རྒྱ་ནད་སོགས་ཟེར་བས་མི་ཕན།

སེམས་ངལ་གྱིས་ཉིན་མཚན་མནར་བའི་དེང་གི་ཛ་དྲག་ཆེ་བའི་དུས་སྐབས་སུ། རང་སྣང་གང་དྲན་དང་དཔྱོད་ཤེས་མེད་པའི་བསམ་པའི་ཀུན་སློང་ལ་ཚོད་འཛིན་དགོས་པ་ནི། སྡུག་བསྔལ་གྱི་ལོ་ཟླའི་ཁྲོད་ལ་ཅིས་ཀྱང་མཉམ་པར་བཞག་དགོས་པའི་གནད་ཁག་ཅིག་ཡིན།    ཁ་པར་དང་བརྙན་ལེན་བརྙན་མིག་གི་མདུན་ལ་ཚིག་གསུམ་སྨྲ་སྒོ་ནས་མ་འཐོན་གོང་། ལེན་དྲུག་ཁོག་ལ་བསམ་དགོས་པའི་དོན་གནད་ཇི་སྙེད་ཅིག་ཡོད། ཆེ་ས་རྒྱལ་ཁབ་དང་ཆུང་ས་མི་སྒེར་སུ་ཡིན་ནའང་། ང་ཚོའི་འཇིག་རྟེན་གྱི་མིའི་རིགས་ལ་ཕྲད་དང་འཕྲད་བཞིན་པའི་ནད་ཡམས་ཀྱི་འཇིགས་པ་དེ། ཁྱོད་དང་ཁྱོད་ཀྱི་གཉེན་ཉེའི་སྒོ་འགྲམ་ན་བསླེབ་མི་སྲིད་པ་ཞིག་ཡིན་པ་སུས་ཀྱང་བརྗོད་མི་ཤེས་པས། གཞན་སྡུག་བསྔལ་གྱི་མིག་ཆུ་གཏང་སར་ཁྱོད་ཀྱིས་རྔ་རྡུང་གར་འཁྲབ་བྱེད་ན་མི་ཆོས་ཀྱི་རྩ་བ་མ་ནས་མེད་པའི་བྱེད་སྟངས་ཤིག་ཡིན། ཉེ་དུས་རྒྱ་གར་ནང་བལ་པོ་དང་ལ་དྭགས་པ། རྒྱ་གར་ཤར་ཁུལ་གྱི་མི་རིགས་རྒྱ་རིགས་བཞིན་གཟུགས་བོངས་ཆུང་ལ་ཤ་རྩི་དཀར་བ་མ་ཟད། མིག་ཟུང་ཡང་རྒྱ་རིགས་ལྟར་ཆུང་བའི་མི་རྣམས་རིག་མ་ཐག  ཀོ་རོ་ནཱ་ཞེས་མིང་ནས་འབོད་ཅིང་དོགས་པ་བྱེད་པ་དང་། ཁོང་ཚོ་ཚོང་ཁང་སོགས་ལ་སླེབས་དུས་ཚོང་བདག་དང་ཡུལ་མིས་མི་བདེ་བའི་རྣམ་འགྱུར་བསྟན་པའི་བྱ་བྱེད་ལ་མི་རིགས་དབྱེན་འབྱེད་ཀྱི་ཚོར་སྣང་ཅི་འདྲ་ཞིག་ཡོད་མེད་དྲྭ་ལམ་ནས་གསལ་པོ་གྱུར་ཡོད་སྲིད། སྤྱིར་ནས་ནད་ནི་ནད་ལས་མི་སྒེར་དང་ཉེས་མེད་ཕལ་བའི་མི་རིགས་ལ་འཕྱ་སྨོད་ཀྱི་ལག་ཆར་བཀོལ་སྤྱོད་བྱེད་པ་ནི། འོས་འབབ་ཅིག་ཡིན་མིན་བརྟག་དགོས་པ་མ་ཡིན་ནམ།  ངས་དེ་ལྟར་བཤད་དགོས་པའི་དོན་གནད་ནི། རང་དབང་ཅན་གྱི་རྒྱལ་ཁབ་ཀྱི་གཞོན་ནུ་འགས། ཕྱི་བསྐྱོད་མེད་པའི་ཐེམ་སྤང་གི་སྲིད་བྱུས་ལག་བསྟར་བྱེད་བཞིན་པའི་འོག   