སྨྲ་བརྗོད་རང་དབང་དང་མ་ཉེས་ཁག་གཡོགས་ཀྱི་དབྱེ་བ་དང་གསལ་བཤད།

ལ་མོ་ཚུལ་ཁྲིམས།

དམངས་གཙོའི་ལམ་ལུགས་ནི་འཛམ་གླིང་ཡོངས་ཀྱི་འགྲོ་བ་མིའི་རིགས་ཡོངས་ཀྱི་ཆེས་ཡིད་སྨོན་དང་བརྩི་བཀུར་བྱེད་སའི་ཆབ་སྲིད་ཀྱི་ལམ་ལུགས་དེ་ཡིན་ལ། དེང་སང་འཛམ་གླིང་སྟེང་ཆེས་དར་ཁྱབ་ཆེ་བའི་ཆབ་སྲིད་ཀྱི་ལམ་ལུགས་ཤིག་ཀྱང་ཡིན་པ་རེད། དམངས་གཙོའི་ལམ་ལུགས་འདི་ཉིད། འདི་ལྟར་འཛམ་གླིང་ཡོངས་སུ་དར་ཁྱབ་བྱེད་དགོས་དོན་གྱི་རྒྱུ་མཚན་གཙོ་བོ་ཞིག་ནི་སྨྲ་བརྗོད་རང་དབང་རེད། སྨྲ་བརྗོད་རང་དབང་ནི་དམངས་གཙོའི་ལམ་ལུགས་ཀྱི་རྩ་བའི་དམ་བཅའ་ཡིན། རྩ་བའི་དམ་བཅའ་འདི་ལ་ཁྲིམས་ཀྱི་འགན་སྲུང་ཡོད་པ་རེད། གལ་སྲིད་རྩ་བའི་དམ་བཅའ་འདི་ལ་ཁྲིམས་ཀྱིས་འགན་སྲུང་བྱེད་མ་ཐུབ་ཚེ། དམངས་གཙོའི་ལམ་ལུགས་ཐོག་ཤར་སྐྱོད་བྱེད་མི་ཐུབ་པ་ཡིན།

དེ་བཞིན་ཏུ། སྨྲ་བརྗོད་རང་དབང་ཞེས་བརྗོད་དུས། གཏམ་བརྗོད་རང་དབང་དང་དཔར་བསྐྲུན་རང་དབང་ལ་གོ་ཞིང་། དེའང་དྲང་བདེན་དང་། ཕྱི་གསལ་ནང་གསལ་གྱི་རྩ་བའི་རྩ་དོན་ཞིག་གཞི་ལ་བཞག་སྟེ། གཏམ་བརྗོད་རང་དབང་དང་དཔར་བསྐྲུན་རང་དབང་བྱེད་པ་དེ། འཛམ་གླིང་སྟེང་གི་མི་སེར་སུ་དང་གང་ལའང་ཐོབ་དབང་ཡོད་ཅིང་། ཐོབ་དབང་དེར་སྲིད་གཞུང་སུ་གང་གིས་ཚོད་འཛིན་དང་བཀག་འགོག་བྱེད་མི་ཆོག་པ་ཡིན།

རེད་དེ། སྨྲ་བརྗོད་དབང་དེ་རང་གི་རྩ་བའི་དམ་བཅའ་དང་ཚད་གཞི་ལས་བརྒལ་ཏེ། དྲང་གཏམ་དེ་དཀྲོག་གཏམ་དུ་བསྒྱུར། བདེན་པ་དེ་རྫུན་མར་བཟོས་བའི་བྱ་སྤྱོད་དེས། མི་སྒེར་དང་གཞུང་ལ་འགལ་རྐྱེན་བཟོ་ཀྱིན་རེད། གལ་སྲིད་མི་སྒེར་དང་གཞུང་ལ་འགལ་རྐྱེན་བཟོས་ཚེ། སྨྲ་བརྗོད་རང་དབང་གི་རིན་ཐང་རྦད་དེ་ཉེས་བའི་ངོ་བོར་འགྱུར་བ་ཡིན། གལ་སྲིད་ཉེས་བའི་ངོ་བོ་ལ་འགྱུར་བ་ཡིན་ན་མ་ཉེས་ཁག་གཡོགས་ཀྱི་ཁྲིམས་ཆད་ཕོག་པའི་གཞི་རུ་འགྲོ་གིན་རེད།

འདི་ལྟ་བུའི་སྒྲིག་སྲོལ་ལམ་ལུགས་འདི་ལ་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཡོངས་ཁྱབ་གསལ་བསྒྲགས་དང་། ཨ་མེ་རི་ཀའི་རྩ་ཁྲིམས་བསྐྱར་བཅོས་གཉིས་ཀས་རྒྱབ་སྐྱོར་བྱེད་ཅིང་། ངེད་ཅག་བཙན་བྱོལ་བོད་མིའི་བཅའ་ཁྲིམས་ཀྱིས་ཀྱང་དེ་བཞིན་ཏུ་བརྩི་བཀུར་བྱེད་བཞིན་ཡོད།

