ལ་མོ་ཚུལ་ཁྲིམས།
དེང་གི་ཆ་ལ་འཛམ་གླིང་ཡོངས་སུ་རྒྱ་ནད་ཀྱིས་མནར་ཏེ་མི་ཚང་མ་རང་ཁྱིམ་དུ་བཀག་སྡོད་བྱས་ཡོད། ས་ག་ཟླ་བ་སྟེ་སྟོན་པ་སངས་རྒྱས་བཅོམ་ལྡན་འདས་མངོན་པར་རྗོགས་པར་སངས་རྒྱས་པའི་དུས་ཆེན་སོགས་དུས་ཆེན་སུམ་འཛོམས་ཀྱི་སྐབས་འདིར། མི་མང་པོ་ཞིག་མགོན་མེད་སྐྱབས་མེད་དུ་གྱུར་བའི་གནས་སྟངས་འོག་རང་ཅག་གི་སྟོན་པ་དངོས་ལས་བཀའ་དྲིན་ཆེ་བ་༧རྒྱལ་བ་རིན་པོ་ཆེ་ནས་དྲྭ་ལམ་བརྒྱུད་ནང་བཀའ་ཆོས་གནང་བཞིན་ཡོད། འདི་ནི་དུས་དང་མཐུན་ཞིང་ངེས་པར་དུ་མཁོ་བའི་རླབས་ཆེན་གྱི་ལས་དོན་ཞིག་ཡིན། རེད་དེ་རླབས་ཆེན་གྱི་ལས་དོན་འདི་ལ་ཨོ་རྒྱན་སྟོབས་རྒྱལ་དང་ཆོས་དོན་ལས་ཁུངས་ཀྱི་བཀའ་བློན་ཀརྨ་དགེ་ལེགས་གཉིས་ནས་དེ་ལྟར་མི་འདོད་པར། ༧གོང་ས་མཆོག་གི་གནང་སྟངས་འདི་ནི་བསྟན་པ་བཤིག་པའི་སྟ་རེ་དང་།གསང་སྔགས་ཁྲོམ་བསྒྲགས་བྱས་པའི་གནོད་སྐྱོན་ཡིན་པར་ངོས་འཛིན་བྱེད་བཞིན་ཡོད། ༧གོང་ས་མཆོག་གི་མཛད་པ་འཕྲིན་ལས་ལ་དམའ་འབབ་དང་ཟུར་ཟ་བྱས་པ་འདི་ནི་བཙན་བྱོལ་བོད་མིའི་རྩ་ཁྲིམས་དང་ཡོངས་སུ་འགལ་ཞིང་། བོད་མི་ས་ཡ་དྲུག་གི་དད་འདུན་ལ་གནོད་སྐྱོན་ཚབས་ཆེན་བཏང་བ་ཡིན་པས། གནད་དོན་འདི་ཁྲིམས་ཀྱི་མདུན་ས་ནས་ཐག་གཅོད་བྱེད་དགོས།
ད་ལོའི་སྤྱི་ཟླ་ལྔ་བའི་ཚེས་ ༡༦ དང་༡༧ གཉིས་ལ་༧ གོང་ས་རྒྱལ་བ་རིན་པོ་ཆེ་མཆོག་ནས་དྲྭ་ལམ་བརྒྱུད། དཔལ་མགོན་འཕགས་པ་ཀླུ་སྒྲུབ་ཀྱིས་མཛད་པའི་དབུ་མ་རིན་ཆེན་ཕྲེང་བ་དང་འབྲེལ་ད་ལྟའི་དུས་འདིར་རྐྱེན་ངན་ལ་གདོང་ལེན་བྱེད་ཕྱོགས་ཀྱི་ལམ་སྟོན་གནང་། དྲྭ་ལམ་དུ་གནང་བའི་གསུང་ཆོས་དེ་སྐད་རིགས་་༡༣ ཙམ་ནས་བརྒྱུད་བསྒྲགས་བྱེད་ཐུབ་པ་བྱུང་ཞིང་། འཛམ་གླིང་ཡོངས་ནས་མི་དམངས་ས་ཡ ༢༠ ཙམ་ཞིག་ཁོང་གི་གསུང་ཆོས་དེར་མཉམ་ཞུགས་ཐུབ་ཡོད། ཟླ་འདིའི་ཚེས་ ༢༩ དང ༣༠ ཉིན་ཡང་བསྐྱར ༧གོང་ས་མཆོག་གིས་མུ་མཐུད་གསུང་ཆོས་གནང་རྒྱུ་ཡིན་པ་རེད། འཛམ་གླིང་གང་སར་མི་དམངས་ས་ཡ་དུང་ཕྱུར་མང་པོས། ཁོང་གི་གསུང་གི་བདུད་རྩི་ལ་སྐོམ་པས་གདུང་བའི་ཆུ་ལྟར་རེ་སྒུག་བྱེད་བཞིན་ཡོད།
ཨོ་རྒྱན་སྟོབས་རྒྱལ་ཀྱིས། ཟླ་འདིའི་ཚེས ༢༥ ཉིན། ཏཱ་ལའི་བླ་མས་ཁྲོམ་དབང་བསྐུར་ནས་བསྟན་པ་བཤིག་ཅིང་། དབང་ལུང་སྩལ་ཏེ་སྙན་གྲགས་བསྐྱེད་པར་བྱེད་བཞིན་ཡོད། འདི་ནི་བསྟན་པ་བཤིག་སྤྱད་ཀྱི་སྟ་རེ་ཡིན་ཞེས་བརྙན་འཕྲིན་བརྒྱུད་ཁྱབ་བསྒྲགས་བྱས། གུང་ཁྲན་ཏང་གིས་ད་རག་བར་ ༧གོང་ས་མཆོག་ལ་མཚན་སྨད་འདྲ་མིན་ཞུས་མྱོང་ཡང་། བསྟན་པ་བཤིག་པའི་སྟ་རེ་ཡིན་ཞེས་པ་ཞིག་བཤད་མྱོང་མེད། འདི་ནི་གུང་ཁྲན་གྱིས་བཤད་མ་མྱོང་བ་ཞིག་ཨོན་རྒྱན་སྟོབས་རྒྱལ་ཀྱིས་གུང་ཁྲན་གྱི་ཚབ་བྱས་ཏེ་བཤད་པ་ཞིག་ཡིན།
དངོས་ནས་བཤད་ན་འདི་ནི་སངས་རྒྱས་ཀྱི་མཛད་པ་ལ་བདུད་སྡིག་ཏོ་ཅན་ཀྱིས་གནོད་པ་བྱེད་པ་དང་གཅིག་ཏུ་མཚུངས་ལ། ༧གོང་ས་མཆོག་ལ་ཆེད་དུ་ཟུར་ཟ་དང་གནོད་གཞི་ཡོད་པའི་གཏམ་འཆལ་སྤེལ་བ་འདི་ནི་མ་ཉེས་ཁག་གཡོགས་ཀྱི་གནད་དོན་ཞིག་ཡིན་པས། མ་ཉེས་ཁག་གཡོགས་ཀྱི་གནད་དོན་འདི་ཁྲིམས་ཀྱི་མདུན་སར་ངེས་པར་དུ་ཐག་གཅོད་བྱེད་དགོས།
ཆོས་དོན་ལས་ཁུངས་ཀྱིས་གཞུང་འབྲེལ་ཐོག ཆོས་རིག་བཀའ་བློན་ཀརྨ་དགེ་ལེགས་ཀྱི་མཚན་ཐོག་ནས། ཨོ་རྒྱན་སྟོབས་རྒྱལ་ནི་བོད་ཀྱི་སྤྲུལ་བའི་མིང་འཛིན་པའི་རིན་པོ་ཆེ་ཞིག་ཡིན་པ་དང་། མི་དྲང་བོ། ཁ་རེ་ཁ་ཐུག་ཞིག་ཀྱང་ཡིན། ཞེས་བཤད་ཡོད་ལ། གསང་སྔགས་ཁྲོམ་བསྒྲགས་བྱེད་པ་ནི་མི་འགྲིག་ཅིང་། དུས་རབས་མང་པོའི་སྔོན་རོལ་ནས་འགལ་འཛོལ་ཉམས་ཆག་ཅི་ཆེར་སོང་ཟིན། དེ་ལ་བརྟེན་ནས་བསྟན་པ་ལ་གནོད་སྐྱོན་ཡང་ཅི་ཆེ་བྱུང་ཡོད་པ་དང་། ད་དུང་དྲྭ་ལམ་བརྒྱུད་དབང་དང་བྱིན་རླབས་རིགས་གནང་སྐབས། དྲྭ་ཐོག་ནས་ཉན་མཁན་དང་ལྟ་མཁན་ཚང་མར་དབང་དང་། བྱིན་རླབས་ངོ་མ་ཐོབ་པར་དགོངས་མཁན་དང་གསུང་མཁན་ཕལ་ཆེར་སུ་ལའང་བྱུང་མེད། ཞེས་༧གོང་ས་མཆོག་གི་དྲྭ་ལམ་བརྒྱུད་བཀའ་ཆོས་གནང་བཞིན་ཡོད་པ་འདིས། གསང་བསྔགས་ཁྲོམ་བསྒྲགས་དང། བསྟན་པ་ལ་གནོད་སྐྱོན་བྱེད་བཞིན་ཡོད་པ་ལས། ཆོས་ཀྱི་བྱིན་རླབས་ཤིག་འཇུག་རྒྱུ་མེད་པར་བཤད་ཏེ་བདུད་སྡིག་ཏོ་ཅན་ཨོ་རྒྱན་སྟོབས་རྒྱལ་གྱི་བྱས་ཉེས་ལ་རྒྱབ་སྐྱོར་དང་། ༧གོང་ས་མཆོག་གི་མཛད་པ་ལ་སྐྱོན་འཛུགས་ཀྱི་དཔུང་རོགས་བྱས་ཏེ་གསལ་བཤད་ཡིག་ཆ་བཀྲམས།