དྲྭ་ལམ་ནས་དགྲ་འཛིན་རྒོལ་རྡུང་གི་བསམ་སྟངས་འདུ་ཤེས་ཤིག་གི་འོག་ནས། རང་འཚམས་བརྙན་ཐུང་སྣ་ཚོགས་གཅད་གཏུབ་མཚམས་སྦྱོར་བྱས་ནས་དོན་སྙིང་མེད་པའི་ཆབ་ཆོབ་བཅོ་བརྒྱད་བཟོས་ནས་ཁྱབ་སྤེལ་བྱེད་བཞིན་པ་དེས། བདག་ལ་ལྕགས་ཞུན་ཁོལ་མ་སྙིང་ལ་བླུགས་པ་ལྟ་བུའི་ཚོར་འདུ་ཞིག་ཡང་ཡང་བྱིན་པས་ཡིན། ད་དུང་དེ་དང་འབྲེལ་ནས་དོན་གཞན་ཞིག་ཁ་སྣོན་བྱ་སྙིང་འདོད་པ་ཞིག་ལ། རང་རེའི་སྤྱི་ཚོགས་ནང་གི་བོད་རིགས་གཞོ་ན་སྐྱེས་ཚོས་དེ་ལྟའི་བྱེད་སྟངས་ཡ་མ་ཟུང་ལ་རང་སེམས་མ་གཏད་པར། གནས་ཡུལ་རྒྱལ་ཁབ་ཀྱི་སྲིད་བྱུས་བཀོད་ཁྱབ་འོག་གནས་དགོས་པ་ཅི་ནས་ཀྱང་གལ་ཆེ་བའི་བྱ་བྱེད་ཅིག་ཡིན། ལ་ལས་དེ་རིང་གོ་སྐབས་ལ་བསམས་ནས་རང་དང་བསམ་སྤྱོད་མི་མཐུན་པའི་རང་སྡེའི་རིགས་ལ་རྒོལ་བ་དང་། རང་སྡེ་མིན་པའི་རྒྱ་རིགས་ཀྱི་སྤྱི་ཚོགས་ལ་ཁ་གཏད་ནས་མང་མང་བྱུང་རྒྱལ་དུ་སྨྲ་བ་ནི། ཅུང་ཚོད་འཛིན་མེད་པའི་ལས་སུ་སེམས།

དེ་རིང་གི་གསར་འགྱུར་ནི། སང་ཉིན་གྱི་ལོ་རྒྱུས་དཔྱད་གཞིའི་ཡིག་ཚགས་ཡིན་ཞེས་གསུངས་པ་ལྟར། གཞུང་འབྲེལ་གྱི་གསར་འགྱུར་བརྒྱུད་ལམ་དང་། སྤྱི་ཚོགས་དྲྭ་ལམ་ནས་མཐོང་བའི་རིམས་ནད་འདིར་མིང་གི་འབོད་སྟངས་ཐད། བདག་ལ་མངར་སྐྱུར་འདྲེས་མའི་ཚོར་སྣང་ཇི་སྙེད་ཅིག་བསྟུད་མར་སྟེར་གྱིན་འདུག་པས། དེ་རིང་མང་མང་གི་བླང་དོར་འཇུག་ལྡོག་ལ་ཕན་མིན་མི་ཤེས་ནའང་། རང་སེམས་དྲང་མོའི་གཏམ་འདི་ཁ་ཐུག་ཚིག་ཉུང་གོ་བདེའི་ལམ་ནས་བཤད་སྙིང་ལྷག་ཏུ་ཆེ། ལྷག་དོན་ད་ལྟའི་བར་གྱི་བོད་རྒྱའི་མི་མང་གི་གས་ཆག་མང་བའི་འབྲེལ་ལམ་ནི། འདས་པའི་ལོ་ངོ་བཅུ་ཕྲག་འགའི་སྔོན་དང་མཚུངས་བསྡུར་བྱས་ཚེ། ཕྱོགས་མང་པོར་ཡར་རྒྱས་ཀྱི་རྣམ་པ་ཡོད་པ་སུས་ཀྱང་ཤེས་སླ། དེ་དག་ནི་༸གོང་ས་མཆོག་གིས་ཏང་གི་མཁྲེགས་འཛིན་གྱི་སྲིད་བྱུས་ཇི་ཙམ་ཆེ་ནའང་། བོད་རྒྱའི་དཀའ་རྙོག་སེལ་ཐབས་སུ་རྒྱ་རིགས་མི་མང་གི་རྒྱབ་སྐྱོར་རེག་ལ་སྐུ་ངལ་འཛེམ་མེད་གནང་བའི་མཇུག་འབྲས་འབའ་ཞིག་ཡིན། དྷ་ས་དང་དྷ་ས་མ་ཡིན་པའི་ས་ཕྱོགས་མང་པོར་