 ཅི་ཞིག་ལ་སྨྲ་བརྗོད་རང་དབང་ཟེར།

སྨྲ་བརྗོད་རང་དབང་ནི་སྤྱི་ཚོགས་ཡོངས་དང་འགྲོ་བ་མིའི་རིགས་ཡོངས་ཀྱི་རྩ་བའི་འཚོ་གནས་ཀྱི་དགོས་དབང་གཙོ་བོ་དེ་ཡིན། ནམ་རྒྱུན་ཡིན་ན། མི་སེར་རྣམས་ཀྱིས་གཞན་གྱི་གནས་ཚུལ་འཚོལ་སྡུད་དང་། དེ་ལ་ཞིབ་འཇུག་བྱས་ཏེ། རང་གི་ལྟ་ཚུལ་བརྗོད་པ་དང་འཚོ་བ་ཡར་རྒྱས་སུ་གཏོང་བ་བཅས་བྱེད་བཞིན་པ་ཡིན། དེ་དང་མཉམ་དུ་སྨྲ་བརྗོད་རང་དབང་གི་བརྒྱུད་ལམ་འདི་བརྒྱུད་ནས། མི་སེར་གྱི་ཤེས་རྟོགས་གོང་དུ་སྤེལ་ཞིང་ལྟ་ཚུལ་གྱི་ནུས་པའང་ཕྱོགས་གཅིག་ཏུ་ཡོང་བའི་ནུས་བ་ཐོན་བཞིན་ཡོད། རྒྱལ་ཁབ་དང་སྲིད་གཞུང་ནས་མི་སེར་གྱི་བྱེད་སྒོ་འདི་དག་ལ་ཚོད་འཛིན་བྱེད་མི་ཆོག་པར། འདི་ནི་དམངས་གཙོའི་ལམ་ལུགས་ཀྱི་གྲུབ་ཆ་གལ་འགངས་ཆེ་བ་ཞིག་ཡིན།

ཨ་མེ་རི་ཀའི་ཁྲིམས་དཔོན་ལའོ་སུ་སྦི་རན་རྡ་ཡིས་འདི་འདྲ་ཞིག་གསུངས་ཡོད། རང་དབང་གི་བསམ་བློ་གཏོང་རྒྱུ་དང་རང་དབང་གིས་སྐད་ཆ་བཤད་རྒྱུ་གཉིས་ནི་ཆབ་སྲིད་ཀྱི་གནས་སྟངས་ངོ་མ། ཕྱི་ལ་གསལ་བོར་སྟོན་པར་བྱེད་པའི་ཐད་ལ་མེད་དུ་མི་རུང་བ་ཞིག་ཡིན་ཞེས་གསུངས་ཡོད།

མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཡོངས་ཁྱབ་གསལ་བསྒྲགས་ཀྱི་ལེའུ་ ༡༩ བའི་ནང་དུ། འགྲོ་བ་སུ་ཞིག་ཡིན་ཡང་རང་གི་ལྟ་བ་དང་བསམ་འཆར་བརྗོད་པ་ལ་བཀག་འགོག་མེད་པ་དང་། རང་གི་ལྟ་ཚུལ་རྒྱུན་འཁྱོངས་བྱེད་པའི་ཐོབ་ཐང་ཀྱང་ཡོངས་སུ་ཡོད་དགོས། དེ་བཞིན་ཏུ་གཞན་གྱི་གནས་ཚུལ་འདྲི་བརྩད་དང་། དྭང་ལེན། ཁྱབ་བསྒྲགས་བཅས་བྱེད་པའི་རང་དབང་ཡང་ཡོད་དགོས་ཞེས་འཁོད་ཡོད།

ཨ་མེ་རི་ཀའི་རྩ་ཁྲིམས་བསྐྱར་བཅོས་ལེའུ་དང་པོའི་ནང་དུ། གྲོས་ཚོགས་ཀྱིས། མི་སེར་ཀྱིས་ཆོས་ལུགས་གང་ཞིག་ལ་དད་པ་བྱེད་མིན་ཐད་ཇུས་གཏོགས་བྱས་མི་ཆོག་པ་དང་། མི་སེར་གྱིས་སྲིད་གཞུང་གི་སྐོར་ལ་སྐད་ཆ་གང་ཞིག་དང་། རྣམ་འགྱུར་གང་ཞིག་བསྟན་ཅིང་སྲིད་གཞུང་གིས་དེ་ལ་བཀའ་འགོག་བྱས་མི་ཆོག་ཞེས་འཁོད་ཡོད།

སྤྱིར་འཛམ་གླིང་སྟེང་གི་འགྲོ་བ་མི་སུ་ཞིག་གིས་ཀྱང་རང་ཉིད་ཀྱི་ལྟ་བ་ལངས་ཕྱོགས་བརྗོད་པ་དང་། གཞན་གྱི་གནས་ཚུལ་རྒྱུས་ལོན་བྱེད་པ་དེ་ལ་སྲིད་གཞུང་གིས་འགོག་རྐྱེན་བཟོས་མི་ཆོག་པ་གསལ་བོ་རེད། དེ་དང་ཆབས་ཅིག་སྨྲ་བརྗོད་རང་དབང་ནི་སྲིད་གཞུང་དང་མི་སེར་གཉིས་བར་ཀྱི་འབྲེལ་བ་ལས་བྱུང་བ་ཞིག་ཡིན་པ་དང་། སྲིད་གཞུང་གི་ལས་དོན་ལ་མི་སེར་གྱིས་བལྟ་རྟོག་བྱེད་ཅིང་། སྲིད་གཞུང་གི་ལས་དོན་རྣམས་མི་དམངས་ལ་ཧ་གོ་རུ་འཇུག་རྒྱུ་ནི། སྲིད་གཞུང་དང་མི་དམངས་གཉིས་བར་གྱི་ཐོག་མའི་གན་རྒྱ་དང་། སྨྲ་བརྗོད་རང་དབང་གི་རྩ་བའི་དམ་བཅའ་ཡིན། གལ་སྲིད། སྲིད་གཞུང་གིས་གཞུང་དམངས་གཉིས་ཀྱི་རྩ་བའི་དམ་བཅའ་འདི་ལ་བརྩི་བཀུར་མ་བྱས་ཚེ། མི་སེར་གྱིས་སྲིད་གཞུང་ལ་ངོ་རྒོལ་བྱས་ཆོག་ཅིང་། དེ་ལྟར་ངོ་རྒོལ་བྱེད་ཆོག་པའི་ཐོབ་དབང་དང་། བྱེད་དགོས་པའི་རྒྱུ་མཚན་ནི་མི་སེར་ལ་རང་གི་སྨྲ་བརྗོད་རང་དབང་ལོངས་སྤྱོད་བྱེད་ཆོག་པའི་ཐོབ་ཐང་དང་། སྲིད་གཞུང་གིས་མི་སེར་གྱི་སྨྲ་བརྗོད་རང་དབང་ལ་ཚོད་འཛིན་བྱེད་མི་ཆོག་པའི་ཁྲིམས་ཀྱི་གཞི་རྩ་འདི་ལས་བྱུང་བ་ཡིན།

དེ་བས་མི་དམངས་ཀྱིས་སྲིད་གཞུང་གི་བྱེད་སྟངས་ལ་རྔམ་སྟོན་ཁྲོམ་སྐོར་དང་། རང་གི་ལྟ་བ་དང་ལངས་ཕྱོགས་རྣམས་ཚགས་དཔར་དང་། བརྙན་འཕྲིན། རླུང་འཕྲིན། རི་མོའི་མཚོན་རྟགས་ལ་སོགས་བརྒྱུད་ནས་འགྲེལ་སྤེལ་བྱེད་པ་འདི་དག་ཚང་མ་སྨྲ་བརྗོད་རང་དབང་གི་ཁྲིམས་ལུགས་ཀྱི་གཞི་རྩ་ལས་བྱུང་ཞིང་། སྲིད་གཞུང་གིས་མི་སེར་གྱི་བྱེད་སྒོ་འདི་དག་བཀག་འགོག་བྱེད་རྒྱུ་ལས་དེ་ལ་སྲུང་སྐྱོབ་བྱེད་པའི་འགན་དབང་ཡོད་པ་རེད།

དེ་བཞིན་ཏུ་སྨྲ་བརྗོད་རང་དབང་ཞེས་བརྗོད་ཚེ། སྨྲ་བརྗོད་རང་དབང་ལ་སྨྲ་བརྗོད་རང་དབང་གི་ཁྱད་ཆོས་དང་རང་བཞིན་ཡོད་པ་ཞིག་ཡིན། ཁྲིམས་གཞུང་དུ་སྨྲ་བརྗོད་རང་དབང་གི་མཚན་ཉིད་ནི་དངོས་ཐོག་བདེན་འཚོལ་དང་། སྤྱི་བསམ་ཡོད་པ། ཡ་རབས་སྤྱོད་བཟང་། གནས་ལུགས་དང་རྒྱུ་མཚན་ཡོད་པ། ཡར་རྒྱས་དང་ཡང་དག་པའི་ཀུན་སློང་ཡོད་པ། མཉམ་འབྲེལ་གྱི་ནུས་པ་ཡོད་པ་བཅས་ལ་ཟེར་ཞིང་། ཁྱད་ཆོས་དེ་དག་དང་ལྡན་པའི་བྲིས་རྩོམ་དང་། གཏམ་བཤད་དང་། མཚོན་རྟགས་བཅས་ལ་གོ་བ་ཡིན། གལ་སྲིད་གོང་གི་ཁྱད་ཆོས་དེ་དག་ལས་ལྡོག་ན་སྨྲ་བརྗོད་རང་དབང་གི་མཚན་ཉིད་མི་ཚང་ཞིང་། སྨྲ་བརྗོད་རང་དབང་གི་ཐོག་མའི་དམ་བཅའ་དང་འགལ་འགྲོ་བས། སྲིད་གཞུང་གི་སྲུང་སྐྱོབ་བྱེད་པའི་འགན་དབང་མེད་པའི་ཁར། མ་ཉེས་ཁ་གཡོགས་ཀྱི་ཁྲིམས་ལུགས་ཀྱིས་ཚོད་འཛིན་དང་བཀག་འགོག་བྱེད་ཆོག་པ་གསལ་བོར་བསྟན་ཡོད།