བཀའ་བློན་ཀརྨ་དགེ་ལེགས་ཀྱིས། ༧གོང་ས་མཆོག་ལ་སྐྱོན་བརྗོད་དཔུང་རོགས་བྱེད་པའི་གསལ་བཤད་ཡིག་ཆ་འདི་ལ། བོད་མིའི་སྒྲིགས་འཛུགས་ཀྱི་མཚོན་པའི་ཆོས་དོན་ལས་ཁུངས་ཀྱི་ལས་ཤོག་དང་། བཀའ་བློན་དོ་བདག་གི་མཚན་རྟགས་བཅས་འཁོད་ཡོད་པས་། གཞུང་འབྲེལ་གྱི་ངོ་བོ་མཚོན་པའི་ཁྲིམས་ཀྱི་གཞི་འཛིན་ས་ཡོངས་སུ་ལྡན་ཡོད། དེ་བས་གསལ་བཤད་ཡི་གེ་འདི་ནི་ཆོས་དོན་ལས་ཁུངས་དང་། ཡང་ན་ཆོས་དོན་ལས་ཁུངས་ཀྱི་ཁྲིམས་དབང་ཡོད་མཁན་བཀའ་བློན་གྱིས་མཚོན་པའི་བྱ་སྤྱོད་ཞིག་ལས་བྱུང་བ་ཞིག་ཡིན་པས། ཆོས་དོན་ལས་ཁུངས་དང་ཆོས་རིག་བཀའ་བློན་ལ་ཡིག་ཆ་འདིའི་མཇུག་འབྲས་ལ་བདག་བཟུང་བྱེད་པའི་འགན་འཁུར་ཆ་ཚང་ཡོད།
ཨོ་རྒྱན་སྟོབས་རྒྱལ་ནི་མདོ་སྟོད་མི་དམངས་ཀྱིས་ཆེ་བསྟོད་ཡོད་པ་དང་། སྤྱི་འཐུས་བྱས་མྱོང་མཁན་གྱི་མི་ཞིག་ཡིན་ལ། སྟོན་པའི་ན་བཟའ་གྱོན་པའི་ཕ་རྒན་ཞིག་ཀྱང་ཡིན་ཚོད་འདུག ཁོ་བ་རྡ་རམ་ས་ལའི་ཉེ་འཁོར། སྦིར་ཅོན་ཏ་རཱ་ཁམས་ནང་ཆེན་གཞིས་ཆགས་སུ་བསྡད་དེ། རྟག་ཏུ། ༧གོང་ས་མཆོག་གི་ཆོས་དང་སྲིད་ཀྱི་མཛད་འཕྲིན་ལ་ཧ་ཅང་སྡང་ཟུག་མཁན་གྱི་མི་ཞིག་ཡིན་པ་རེད། དེ་སྔ་ཀུན་བཟང་བླ་མའི་སྐབས་སུ་ཁོ་བས་བཀའ་ཤག་སྒོ་བརྒྱབ་ཡོད་པ་དང་། ༡༩༩༠ ལོར་སྦིར་སློབ་གྲྭར་ཁམས་པ་དང་ཨ་མདོའི་སློབ་མ་འཛིང་རེས་བྱེད་སྐབས། ཨོ་རྒྱན་སྟོབས་རྒྱལ་གྱིས་ཁམས་པའི་སློབ་མ་དག་གི་མདུན་ཏུ་གྲི་དང་མདུང་ལ་སོགས་པའི་མཚོན་ཆ་སྤུངས་སྟེ། ཨ་མདོ་བ་ཚང་མ་རྩ་མེད་བཟོས་དང་། མཇུག་འབྲས་ཅི་བྱུང་ལ་ངས་འགན་འཁུར་ཆོག་ཅེས་སྤུན་ཟླ་ནང་དམེ་ལ་ངན་སྐུལ་བྱས་ཡོད། ཚོགས་ཟུར་སྤེན་པ་ཚེ་རིིང་ལ་མི་གསོད་ཀྱི་ལག་དམར་ཞེས་པའི་སྐྱོན་འཛུགས་མཁན་ཐོག་མའང་ཁོ་རང་ཡིན།
