི་ཟོལ་ལྟ་བུ་ཞིག་འདུག་པས་དེ་ནི་བོད་རང་གི་ཐུན་མོང་མ་ཡིན་པ་ལྟ་བུ་ཞིག་ཆགས་འདུག བོད་པའི་རྣམ་ཐར་དེ་སུ་གཅིག་གིས་ཀྱང་ལད་ཟློས་བྱེད་མ་ཐུབ་པ་ཞིག་ཡོད་དུས་དེ་དགེ་མཚན་ཞིག་རེད། ཁྱེད་རང་ཚོས་ཟློས་གར་ཚོགས་པ་བཙུགས་ནས་ད་བར་ཧུར་ཐག་བྱས་པ་རེད། ང་ཚོའི་འཐབ་རྩོད་འདི་མི་རིགས་ཤིག་གི་འཐབ་རྩོད་ཡིན་དུས་མི་རབས་བརྗེ་ནས་འགྲོ་ཡི་ཡོད་པ་རེད་དེ། འཐབ་རྩོད་ཀྱི་རྒྱུན་མུ་མཐུད་འཁྱེར་ནས་སྡོད་ཀྱི་ཡོད་པ་རེད། ཟློས་གར་ཚོགས་པར་ཆ་བཞག་ན་མགོ་སྟོད་ཀྱི་ཚོགས་པའི་མི་རབས་དེ་རྫོགས་ཚར་བ་རེད། ད་ནི་ཁྱེད་རང་ཚོ་མི་རབས་རྗེས་མ་ཚོས་མཇུག་བཟུང་ནས་བྱེད་ཀྱི་ཡོད་པ་དེར་ཐུགས་རྗེ་ཆེ་ཟེར་གྱི་ཡིན། ཞེས་སོགས་གསུངས་སོང་།
གསར་འགོད་པ། པ་སངས་ཚེ་རིང་། ཀླུ་མགོན་ཐར།