ཅི་ཞིག་ལ་མ་ཉེས་ཁག་གཡོགས་ཟེར།

སྨྲ་བརྗོད་རང་དབང་ནི་ཆེས་བཀུར་ཏུ་འོས་བའི་ལམ་ལུགས་ཤིག་ཡིན་པ་བདེན་ཏུ་འཆུག་མོད། སྨྲ་བརྗོད་རང་དབང་དེ་ལའང་ཚད་གཞི་ཞིག་ངེས་པར་དུ་ཡོད། ཚད་གཞི་དེ་ལས་བརྒལ་ཏེ་བྱུང་རྒྱུད་དུ་སྨྲས་པའམ། མི་སྒེར་དང་། སྤྱི་ཚོགས་ལ་གནོད་གཞི་ཡོད་པའི་གཏམ་བཤད་སྤེལ་ན། སྨྲ་བརྗོད་རང་དབང་གི་རིན་ཐང་བྲལ་ཞིང་། ཁྲིམས་ལུགས་ཀྱི་སྲུང་སྐྱོབ་མེད་པར་གྱུར་ཏེ་མ་ཉེས་ཁག་གཡོགས་ཀྱི་ཁྲིམས་ལུགས་ཀྱི་གཏིང་འཛིན་འོག་ཚུད་འགྲོ་བ་ཡིན། མ་ཉེས་ཁག་གཡོགས་ཀྱི་ཁྲིམས་ལུགས་ཀྱི་རྩ་བའི་དགོས་དོན་ནི། འགྲོ་བ་མི་ཞིག་གི་མཚན་གནས་དང་གཟི་བརྗིད་ལ་བརྩི་བཀུར་དང་སྲུང་སྐྱོབ་བྱེད་རྒྱུ་དེ་ཡིན་པ་དང་། ཚད་ཡོད་པའི་སྨྲ་བརྗོད་རང་དབང་གི་ཁྲིམས་ལུགས་སྟེ། མ་ཉེས་ཁག་གཡོགས་ཀྱི་ཁྲིམས་ལུགས་གཞི་ལ་བཞག་ཏེ། འགྲོ་བ་མིའི་མཚན་སྙན་གྲགས་ལ་སྲུང་སྐྱོབ་བྱེད་པ་ནི་མ་ཉེས་ཁག་གཡོགས་ཀྱི་རྩ་བའི་དམིགས་ཡུལ་དང་རིན་ཐང་ཡིན།

སྨྲ་བརྗོད་རང་དབང་གི་ཁྲིམས་ལུགས་ཀྱི་ཚད་གཞིའི་ཐད་ལ། རྒྱལ་སྤྱིིིའི་མི་སེར་དང་ཆབ་སྲིད་ཀྱི་ཆིངས་ཡིག་(International Covenant on Civil and Political Rights) ལེའུ་ ༡༩ པའི་དོན་ཚན་ ༣ པའི་ཁྲིམས་ཡིག་གི་ནང་དུ། སྨྲ་བརྗོད་རང་དབང་གི་གླེང་བྱའི་ཁྲོད་དུ། སྨྲ་བརྗོད་རང་དབང་ཉམས་སུ་ལེན་པའི་བརྒྱུད་རིམ་ཁྲོད་མི་གཞན་གྱི་དབང་ཆ་དང་། སྙན་གྲགས་ལ་བརྩི་བཀུར། རྒྱལ་ཁབ་ཀྱི་བདེ་འཇགས་དང་སྒྲིག་སྲོལ། སྤྱི་བའི་འཕྲོད་བསྟེན་དང་ཀུན་སྤྱོད་བཅས་ལ་སྲུང་སྐྱོབ་བྱེད་དགོས་པ་གསལ་བོོར་བཀོད་ཡོད་ལ། དེ་དང་མཉམ་དུ་མི་སྒེར་གྱི་གསང་བ་དང་། མཚན་སྙན་གྲགས་ལ་སྲུང་སྐྱོབ་བྱེད་པར་མ་ཉེས་ཁག་གཡོགས་ཀྱི་ཁྲིམས་ལུགས་ཀྱིས་སྟངས་འཛིན་དང་། ཡང་ན་དྭངས་སྙོམས་སུ་གནས་བར་བྱེད་པ་ཡིན།

འགྲོ་བ་མིའི་ཐོང་ཐང་ཡོངས་ཁྱབ་གསལ་བསྒྲགས་ཀྱི་ལེའུ་ ༡༢ ནང་དུ། མི་སྒེར་གྱི་འཚོ་བ་དང་། ཁྱིམ་ཚང། ཁང་ཁྱིམ་དང་འཕྲིན་བསྐྱལ་སོགས་ལ་སྨྲ་བརྗོད་རང་དབང་གིས་འགལ་རྐྱེན་གང་ཡང་བཟོས་མི་ཆོག དེ་དང་མཉམ་དུ་མི་སུ་ཞིག་གི་མཚན་སྙན་གྲགས་ལ། ཚིག་མཚོན་འདེབས་པ་སོགས་བྱས་མི་ཆོག་ཞིང་། གལ་སྲིད་དེ་དང་དེ་ལྟ་བུའི་མི་འདོད་པའི་ཚུར་རྒོལ་སོགས་བྱེད་སྐབས། བྱ་སྤྱོད་འདི་དག་ལ་ཁྲིམས་ལུགས་ཀྱི་རྒྱབ་སྐྱོར་དང་། སྲུང་སྐྱོབ་བྱེད་བའི་འགན་འཁུར་ཡོད། ཅེས་གསལ།

