བོད་མི་ཚོས་དཔེ་ཆ་པར་སྐྲུན་བརྒྱུད་སྐུར་སོགས་བྱས་ན་ཉེས་ཆད་ལྕི་མོ་ཡོད་ཟེར།

རྒྱ་ནག་དམར་ཤོག་ཚོགས་པ་དང་དེའི་མགོ་འཁྲིད་ཚོར་འཕྱ་སྨོད་དང་ཁས་ལེན་མ་བྱས་ན་ཁྲིམས་དང་འགལ་ཡོད་པས་ཉེས་ཁྲིམས་ལྕི་མོ་གཅོད་རྒྱུ་ཡིན་པ་སོགས་ཀྱི་དོན་ཚན་ ༡༠ ཅན་ཞིག་བསྒྲགས་འདུག ཁ་སང་ཕྱི་ཚེས་ ༡ ཉིན། རྒྱ་ནག་གཞུང་འབྲེལ་བོད་ལྗོངས་ཉིན་རེའི་ཚོགས་པར་ཁང་ཟེར་བས་གནས་ཚུལ་སྤེལ་བ་ལྟར་ན། འདི་ལོ་ནས་རྒྱ་ནག་གཞུང་གིས་བོད་མི་ཚོས་དཔེ་ཆ་པར་སྐྲུན་དང་ཡིག་ཆ་བརྒྱུད་སྐུར་སོགས་བྱེད་མི་ཆོག་པའི་དོན་ཚན་ ༡༠ ཅན་གྱི་བཀག་སྡོམ་ཁྲིམས་ཟེར་བ་ཞིག་བསྒྲགས་ཡོད་པ་དང་། དོན་ཚན་དེ་དག་ནང་བོད་ཆེན་པོ་དང་ཚད་མཐོའི་རང་སྲིད་རང་སྐྱོང་། དབུ་མའི་ལམ་སོགས་འུད་སྒྲོག་དང་བརྒྱུད་སྐུར་བྱས་ཏེ། མངའ་ཁོངས་བདག་དབང་ལ་གནོད་འཚེ་བཏང་ན་ཁྲིམས་ཆད་ནན་མོ་གཅོད་རྒྱུ་ཡིན་སྐོར་བཀོད་འདུག

དེ་འབྲེལ་གནས་ཚུལ་ནང་། བོད་རང་སྐྱོང་ལྗོངས་འཆལ་སེལ་ལོག་རྡུང་ལས་དོན་གྱི་ཐེར་འདོན་བཀག་སྡོམ་ཁྲིམས་གཞི་ལྟར། བཀག་སྡོམ་ནང་དོན་ལྡན་པའི་དཔེ་སྐྲུན་དང་དངོས་པོ། ཡིག་ཆ་རིགས་སྒྲིག་བཟོ་དང་པར་འདེབས་བྱེད་པ། གཞན་ལ་བརྒྱུད་སྐུར་བྱས་ཏེ་ཁྲིམས་གཞི་དང་འགལ་བ་ཡིན་ན། ཉེས་ཅན་ལ་ཆད་པ་ནན་མོ་གཅོད་རྒྱུ་ཡིན་པ་དང་། གལ་ཏེ་ཁྲིམས་འགལ་བྱེད་མཁན་ཚོ་མཐོང་ཐོས་བྱུང་བ་ཡར་གཏུགས་བྱེད་མཁན་བྱུང་ན་བྱ་དགའ་སྤྲོད་རྒྱུ་དང་། ཡར་གཏུག་བྱེད་སའི་འབྲེལ་ཡོད་ལས་ཁུངས་ཆེད་འཛུགས་བྱས་ཡོད་སྐོར་བརྗོད་འདུག

དོན་ཚན་ ༡༠ ཅན་གྱི་བཀག་སྡོམ་གནད་དོན་ཅན་ཟེར་བ་དེའི་ནང། གཅིག ཏང་དང་རྒྱལ་ཁབ་ཀྱི་དབུ་ཁྲིད་ལ་སྐུར་འདེབས་འཕྱ་སྨོད་བྱེད་པ་དང་། ཏང་གི་འགོ་ཁྲིད་ཁས་ལེན་མི་བྱེད་པ། རྒྱ་ནག་གི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ལམ་ལུགས་དང་མི་རིགས་ས་ཁོངས་རང་སྐྱོང་ལམ་ལུགས་ལ་སྐུར་འདེབས་བྱེད་པ་སོགས་རྩ་ཁྲིམས་ནང་གཏན་འཁེལ་ཟིན་པའི་གཞི་རྩའི་རྩ་དོན་ལ་ངོ་རྒོལ་བྱེད་པ། གཉིས། བོད་ཆེན་པོ་དང་ཚད་མཐོའི་རང་སྐྱོང་། དབུ་མའི་ལམ་སོགས་འུད་སྒྲོག་བྱས་ནས་རྒྱལ་ཁབ་གཅིག་གྱུར་བདག་དབང་དང་། མངའ་ཁོངས་ཆ་ཚང་བཅས་ལ་གནོད་འཚེ་གཏོང་བ། གསུམ། རྒྱལ་ཁབ་ཀྱི་གསང་བ་ཕྱིར་གྱར་བ་དང་རྒྱལ་ཁབ་ཀྱི་བདེ་འཇགས་ལ་གནོད་འཚེ་གཏོང་བ་དང་ཡང་ན་རྒྱལ་ཁབ་ཀྱི་གཟི་བརྗིད་དང་ཁེ་ཕན་ལ་གནོད་འཚེ་གཏོང་བའི་བྱ་སྤྱོད། ཅེས་ཡིན་འདུག

