མཁན་པོ་ཤེས་རབ་ཆོས་འཕེལ། ཆོས་ཐང་དགོན།
ནད་རྫས་ཀྱི་ངོ་བོ།
བཅུ་དགུ་པའི་ཏོག་དབྱིབས་རིམས་རྫས་འདི་ནི་གཟུགས་སུ་གྲུབ་པའི་རྡུལ་ཤིན་ཏུ་ཆུང་བ་ཞིག་ཡིན་ལ། མངོན་གསུམ་གྱི་བློ་རགས་པའི་སྤྱོད་ཡུལ་ལས་འདས་པ་ཞིག་རེད། འོན་ཀྱང་ཕྲ་མཐོང་རྒྱང་ཤེལ་གྱིས་བརྟག་ན་ཕྲ་རབ་བརྒྱད་འདུས་ཀྱི་རྡུལ་ཕྲན་ལས་ཆེ་བ་ཡིན་མོད་ཀྱང་མི་རང་ག་བའི་སྐྲ་ཉག་མ་གཅིག་ཆ་སྟོང་དུ་ཕྱེས་པའི་ཆ་གཅིག་གི་བོངས་ཚོད་དང་ལྡན་པ་ཞིག་ཡིན། དེ་ཡང་རྡུལ་རྫས་དུ་མ་འདུས་པའི་གོང་བུ་ཞིག་ཡིན་པ་མ་ཚད། ཆེ་ཆུང་ལ་ན་ནོ་མེའི་ཁྲི་100(nm)ཡོད་པ་དང་ཕྱིའི་དབྱིབས་ནི་རླུག་རིལ་ལྟ་བུ་ཞིག་ཡིན། དེའི་ནང་ལ་སྒོ་ངའི་དཀྱིལ་གྱི་སེལ་པོ་བཞིན་དུ་སྙིང་པོའི་རིགས་རྫས་ཡོད། མོ་ཊའི་སྣུམ་བཞིན་འབྱུང་བ་ལྔའི་ནང་གི་ཆུའི་རིགས་དང་སའི་རིགས་གཉིས་ཀ་དང་ལྡན་པ་ཞིག་ཡིན་པ་ལས་སྐམ་པོ་རྡོ་ཐལ་ནང་བཞིན་ཞིག་མ་ཡིན།
སྐྱེ་འཇིག་གནས་གསུམ།
ཏོག་དབྱིབས་ནད་རྫས་འདི་ཡང་རྩྭ་མགོའི་ཟིལ་བ་བཞིན་མི་རྟག་པའི་བདག་ཉིད་དུ་གྲུབ་པ་ཡིན་པས་ནུས་པ་ཇེ་རྙིང་དང་ཇེ་ཞན་དུ་འགྲོ་རུ་ཡོད། འོན་ཀྱང་ཁེར་རྐྱང་དུ་འདུག་མི་ནུས་པ་དང་རང་སྐྱ་མི་ཐུབ་ཡིན་པས་དངོས་པོ་གཞན་དང་གཞན་གྱི་སྟེང་དུ་སྤུ་ཉག་བཞིན་འབྱར་ནས་གནས་མཁན་ཞིག་ཡིན། མིའི་ལུས་ཀྱི་བྱིང་ཁོག་སྤྱི་དང་ལྷག་པར་གློ་བའི་ནང་དུ་གནས་པ་རྒྱུན་རིང་བ་ཡིན་པ་མ་ཟད། རིང་སྲེལ་འཕེལ་བ་བཞིན་མིའི་ལུས་ནང་དུ་རིགས་རྫས་དེས་བུ་ཕྲུག་སྐྱེད་པ་བཞིན་གཅིག་ནས་གཅིག་སྐྱེད་པར་བྱེད་པ་དང་འཕེལ་བར་བྱས་ཏེ་མིའི་ལུས་ཀྱི་གཅིན་སྐྱག་ཁྲག་གསུམ་དང་། མཆི་སྣབས་རྔུལ་གསུམ་དང་འགྲོགས་ནས་ཕྱི་རོལ་ལ་འཕོ་ཞིང་གནས་པར་བྱ། མིའི་ལུས་པོ་དང་ཁ་བྲལ་ཚེ་ཕྱི་རོལ་གྱི་ལྕགས་སོགས་ཀྱི་སྟེང་དུ་སྐྱེ་འཕེལ་མི་ཐུབ་ཀྱང་ཡུན་རིང་པོར་ནུས་ལྡན་དུ་གནས་ཐུབ། ནུས་ལྡན་དུ་གནས་པའི་ཡུན་ཚད་ནི་ཉུང་མཐར་ཆུ་ཚོད་གསུམ་དང་རིང་མཐར་ཉིན་གསུམ་བར་ཡིན། དེ་ཡང་འགོ་གཞིའི་དངོས་པོ་མི་འདྲ་བ་ལ་གནས་ཡུན་མི་འདྲ་བ་ཡོད།
| དངོས་པོ། | ཡུན་ཚད |
| འགྱིག་དང་བཙའ་མེད་ལྕཊ་རིགས། | ཉིན་ཞག་༣ |
| ཟངས་རིགས། | དུས་ཚོད་༤ |
| ཤོག་སྒམ། | དུས་ཚོད་༢༤ |
| མི་ཡི་དྲི་མ་ཁྱབ་ཁོངས་ནང་(Airborne Aerosol) | དུས་ཚོད་༣ |
| འཁྱག་སྒམ་ནང་དུ། | ལོ་གཅིག |
ཆུ་ཚན་དང་ཇ་ཚ་བོ་ལྟ་བུའི་འབྱུང་བ་མེ་སྟོབས་ལྡན་དང་འཕྲད་ཚེ་འགྱིག་དང་ལ་ཅཱ་བཞིན་དུ་འགྱུར་ནས་ནུས་མེད་དུ་ཆགས་འགྲོ་བ་དང་། འཁྲུད་རྫས་ཆང་ཅན་དང་སྐྱུར་ཅན་སོགས་དང་འཕྲད་ཚེ་གནམ་ལྕགས་མགོ་ལ་ལྷུང་བ་བཞིན་འཐོར་ཞིག་ཏུ་འགྲོ་བ་ཡིན།།
ཇི་ལྟར་འགོ་ཚུལ།
འདི་ནི་ཐོག་རེག་ཅན་གྱི་གཟུགས་སུ་གྲུབ་པ་ཡིན་པས་ཅ་ལག་སོགས་དངོས་རྫས་གཞན་གྱི་སྟེང་དུ་ཐོག་པ་དང་རེག་འབྱར་བྱ་བ་ཞིག་ཡིན། ད་དུང་ལྗིད་ཁོག་ཀྱང་ཡོད་པས་རྩམ་སྐྱ་བཞིན་ས་ལ་འབབ་རྒྱུ་ཞིག་ཡིན་པ་ལས་མཁའ་རླུང་གི་ཉི་རྡུལ་བཞིན་བར་སྣང་ལ་འཕུར་ལྡིང་བྱ་རྒྱུ་ཞིག་མིན། ཆུ་དང་འཕྲད་ཚེ་རྡོ་ཁབ་ལེན་བཞིན་ཆུས་སྡུད་པར་བྱས་ནས་ཉ་གཅོང་ལྟར་ཆུ་ཡིས་འཁྱེར། ལྷག་པར་མིའི་ལུས་ནས་བཏོན་པའི་མཆི་མ་དང་རྔུལ་ཆུ་རྣམས་ནི་རྟ་ཕོ་བཞིན་དུ་ཞོན་ནས་བསྐྱོད་དེ་སྣུམ་ནག་བཞིན་དུ་ག་ས་ག་བར་འགོ་བར་བྱ། ཏོག་ནད་ཅན་གྱི་མིའི་ལུས་ནས་ཕྱིར་མཆེད་སྐབས་ལུས་ཀྱི་དྲི་མ་བཞིན་དུ་ཕྱོགས་བཅུ་ལ་ཁྱབ་ཅིང་། རྒྱ་ཁྱོན་ཡང་མིའི་ལུས་ཀྱི་དྲི་མ་ཁྱབ་ཚད་ཀྱི་རྒྱ་ཁྱོན་དང་གཅིག་པ་ཡིན། དེའི་ཁྱབ་ཚད་ལ་མེས་ཁྲི་གཅིག་དང་ཕྱེད་ལྷག་ཡོད། །