དེ་བཞིན་ཏུ་ཨ་རིའི་རྩ་ཁྲིམས་བསྐྱར་བཅོས་ལེའུ་དང་པའི་ནང་དུའང་། མི་སེར་གྱིས་སྲིད་གཞུང་གི་སྐོར་ལ་སྐད་ཆ་གང་ཞིག་དང་། རྣམ་འགྱུར་གང་ཞིག་བསྟན་ཅིང་ སྲིད་གཞུང་གིས་དེ་ལ་བཀག་འགོག་བྱས་མི་ཆོག་ཞེས་འཁོད་ཡོད་ལ། དེ་དང་མཉམ་དུ་མི་སུ་དང་ཚོགས་པ་གང་གིས་ཀྱང་རྫུན་བཟོ་དང་དཀྲོག་གཏམ་སྤེལ་ཏེ། མི་གཞན་གྱི་མཚན་སྙན་གྲགས་ལ་གནོད་སྐྱོན་གཏོང་མི་ཆོགཞེས་གསལ།

གོང་གི་ཁྲིམས་གཞི་འདི་དག་ལས་སྨྲ་བརྗོད་རང་དབང་ལ་ཚད་གཞི་ཡོད་པ་དང་། གལ་སྲིད་ཚད་གཞི་དེ་ལས་བརྒལ་ཚེ་མ་ཉེས་ཁག་གཡོགས་ཀྱི་ཁྲིམས་ཀྱི་དྲ་རྒྱ་ཡིས་སྟངས་འཛིན་བྱས་ཆོག་པའི་འགྲོ་ལུགས་གསལ་བར་བསྟན་ཡོད། མ་ཉེས་ཁག་གཡོགས་ཀྱི་ཁྲིམས་ལུགས་ཀྱི་རྩ་བའི་དགོས་དམིགས་གཙོ་བོ་ནི། འགྲོ་བ་ཡོངས་ཀྱི་རྩ་བའི་རང་དབང་གཉིས་སྟེ། སྨྲ་བརྗོད་རང་དབང་དང་། ཆེ་མཐོང་རང་དབང་གཉིས་ཀ་བཏང་སྙོམས་དང་། འདུམ་འགྲིག སྲུང་སྐྱོབ་བཅས་བྱེད་རྒྱུ་དེ་ཡིན་པ་རེད།

དེ་ཡང་དམངས་གཙོའི་གཞུང་ལུགས་ཀྱི་སྨྲ་བརྗོད་རང་དབང་གི་གནོན་ཤུགས་ལས། འགྲོ་བ་མིའི་ཆེ་མཐོང་གི་རང་དབང་དང་། སྤྱི་ཚོགས་ཀྱི་བདེ་འཇགས་ལ་ཤུགས་རྐྱེན་ཐེབས་པར་མི་འཇུག་པར་སྲུང་སྐྱོབ་དང་། འདུམ་འགྲིག་བྱེད་པའི་ཁྲིམས་ལུགས་དེ་ལ་མ་ཉེས་ཁག་གཡོགས་ཀྱི་ཁྲིམས་ལུགས་ཞེས་བརྗོད་པ་ཡིན།

མ་ཉེས་ཀྱི་ཁག་གཡོགས་ཁྲིམས་ལུགས་ཀྱི་མཚན་ཉིད་ལ་མཚོན་ན། སྨྲ་བརྗོད་རང་དབང་གི་ཚད་གཞི་ལས་བརྒལ་བའི་བྱ་སྤྱོད་དེ་ལ་བརྗོད་ཅིང་། ཚད་གཞི་ལས་བརྒལ་བའི་བྱ་སྤྱོད་དེ་དག་ནི་མ་རབ་དང་། འཇིགས་སྣང་སྐུལ་བ། ཉེན་ཁ་ཡོད་པ། ནག་ཉེས་བཟོ་བར་ངན་སྐུལ་བྱེད་པ། གཡེན་དཀྲུག་བྱེད་པ། ཕར་རྒོལ་བྱེད་པ། ཁ་ཡན་སྒྲོགས་པ། སྐུར་བ་འདེབས་པ། ཞེ་འཁོན་ཡོད་པའི་གཏམ་བཤད་སྤེལ་བ། ཆོས་ལུགས་ལ་དགག་པ་རྒྱག་པ། རྒྱལ་དར་བསྲེགས་པ། མང་ཚོགས་ལ་ངན་སྐུལ་རྒྱག་པ། མི་སུ་ཡིན་ལ་མཐོང་ཆུང་དང་དམའ་འབབ་བྱེད་པ། འཁོན་འཛིང་བྱེད་པ་བཅས། ཕ་རོལ་མི་སྒེར་དང་། སྤྱི་ཚོགས། སྲིད་གཞུང་བཅས་ཀྱི་ལས་དོན་ལ་འཐུས་ཤོར་དང་། མཚན་སྨད་བྱེད་པའི་བྱ་སྤྱོད་འདི་དག་ལ་བརྗོད་པ་ཡིན།

མ་ཉེས་ཁག་གཡོགས་ཀྱི་བྱ་སྤྱོད་འདི་དག་སྤེལ་བ་ལ་ཁག་གཉིས་ཀྱི་ལམ་ནས་ཡོང་བཞིན་ཡོད་པ་ཡིན། དེ་ནི་ཡིག་ཐོག་གི་རྩོམ་ཡིག་དང་། རི་མོ་འགྲེམས་སྤེལ་བ། ངག་ཐོག་གི་གཏམ་བཤད་སྤེལ་བ་དེ་གཉིས་ལ་ཟེར། ཡིག་ཐོག་གི་རྩོམ་ཡིག་དང་རི་མོའི་འགྲེམ་སྤེལ་ཞེས་པ་ནི་ཚགས་པར་དང་། དུས་དེབ་སོགས་སུ་མ་ཉེས་ཁག་གཡོགས་ཀྱི་མཚན་ཉིད་ཚང་པའི་ཚིག་མཚོན་གྱི་རྩོམ་ཡིག་འབྲི་བ་ལ་གོ་ཞིང་། ངག་ཐོག་གི་གཏམ་བཤད་ཀྱང་དེ་བཞིན་ཏུ་སྨྲ་བརྗོད་རང་དབང་གི་ཚད་གཞི་ལས་ཡོངས་སུ་བརྒལ་བའི་གཡེན་དཀྲུག་དང་། ཞེ་འཁོན་ཡོད་པའི་གཏམ་བཤད་དག་བརྙན་འཕྲིན་དང། རླུང་འཕྲིན། སྐད་འཕྲིན། ཡང་ན་གཟུགས་རིས་དང་རྣམ་འགྱུར་བཅས་རྒྱུད་དེ་བརྒྱུད་བསྒྲགས་བྱེད་པ་དེ་ལ་ཟེར་ཞིང་། འདི་ལྟར་འགྲེམ་སྤེལ་དང་རྒྱུད་བསྒྲགས་བྱས་པའི་ཉེར་ལེན་ལས། རྒྱལ་ཁབ་ཀྱི་བདེ་འཇགས་ལ་གནོད་སྐྱོད་དང་། མི་སྒེར་གྱི་མཚན་སྙན་གྲགས་ལ་བར་ཆད་བཟོས་ཏེ། གཞུང་སྒེར་གཉིས་ཀ་འཇིགས་སྣང་གི་གནས་སུ་ཕར་རྒོལ་བྱེད་པའི་བྱ་སྤྱོད་འདི་ལ་མ་ཉེས་ཁག་གཡོགས་ཀྱི་བྱ་སྤྱོད་ཞེས་བརྗོད་ཆོག ཞེ་འཁོན་ཡོད་པའི་གཏམ་གྱི་སྐོར་ལ་མཉམ་འབྲེལ་རྒྱལ་ཚོགས་ཀྱི་སྤྱི་ཁྱབ་དྲུང་ཆེ་ཨན་ཐཱའོ་ནེ་རྒ་ཏྲེར་གྱིས་འདི་ལྟར་གསུངས་ཡོད།

སྨྲ་བརྗོད་རང་དབང་ཁ་ལ་ཁྱེར་ནས་སྲིད་གཞུང་དང་། སྤྱི་སྒེར་གྱི་གནས་སྟངས་ལ་མི་ལྟ་བར། ཆོལ་ཁ་དང་ཆོས་ལུགས་ཀྱི་གྲུབ་མཐའ་མི་གཅིག་པ་དང་། མི་རིགས་དང་ཕོ་མོ་མི་གཅིག་པ། ལོ་ན་མི་གཅིག་པ་སོགས་རྒྱུ་མཚན་དུ་བྱས་ནས། གཅིག་གིས་གཅིག་ལ་ཞེ་འཁོན་ཡོད་པའི་གཏམ་བཤད་སྤེལ། ཚིག་མཚོན་སུན་བཙུར་བཟོས། སྐུར་འདེབས་བྱེད་བཞིན་ཡོད་པ་འདི་དག་ཚང་མས་དམངས་གཙོའི་རིན་ཐང་དང་། སྤྱི་ཚོགས་ཀྱི་བརྟན་བརླིང་། རྒྱལ་ཁབ་ཀྱི་ཞི་བདེ་བཅས་ལ་གནོད་སྐྱོན་བཟོ་བཞིན་ཡོད་པ་མཉམ་འབྲེལ་རྒྱལ་ཚོགས་ནས་གསལ་ཁ་འདོན་རྒྱུ་ཡིན་ཞེས་བཤད་ཡོད།

གོང་གི་ཁྲིམས་གཞི་འདི་དག་ལས་ང་ཚོས་གསལ་བོར་ཤེས་བ་ནི། སྨྲ་བརྗོད་རང་དབང་ཞེས་པ་ནི་ཁ་ལ་ཡོང་སྟངས་བསྒྲགས་རྒྱུ་དང་སེམས་ལ་ཡོང་སྟངས་མངོན་རྒྱུ་ཞིག་མ་ཡིན་པར། སྨྲ་བརྗོད་རང་དབང་ལ་རང་དབང་གི་ས་མཚམས་ཆུ་མཚམས་ཀྱི་ཚད་གཞི་ཡོད་པ་དང་། ཡང་དག་པ་དང་དྲང་བདེན་གྱི་ཁྱད་ཆོས་ཡོད་པ་ཞིག་ཡིན་པ་གསལ་བོ་རེད།

