རྗེ་རིན་པོ་ཆེ་དགོངས་རྫོགས་ཀྱི་ལོ་  ༦༠༠ འཁོར་བར་རྗེས་དྲན་ཞུས།

༄༅། །འཛམ་གླིང་ཡུལ་གྲུ་གང་སར་འཇམ་མགོན་བླ་མ་ཙོང་ཁ་པ་ཆེན་པོ་ཁམས་གསུམ་ཆོས་ཀྱི་རྒྱལ་པོ་ཤར་༸རྒྱལ་བ་ཁྱབ་བདག་རྡོ་རྗེ་འཆང་ཆེན་པོ་རྗེ་བཙུན་བློ་བཟང་གྲགས་པ་དཔལ་བཟང་པོ་མཆོག་གཟུགས་སྐུའི་བཀོད་པ་ཆོས་དབྱིངས་སུ་འཐིམ་ཚུལ་བསྟན་ནས་ལོ་ངོ་  ༦༠༠ འཁོར་བའི་རྗེས་དྲན་བྱས་དང་བྱེད་མུས་བཞིན་འདི་ག་བལ་ཡུལ་དགེ་ལྡན་ལྷན་ཚོགས་དང་བལ་ཡུལ་དགེ་ལྡན་སྨོན་ལམ་ཚོགས་པ་ཐུན་མོང་ནས་ཀྱང་འདི་ལོར་རྗེས་འཇུག་པ་རྣམས་ཀྱིས་རྗེས་དྲན་མཚོན་པར་བྱེད་པའི་ཆེད་དུ་མཛད་རིམ་ཁག་ཅིག་གོ་སྒྲིག་ཞུས་ཡོད།

སྤྱི་ལོ་ ༢༠༡༩ སྤྱི་ཟླ་ ༡༡ པའི་ཚེས་ ༦ ཉིན་འདི་ག་ཤེལ་དཀར་ཆོས་སྡེ་དགའ་ལྡན་ལེགས་བཤད་གླིང་གྲྭ་ཚང་དུ་རྗེ་བླ་མའི་རྗེས་དྲན་ཆེད་ཕར་ཕྱིན་བགྲོ་གླེང་ཆེན་མོ་ཐེངས་དང་པོ་ཚུགས་ཐུབ་པ་བྱུང་ཡོད་ཅིང་། བགྲོ་གླེང་ཆེན་མོའི་སྐུ་མགྲོན་གཙོ་བོར་བལ་ཡུལ་སྐུ་ཚབ་དོན་གཅོད་ཚུལ་ཁྲིམས་རྒྱ་མཚོ་མཆོག་དང་། བོད་མི་མང་སྤྱི་འཐུས་ལས་ཐོག་བཀྲིས་དོན་གྲུབ་མཆོག དེ་བཞིན་བོད་མི་མང་སྤྱི་ཟུར་རྣམ་པ་དང་བལ་ཡུལ་ནང་པའི་ཚོགས་ཆེན་གྱི་ཚོགས་གཙོ་ནོར་བུ་ཤར་པ་མཆོག གཞན་ཡང་༧སྐྱབས་རྗེ་ཆུ་བཟང་རིན་པོ་ཆེ་མཆོག་དང་དཔལ་ས་སྐྱའི་མཁན་པོ་འབྱོར་ལྡན་མཆོག་གི་གཙོས་དགོན་སྡེ་ཁག་གི་མཁན་རིན་པོ་ཆེ་རྣམ་པ་དང་། ལྷན་ཚོགས་ཀྱི་ཚོགས་གཙོ་བགྲེས་གཞོན་དང་རྒྱུན་ལས། བགྲོ་གླེང་གི་གཙོ་སྐྱོང་བ་ལྷན་ཚོགས་ཀྱི་ཚོགས་ཟུར་ཤེལ་དཀར་ཆོས་སྡེའི་དཔེ་འཁྲིད་དགེ་རྒན་དགེ་བཤེས་ངག་དབང་སྐལ་བཟང་ལགས་ཀྱིས་གཙོས་གཙོ་སྐྱོང་བ་བཞི་དང་དགོན་སྡེ་ཁག་གི་དཔེ་འཁྲིད་རྒན་རྣམས་པ་ལྷན་འཛོམས་གནང་ཐུབ་ཡོད།

