ཡུ་གུར་བ་སློབ་དཔོན་ཆེན་མོ་ཨེལ་ཧམ་ཊོ་ཧ་ཊེ་ལ་རྒྱལ་ཁབ་མགོ་རྟིང་སློག་རྩིས་བྱས་པའི་ཉེས་འཛུགས་མཁན་གཏེ་བོ་ཡུ་གུར་དམར་ཤོག་མགོ་འཁྲིད་ཟུར་བར་ལྐོག་ཟ་རུལ་སུངས་ཀྱི་ཉེས་མིང་འོག་ཚེ་བཙོན་ཁྲིམས་ཐག་བཅད་འདུག
རྒྱལ་སྤྱིའི་བརྒྱུད་ལམ་ཁག་ཏུ་གནས་ཚུལ་ཐོན་པ་ལྟར་ན། ཁ་སང་རྒྱ་ནག་ཧྲན་ཡཱང་མི་མང་འབྲིང་རིམ་ཁྲིམས་ཁང་(Shenyang Intermediate People’s Court)ཟེར་བས། ཡུ་གུར་རང་སྐྱོང་ཁུལ་གྱི་དམར་ཤོག་མགོ་འཁྲིད་ཟུར་བ་ནཱོར་བྷེག་རེ་(Nur Bekri)ཡུ་གུར་རང་སྐྱོང་ཁུལ་གྱི་མགོ་འཁྲིད་ཡིན་སྐབས། རྒྱ་སྒོར་ས་ཡ་ ༧༩ ལྷག་གི་ལྐོག་རྔན་བླངས་པའི་ཉེས་མིང་འོག ཆབ་སྲིད་ཀྱི་ཐོབ་ཐང་ཡོངས་རྫོགས་འཕྲོག་པ་མ་ཟད། སྒེར་གྱི་རྒྱུ་དངོས་ཡོད་ཚད་གཞུང་བཞེས་ཀྱིས་ཚེ་བཙོན་ཁྲིམས་ཐག་བཅད་ཡོད་འདུག
ཧྲན་ཡཱང་མི་མང་འབྲིང་རིམ་ཁྲིམས་ཁང་གི་དེ་འབྲེལ་གནས་ཚུལ་ནང་། ཤིན་ཅང་ཡུ་གུར་རང་སྐྱོང་ཁུལ་གྱི་དམར་ཤོག་མགོ་འཁྲིད་ཟུར་བ་ནཱོར་བྷེག་རེ་ཡིས་ཕྱི་ལོ་ ༡༩༩༨ ནས་ ༢༠༡༨ བར་ཁྱོན་རྒྱ་སྒོར་ས་ཡ་ ༧༩ ལྐོག་རྔན་བླངས་བའི་ནག་ཉེས་ངོས་ལེན་བྱས་ཏེ་ཚེ་བཙོན་གྱི་ཁྲིམས་ཆད་དང་ལེན་བྱས་ཡོད་པ་དང་། ཐེངས་འདིའི་ཉེས་འཛུགས་ཁྲོད་ནཱོར་བྷེག་རེ་ཡིས་ཆབ་སྲིད་ཀྱི་དབང་ཆ་ལོག་སྤྱོད་ཀྱིས། རང་ཉིད་ཀྱི་ནང་མི་གཉེན་ཉེ་སོགས་བརྒྱུད་ཁྲིམས་འགལ་ཐོག་ལྐོག་རྔན་འབོར་ཆེན་བླངས་བ་མ་ཟད། རྒྱས་སྤྲོ་ཡིས་དཔོན་སར་རོལ་བ་དང་འཁྲིག་སྤྱོད་ཉོ་ཚོང་སོགས་བྱས་མྱོང་བའི་ཉེས་འཛུགས་བྱས་ཡོད་པ་རེད།
ཕྱི་ལོ་ ༢༠༠༩ ལོར་ནཱོར་བྷེག་རེ་ཡུ་གུར་རང་སྐྱོང་ཁུལ་གྱི་མགོ་འཁྲིད་དུ་བསྐོ་བཞག་བྱུང་སྟེ་ལོ་གཅིག་ཙམ་འགོར་རྗེས། ཤིན་ཅང་གི་རྒྱལ་ས་(Urumqi)ནང་རྒྱ་རིགས་ཧན་དང་ཡུ་གུར་གྲང་ཉུང་མི་རིགས་དབར་གདོང་ཐུག་བྱུང་སྟེ། སྐབས་དེའི་སྙན་ཐོ་ལྟར་ན་ཁྱོན་མི་གྲངས་ ༡༩༧ ལ་ཤི་སྐྱོན་བྱུང་ཡོད་པ་དང་། ཁོ་ནི་ཤིན་ཅང་ཡུ་གུར་རང་སྐྱོང་ཁུལ་དུ་རྒྱ་ནག་གི་དྲག་གནོན་སྲིད་བྱུས་ལག་བསྟར་མགོ་རྩོམ་མཁན་གྲས་ཡིན་པ་མ་ཟད། ཡུ་གུར་གྱི་དཔལ་འབྱོར་རིག་པ་བ་དང་། སློབ་དཔོན་ཆེན་མོ་སྐུ་ཞབས་ཨེལ་ཧམ་ཊོ་ཧ་ཊེ་(Ilham Tohti)ལགས་སུ་རྒྱལ་ཁབ་མགོ་རྟིང་སློག་རྩིས་བྱས་པའི་ཉེས་འཛུགས་བྱེད་མཁན་གཏེ་བོ་ཡང་ཡིན་འདུག
ནཱོར་བྷེག་རེ་ནི་ཕྱི་ལོ་ ༢༠༠༨ ནས་ ༢༠༡༤ དབར་ཤིན་ཅང་ཡུ་གུར་རང་སྐྱོང་ཁུལ་གྱི་མགོ་འཁྲིད་དུ་བསྐོས་ཤིང་། ཕྱི་ལོ་ ༢༠༡༤ ནས་ ༢༠༡༨ དབར་གོ་གནས་འཕར་ཏེ་རྒྱ་ནག་གི་རྒྱལ་ཁབ་འཛུགས་སྐྲུན་དང་བཅོས་སྒྱུར་ལྷན་ཁང་གི་ཚོགས་གཙོ་གཞོན་པ་དང་རྒྱལ་ཁབ་ཀྱི་ནུས་ཤུགས་ཐོན་སྐྱེད་འཛིན་སྐྱོང་ལྷན་ཁང་གི་མགོ་འཁྲིད་བཅས་ལ་བསྐོ་བཞག་བྱུང་ཡོད་འདུག
གསར་འགོད་པ། སྐལ་བཟང་སྦྱིན་པ།