འགོས་འབྲས།
ནད་རྫས་འདི་མིའི་ལུས་ཁོག་ནང་དུ་སོང་ན་ངོ་བོ་སྟོབས་ལྡན་དུ་འགྱུར་བ་མ་ཟད། ཕྲུ་གུ་འཕེལ་བ་བཞིན་གཅིག་གིས་གཅིག་བསྐྱེད་ནས་ཡུན་ཐུང་ངང་གྲངས་ཀ་འཕེལ་བར་འགྱུར་བ། ནད་རྟགས་ཀྱང་བདུན་ཕྲག་གཅིག་གཉིས་ནང་མ་གཏོགས་མི་མངོན། གལ་སྲིད་མིའི་རང་ལུས་ཀྱི་འགོག་རྫས་སྟོབས་ཤིན་ཏུ་ཉམས་པའི་ཚེ་གློ་བུར་དུ་ནད་རྟགས་མི་གསལ་བར་ལྔ་ལམ་དུ་འགྲོ་སྲིད། མིའི་རང་ལུས་ཀྱི་འགོག་རྫས་སྟོབས་དང་ལྡན་མིན་གྱི་དབང་གིས་ད་བར་འཆི་ཚད་རྣམས་ལས་སྐྱེས་པ་ཕོ་ཤི་བ་མང་ལ། སྐྱེས་མ་བུད་མེད་ཤི་བ་ཉུང་བ་ཡིན། དེ་ལས་ཀྱང་རྒན་ཁོག་དང་། རྒྱགས་པ་རྣམས་ནི་ནད་ལས་ཐར་བ་དཀོན།
འགོ་ཡུལ་དང་འགོ་བྱེད།
མིའི་ཁ་དང་སྣ་དང་མིག་གསུམ་ནི་ནད་རྫས་འཇུག་པར་བྱ་ཡུལ་གྱི་སྒོ་གསུམ་ཡིན་ལ། དེ་ལས་གྲོགས་གཞན་དང་ནང་མི་གཞན་ལ་མཆེད་པ་མ་ཟད། རང་ལ་ཡང་དེ་གསུམ་བརྒྱུད་ནས་ལུས་ལ་ཞུགས། ད་བར་གྱི་ཏོག་ནད་ཅན་གང་བྱུང་ཐམས་ཅད་ལ་སྒོ་དེ་གསུམ་ལས་ཕར་འགོས་ཚུར་འགོས་བྱས་པ་ཡིན། དེའི་ཕྱིར་རང་དང་གྲོགས་གཞན་གཉིས་ཀའི་ཆེད་དུ་ཁ་ཡོལ་དང་མིག་ཤེལ་གྱོན་རྒྱུ་གལ་ཆེ།དེ་འདྲའི་འཇུག་སྒོ་གསུམ་དང་གཞན་ཡང་། མི་གཞན་གྱི་ཁ་རླངས་དང་རང་གི་ལག་པ་གཉིས་ནི་ནད་རྫས་ཕན་ཚུན་ལ་འགོ་བྱེད་ཀྱི་རྒྱུ་རྐྱེན་གཙོ་བོ་ཞིག་ཡིན་པས། མི་གཞན་ལ་བར་ཐག་འཇོག་པ་དང་ལག་པ་ཁྲུས་པ་ནི་རང་གཞན་གཉིས་ཀའི་ཆེད་ཡིན། མིའི་བར་ཐག་ཕྱེ་བ་ནི་མེས་ཁྲི་གཉིས་དང་ལག་པ་འཁྲུད་པའི་ཡུན་ཚད་སྐར་ཆ་སུམ་ཅུ་ཙམ་ཡིན། མདོར་ན་འགོ་བྱེད་གཉིས་དང་འགོ་ཡུལ་གསུམ་བཅས་དོན་ཚན་ལྔ་པོ་འདི་ལ་རང་དོན་དང་གཞན་དོན་ཆེད་དུ་དྲན་ཤེས་བག་ཡོད་གསུམ་ག་བསྟེན་དགོས།
བླངས་དོར་གནས་ལ་མི་རྨོངས་པ།