གཞན་ཡང་བགྲོ་གླེང་ཆེན་མོའི་ཐོག ས་གནས་གྲོས་ཚོགས་ཀྱི་ཚོགས་གཙོ་རྣམ་པ་དང་ས་གནས་འགོ་འཛིན་རྣམ་པ། ས་གནས་ཆོལ་ཁ་གསུམ་གྱི་ཚོགས་གཙོ་རྣམ་པ། གཞུང་འབྲེལ་མ་ཡིན་པའི་ཚོགས་པ་སྐྱིད་སྡུག་ཁག་གི་ཚོགས་གཙོ་རྣམ་པ་ཕེབས་ཡོད་པ་དང་། དགོན་སྡེ་ཁག་གི་ཕྱག་མཛོད་དང་ཤེས་ཡོན་འགན་འཛིན། དགེ་བསྐོས་རྣམ་པ། ཆོས་རྒྱུད་ཆེན་པོ་བཞིས་གཙོས། བོ་དོང་སྤོ་རོང་དགོན་པའི་སློབ་གཉེར་བ་དང་། འཕགས་ཤིང་བོན་པོ་དགོན་པའི་སློབ་གཉེར་བ། བལ་ཡུལ་དགེ་ལྡན་ལྷན་ཚོགས་ཀྱི་ཁྱབ་ཁོངས་དགོན་ཁག་བཅུའི་འདུལ་མཛོད།  དབུ་མ། ཕར་ཕྱིན་བཅས་ལ་སློབ་གཉེར་བྱེད་བཞིན་པའི་སློབ་མ་དང་། ས་གནས་རྣམ་རྒྱལ་དང་སྲོང་བཙན་མཐོ་སློབ་ཀྱི་སློབ་མ་ལ་རྣམས་ཟུར་ཉན་དུ་བཅར་ཡོད་པ་བཅས། རྗེས་དྲན་བགྲོ་གླེང་ཆེན་མོ་དེ་ཉིད་ལེགས་པར་གྲུབ་ཐུབ་ཡོད།

མཛད་རིམ་གཉིས་པ། འདི་ལོའི་སྤྱི་ཟླ་ ༡༡ ཚེས་ ༦ ཉིན་འདི་ག་བལ་ཡུལ་དགེ་ལྡན་ལྷན་ཚོགས་ནས་དུས་རབས་ཉེར་གཅིག་གི་ནང་པའི་འགན་ཁྲིའམ་ཆོས་ལུགས་མཐུན་སྒྲིལ་གྱི་ལས་གཞི་ཞིག་སྤེལ་བའི་ཐོག སྐུ་མགྲོན་གཙོ་བོ་སྒྲུབ་རྒྱུད་བསྟན་པའི་བདག་པོ་༸སྐྱབས་རྗེ་ཁྲ་འགུ་རིན་པོ་ཆེ་མཆོག་དང་༸སྐྱབས་རྗེ་ཤྲི་ཆུ་བཟང་རིན་པོ་ཆེ་མཆོག ནང་པའི་ཚོགས་ཆེན་གྱི་ཚོགས་གཙོ་ནོར་བུ་ཤར་པ་མཆོག་དང་། ཆེད་དུ་ཕེབས་པའི་སྐུ་མགྲོན་བལ་གཞུང་གི་དཔོན་རིགས་ཁག་ཅིག་དང་། ཆོས་རྒྱུད་ཆེན་པོ་བཞིའི་ཚོགས་གཙོ་རྣམ་པ། རིས་མེད་མཁན་བླ་སྤྲུལ་རྣམ་པ། དགེ་བའི་བཤེས་གཉེན་དགེ་བཤེས་རྣམས་དང་། དགེ་བསྐོས་ཕྱག་མཛོད། ཤེས་ཡོན་འགན་འཛིན་རྣམ་པ། དེ་བཞིན་བོད་རིགས་ཧི་མ་ལ་ཡའི་ཚོགས་སྐྱིད་ཁག་གི་སྐུ་ཚབ་རྣམ་པ་ལྷན་འཛོམས་གནང་ཡོད།

 བལ་ཡུལ་དགེ་ལྡན་ལྷན་ཚོགས་ཡིག་ཚང་ནས་ཕུལ།།  །།