འཛད་འཕྲིན་གནང་སྐབས་རྒྱ་རིགས་དད་ལྡན་པ་དང་། རྒྱ་རིགས་ཤེས་ཡོན་ཅན་ཚོར་དམིགས་བསལ་མཇལ་འཕྲད་གནང་སྟེ་བྱུང་བ་ཞིག་ལས་གཞན་སུས་ཀྱང་འཇོན་པ་ཞིག་མིན། ད་ལྟའི་དུས་སྐབས་ལ་མཚོན་ན། རྒྱ་རིགས་མི་མང་གི་སེམས་ཁམས་ནི་ནད་མནར་འདིས་ཚོར་སྣང་སྐྱེན་པའི་སྐབས་ཤིག་ཡིན། དེ་དག་ང་ཚོས་ངོས་འཛིན་མ་ཐུབ་པར་བཤད་བཤད་མང་དྲགས་ན། བཟང་ཕྱོགས་ཀྱི་འགྱུར་བ་ལས་ལྡོག་སྟེ་ངན་ཕྱོགས་ཀྱི་ཤུགས་རྐྱེན་ཡོང་མི་སྲིད་པ་མིན། དེས་ན་གནད་ཁག་མེད་པའི་གཏམ་ལ་གཟོབ་དགོས་པ་འདུག སྤྱི་སྒེར་གྱི་དྲྭ་ཐོག་གསར་འགྱུར་ནང་རྒྱ་ནག་ཝུ་ཧན་ནས་མཆེད་པའི་རིམས་ནད་དང་། རྒྱ་ནག་ཝུ་ཧན་ནས་མཆེད་པའི་ཏོག་དབྱིབས་ཀྱི་འགོས་ནད་ཅེས་བརྒྱུད་བསྒྲགས་བྱེད་པ་དང་། ཡང་སྤྱི་ཚོགས་དྲྭ་ལམ་ནང་རྒྱ་ནད་དང་། རྒྱ་ནག་གི་འགོས་ནད། རྒྱ་ནད་ཏོག་གསར། རྒྱ་གོག་གི་ནད་ཡམས་སོགས་ཡུལ་མིང་ནས་བཟུང་སྟེ་བརྗོད་པ་ནི། འཁོན་འཛིན་གྱི་ཚོར་ཤུགས་དྲག་པོ་ཁོག་མའི་ནང་གི་མེ་མདག་བཞིན་མེར་མེར་དུ་འཁོལ་བཞིན་པའི་ཉམས་སྣང་ཞིག་རྟག་ཏུ་བྱིན་གྱིན་འདུག་ན། མྱུར་དུ་འཇུག་ལྡོག་གི་བྱ་བ་ལེགས་པར་ཤེས་ནས།  གླེང་གཞི་ཡོད་མེད་ལ་མ་ལྟོས་པར་རྒྱལ་ཚོགས་ཀྱིས་ཀོ་ཝིཊ་༡༩ཞེས་པ་དེ་དང་། ཡང་ན་ཀོ་རོ་ནཱ། ཡང་གཞན་ཏོག་དབྱིབས་རིམས་ནད་ཅེས་ཁོ་ན་མིང་ནས་བཟུང་བ་ལས་ཁུངས་དང་མི་རིགས་དམིགས་བཀར་མ་བརྗོད་ན་དགའ་སྙམ། ཁྱད་པར་གོང་སྨྲོས་ཀྱི་ཐ་སྙད་སྐྱུག་བྲོ་བ་དེ་དག་ནི། ཧོལ་རྒྱུག་ལ་དགའ་བའི་མི་རེ་ཟུང་གི་བསམ་འཁྱེར་ཡིན་པ་ལས་སྤྱིའི་བསམ་པའི་འཁོར་ཕྱོགས་ནམ་ཡང་མཚོན་ཐབས་མེད། དེ་ལས་ཀྱང་མི་རིགས་རིག་གཞུང་གི་སློབ་གསོའི་ཁ་ཕྱོགས་དང་ནི། གནམ་ས་ལྟ་བུའི་ཁྱད་པར་ཡོད།  འབྱུང་འགྱུར་རྒྱ་གར་སོགས་རྒྱལ་སྤྱིའི་གསར་འགྱུར་ནང་གང་སྒྲོག་བཞིན་པ་དེ་སྤྱད་ན་མི་བཟང་ངམ། ཁོ་བོ་བསྡད་སའི་ཡུལ་ལུང་ཆུང་ཆུང་དེར་མཚོན་ན། ད་ལྟ་བར་ནད་རྟགས་ཐོན་པའི་མི་ཁ་ཤས་བྱུང་ཡོད། གཞུང་འབྲེལ་གནས་ཚུལ་དྲིལ་བསྒྲགས་བྱེད་མིས་ནད་རྟགས་ཡོད་པའི་མིའི་མིང་ཙམ་ལས་ལས་གནས་དང་། ཆོས་ལུགས། སྐྱ་སེར་སོགས་འགྲེལ་བརྗོད་གནང་རྒྱུར་གཟོབ་བཞིན་འདུག