རི་སྐྱེས་སྲོག་ཆགས་དང་ཁོར་ཡུག་སྲུང་སྐྱོབ་ལ་འགན་འཁུར་རོགས།

༧གོང་ས་རྒྱལ་བ་རིན་པོ་ཆེ་མཆོག་གིས་ངོ་དེབ་སྤྱི་ཚོགས་དྲ་ལམ་སྟེང་འགྲོ་བ་མིའི་རིགས་ཀྱིས་ཛ་དྲག་ངང་རི་སྐྱེས་སྲོག་ཆགས་དང་ཁོར་ཡུག་སྲུང་སྐྱོབ་ལ་འགན་འཁུར་དགོས་སྐོར་གསུངས་འདུག

ཁ་སང་ཕྱི་ཚེས་ ༡༨ ཉིན། ༧གོང་ས་རྒྱལ་བ་རིན་པོ་ཆེ་མཆོག་གིས་སྐུ་སྒེར་གྱི་ངོ་དེབ་སྤྱི་ཚོགས་དྲ་རྒྱ་བརྒྱུད། འགྲོ་བ་མིའི་རིགས་ཀྱིས་ཛ་དྲག་ངང་རི་སྐྱེས་སྲོག་ཆགས་དང་ཁོར་ཡུག་སྲུང་སྐྱོབ་ལ་འགན་འཁུར་དགོས་པ་དང་། ང་ཚོས་ངོས་འཛིན་ཐོབ་པ་བཞིན་འགྲོ་བ་མིའི་རིགས་ནི་སེམས་ཅན་ཀུན་ལས་རང་བྱུང་ཁམས་དང་འཛམ་གླིང་ལ་གཏོར་བཤིག་གཏོང་བའི་ནུས་པ་ཆེ་ཤོས་ཅན་གཅིག་པུ་ཡིན་སྟབས། ང་ཚོས་བྱེད་ལས་ཀྱིས་སེམས་ཅན་གཞན་གྱི་འཚོ་གནས་ལ་ཤུགས་རྐྱེན་ཐེབས་བཞིན་ཡོད་སྐོར་གསུངས་འདུག

༧གོང་ས་རྒྱལ་བ་རིན་པོ་ཆེ་མཆོག་གིས་རང་བྱུང་ཁམས་དང་རི་སྐྱེས་སྲོག་ཆགས་ཀྱི་སྐྱེས་འཕེལ་ལ་གཏོར་བཤིག་གཏོང་བ་དེ།  ང་ཚོས་འདོད་རྔམ་དང་འཚོ་གནས་བྱེད་མཁན་གཞན་ལ་གུས་བརྩི་མ་བྱས་དང་སྣང་མེད་ཀྱི་འཇུག་འབྲས་ཡིན་པ་དང་། ང་ཚོས་ངོས་འཛིན་ཐོབ་པ་བཞིན་འགྲོ་བ་མིའི་རིགས་ནི་སྲོག་ཆགས་ཀུན་ལས་རང་བྱུང་ཁམས་དང་འཛམ་གླིང་ལ་གཏོར་བཤིག་གཏོང་བའི་ནུས་པ་ཆེ་ཤོས་ཅན་གཅིག་པུ་ཡིན་སྟབས། ང་ཚོས་བྱེད་ལས་ཀྱིས་སེམས་ཅན་གཞན་གྱི་འཚོ་གནས་ལ་ཤུགས་རྐྱེན་ཐེབས་བཞིན་ཡོད་སྐོར་གསུངས་འདུག

ཡང་ཁོང་ཉིད་ཀྱིས་མུ་མཐུད། གལ་ཏེ་ང་ཚོར་དེ་ལྟ་བུའི་གཏོར་བཤིག་གི་ནུས་པ་ཡོད་པ་ཡིན་ན། ང་ཚོར་རང་བྱུང་ཁམས་དང་རི་སྐྱེས་སྲོག་ཆགས་ལ་སྲུང་སྐྱོབ་བྱེད་ཐུབ་པའི་ནུས་པ་ཡོད་པས། ང་ཚོས་ཛ་དྲག་ངང་རང་བྱུང་ཁོར་ཡུག་སྲུང་སྐྱོབ་ལ་འགན་འཁུར་དགོས་སྐོར་སོགས་གསུངས་འདུག  ༧གོང་ས་རྒྱལ་བ་རིན་པོ་ཆེ་མཆོག་གིས་ནམ་རྒྱུན་ཁོར་ཡུག་དང་རི་སྐྱེས་སྲོག་ཆགས་སྲུང་སྐྱོབ་ཐད་བཀའ་སློབ་གནང་བཞིན་ཡོད་པ་ལྟར། ཕྱི་ལོ་ ༢༠༡༥ ལོར་ཁོང་ཉིད་ཀྱིས་གོ་ལའི་ཁོར་ཡུག་དཀའ་ངལ་ནི་མིའི་རིགས་ཀྱིས་བཟོས་པ་ཡིན་པས། དཀའ་ངལ་དེ་མེད་པར་གཏོང་བར་མིའི་རིགས་ལ་འགན་ཡོད་སྐོར་བརྗོད་ཡོད་པ་རེད།

གསར་འགོད་པ། སངས་རྒྱས་དཀོན་མཆོག