༧གོང་ས་མཆོག་གི་དོལ་རྒྱལ་སྐོར་གྱི་བླང་དོར་བཀའ་སློབ་དང་། དབུ་མའི་ལམ་གཉིས་ནི་ཨོ་རྒྱན་སྟོབས་རྒྱལ་གྱིས་ཆེས་དམའ་འབེབས་བྱེད་སའི་ལམ་ཁག་གཉིས་ཡིན་ཞིང་། ཐེངས་འདིར་༧གོང་ས་མཆོག་གིས་དྲྭ་ལམ་བརྒྱུད་དད་ལྡན་ཆོས་ཞུ་བ་དག་ལ། ནང་ཆོས་འཆད་འཁྲིད་གནང་བཞིན་པ་འདི་ཡང་ཨོ་རྒྱན་སྟོབས་རྒྱལ་གྱི་དགག་པ་བྱེད་སའི་ཡུལ་གསར་བ་ཞིག་ཡིན།
དེ་བཞིན་ཏུ་ཁོ་ནི་རྟག་ཏུ་རྒྱ་ནང་ལ་བསྐྱོད་ཅིང་། བོད་རང་སྐྱོང་ལྗོངས་ཀྱི་སྲིད་གྲོས་ཀྱི་ཚོགས་འདུ་ལ་མཉམ་ཞུགས་བྱས་པ་ཡིན་ཞེས་ཁོ་བས་བཤད་མྱོང་། གལ་སྲིད་ཁོང་རང་བོད་རང་སྐྱོང་ལྗོངས་ཀྱི་ཆབ་སྲིད་གྲོས་ཚོགས་ལ་མཉམ་ཞུགས་བྱེད་མཁན་གྱི་མི་སྣ་ཞིག་ཡིན་ན། ཨོ་རྒྱན་སྟོབས་རྒྱལ་ནི་བཙན་བྱོལ་ནང་གི་མདོ་སྟོད་སྤྱི་ཟུར་གཅིག་པུ་མ་ཡིན་པར། རྒྱ་ནག་ནའང་གོ་གནས་ངེས་ཅན་ཞིག་ཡོད་པ་ཐག་ཆོད་རེད། ཁོང་གིས་མུ་མཐུད་དེ་༧གོང་ས་མཆོག་ལ་སྐྱོན་འཛུགས་དང་། བོད་མིའི་ནང་ཁུལ་ལ་རྙོག་དྲ་བཟོ་སྟངས་འདི་དག་ལ་ལྟོས་ན། རྒྱ་མིའི་སྤྲད་པའི་ལས་འགུལ་ཞིག་མ་རྫོགས་པར་ཧུར་བརྩོན་བྱེད་བཞིན་ཡོད་པའང་གསལ་བོ་རེད།
ཆོས་དོན་ལས་ཁུངས་ནི་བཙན་བྱོལ་བོད་མིའི་སྒྲིག་འཛུགས་ཀྱི་བློན་ཆེན་ལས་ཁུངས་མཐོ་ཤོས་ཤིག་ཡིན་པ་དང་། ཀརྨ་དགེ་ལེགས་ནི་ཆོས་རིག་ལས་ཁུངས་ཀྱི་བཀའ་བློན་ཡིན། བཙན་བྱོལ་བོད་མིའི་སྒྲིག་འཛུགས་ཀྱི་བློན་ཆེན་ལས་ཁུངས་ལ་བོད་དང་བོད་མིའི་མགོན་སྐྱབས་དང་མཚོན་རྟགས། ༧གོང་ས་སྐྱབས་མགོན་ཆེན་པོ་མཆོག་ལ་སྲུང་སྐྱོབ་དང་། ཁོང་གི་མངོན་འདོད་སྒྲུབ་རྒྱུའི་འགན་དབང་ཡོད་པ་ལས་བདུད་རྒན་སྡིག་ཏོ་ཅན་ཨོ་རྒྱན་སྟོབས་རྒྱལ་དང་མཉམ་དུ་ ༧གོང་ས་མཆོག་ལ་མ་ཉེས་ཁ་གཡོག་བྱེད་པ་ནི་ཤིན་ཏུ་ནས་ཀྱང་མ་རུང་བ་ཞིག་རེད། འདི་ནི་ཆོས་དོན་ལས་ཁུངས་ཀྱི་རྩ་བའི་དམ་བཅའ་དང་འགལ་ཞིང་བོད་མི་དམངས་ལ་མཐོང་ཆུང་བྱས་བ་ཞིག་མ་རེད་དམ། བཀའ་བློན་ཀརྨ་དགེ་ལེགས་ཀྱིས་ཐེངས་འདིར་ཨོ་རྒྱན་སྟོབས་རྒྱལ་ལ་རྒྱབ་སྐྱོར་བྱས་པ་འདིས། ཆོས་དོན་ལས་ཁུངས་རང་བཞིན་གྱི་མ་ཉེས་ཁ་གཡོག་བྱེད་མཁན་གྱི་དཔུང་རོགས་སུ་གྱུར་བ་གསལ་བོ་ཡིན།