ཁྲིམས་དོན་ཁ་ཤས་ཤིག་དཔེ་མཚོན་དུ་བཀོད་ན།

ཉེན་ཁ་ཡོད་པའི་ཡིག་ཆ་འགྲེལ་སྤེལ་བྱས་པའི་སྐོར་ལ།

ཁྲིམས་དོན་འདི་ནི་འཛམ་གླིང་འཁྲུག་ཆེན་དང་བའི་སྐབས། ཨ་མེ་རི་ཀར་བྱུང་བའི་གྱོད་དོན་ཞིག་ཡིན། གྱོད་དོན་འདི་ནི་དམག་འཁྲུག་ལ་ངོ་རྒོལ་བྱེད་མཁན། ཨ་རི་བ་འཆར་གཤིན་ཁཱི་ཡིས། ཨ་རི་སྲིད་གཞུང་གིས། འཛམ་གླིང་འཁྲུག་ཆེན་དང་པའི་ཐོག་དམག་མི་བསྡུ་སྐོང་བྱེད་སྐབས། ཁོ་བོས་མང་ཚོགས་ལ་དམག་མི་བསྡུ་སྐོང་བྱེད་པར་རྒྱབ་སྐྱོར་མེད་པའི་རྣམ་འགྱུར་བསྟན་ཞིང་། དེ་ལ་ངོ་རྒོལ་བྱེད་པའི་ཡིག་ཆ་འགྲེལ་སྤེལ་བྱས། སྐུ་ཞབས་གཤིན་ཁཱི་ཡིས་ཡིག་ཆ་དེ་ལྟར་འགྲེམ་སྤེལ་བྱེད་པའི་རྒྱུ་མཚན་ནི། ཁོང་གིས་ཁོང་ལ་སྨྲ་བརྗོད་རང་གི་ཐོབ་ཐང་ལོངས་སུ་སྤྱོད་པའི་དབང་ཆ་ཡོད་པར་བཤད་ཡོད་ཀྱང་། ཁོང་གི་བྱ་སྤྱོད་དེ་ནི་རྒྱལ་ཁབ་གྱི་བདེ་འཇགས་ལ་ཉེན་ཁ་ཡོད་པའི་བྱ་སྤྱོད་ཞིག་ཏུ་བརྩི་ཏེ། སྐུ་ཞབས་གཤིན་ཁཱི་བཙོན་ཏུ་བཅུག རྒྱལ་ཁབ་གྱི་བདེ་འཇགས་ལ་ཉེན་ཁ་ཡོད་པའི་ཡིག་ཆ་འགྲེམ་སྤེལ་བྱས་པ་འདི། སྨྲ་བརྗོད་རང་དབང་གི་ཁྲིམས་ཀྱི་གཞི་འཛིན་ས་མེད་པར། མ་ཉེས་ཁག་གཡོགས་ཀྱི་ཁྲིམས་ཀྱི་དྲ་རྒྱའི་ནང་ཚུད་པ་འདི་ལྟར་རེད།

ཁ་ཡན་དང་སྐུར་འདེབས་བྱས་པའི་སྐོར།

ཁྲིམས་དོན་འདི་ ༢༠༡༨ ལོར་སྲིད་སྐྱོང་བློ་བཟང་སེང་གེ་གཙོ་བོའི་བཀའ་ཤག་གིས། ཨ་རི་དོན་གཅོད་སྤེན་པ་ཚེ་རིང་ལ་མ་ཉེས་ཁག་གཡོགས་བྱས་པའི་གྱོད་དོན་དེ་རེད། གྱོད་དོན་དེ་བྱང་ཨ་རི་སྐུ་ཚབ་དོན་གཅོད་སྤེན་པ་ཚེ་རིང་ལ། སྲིད་སྐྱོང་བློ་བཟང་སེང་གེ་གཙོ་བོའི་བཀའ་ཤག་གིས། སྐུ་ཞབས་སྤེན་པ་ཚེ་རིང་ལགས་ཨ་མེ་རི་ཀར་ཕྱིན་ཏེ། དོན་གཅོད་ཀྱི་ལས་ཀ་བྱས་ཏེ་ལོ་གཅིག་ལས་མ་འགོར་བར་གནས་དབྱུང་བཏང་ཞིང་། གནས་དབྱུང་བཏང་བ་དང་མཉམ་དུ། སྐུ་ཞབས་སྤེན་པ་ཚེ་རིང་གིས་བྱང་ཨ་རིའི་དོན་གཅོད་ཀྱི་ལས་ཀ་མི་འཇོན་ཚུལ་དང་། འཐུས་ཤོར་དུ་ཕྱིན་ཡོད་ལུགས། ཡིད་ཆེས་མེད་ལུགས་ཀྱི་གཏམ་བཤད་དང་ཡིག་ཆ་འགྲེམ་སྤེལ་བྱས། སྲིད་སྐྱོང་བློ་བཟང་སེང་གེ་གཙོ་བོའི་བཀའ་ཤག་གིས་དེ་ལྟར་ཡིག་ངག་གཉིས་ཀྱིས་ལམ་ནས་གཏམ་མཆལ་སྤེལ་བ་འདིས། སྐུ་ཞབས་སྤེན་པ་ཚེ་རིང་གི་མཚན་སྙན་གྲགས་ལ་གནོད་སྐྱོན་ཐེབས་ཡོད་པ་རེད།