དེས་མི་མང་གི་ཁྲོད་ལ་རིམས་ནད་དེར་ཀོ་རོ་ནཱ་དང་། ཀོ་ཝིཊ་༡༩ཞེས་མིང་ནས་འབོད་པའི་གོམས་གཤིས་ལས་ཆོས་ལུགས་དང་མི་རིགས། ཡུལ་མིང་ནས་བཟུང་བའི་བག་ཆགས་མི་འདུག དེ་དག་ལ་མཚོན་ན་རང་རེའི་བསམ་སྤྱོད་ལ་དྲི་རྟགས་མི་བཞག་རང་བཞག་རེད། །

ལར་ནས་གཞུང་དང་ཚོགས་པ། མི་སྒེར་སུ་ཡིན་ནའང་། ༸གོང་ས་མཆོག་གི་སྔ་ཕྱིར་བསྩལ་བའི་བཀའ་སློབ་དང་། གསུང་འཕྲིན་ཕེབས་པའི་བརྗོད་བྱ་རྫོད་བྱེད་གཉིས་ཐད་ལ་དགོངས་པ་བཞེས་དགོས་པ་དང་། དགོངས་པ་བཞེས་ནས་དེ་དང་རྗེས་སུ་མཐུན་པའི་འགྲོ་ལམ་ཞིག་ལ་བསྐྱོད་དགོས་པ་ནི་གལ་ཆེ། ༸རྒྱལ་བ་དོན་གྱི་བདག་པོས་རྒྱ་ནག་ལ་ནད་ཡམས་ཐོག་མར་ཐོན་སྐབས། རྒྱ་མི་དད་ལྡན་གདུང་བྱ་རྣམས་ཀྱིས་རེ་མདུན་བཞིན་ཐུགས་སྨོན་དང་ལམ་སྟོན་གནང་སྐབས། རྒྱ་རིགས་མི་མང་ལ་འགྲོ་བ་མི་གཅིག་ཡིན་པའི་གུས་གཙི་དང་། ལྷག་དོན་རྒྱ་ནག་ལ་ལོ་རྒྱུས་ཡུན་རིང་ལྡན་པའི་ནང་པའི་སྤྱི་ཚོགས་ཤིག་ཡོད་པས། གུས་གཙི་དང་ཐུགས་སྨོན་ལམ་སྟོན་བྱ་རིན་ཡོད་པ་ཞིག་ཡིན་པ་གསལ་སྟོན་གནང་ཡོད། དེ་བཞིན་ཉེ་ཆར་༢༠༢༠ཟླ་༠༣ཚེས་༣༠ཉིན་ཕེབས་པའི་གསུང་འཕྲིན་རིན་པོ་ཆེའི་ནང་ལའང་། ད་ལྟའི་ནད་ཡམས་འདི་འཛམ་གླིང་གི་མི་ཐམས་ཅད་ཀྱི་གདོང་ལེན་དང་ནུས་པ་མཉམ་སྤུངས་བྱ་དགོས་པའི་ལམ་སྟོན་དེ་ལྟར་གནང་ཡོད། ནད་ཡམས་ནི་མིའི་རིགས་སྤྱི་ལ་འཕྲད་པའི་དཀའ་ངལ་ཞིག་དང་། འཛམ་གླིང་འདི་ཕན་ཚུན་གཅིག་ལ་གཅིག་བརྟེན་ཡིན་སྟབས་ཚང་མས་ནུས་པ་མཉམ་སྤུངས་དགོས། སྤྱིར་སྤྱི་སྒེར་ཀུན་གྱི་སྔོན་འགོག་ལ་ཧུར་ཐག་དང་། རིམས་ནད་འདི་འགོག་ཐབས་སླད་རྒྱལ་ཁབ་མཉམ་ལས་དགོས་པའི་བཀའ་བསྩལ་གནང་ཡོད། གཞན་ཡང་བོད་རྒྱའི་མི་རིགས་གཉིས་ཀྱི་འདས་སོང་གི་ལོ་རྒྱུས་ནང་འཕེལ་འགྲིབ་ཀྱི་འགྱུར་ལྡོག་ཇི་ཙམ་ཆ་མི་འཚལ་བའི་གནས་སུ་སྣང་ནའང་། མི་རིགས་གཉིས་ཀྱི་མ་འོངས་པའི་ཕུགས་ཀྱི་བདེ་དོན་ལ་དགོངས་ནས་ཕན་ཚུན་མཉམ་གནས་དང་། སྤུན་ཟླའི་འདུ་ཤེས་ཡོང་ཐབས་སུ་སྔ་ཕྱིར་ཆོས་དང་ཆབ་སྲིད་གཉིས་ཀྱི་མན་ངག་གི་རྩ་དོན་ཇི་སྙེད་ཅིག་ཡོད་པ་ལས། སྔ་ཕྱི་མ་གཏོགས་ང་ཚོས་སྐད་ཆ་བཤད་རྒྱུ་ལས་དྲག་ཤུགས་ཀྱིས་རྒྱ་མི་ཕྱིར་འབུད་མི་ཐུབ། ཐུབ་ན་ཡག་རྒྱུ་མེད། མི་དང་མི་གདོང་བསྟན་ནས་སྐད་ཆ་ཤོད་རེས་དང་། བདེན་པ་བདར་ནས་ཕན་ཚུན་གཉིས་ཕན་གྱི་ཐོག་ནས་ང་ཚོའི་དཀའ་ངལ་སེལ་ཐབས་བྱ་རྒྱུ་དེ་འོས་ཤོས་རེད་ཅེས་༡༩༩༨ཟླ་༠༨ཚེས་༢༧ཉིན་གཞོན་ནུའི་ཚོགས་ཆེན་ཐེངས་བཅུ་པའི་སྟེང་བཀའ་བསྩལ་ཡོད། རྒྱབ་ལྗོངས་ཀྱི་གནད་དོན་དེ་དག་རྩ་དོན་ལ་བཟུང་ནས། བོད་མི་སྤྱི་དང་ལྷག་དོན་ཕྱི་རྒྱལ་རང་དབང་གི་ལུང་པའི་ནང་ཡོད་པའི་བོད་མི་སྤྱི་སྒེར་ཚང་མས་དཔྱོད་ཤེས་མེད་པའི་སྡར་མའི་ངང་ཚུལ་ཕྱི་ལ་ངོམས་པའི་བྱེད་སྟངས་ནམ་ཡང་བྱ་མི་ཉན། མང་པོས་བོད་མི་རིགས་ལ་ཞེན་ཁོག་གི་བསམ་པས་དེ་ལྟར་བྱེད་ཀྱི་ཡོད་ཀྱང་སྲིད། དེ་ནི་དགོངས་ཡངས་མེད་པ་དང་། ཕྱོགས་གཅིག་ཁོ་ནའི་སྣང་ཚུལ་ལས་ཕྱོགས་མཐའ་དག་གི་གནས་ལུགས་ལ་བསམ་པས་མ་ཁྱབ་པ་ལས་གཞན་གང་ཡང་མིན། རང་རེར་རང་གི་མི་རིགས་ལ་དུངས་ཞེན་ཡོད་པ་བཞིན་རྒྱ་མི་རིགས་ཀྱི་བྱིས་པ་ཆུང་ཆུང་ཡན་ནས་རྒྱ་རིགས་སྤྱི་ལ་ཞེན་ཁོག་གི་བསམ་པ་གཞན་ལས་ལྷག་པ་ཡོད། དེ་ལྟར་རྒྱུ་མཚན་དང་རིགས་ལམ་ལ་བཀུར་མི་ཐུབ་པའི་ཞེན་ཁོག་བསྐམས་པོའི་རྗེས་སུ་འབྲངས་ནས་ཚིག་མཚོན་མདའ་མོ་འཕེན་རེས་བྱེད་ན། ཡག་རྒྱུ་གཅིག་ཀྱང་མེད་པ། སྡུག་གྱོང་ཉིས་བརྩེགས་ལས་གཞན་མེད། སླར་ཡང་དོ་དོ་ནན་ནན་གྱིས་ཞུ་སྙིང་འདོད་པ་ཞིག་ལ། ༡༩༨༣ཟླ་༡༠ཚེས་༠༩ཉིན་༸གོང་ས་མཆོག་གིས་ལྡི་ལིར་གཞོན་ནུའི་ཚོགས་འདུར་བཅར་བ་ཚོར་ཕེབས་པའི་བཀའ་སློབ་ལས། ཉེ་ཆར་ཁ་ཤས་ལ་བཤད་རྒྱུ་བྱུང་། ཕྱེད་ཀ་རྩེད་མོ་ཡིན་ལ་ཕྱེད་ཀ་དངོས་གནས་ཡིན། ཐར་པ་གང་ཡིན་ཟེར་ན། འཛམ་བུ་གླིང་ཡོངས་རྫོགས་མིའི་ཁྱིམ་ཚང་གཅིག་ཏུ་གྱུར། མི་ཐམས་ཅད་ཕ་མ་བུ་ཕྲུག་ནང་བཞིན་མཛའ་བརྩེ་དང་ཞི་འཇམ་བདེ་སྐྱིད་ཡོད་པའི་ཁྱིམ་ཚང་ཆེན་པོ་གཅིག་བྱུང་སོང་ན་དེ་ཐར་པ་ཡིན་ཞེས་ཤོད་ཀྱི་ཡོད། དེ་འདྲ་ཞིག་བྱུང་ན་རྒྱལ་ཁབ་ཕན་ཚུན་གྱི་དོན་དག་ལ་དམག་འཁྲུག་རྒྱག་མི་དགོས། ཡུལ་གཅིག་གི་ནང་མུ་གེ་བྱུང་ན་གཞན་ཞིག་གིས་ལྟད་མོ་བལྟས་ནས་སྡོད་ཐབས་མེད། ལྟ་བ་འདྲ་མི་འདྲའི་ཐོག་ནས་རྩོད་པ་རྒྱག་དགོས་མེད། དངོས་གནས་ཚེ་གང་པོར་དགོས་པའི་བདེ་སྐྱིད་ཅིག་ཡོང་གི་རེད་ཅེས་བཀའ་བསྩལ་ཡོད། གོ་ལ་ཧྲིལ་པོ་སྤྱི་ལ་དགོངས་པའི་རླབས་ཆེན་གྱི་དགོངས་པ་དེ་དག་རང་ཅག་བོད་མི་ཚོར་འབྲེལ་བ་དམིགས་བསལ་ཡོད་པ་མ་ཟད། ༸རྒྱལ་བའི་དགོངས་པ་བདེ་བླག་ཏུ་འགྲུབ་རྒྱུར་འོས་འགན་ཡང་ཆེན་པོ་ཡོད། ང་ཚོས་༸རྒྱལ་བའི་དགོངས་གཞི་དེ་དག་ཁ་ཙམ་དང་ཚིག་ཙམ། མོས་པ་ཡིད་ཆེས་ཀྱི་གཟུགས་བརྙན་ལ་མ་བཞག་ནས་དངོས་ཐོག་བདེན་འཚོལ་གྱི་འདུ་ཤེས་སྐྱེས་ནས། ལག་བསྟར་ཆེད་ཞི་བའི་དཔུང་རོགས་སུ་སྔོན་བསྐྱོད་མི་སྣར་འཐོན་དགོས། གཞན་ཞེན་ཁོག་བསྐམས་པོས་ཅི་ཡང་ཧ་ལས་རྒྱུ་མེད་དོ།།

ད་ལྟའི་སྐབས་ལ་རྒྱ་ནག་ནི་ནང་ཁུལ་གྱི་ཆབ་སྲིད་དང་འཕྲོད་བསྟེན། དཔལ་འབྱོར་དང་རྒྱལ་སྤྱིའི་འབྲེལ་ལམ་ཐད་ཟང་ཟིང་ལང་ལོང་མཚོ་མཐའི་རྦ་ཀློང་འཁྲུག་པ་བཞིན་ཡོད་པའི་སྐབས་ཡིན་པ་དང་། ལྷག་དོན་རྒྱ་རིགས་ཀྱི་གྲོང་གསེབ་སོགས་ཀྱི་དབུལ་ཕོངས་མི་སྡེའི་སྤྱི་ཚོགས་ནི།  སྡུག་བསྔལ་ཟམ་མི་ཆད་པ་ལ་གདོང་ལེན་བྱ་དགོས་པའི་སྒང་ཡིན། དེ་འདྲའི་དུས་སྐབས་སུ་རང་རེ་ཕྱི་ལོགས་སུ་ཡོད་པའི་མི་ལ་ལས་ཨ་རི་སོགས་སྟོབས་འབྱོར་མངའ་ཐང་ལྷག་ཏུ་ཆེ་བའི་རྗེས་སུ་དྲངས་ནས། ནད་ཡམས་འདི་དང་འབྲེལ་ནས་རྒྱ་ནད་དང་། རྒྱ་འདྲེའི་ནད། རྒྱ་ནག་གི་ཏོག་གསར། རྒྱ་ནག་ཝུ་ཧན་ནས་ཐོན་པའི་འགོས་ནད་་སོགས་རྣོ་ངར་ཆེ་བའི་ཚིག་མཚོན་འཕེན་པ་ནི། ཁོང་ཅག་གི་ལུས་