ཏོག་དབྱིབས་ནད་ཡམས་ཕོག་པའི་བོད་མི་དེའི་གནས་སྟངས་རང་འཇཊ་ཡིན་སྐོར་བརྗོད་འདུག

ཧྥ་རན་སིའི་ནང་གནས་སྡོད་བོད་མི་ཞིག་ལ་ཏོག་དབྱིབས་ནད་རྟགས་ཐོན་ཡོད་ཀྱང་ཁོང་གི་ཁྱིམ་མི་ཚོར་བརྟག་དཔྱད་བྱས་རྗེས་ནད་རྟགས་ཐོན་མེད་སྐོར་བརྗོད་བྱུང་། འདི་ག་དུས་བབ་ཀྱི་གསར་འགོད་པས་ཧྥ་རན་སི་བོད་རིགས་ཚོགས་པའི་ཚོགས་གཙོ་བསྟན་འཛིན་སྤེན་པ་ལགས་སུ་དེའི་སྐོར་སྐད་ཆ་དྲིས་པར་ཁོང་གིས། བོད་མི་དེ་སྨན་ཁང་དུ་བསྡད་ནས་ཉིན་ ༡༠ ཙམ་འགྲོ་ཡི་ཡོད་པ་དང་། གནས་སྟངས་ཕྲན་བུ་ཛ་དྲག་པོ་འདྲ་འདུག་ཀྱང་། ཁོ་རང་གི་ནང་མིས་སྨན་ཞབས་པ་སོགས་ལ་སྐད་ཆ་དྲིས་དུས། ཁ་སང་ཉིན་རྒྱབ་རང་འཇགས་ཡིན་སྐོར་བརྗོད་འདུག་ལ། ང་ཚོ་ལྟ་རུ་འགྲོ་ཆོག་གི་མི་འདུག་ལ། སྨན་ཞབས་ཚོས་ཡང་ཡང་ཁ་པར་ཡང་གཏོང་མ་ཡོང་། གནས་ཚུལ་ག་རེ་བྱུང་ནའང་དྲ་ལམ་ནས་འབྲེལ་བ་གནང་ཡོང་ལབ་འདུག ཅེས་བརྗོད་བྱུང་།

ཡང་ཁོང་གིས། ད་ལྟའི་ཆར་ནད་པ་དེའི་བཟའ་ཟླ་དང་བྱིས་པ་བཅས་རང་ཁྱིམ་དུ་ཟུར་བཀག་ནང་བཞག་ཡོད་པ་དང་། ནང་མི་ཚོར་བརྟག་དཔྱད་བྱེད་སྐབས་ནད་རྟགས་ཐོན་མེད་ལ། མ་འོངས་པར་ཚ་བ་རྒྱས་པ་དང་གློ་རྒྱག་པ་སོགས་བྱུང་ན་སྨན་ཁང་ལ་ཐད་ཀར་འབྲེལ་བ་བྱེད་དགོས་པའི་བཀོད་མངགས་ཀྱང་བྱས་ཡོད་སྐོར་བརྗོད་བྱུང་།

ཡང་སྤྱི་ཚོགས་དྲ་ལམ་སོགས་ན་ཧྥ་རན་སིར་གནས་སྡོད་བོད་མི་གཞན་རེ་ཟུང་ལའང་ཏོག་དབྱིབས་ནད་རྟགས་ཐོན་ཡོད་སྐོར་བརྗོད་ཀྱི་ཡོད་སྟབས།  ས་གནས་བོད་རིགས་ཚོགས་པའི་ཚོགས་གཙོ་ལགས་ལ་གནས་ཚུལ་དེ་བདེན་པ་ཡིན་མིན་དྲིས་པར་ཁོང་གིས། དེང་སང་སྤྱི་ཚོགས་དྲ་ལམ་ཁག་ཏུ་ཡིན་ལ་མིན་ལ་མང་པོ་བཤད་འདུག་མཁན་མང་བས་དེ་ཚོ་གསལ་པོ་བཤད་རྒྱུ་མེད། ཉེ་ཆར་རྒྱ་གར་ནས་ཧྥ་རན་སིར་བསླེབས་པའི་བོད་མིི་ཞིག་ཏོག་དབྱིབས་ནད་པ་ཞིག་དང་འབྲེལ་འདྲིས་བྱུང་ཡོད་པའི་དོགས་གཞི་ཡོད་སྟབས། ང་ཚོས་རྩད་གཅོད་བཏང་ཡང་ལམ་གྱི་མིང་ཙམ་མ་གཏོགས་སྡོད་གནས་ཁ་བྱང་གསལ་པོ་ཞིག་གཏན་ནས་རག་མ་སོང་། ཞེས་བརྗོད་བྱུང་།

ཧྥ་རན་སི་བོད་རིགས་ཚོགས་པའི་ངོས་ནས་ཡིག་ཐོག་ནས་གསལ་བསྒྲགས་འགའ་བཏང་ཡོད་པ་མ་ཟད། ཁ་སང་ཞོགས་པར་བོད་རིགས་ཚོགས་པའི་ཚོགས་གཙོ་ལགས་ནས་སྒྲ་སྒམ་ཞིག་ཀྱང་བཟོས་འདུག་པའི་ནང་། རང་ཁོངས་བོད་མི་ཚོར་བདེ་མ་བདེ་ག་རེ་བྱུང་ནའང་སྦེད་གསང་མེད་པའི་ཐོག་ནས་འཕྲལ་དུ་སྨན་པར་བསྟེན་གཏུག་བྱེད་དགོས་པ་དང་། ཚང་མས་སྣང་མེད་མི་གཏོང་བར་ངེས་པར་དུ་ནད་ཡམས་འདི་ལ་ཡིད་གཟབ་དགོས་སྐོར་བརྗོད་འདུག