ཨོ་རྒྱན་སྟོབས་རྒྱལ་དང་ཀརྨ་དགེ་ལེགས་ཀྱིས་དཔུང་བ་མཉམ་རུབ་ཀྱི་བྱས་ཉེས་འདི་ལ། ནང་ཆོས་ཀྱི་གཞི་འཛིན་ས་དང་ཁྲིམས་ཀྱི་རྒྱབ་བརྟེན་ས་གང་ཡང་མེད་དེ། ན་ནིང་ལོར་༧གོང་ས་མཆོག་གིས་འདི་འདྲ་ཞིག་གསུངས་ཡོད།
སྔར་བཅོམ་ལྡན་འདས་ཞལ་བཞུགས་པའི་ཁ་ཐུག་ལ་འདུལ་བའི་ལག་ལེན་ཏོག་ཙམ་ཞིབ་ཚགས་པོ་འདྲ་ཞིག་ཡོད་པ་རེད། དེ་ལ་འཕྲིན་གྱི་སྒོ་ནས་བསྙེན་པར་རྫོགས་ཆོག་ཟེར་དུས་ཙ་ནས། ད་རེས་འདིར་དག་སྣང་གི་ཆོས་སྐོར་ཕལ་ཆེར་རེད། སྔགས་བླ་མེད་དང་འབྲེལ་བསྡད་པ་ཞིག་ཆགས་བསྡད་ཡོད་པ་རེད། དེ་འདྲ་ཡིན་དུས། ཁྱེད་རང་ཚོར་དབང་དང་བྱིན་རླབས་དེ་ཚོའི་གྲས་ངེས་པར་དུ་འཐོབ་ཀི་རེད། དེ་ལུགས་ཀྱི་བསམ་བློ་ཐོངས་ཤོག་ཨ། ཞེས་གསུངས།
འདི་ལས་ང་ཚོས་གསལ་བོར་ཤེས་དགོས་པ་ཞིག་ནི། དབང་གནང་་སྐབས་ངེས་པར་དུ་བུམ་པ་མགོ་ལ་བཞག བུམ་ཆུ་ཁ་ལ་རག་ནས་ཆོས་ཞུ་དགོས་དོན་མེད་པར། དམིགས་བསལ་གྱི་གནས་སྟངས་འོག་འཕྲིན་ཞེས། བརྙན་འཕྲིན་དང་སྐད་འཕྲིན་ལས་ཀྱང་ཆོས་ཞུ་ཆོག་པ་སངས་རྒྱས་ཀྱི་གསུང་། འདུལ་བ་ནས་གསུང་བ་དང་མདོར་བསྡུས་སྦྱོར་བའམ་རིགས་འགྲེ་ཐུབ་པར་གསལ་ཞིང་། ༧གོང་ས་སྐྱབས་མགོན་རིན་པོ་ཆེས་ནས་ཀྱང་བཀའ་ཆོས་ཀྱི་སྐབས་ཁུངས་དེ་དྲངས་ནས་གསུངས་ཡོད་པ་ཚང་མས་ཤེས་གསལ་རེད།
དེ་བཞིན་༧གོང་ས་མཆོག་ནི་ཚན་རིག་ལ་དགའ་མོས་གནང་མཁན་ཞིག་ཡིན་ལ། ནང་ཆོས་ནི་ཚན་རིག་གི་རང་བཞིན་ལྡན་པའི་རིག་པའི་གཞུང་ལུགས་ཤིག་ཡིན་པར་དགོངས་མཁན་ཞིག་ཡིན། ཁོང་གིས་ཐེངས་འདིར་བརྙན་འཕྲིན་བརྒྱུད་གསུང་ཆོས་གནང་སྐབས་ཀྱང་བརྒྱུད་ལམ་འདི་ཧ་ཅང་ཕན་ཐོགས་ཡོད་པ་ཞིག་ཡིན་པར་གསུངས་ཡོད།
འཛམ་གླིང་སྟེང་གི་མི་དམངས་དུང་ཕྱུར་མང་བོ་ལའང་ ༧གོང་ས་མཆོག་གིས་ཐེངས་འདིའི་དྲྭ་ལམ་བརྒྱུད་ནས་ཕན་ཐོགས་བླ་ན་མེད་པ་སྦྱིན་ཡོད། ༧གོང་ས་མཆོག་གི་འདི་ལྟ་བུའི་རླབས་ཆེན་གྱི་མཛད་རྗེས་ལ་ཨོ་རྒྱན་སྟོབས་རྒྱལ་དང་ཁོང་གི་དཔུང་རོགས་ཚོས་མ་དགའ་བ་བྱེད་དོན་གང་ཡིན་ནམ།