༢༠༡༩ ལོར་བཙན་བྱོལ་བོད་མིའི་ཆེས་མཐོ་ཁྲིམས་ཞིབ་ཁང་ནས། བློ་བཟང་སེང་གེ་གཙོ་བོའི་བཀའ་ཤག་གི་བྱ་སྤྱོད་དེ་ནི་ཁུངས་སྐྱེལ་མེད་པ་དང་། གནས་ཚུལ་ཡོང་ཁུངས་ངེས་བརྟན་མེད་པར། ཁ་ཡན་སྒྲོགས་པ་ཁོ་ན་ཡིན་པར་ར་སྤྲོད་བྱུང་ཏེ། སྤྱི་ཚོགས་ནང་དངོས་བདེན་མ་ཡིན་པའི་གནས་ཚུལ་ཁྱབ་འགྲེམས་བྱས་བའི། ཐག་གཅོད་ཀྱི་བཅད་ཁྲ་ཁྱབ་བསྒྲགས་གནང་ཡོད། འདི་ལས་སྨྲ་བརྗོད་རང་དབང་ནི་དངོས་ཐོག་བདེན་འཚོལ་དང་། སྤྱི་བསམ་ཡོད་པ། ཡ་རབས་སྤྱོད་བཟང་གི་ཁྱད་ཆོས་ཡོད་པའི་སྨྲ་བརྗོད་ཞིག་ཡིན་དགོས་པ་ལས། ཁུངས་ལུང་གང་ཡང་མེད་པའི་གཏམ་འཆལ་སྤེལ་ན་ང་ཚོའི་ཁྲིམས་ཁང་གིས་ཀྱང་ངོས་ལེན་མི་བྱེད་པ་གསལ་བོ་རེད།

མཐའ་དོན།

སྨྲ་བརྗོད་རང་དབང་ནི་ང་ཚོ་འགྲོ་བ་ཡོངས་ལ་མེད་དུ་མི་རུང་བའི་བརྩི་བཀུར་བྱེད་དགོས་པའི་ཐོབ་དབང་ཞིག་དང་། དམངས་གཙོ་སྲིད་གཞུང་གི་ངོམས་ཆོག་པ་དང་། ཁྲིམས་ཀྱི་སྲུང་སྐྱོབ་ཡོད་པའི་སྒྲིག་སྲོལ་ཞིག་ཡིན་པའང་གསལ་བོ་རེད། རེད་དེ་སྨྲ་བརྗོད་རང་དབང་གི་རང་དབང་དེ་ནི་ཚད་གཞི་ཡོད་པའི་རང་དབང་ཞིག་ལས། གལ་སྲིད་ཚད་གཞི་དེ་ལས་བརྒལ་ཚེ་སྨྲ་བརྗོད་རང་དབང་ལ་སྨྲ་བརྗོད་རང་དབང་གི་རིན་ཐང་དེ་མེད་པར་ཆགས་པ་མ་ཟད། ཉེས་བ་བསགས་པའི་རྒྱུ་རུ་འགྲོ་བ་ཡིན། དེ་དུས་མ་ཉེས་ཁག་གཡོགས་ཀྱི་ཁྲིམས་ཀྱིས་ལྕགས་ཀྱི་ཨ་ལོང་གིས་བསགས་བའི་ཉེས་བ་རྣམས་ཁྲིམས་ཀྱི་མདུན་ས་ནས་རེ་རེ་བཞིན་གཅུན་པར་བྱེད།

སྨྲ་བརྗོད་རང་དབང་གི་རིན་ཐང་ཆག་དགོས་བའི་རྒྱུ་མཚན་གཙོ་བོ་ནི། འགྲིག་གིན་མེད་པ་ལ། འགྲིག་གིན་མི་འདུག་ཞེས་ལབ་ན་མ་ཆོག་པ་ཞིག་མིན་པ་དང་། འགྲིག་གིན་ཡོད་པ་ཞིག་ལ་འགྲིག་གིན་མི་འདུག་ཞེས་བརྗོད་ན་དེ་བས་མི་ཆོག སྨྲ་བརྗོད་རང་དབང་གི་ཁྱད་ཆོས་གཙོ་བོ་ནི་བདེན་པ་ལ་རྒྱབ་སྐྱོར་དང་། རྫུན་མ་དག་མཐར་བྱས་ཤིང་དྲང་གཏམ་དང་། ཡ་རབ་སྤྱོད་བཟང་། ལྷག་བསམ་ཡོད་པའི་གཏམ་བཤད་དང་། རྩོམ་ཡིག མཚོན་རྟགས་བཅས་ལ་སྤེལ་བ་ལ་གོ་ཞིང་། དེ་བཞིན་ཏུ་རང་གི་སྤེལ་བའི་མཇུག་འབྲས་ལས་ཕ་རོལ་སྤྱི་ཚོགས་དང་། མི་སྒེར་ལ་ཕན་ཐོགས་ཞིང་ཡར་རྒྱས་ཀྱི་ནུས་བ་ཡོད་པ་ཞིག་ཏུ་འཛུགས་བསྐྲུན་བྱེད་རྒྱུ་ནི་སྨྲ་བརྗོད་རང་དབང་གི་རྩ་བའི་དགོས་དམིགས་ཡིན་པ་གསལ་བོ་རེད།