སེམས་ན་ཐིང་ཐིང་ཡོད་པའི་སྟེང་། རང་རེས་མགོ་ཐོག་ལ་རྡོ་བས་རྡུང་བ་བཞིན་འགྱུར་ངེས། བདག་ལྟ་བུར་མཚོན་ན། མི་སྙན་པའི་ལབ་རྙོག་དེ་དག་གོ་མ་ཐག་ཅི་ཞིག་ཤོད་ཀྱིན་ཡོད་དམ་སྙམ་པའི་སེམས་ཁྲལ་གྱིས་འདུག་བཟོད་མི་བདེ་བའི་ཚོར་སྣང་ཤུགས་ཆེན་བྱུང་། དོན་དངོས་ཐོག་དེ་རིང་རང་རེས་གོ་སྐབས་ཆེན་པོ་ཞིག་ལ་གཙིས་ནས། རྒྱ་ནག་གི་གཞུང་དམངས་གཉིས་ལ་ཕན་སེམས་ཀྱི་སེམས་འཁུར་བསྐྱེད་ནས། ༸རྒྱལ་བའི་དགོངས་པ་བཞིན་འགྲོ་བ་མི་གཅིག་ཡིན་པའི་འདུ་ཤེས་བཟུང་ནས། ནུས་པ་མཉམ་སྤུངས་དང་སྙིང་སྟོབས་བསྐྱེད་པའི་མིའི་རྣམ་དཔྱོད་འཕེལ་ཐབས་ལ་གྲོགས་དད་བྱེད་དགོས་པའི་དུས་ཡིན། ཡ་ཡོར་ཆེ་བའི་དུས་ཚོད་དེ་འདྲ་ཞིག་ལ་བོད་མི་ཚོས་ལྷག་བསམ་རྣམ་པར་དག་པའི་སྒོ་ནས། བཟང་སྤྱོད་ཀྱི་རྣམ་པ་བསྟན་ཐུབ་ན།  རྒྱ་མིས་བོད་མིའི་ཐོག་འཛིན་པའི་དོགས་པ་མང་པོ་བསལ་རྒྱུར་ཕན་ཐོགས་ཡོད། དེ་ལྟར་བརྗོད་དུས་བདག་གིས་རང་ལུགས་གཏད་སོ་མེད་པར་བྱེད་དགོས་ཞེས་ཤོད་ཀྱི་མེད་ལ། རྒྱ་ནག་གིས་རྒྱལ་སྤྱིའི་འགྲོ་ལུགས་ཀྱི་ཁྲིམས་དོན་ལ་རྡོག་རོལ་དང་། གཞུང་འཛིན་ཏང་གིས་རང་གི་མི་མང་ལ་གནས་ཚུལ་ཉན་ཞིབ་ཐད་གསང་རྒྱའི་དམ་དྲག  དེ་བཞིན་མི་མང་གིས་དངོས་ཡོད་ཀྱི་དཀའ་ངལ་ཕྱི་གྱར་མི་ཡོང་ཆེད་ཉིན་མཚན་དུས་དྲུག་ལ་ལྟ་རྟོག་ནན་མོའི་འོག་བཞག་པ། ཏང་གི་སློབ་གསོའི་ནང་ནུབ་ཕྱོགས་ཀྱི་སྤྱི་ཚོགས་སྤྱི་ལ་གོ་བ་ལོག་སྒྲུབ་བྱེད་པ། དམིགས་བསལ་གྲངས་ཉུང་མི་རིགས་ཀྱི་ཐོག་ལ་འཛིན་པའི་སྲིད་བྱུས་གདུག་རྩུབ་ཆེ་བ། དུས་ད་ལྟའི་བར་༸གོང་ས་༸ཏཱ་ལའི་བླ་མ་མཆོག་གི་ལྷག་བསམ་རྣམ་དག་གི་དགོངས་གཞིར་ལོག་འགྲེལ་བྱེད་པ་དེ་དག་དངོས་འབྲེལ་མིན་པའང་ཤོད་ཀྱི་མེད། ང་ཚོས་རྒྱ་མི་དུང་ཕྱུར་བཅུ་གསུམ་གཉེན་དུ་འགུག་ཐབས་ལ་དགོངས་པ་བཞེས་དགོས། རྒྱ་ནག་མི་མང་དང་ཏང་གི་སྲིད་གཞུང་གཉིས་ཀ་ཁག་ཁག་སོ་སོ་ཡིན། རྒྱ་མི་དུང་ཕྱུར་བཅུ་གསུམ་ནི་ཉེས་ཅན་ཁྲོད་ཀྱི