མདོ་དང་འདུལ་བ་ནས་མིའི་ལུས་ལ་སྲིན་འབུའི་རིགས་ཡོད་པར་གསུངས་པ་བཞིན་ཁ་ཅིག་གིས་ནད་འབུ་ཟེར། གདུགས་དཀར་མདོ་སོགས་ལས་སྦྱར་བའི་དུག་གི་མཚོན་ཡོད་པར་གསུངས་པ་ལ་བརྟེན་ནས་འགའ་ཞིག་གིས་དུག་རྫས་ཡིན་པར་རློམ། མཁའ་འགྲོའི་འཁྲུགས་བསྐང་ནང་དུ་གསལ་བ་ལྟར། ཆོས་པ་དུ་མ་ཞིག་གིས་དུས་ངན་གྱི་ནད་ཡམས་ཙམ་ཡིན་པར་བཤད། ལ་ལས་ཤ་ཚོང་ཁང་ནས་མཆེད་པའི་ཤ་དུག་ཅིག་གོ་ཟེར་བ་སོགས་བྱིས་པའི་སྐད་ཆ་བཞིན་སྒྲོ་འདོགས་སྣ་ཚོགས་ཀྱི་འུར་སྒྲ་དང་། སང་འཆི་ལ་ཉེ་བའི་དངངས་སྐྲག་དང་། ཉིན་རེའི་འཚོ་བའི་ཆ་རྐྱེན་སྐོར་གྱི་སེམས་ཁྲལ་བཅས། མདོར་ན་གཞིའི་འཇིག་རྟེན་དང་ཕྱིའི་ལུས་དང་ནང་གི་སེམས་ཀྱི་སྡུག་བསྔལ་བཅས་སྦྲེལ་ནས་རྣམ་རྟོག་སྣ་ཚོགས་ཀྱིས་གང་སྟེ་ཅི་བྱ་རྟོལ་མེད་དུ་ཆགས་པའི་དུས་སུ། གོ་སྐབས་དེ་ནི་ཆོས་བྱ་བའི་རྐྱེན་དུ་འགྲོ་བ་ནི་ལོས་སྲིད། ནད་རྫས་འདི་ལ་དམིགས་ནས་དེ་འགོག་པ་དང་མེད་པར་བཟོ་བའི་ཆེད་དུ་གསོལ་ཁ་དང་ཞལ་འདོན་སོགས་སྣ་ཚོགས་ཤིག་བྱ་བ་ནི་ཅི་ཡིན་ནམ་སྙམ། འོན་ཀྱང་སྣབས་དང་མཆི་མའི་ནང་དུ་བསྡད་ཆོག་རྒྱུ་ཞིག་དང་། ལག་པའི་སྣུམ་འཁྲུད་བྱེད་ཀྱིས་གཞོམ་དུ་ཡོད་རྒྱུ་ཞིག་དང་། ལག་པའི་ངོས་སུ་འབྱར་འགྲོ་རྒྱུ་ཞིག་ཡིན་ན་ནི་གཟུགས་སུ་གྲུབ་པ་ཡིན་དགོས་པ་ལས་འོས་ཅི་ཡོད། གཟུགས་ཀྱི་ཕུང་པོ་ཞིག་ཡིན་ཕྱིན་སྔགས་དང་ཞལ་འདོན་ཅི་ལྟར་དང་ག་ཚོད་བཏོན་ཀྱང་དེས་དེ་མེད་པར་བཟོ་ག་ལ་ཐུབ། དེ་ལས་ཆོས་བྱ་ལུགས་ཀྱི་བླངས་དོར་ལ་མ་རྨོངས་པར་ལུས་ཀྱི་འཕྲོད་བསྟེན་སྤྱི་དང་རྒྱལ་སྤྱིའི་སྨན་པ་དང་རང་རྒྱལ་ཁབ་ཀྱི་ལམ་སྟོན་ལྟར་རང་འགུལ་གྱིས་ལག་བསྟར་བྱ་བ་ཅིས་ཀྱང་གལ་ཆེ། མདོར་ན་ནད་རྫས་གསར་བ་འདི་ལ་བརྟེན་ནས་སེམས་ཅན་ཤི་ཚད་དང་ན་ཚད་ལ་དམིགས་ཏེ་རང་གཞན་སུ་ན་ཡང་། སྤྱོད་འཇུག་སོགས་ལས་གསུངས་པ་བཞིན། སྨོན་འཇུག་གི་སེམས་བསྐྱེད་ལ་བསམ་བློ་གཏང་རྒྱུ་ནི་ཆོས་པ་དངོས་དང་ནང་བའི་ཁྱད་ཆོས་དངོས་དེ་རེད་སྙམ། ཀུན་མཁྱེན་དོལ་པོ་བའི་རིམ་གཉིས་སྨོན་ལམ་ལས་ཀྱང་།