སྟོན་པའི་ན་བཟའ་གྱོན་ཏེ་བོད་པའི་སྤྱི་ཚོགས་ལ་དཀྲུགས་ཤིང་གཏོང་མཁན། བདག་ཅག་གི་སྟོན་པ་གསོན་པོ་ ༧གོང་ས་མཆོག་ལ་མཚན་སྨད་ཞུ་མཁན། བདུད་སྡིག་ཏོ་ཨོ་རྒྱན་སྟོབས་རྒྱལ་ཁྱེད་ལས་ལྷག་པའི་བསྟན་པ་བཤིག་པའི་དགྲ་བོ་ཞིག་བོད་པའི་སྤྱི་ཚོགས་ནང་ཡོད་མི་སྲིད། ཁྱེད་ནི་བོད་མི་ཡོངས་ཀྱི་སྤྱི་དགྲ་དང། སངས་རྒྱས་བསྟན་པའི་བསྟན་དགྲ། ལན་ཆགས་ངོ་མ་དེ་ཡིན།
ཆོས་རིག་བཀའ་བློན་ཀརྨ་དགེ་ལེགས་ལ་མཚོན་ནའང་ཆོས་ཀྱི་དམ་ཚིག་མི་གཙང་ཞིང་། ཆབ་སྲིད་ཀྱི་ལངས་ཕྱོགས་ངེས་བརྟན་མེད་མཁན། བོད་པའི་སྤྱི་ཚོགས་ཆུང་ཆུང་འདིའི་ནང་གི་ནང་དམེ་དང་དཀྲུག་ཤིང་ལ་དགའ་མོས་ཆེས་ཆེར་ཡོད་པའི་བླ་རྒན་སྲིད་དོན་པ་རྙིང་ཧྲིལ་ལ་སོང་བ་ཞིག་ཡིན། ཐེངས་འདིར་ཁོ་བས་བདུད་རྒན་སྡིག་ཏོ་ཅན་ཨོ་རྒྱན་སྟོབས་རྒྱལ་དང་ཁྱི་སྤྱང་མཉམ་འབྲེལ་གྱིས ༧གོང་ས་མཆོག་གི་རླབས་ཆེན་གྱི་མཛད་པ་ལ་མ་ཉེས་ཁ་གཡོགས་ཀྱི་དཔུང་རོགས་བྱེད་པ་འདི་ནི་ཆེས་མ་རུང་བ་ཞིག་ཡིན་པས། ད་ནས་བཟུང་སྟེ་མི་འདི་གཉིས་ཀྱི་རྒྱབ་ནས་སྟོན་པའི་ན་བཟའ་ཕུད། སྔར་བྱས་ཀྱི་ཉེས་སྐྱོན་གྱི་དུག་རྫས་རྣམས་ཁྲིམས་ཀྱི་མདུན་ས་ནས་རེ་རེ་བཞིན་རྒྱ་ནད་འདི་དང་མཉམ་དུ་ཚར་གཅོད་བྱེད་དགོས།
ལ་མོ་ཚུལ་ཁྲིམས་ཁྱོད་གང་ཡང་མེ་ཤེས་མཁན་གཞན་གྱི་བཤད་ཡམས་ཀྱི་རྗེས་སུ་གཡམ་རྒྱུགས་ཀྱི་རྒྱུ་མཚན་གང་ཡང་མེད་པར་ཆོས་རིག་བཀའ་བློན་ལ་མཚན་སྨས་ཞུས་པ་ནི་༧གོང་ས་མཆོག་ལ་མཚན་སྨས་ཞུས་པ་དང་གཅིག་པ་རེད།དེར་བརྟེན་ཁྱོད་ལྟ་བུ་སྨུག་གུ་འཛིན་ཤེས་ཙམ་གྱི་སྤྱི་ཚོགས་དཀྲུགས་ཆེད་ཀྱི་ཡིག་ཛར་འདི་རིགས་མ་བྲིས་ན་དགའ།
ཁྱོད་༧གོང་ས་མཆོག་ལ་ཨོ་སྟོབས་ཀྱིས་བཤད་པའི་ནད་མ་ཁྱོག་ན་སྦིར་རི་ལ་ཤོག
ཆོས་རིག་བཀའ་བློན་གྱིས་རྒྱལ་བའི་བཀའ་བཞིན་ཆོས་དང་མཐུན་པའི་གཏམ་བྲིས་པ་ཁྱོད་ལྟ་བུའི་བློ་ལ་མི་གཤོང་བ་འདི་སྡུག་གྱོང་རེད།