དེ་བཞིན་དོན་ཚན་ནང་མུ་མཐུད། བཞི་པ། གཏུམ་སྤྱོད་འཇིགས་སྐུལ་དང་ལྡན་པའི་རིགས་སྒྲིག་བཟོ་དང་། བརྒྱུད་སྤེལ། འུད་སྒྲོག་བཅས་བྱས་ནས་ཆོས་དད་མི་འདྲ་བ་དང་གྲུབ་མཐའ་མི་འདྲ་བའི་དད་ལྡན་མང་ཚོགས་ཕན་ཚུན་དགྲར་འཛིན་དང་ཁ་གཏད་དུ་ལངས་པ། གདོང་གཏུག་སོགས་ཆོས་ལུགས་ཀྱི་ལོག་ཐལ་བསམ་ངན་སྐྱེ་རུ་འཇུག་པ་སོགས་མི་རིགས་ཀྱི་འཁོན་འཛིན་དང་མི་རིགས་མཐོང་ཆུང་གི་ངན་སྐུལ་རྒྱག་པ་དང་། མི་རིགས་མཐུན་སྒྲིལ་ལ་གཏོར་བཤིག་གཏོང་བ། ཡང་ན་མི་རིགས་ཀྱི་ཡུལ་སྲོལ་གོམས་འདྲིས་ལ་གནོད་འཚེ་གཏོང་བ། ལྔ་པ། ཆོས་ལོག་དང་རྨོངས་དད་རིགས་འུད་སྒྲོག་བྱེད་པའི་བྱ་སྤྱོད་བཅས་ཡིན་སྐོར་བརྗོད་འདུག

དྲུག་པ། སྤྱི་ཚོགས་ཀྱི་སྒྲིག་ལམ་ཟང་ཟིང་བཟོ་བ་དང་སྤྱི་ཚོགས་ཀྱི་བརྟན་ལྷིང་ལ་གཏོར་བཤིག་གཏོང་བ། བདུན་པ། རྒྱན་འཛུགས་དང་གཏུམ་སྤྱོད་རིགས་འུད་སྒྲོག་བྱེད་པ་དང་ཡང་ན་ཉེས་གསོག་རིགས་ངན་སྐུལ་བྱེད་པ། བརྒྱུད་པ། མི་གཞན་ལ་ཐུབ་ཚོད་དང་སྐུར་འདེབས་བྱེད་པ་དང་མི་གཞན་གྱི་ཁྲིམས་མཐུན་ཁེ་དབང་ལ་བཙན་གནོད་བྱེད་པའི་བྱ་སྤྱོད། དགུ་པ། སྤྱི་ཚོགས་ཀྱི་ཀུན་སྤྱོད་དང་ཡང་ན་མི་རིགས་ཀྱི་ཕུལ་བྱུང་རིག་གནས་སྲོལ་རྒྱུན་ལ་གནོད་འཚེ་གཏོང་བའི་བྱ་སྤྱོད། བཅུ་པ། རྒྱ་ནག་གི་བོད་སྐྱོང་ཐབས་ཇུས་དང་ཏང་གི་མི་རིགས་ཆོས་ལུགས་སྲིད་ཇུས་ལ་སྐུར་འདེབས་བྱེད་པ་སོགས་ཁྲིམས་ལུགས་དང་སྲིད་འཛིན་ཁྲིམས་སྲོལ། རྒྱལ་ཁབ་ཀྱི་གཏན་འབེབས་བཅས་ནང་བཀག་སྡོམ་བྱས་པའི་ནང་དོན་སྤེལ་བའི་བྱ་སྤྱོད་བཅས་ཡིན་སྐོར་བཀོད་འདུག

གསར་འགོད་པ། སངས་རྒྱས་དཀོན་མཆོག