བདག་གི་ལུས་དང་ལོངས་སྤྱོད་དང༌། །དུས་གསུམ་དགེ་བ་ཐམས་ཅད་ཀྱང༌། །
སེམས་ཅན་ཀུན་ལ་སྨིན་གྱུར་ནས། །འཕྲལ་དང་ཡུན་དུ་བདེ་བར་ཤོག །
སེམས་ཅན་རྣམས་ཀྱི་མི་དགེའི་ཚོགས། །སྡུག་བསྔལ་རྒྱ་མཚོའི་རྒྱུར་གྱུར་པ། །
དེ་ཀུན་བདག་ལ་སྨིན་གྱུར་ནས། །སྡུག་བསྔལ་རིན་ཆེན་དབང་པོར་ཤོག།།ཅེས་དང་། གལ་ཏེ་གཞན་ལ་ཕན་གྱུར་ན། །རང་གི་དོན་ལ་ལྟོས་མེད་པར། །
ངན་སོང་གསུམ་གྱི་སྡུག་བསྔལ་ཡང༌། །གཞན་གྱི་དོན་དུ་བཟོད་པར་ཤོག །
ཅེས་སྨོན་ལམ་བཏབ་པ་ལྟར་འགྲུབ་པར་གྱུར་ཅིག ཏོག་དབྱིབས་ནད་རྫས་ཀྱི་འགོས་ཁྱབ་མེ་སྟག་མཆེད་པ་བཞིན་དར་བའི་གནས་ཡོ་རོབ་ནས་འཕྲལ་དུ་བྲིས།
ཤེལ་རིགས།
དཔེར་ན། ཇ་ཕོར། མེ་ལོང་། ཤེལ་སྒོ་སོགས་དང་། གཞན་ཡང་དཀར་ཡོལ། རྫ་དཀར། ཇ་ལྗག་སོགས་སུ་ཉིན་༥།
ཁུངས། https://www.webmd.com/lung/how-long-covid-19-lives-on-surfaces
ཡག་གོ། ཚན་རིག་དང་ནང་ཆོས་བཟུང་འབྲེལ།
དྲི་བ་ལན་ཡོད་པ་ཞུ།
ནད་འབུ་འདི་ཤེལ་ཕུར་དང་ཤེལ་རིགས་ལ་ཡུན་ག་ཚད་གནས་ཡོད་དམ.།
གསལ་བཤད་བྱེད་ན་འདི་འདྲ་དགོས་ནི་རེད། བཀའ་དྲིན་ཆེ། ཧ་ལས་པ་ཡག་པོ་བྲིས་འདུག །
ཀྱེ་མ་དུས་ངན་སྙིགས་མའི་ཀྱི་སེ་མདོག་དྲིན་ལེན་ལོག་འཇལ་རྡོ་ཡར་སྐྱག་ནས་རང་གི་རྐང་པར་ཕོག་པ་གསང་སྔགས་རྡོ་རྗེ་ཐེག་པའི་ཡོན་ཏན་བརྗོད་མ་ཐུབ་པ་མཁས་རློམ་ཚིག་རྗེས་གཡེང་ནས་རྒྱུ་འབྲས་ལ་ཡིད་ཆེས་དཀའ་བ་སྙིང་རེ་རྗེ་།་་་དཔུང་གཉེན་དང་དངོས་གཙོ་སྨྲ་བ་ཟུང་དུ་འཇུག་ན་ཅི་མ་རུང།