ཆོས་རིག་བཀའ་བློན་ལ་ཁྱེད་རང་ཚོ་ཁག་ཅིག་གིས་ངོ་ཚ་མེད་པའི་དབྱེན་སྦྱོར་ཇི་ཙམ་སྤེལ་ན་དེ་ཙམ་གྱིས་རང་མཚང་བསྟན་པ་དང་དགྲ་དགའ་གཉེན་སྡུག་ལས་བློ་གཟུ་བོར་གནས་ཤིང་ཕྱི་ནང་ཤེས་ཡོན་ལྡན་ཞིང་རང་ཚུགས་ཅན་ཁོང་ལྟ་བུ་གངས་སྐྱིད་ན་ཆེས་དཀོན་པོ་ཡིན་ཀུན་ལ་ཡོངས་རེད། དེས་ན་༧ གོང་མཚན་བེདསྤྱོག་པ་མ་གནང་དགེ་མཚན་ལས་ཨོ་སྟོབས་ཕན་འབྲས་གང་ཡང་མི་འབྱུང་།།
ཀརྨ་་དགེ་ལེགས། (༢༠༠༡/༤/༡༠ ནས་༢༠༡༢/༤/༢)
༧༽ གཡུ་ཐོག་ཀརྨ་དགེ་ལེགས་ལགས་ནི། ཕྱི་ལོ་ ༡༩༥༥ ལོར་བྱང་གནམ་རུར་འཁྲུངས། ༡༩༦༠ ལོར་རྒྱ་གར་ལ་བཙན་བྱོལ་དུ་ཕེབས། དྷ་སར་སློབ་ཞུགས་ཀྱིས་ཡུད་ཙམ་བཞུགས་རིང་གློ་གཅོང་གི་ནད་གཞི་ཕོག་སྟེ་ལོ་གཉིས་སྨན་ཁང་དུ་ལུས། ༡༩༦༣ ལོར་མ་སུ་རི་གཏན་སློབ་ཏུ་སློབ་ཞུགས་གནང་སྟེ་སློབ་སྦྱོང་ལ་བརྩོན་པ་ཆེན་པོ་གནང་བ་དང་མཉམ་དུ་ ༡༩༦༦ ལོར་མ་སུ་རིའི་དགོན་པར་བློ་གླིང་མཁན་ཟུར་པདྨ་རྒྱལ་མཚན་གྱི་དྲུང་ནས་རབ་ཏུ་བྱུང༌། ༡༩༧༣ ལོར་མ་སུ་རི་གཏན་སློབ་ནས་འཛིན་རིམ་ ༡༡ གྲུབ་འབྲས་རྩེར་སོན་དང་བཅས་ཐོན།
གཞི་རིམ་སློབ་ཐོན་གྱི་རྒྱུགས་འབྲས་ལེགས་སྟབས་རྒྱ་གར་མཐོ་སློབ་ཏུ་སློབ་ཞུགས་བྱ་རྒྱུར་སློབ་ཡོན་མ་ཐོབ་པའི་དཀའ་ངལ་མེད་ཀྱང་སྐབས་དེར་གསར་ཚུགས་དྷ་ས་རིགས་སློབ་ཏུ་ ༡༩༧༤ ལོར་འཛུལ་ཞུགས་ཀྱིས་ཕྱོགས་གཅིག་ནས་ནང་པའི་གཞུང་ཆེན་ཁག་དང་བོད་ཀྱི་རིག་གནས་ཁག་ལ་སློབ་གཉེར་གནང་མཐར་ ༡༩༨༦ ལོར་སྦྱངས་འབྲས་རྩེ་སོན་ངང་ཐོན་པ་དང༌། ཕྱོགས་གཞན་ནས་ཅན་དྷི་གྷར་གཙུག་ལག་སློབ་ཁང་དུ་ཡིག་འགྲུལ་གྱི་ལམ་ནས་ཉེ་བའི་གཙུག་ལག་རབ་འབྱམས་པ་དང་གཙུག་ལག་རབ་འབྱམས་པའི་སློབ་གཉེར་གནང་སྟེ་སྦྱངས་འབྲས་ལེགས་ཐོན་བྱུང༌།
