རྒྱ་ནག་གཞུང་གིས་མི་མང་ཉིན་རེའི་ཚགས་པར་གྱི་གསར་འགོད་པ་ཞིག་ལ་ཟིང་འཁྲུག་བསླངས་བ་དང་ལྐོག་ཟ་རུལ་སུངས་སོགས་ཀྱི་ནག་ཉེས་འོག་ལོ་ ༡༥ ཡི་བཙོན་འཇུག་ཁྲིམས་ཐག་བཅད་འདུག
གནད་དོན་དེ་དང་འབྲེལ་ནས་རྒྱ་ནག་གི་འགྲོ་བ་མིའི་ཐོབ་ཐང་སྲུང་སྐྱོབ་ལྟ་ཞིབ་ཚོགས་པས། ཐེངས་འདིར་ཁྲིན་ལ་ལྐོག་ཟ་རུལ་སུངས་སོགས་ཀྱི་ཉེས་མིང་སྣ་ཚོགས་གཡོགས་ཡོད་ཀྱང་། དོན་དངོས་སུ་ཁོང་ལ་བཙོན་འཇུག་ཁྲིམས་ཐག་བཅད་པ་དེ་ནི་ཁོང་གིས་སྐད་འཕྲིན་དང་ཟིན་བྲིས་སོགས་སྤྱི་ཚོགས་དྲ་ལམ་ཁག་ཏུ་སྤེལ་བའི་གནས་ཚུལ་གྱི་རྐྱེན་གྱིས་ཡིན་པ་དང་། རྒྱ་ནག་གཞུང་གིས་ཁྲིན་དེ་སྔ་རྒྱ་ནག་གཞོན་ནུའི་ཚགས་པར་དང་། པེ་ཅིན་ཉིན་རེའི་ཚགས་པར་སོགས་ནས་ཕྱིར་འཕུད་བཏང་བ་ཤེས་རྟོགས་བྱུང་ཡོད་ལ། ང་ཚོས་ཁོང་ཆ་རྐྱེན་ཅི་ཡང་མེད་པའི་ཐོག་ནས་ཀློད་གྲོལ་ཡོང་བའི་རེ་བ་བྱེད་བཞིན་ཡོད། ཅེས་བརྗོད་འདུག
ཁྲིན་ནི་རྒྱ་ནག་དམར་ཤོག་ཚོགས་པའི་དབང་བསྒྱུར་ལམ་ལུགས་ལ་སྐྱོན་བརྗོད་བྱེད་མཁན་ཞིག་ཡིན་པ་དང་། ཁོང་གིས་དེ་སྔ་སྒེར་གྱི་སྐད་འཕྲིན་དང་ཝེ་པོ། མི་སྒེར་ཟིན་བྲིས་སོགས་བརྒྱུད་ནས་རྒྱ་ནག་གཞུང་དང་རྒྱ་ནག་གི་མཐོ་རིམ་མགོ་འཁྲིད་ཚོར་སྐྱོན་བརྗོད་དང་། དམར་ཤོག་ཚོགས་པའི་ཆབ་སྲིད་ལངས་ཕྱོགས་དང་མི་མཐུན་པའི་རྩོམ་དང་ཟིན་བྲིས་སོགས་སྤེལ་ཡོད་བར་བརྟེན། ཕྱི་ལོ་ ༢༠༡༨ ལོའི་ཟླ་དཀྱིལ་ཙམ་ལ་འཛིན་བཟུང་བྱས་ཏེ། ད་བར་འདྲི་རྩད་དང་བཀག་སྐྱིལ་འོག་བཞག་ཡོད་འདུག
འདི་ལོའི་ཕྱི་ཟླ་ ༤ ཚེས་ ༢༠ ཉིན་རྒྱལ་སྤྱིའི་རྒྱལ་མཚམས་མེད་པའི་གསར་འགོད་མཐུན་ཚོགས་(Reporters Without Border )ཀྱིས། ཕྱི་ལོ་ ༢༠༢༠ ལོའི་འཛམ་གླིང་གི་རྒྱལ་ཁབ་དང་ས་གནས་མི་འདྲ་བ་ ༡༨༠ ཡི་གསར་འགོད་རང་དབང་གི་གནས་སྟངས་སྐོར་གྱི་སྙན་ཐོ་བཏོན་པའི་ནང་། རྒྱ་ནག་སྔར་རྒྱུན་བཞིན་འཛམ་གླིང་ནང་གི་གསར་འགོད་རང་དབང་ཞན་ཤོས་དང་གསར་འགོད་པ་བཙོན་འཇུག་བྱེད་ཤུགས་ཆེ་ཤོས་སུ་ངོས་བྱས་ཡོད་པ་དང་། ལྷག་པར་དུ་ཏོག་དབྱིབས་རིམས་ནད་དང་འབྲེལ་རྒྱ་ནག་གཞུང་གིས་གསར་འགོད་པའི་ལས་དོན་ལ་སྟངས་འཛིན་ཆེན་པོ་དང་། དོགས་གཞི་ཅན་གྱི་མཐོ་རིམ་མགོ་འཁྲིད་ཚོར་ཞིབ་བཤེར་དང་། ཏོག་དབྱིབས་རིམས་ནད་སྐོར་གྱི་སྙན་ཐོ་གང་བྱུང་བཏོན་མི་ཆོག་པ་སོགས་དམ་དྲགས་ཆེན་པོ་བྱེད་བཞིན་ཡོད་པ་རེད།
གསར་འགོད་པ། སངས་རྒྱས་དཀོན་མཆོག