་ཉེས་མེད་ཡིན། རྒྱ་ནག་གུང་ཁྲན་ཏང་གིས་རྒྱ་ནག་མི་མང་གི་མདུན་དུ་༸ཏཱ་ལའི་བླ་མ་དང་། ཕྱི་སྡོད་བོད་རིགས་ཡུལ་གྱར་བ་རྣམས་ནི། རྒྱ་ནག་ཁ་བྲལ་གཏང་རྒྱུའི་ངན་སེམས་ཡོད་པ་བརྒྱུད་བསྒྲགས་བྱེད་ཀྱིན་ཡོད། ང་ཚོས་འདི་ཕྱོགས་ནས་དེ་དང་རྗེས་མཐུན་ལྟ་བུའི་བཟང་སྤྱོད་ཀྱི་རྣམ་པ་མེད་པའི་རང་སྣང་གང་དྲན་གྱིས་བརྗོད་ཚིག་སྣ་ཚོགས་སྤྱད་པ་ནི། བོད་དང་རྒྱ་རིགས་དུང་ཕྱུར་བཅུ་གསུམ་ལ་དུག་ཏུ་སོང་ཞིང་། ད་ལྟ་བར་ངན་སྤྱོད་ངོ་སོར་འཁྱེར་མཁན་གྱི་ཏང་ལ་སྨན་དུ་སོང་བ་ཞིག་ཡིན། དམིགས་བསལ་དེ་རིང་གི་ནད་ཡམས་འདིས་རྒྱ་ནག་ནང་གི་སྨན་པ་དང་སྨན་ཞབས་སྟོང་ཕྲག་མང་པོས་ནད་པའི་དོན་དུ་ཚེ་སྲོག་ཤོར་དགོས་པའི་ཡིད་སྐྱོའི་གནས་ཚུལ་དེ་དག་ལ་བསམ་པའི་རྒྱབ་སྐྱོར་བྱེད་དགོས་པ་ནི། བཙན་ཤེད་འོག་གི་སྡུག་བསྔལ་མྱོང་མཁན་གཅིག་པ་ཡིན་པ་ཚོས་ཅིས་ཀྱང་དྲན་དགོས་པའི་དོན་དག་ཡིན། དེས་ན་དེ་རིང་ང་ཚོས་༸གོང་ས་མཆོག་གི་ཐུགས་དགོངས་ཀྱི་ལམ་སྟོན་བཞིན་སྐྱིད་སྡུག་མཉམ་མྱོང་གི་ཁ་ཞེ་གཉིས་མེད་ཀྱི་རྣམ་འགྱུར་འཛིན་དགོས་པ་ནི། མི་རིགས་གཉིས་ཀྱི་ཡིད་ཆེས་ཀྱི་རྨང་གཞི་འཛུགས་སྐྲུན་ལ་སྨན་པ་དང་། བཟང་པོའི་ཁ་རྗེ་དབང་ཐང་རྒྱས་པ་དང་། ངན་པའི་ཚེ་བསོད་ཟད་པའི་འགྲོགས་སུ་འགྲོ། ད་དུང་མཇུག་སྣོན་གྱི་ཚུལ་དུ་བཤད་སྙིང་འདོད་པ་ནི། བོད་རྒྱ་གཉིས་སྨན་གྱི་དབུ་མའི་ལམ་གྱི་སྲིད་བྱུས་ནི། རང་ཅག་གཞུང་མང་གཉིས་ཀྱིས་མང་མོས་ཐག་གཅོད་བྱས་པའི་ཁྲིམས་མཐུན་གྱི་ལངས་ཕྱོགས་ཡིན་པས།  རང་གི་སྒོ་གསུམ་གྱི་བྱ་བྱེད་ཅི་དང་གང་བྱེད་པ་མཐའ་དག་སྲིད་བྱུས་ཀྱི་དགོངས་དོན་གྱི་མཐུན་གྲོགས་སུ་འགྲོ་ཞིང་། སྲིད་བྱུས་ཀྱི་གཞུང་ལམ་གི་བཀག་རྡོ་རུ་མི་འགྱུར་བའི་སྤང་བླང་འཇུག་ལྡོག་ཤེས་དགོས་པ་མ་ཟད། བོད་མིའི་སྒྲིག་འཛུགས་ཀྱིས་དེའི་ཐད་འཐུས་ཤོར་མེད་པའི་ལམ་སྟོན་དགོས་པ་ནི། ཁ་ཚ་དགོས་གཏུགས་ཀྱི་དགོས་མཁོ་ཞིག་ཏུ་སྣང་ངོ་།།