༡༩༨༦ ལོར་ཆོས་རིག་ལས་ཁུངས་ཀྱི་རྒན་དྲུང་གི་གནས་རིམ་ཐོག་ནས་དྲུང་གཞོན་ལས་རོགས་ལས་ཚབ་ཀྱི་ལས་འགན་དུ་བསྐོ་བཞག་བྱུང་ཞིང༌། དེ་ནས་གཞུང་ཞབས་ཐེག་པ་རིམ་འཛེགས་ཀྱིས་ ༡༩༨༩ ལོར་ཆོས་རིག་དྲུང་ཆེ་ལས་ཚབ་དང༌། ༡༩༩༠ ལོར་ཆོས་རིག་དྲུང་ཆེར་བསྐོ་བཞག་བྱུང་དོན་ལྟར་ ༡༩༩༣ ལོའི་ལོ་མཇུག་བར་འགན་ཁུར་བཞེས། ༡༩༩༤ ལོར་ཉི་ཧོང་དང་ཤར་ཨེ་ཤ་ཡའི་སྐུ་ཚབ་དོན་གཅོད་དུ་བསྐོ་བཞག་བྱུང་སྟེ་ ༢༠༠༠ ལོའི་ཟླ་ ༦ བར་འགན་ཁུར་བཞེས། ༢༠༠༠ ལོའི་ཕྱི་ཟླ་ ༡༠ པར་ཆོས་རིག་དྲུང་ཆེར་གནས་སྤོས་གནང་བ་ལྟར་ ༢༠༠༢ ལོའི་ཟླ་བ་ ༤ བར་འགན་ཁུར་གནང༌། ༢༠༠༢ ཟླ་བ་ ༤ ནས་ཤེས་རིག་དྲུང་ཆེར་གནས་སྤོས་གནང་བ་ལྟར་དེ་ནས་བཟུང་ད་བར་ཤེས་རིག་དྲུང་ཆེའི་འགན་ཁུར་བཞེས་མུས་ཡིན།
གཞན་ཡང་ཕྱི་ལོ་ ༡༩༨༡ ལོར་ྋགོང་ས་ྋསྐྱབས་མགོན་ཆེན་པོ་མཆོག་གིས་མཁན་སློབ་སྦྲགས་མ་མཛད་དེ་དགེ་སློང་སྒྲུབ་ཅིང༌། ༡༩༨༥ ལོར་སྐུ་སྒེར་ཡིག་ཚང་གི་བཀའ་འབྲེལ་ལྟར་འཛམ་གླིང་ཆོས་ལུགས་ཁག་གི་ཐོག་གཞོན་ནུའི་ཚོགས་འདུ་ཞེས་པར་ཚོགས་བཅར་ཞུས་པའི་རྗེས་འབྲེལ་འཛམ་གླིང་གི་ཕུལ་བྱུང་གཞོན་སྐྱེས་ཁག་དང་ལྷན་དུ་རྒྱལ་ཁབ་བཅུ་སྐོར་ལ་བསྐྱོད་དེ་འཛམ་གླིང་གི་ཆོས་ལུགས་དབུ་འཁྲིད་དང་མཁས་དབང་མང་པོར་མཇལ་མོལ་ཞུ་རྒྱུའི་གོ་སྐབས་ཐོབ། དེ་ནས་བཟུང་ཕྱི་རྒྱལ་རྒྱལ་ཁབ་ ༢༠ བརྒལ་བར་གཞུང་དོན་ཕྱོགས་བསྐྱོད་ལན་གྲངས་མང་པོ་ཕེབས་མྱོང་ཡོད། དེ་བཞིན་རིགས་ལམ་སློབ་གཉེར་ཁང་ནས་འདོན་སྤེལ་གནང་བའི་ལྷག་བསམ་བརྩེགས་པ་ཞེས་པའི་དུས་དེབ་ཀྱི་རྩོམ་སྒྲིག་པ་ཐོག་མ་གནང་བ་སོགས་རྩོམ་སྒྱུར་གྱི་ཕྱག་ལས་མང་པོ་གནང་མྱོང་ཞིང༌། བཙན་བྱོལ་བོད་མིའི་གཞི་རིམ་ཤེས་ཡོན་སྲིད་བྱུས་ཟིན་བྲིས་ཚོགས་ཆུང་གི་ཚོགས་གཙོའི་ལས་འགན་ཡང་བཞེས་མྱོང༌།
སྐབས་བཅུ་བཞི་པའི་བཀའ་ཤག་གི་བཀོད་ཁྱབ་ལྟར་ཕྱི་ལོ་༢༠༡༢ ཟླ་༢ ཚེས་༡ ཉིན་བཀའ་དྲུང་དུ་གནས་སྤོས་དང། ཕྱི་ལོ་༢༠༡༢ ཟླ་༤ ཚེས་༢ བར་བཀའ་དྲུང་དང་ཤེས་རིག་དྲུང་ཆེའི་ལས་འགན་གཅིག་ལྕོགས་གནང། ཟླ་༤ ཚེས་༥ ཉིན་ཡིག་རྩིས་དང་ལས་འགན་རྣམས་ཤེས་རིག་དྲུང་ཆེ་གསར་པར་རྩིས་སྤྲོད་ཟིན་རྗེས་བཀའ་ཤག་གི་དྲུང་ཡིག་ཆེ་མོའི་མཛད་འགན་བཞེས་མུས་སུ་བཞུགས།